Мф 24
24
24 ГЛАВА
1-2 Храмым шалатыме нерген ончылгоч каласымаш. 3-14 Орлыкын тӱҥалмыже. 15-28 Кугу йӧсланымаш. 29-31 Айдеме Эрге толмо нерген. 32-35 Смокван туныктымыжо. 36-44 Кече ден шагатше пале огыл. 45-51 Ӱшанле тарзе ден йӧрдымӧ тарзе.
1Храм гыч Иисус лектын каен. Храм оралте-влакым ончыкташ манын, тунемшыж-влак Тудын деке лишемыныт. 2Иисус нунылан каласен: «Чыла тидым ужыда? Тыланда чынак ойлем: тыште кӱ ӱмбалан кӱ огеш код, чыла шалатыме лиеш».
3А Иисус Елеон курык ӱмбалне шинчыме годым Тудын деке тунемшыж-влак посна миеныт да йодыныт: «Мыланна каласе, кунам тиде лиеш? Тыйын толметым да кызытсе курымын пытымыжым могай палдарыше пале ончыкта?»
4Иисус нунылан вашештен: «Шекланыза, нигӧат тендам ынже ондале. 5Шукын Мыйын лӱмем дене толыт да ойлаш тӱҥалыт: ”Мый Христос улам”. Шукыштым ондалат. 6Тыгак сар йӱкым да сар нерген увер-влакым колыда. Шекланыза, ида лӱд, чыла тиде лийшаш, но тиде але мучаш огыл. 7Калык ӱмбаке калык кынелеш, кугыжаныш ӱмбаке – кугыжаныш, верын-верын шужымаш, мор да мланде чытырналтмаш лиеш. 8Тиде чылажат – орлыкын#24:8 «Орлык»: грекла возымым «азам ыштыме годсо орлык» семын умылыман. Тыгак – Мк 13:8. тӱҥалтышыже. 9Тунам тендам орландараш кучат да пуштедаш тӱҥалыт, Мыйын лӱмемлан кӧра тендам чыла калык ужмышудымо лиеш. 10Тунам шукышт кораҥыт, икте-весым кучыктен пуаш тӱҥалыт, икте-весым ужмышудымо лийыт. 11Шояк пророк-влак ятыр лектыт да шукым ондалат. 12Закондымылык чыла вере шукемеш, садлан шукыштын йӧратымашышт йӱкша. 13Но мучаш марте чытыше утаралтеш. 14Кугыжанышын тиде Поро Увержым тӱня мучко каласкалат, тудыжо чыла калыклан таныклымаш лиеш, вара мучаш толеш.
15Тыгеракын, Даниил пророкын каласыме гае йырнык пустаҥмашым#24:15 Дан 9:27. святой верыште ужмекыда – лудшо тек умыла – 16Иудейыште улшо-влак тек курыкышко куржыт. 17А кӧ леведыш ӱмбалне, тек шке пӧртшӧ гыч иктаж-мом налаш ок воло. 18Кӧ пасушто, тек шкенжын вургемжым налаш мӧҥгеш ок пӧртыл. 19Ойго лиеш тудо кечылаште мӱшкыран ӱдырамаш ден чызым пукшышо ава-влаклан! 20Тыланда телым але шуматкечын куржаш ынже логал манын, Юмым сӧрвалыза.
21Тунам тугай кугу азап лиеш, могайже тӱня тӱҥалтыш гыч кызыт марте лийынжат огыл да огешат лий. 22Тиде кече-влак огыт кӱчыкемдалт ыле гын, иктат утлен ок код ыле, но ойырен налме еҥ-влаклан кӧра тиде кече-влак кӱчыкемдыме лийыт. 23Тунам иктаж-кӧ тыланда ”Теве тыште Христос” але ”Тушто” манеш гын, ида ӱшане. 24Вет шояк христос ден шояк пророк-влак лектыт да, лиеш гын, ойырен налме-влакымат ондалаш манын, палдарыше кугу пале ден чудо-влакым ыштат. 25Теве Мый тыланда ончылгоч ойлышым. 26Тыгеже, тыланда ”Тудо ир мландыште” маныт гын, ида лек, ”Теве Тудо кӧргӧ пӧлемыште” маныт – ида ӱшане. 27Кузе волгенче эрвелне волгалтеш да касвелнат коеш, Айдеме Эргын толмыжат тугаяк лиеш. 28Кушто колышо кап лиеш, тушко курныж-влак погынат.
29Тиде пагытыште лийше азап деч вара тунамак кече пычкемышалтеш, тылзе волгалтарымыжым чарна, шӱдыр-влак кава гыч камвозыт да пылпомыш куат-влак вер гыч тарванат. 30Тунам каваште Айдеме Эргын палдарыше палыже коеш да, кавасе пыл ӱмбалне кугу куат да чап дене толшо Айдеме Эргым ужын, мландӱмбалсе чыла калык шорташ тӱҥалеш.#24:30 Дан 7:13. 31Тудо Суксыж-влакым кугу йӱкан пуч шергылтме годым колта, нунышт тӱнян ныл могыржо гыч, каван ик тӱржӧ гыч тӱҥалын вес тӱрышкыжӧ шумеш, Тудын ойырен налме еҥже-влакым погат.
32Смоква пушеҥге деч тунемза. Кунам тудын укшлаже ылыжыт да лышташым колтат, тунам паледа: кеҥеж лишемеш. 33Тыштат тыгак. Кунам ойлымемын шукталтмыжым ужыда, палыза: тудо лишнак, омса воктенак. 34Тыланда чынак ойлем: чыла тиде лиймешке тиде тукым ок пыте. 35Кава ден мланде пытат, но Мыйын шомакем огеш пыте.
36Тиде кече да шагат кунам толын шуэш, нигӧ ок пале: пылпомышсо Суксо-влакат огыт пале, тидым ик Ачам гына пала. 37Кузе Нойын илыме кечылаштыже лийын, Айдеме Эрге толмо годымат тугак лиеш. 38Вӱд ташлыме деч ончыч Нойын ковчегыш шичме кечыже марте еҥ-влак кочкыныт, йӱыныт, ӱдырым налыныт, марлан лектыныт. 39Вӱд ташлымаш тӱҥалмешке да чылаштым пытарымешке, мо лийшашым умылен огытыл. Айдеме Эрге толмо годымат тыгак лиеш. 40Тунам пасушто кок еҥ лиеш, иктыже налалтеш, весыже кодеш. 41Кок ӱдырамаш кидвакш дене йоҥышта, иктыже налалтеш, весыже кодеш.
42Тыгеракын, шекланен шогыза, Господьдан толмо жапшым те огыда пале вет. 43Но тидым те паледа: могай йӱд орол годым вор толшашым пӧрт оза пала гын, ок мале да пӧртышкыжӧ кӱнчен пураш ок пу ыле. 44Тугеже теат ямде лийза, вет кунам огыда вучо, Айдеме Эрге тунам толеш.
45Моло тарзым вуйлаташ да нунылан шке жапыштыже кочкышым пуаш озан шогалтыме ӱшанле да ушан тарзыже кӧ лиеш? 46Толмекыже, тиде тарзын кӱлеш семын ыштымыжым оза ужеш гын, тарзыже пиалан. 47Тыланда чынак ойлем: уло погыжым ончаш тудым шогалта. 48А осал тарзе шӱмыштыжӧ ”Мыйын озам эше ок тол” шона 49да моло тарзым кыраш да йӱшӧ-влак дене пырля кочкаш-йӱаш тӱҥалеш гын, 50озаже вучыдымо кечын да палыдыме шагатыште толын лектеш. 51Оза тудым покшеч руалын шелеш да сайын кояш тӧчышӧ-влакын ужшаш орлыкыштым ужыкта. Тушто шортмаш да пӱйым пурмаш лиеш.
ទើបបានជ្រើសរើសហើយ៖
Мф 24: УС
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Библийым кусарыше институт, Хельсинки 2007
