ག་ལ་ཏི། 4

1ཇི་གི་ཡེག་པེ་དེན་ཐ་ཤོ་ ཐོབ་ཐང་ཉོང་ཁཱན་ཁེ་པ་ ཝག་ཙ་ཨ་ཉི་ ཆོ་ལེ་གང་ཀ་ ཐམས་ཅན་རང་ རོ་ཀ་གིན་ཐཱན་རང་གི་ནེ་བུ་ རོག་ཤོ་ གཡོག་པ་ད་བུ་ཤ་གི༌ལ། 2རོ་ཀ་ཨ་པ་གི་ ཀག་ཉི་ཐ་ཁཱན་ དུས་ཙུན་མ་རེན་པ་སག་པུ་ རོག་ཁེ་པ་ གོད་ཁཱན་བ་ཀ་ཕརའ་ཁེ་ ཆོ་ལེ་ཁེ༌ལེ། 3ཨུ་ཉུ་པུརུས་ཀིན་ཨ་ཉི་ ཨ་ཧ་བ་བུ་ ཐུགས་ཉིད་ག་ མ་ཕུག་པ་ཨ་ཉི་ ཆོ་ལེ་གང་ཀ་ ཨོ་ཐ་འཛམ་གླིང་དབང་ཁཱན་ རྣམ་ཤེས་བ་ཀ་ ཕརའ་ཁེ་ཆོ༌ཝ།

4དག་པ་ཀབ་ཉི་ དུས་ཙུན་ཕྲིག་ཀིན་རེན་པ་ཀབ་ཉི་ དཀོན་མཆོག་གི་ རོ་ཀ་སྲས་ཀུན་ཏི་ཉི་གནང༌མ། རོག་ཤོ་ མེ་ཝག་ཙ་ག་ ཐུང་ཀེ་ཨ་ཉི་འཁྲུངས༌མ། ཉི་བཀའ་ཁྲིམས་ག་ཕརའ་ཁེ་ བཞུགས་ཉི་གནང༌མ། 5ཧང་ཡ་དག་ནེ་ལ་ ཨ་ཧ་བ་ དཀོན་མཆོག་ག་ སྲས་སྲས་མོ་ རིན་ཆེན་དག་པ་གི་ བཀའ་ཁྲིམས་ག་ ཕརའ་ཁེ་ཆོ་ཁཱན་བ་ ཤོག་ཉི་གནང་མེ་དེན་གེ་ བྱོན་མ་གི༌ལ། 6ན་ཧ་བ་ཤོ་ སྲས་སྲས་མོ་བ་ གི་ཝ་ཨ་དེན་གེ་ དཀོན་མཆོག་གི་ རོ་ཀ་སྲས་ག་ཐུགས་ཉིད་ ཨ་ཧ་སེམས་ནང་ཀ་བཞུགས་ཉི་ གནང་མེ་དེན་གེ་ ཀུན་ཏི་ཝ་གི༌ལ། ཉི་ཨོ་ཉ་ཐུགས་ཉིད་གི་ དཀོན་མཆོག་ག་ཏཱན་ ཇི་གི་ཕང་ཁཱན་ ཡབ་དཀོན་མཆོག་དག་ཉི་ ཞུན༌ཅ། 7ཉི་ཨོམ་ ན་ཧ་བ་ཤོ་ གཡོག་པ་མང་གི་ཝ་ དཀོན་མཆོག་ རོག་ཏེན་ག་སྲས་སྲས་མོ་གི༌ལ། ཉི་ན་ཧ་བ་ཤོ་ རོ་ཀ་སྲས་སྲས་མོ་ གི་ཝ་ཨ་དེན་གེ་ དཀོན་མཆོག་གི་ རོ་ཀ་སྲས་སྲས་མོ་བ་ཀ་དེན་གེ་ ཐ་ཁཱན་ཁེ་པ་ ན་ཤི་ཉོང༌པེ༎

ག་ལ་ཏི་ག་སོ་ངོ་བ༌ཀ་དེན༌གེ་ པ༌ཝལ༌གི་ སྡུག༌བསྔལ་ཨ༌ཉི་གནང༌མ༌ལ།

8གོ་མ་ ན་ཤི་དཀོན་མཆོག་ མ་མཇལ་བེ་གོ་མ་ ན་ཧ་བ་ཤོ་ ལྷ་ལྷ་མོ་བ་ཀ་ ཟ་པ་གི་ཝ་ཆོ༌ཝ། རོག་ཏེ་བ་ཤོ་ དཀོན་མཆོག་མང་གི། 9ཉི་ཨོམ་ ན་ཤི་ དཀོན་མཆོག་མཇལ་བ༌ཅ། (ཉི་ན་ཧ་བ་ཀེ་ལག་ཉི་ དཀོན་མཆོག་གི་ ན་ཧ་བ་མཁྱེན༌ཅ།) དག་པ་ཀབ་ཉི་ ན་ཧ་བ་ ཧང་ཨ་ཉི་ ཤུག་དང་ ཁུངས་ད་སུ་རང་མ་ཁཱན་ རྣམ་ཤེས་ག་དབང་ཚད་བ་ཀ་ བཱརང་ཀ་ཏཱན་ ལོག་ཉི་དིན་ཅ་ཡ། ཉི་ཨོམ་ཆང་རང་ ན་ཧ་བ་ རོག་ཏེ་བ་ཀ་ ཟ་པ་རི་ལེ་ག་ སེམས་ཨན་ཅ་སྨོ། 10ན་ཤི་ནོང་ཚེ་བང་དང་ ལ་ཉི་ཚེ་བང་ ཉི་དུས་ཙུན་ཚེ་བང་དང་ ཉིང་ཚེ་བང་ཙི་ཉི་ དཀོན་མཆོག་གེ་ བྱིན་རླབས་ཞུ་ལེ་གོད༌ལ། 11ཇི་གི་ ན་ཧ་པོང་ཀ་ དཀའ་ཝ་ཅཱད་ཉི་ ལའི་ཨ་ཁཱན་བ་ ཁུངས་ཧང་རང་མ་ཝ་རི་ན་དག་ཉི་ མི་ཉི་ ཇང་ན་ཧ་ཀོར་གེ་ སྡུག་བསྔལ་ཨ་ལེ་ཨུ་ན། 12ཇི་གི་ ན་ཧ་ཞུན་ཅ་ ཡུང་ཟི་བ་ ཇང་བུ་ ན་ཧ་བ་ད་བུ་ ཆོ་ཝ་ཨ་དེན་གེ་ ན་ཧ་བ་བུ་ ཇང་ད༌བུ༌རང༌རི།

ཇི་གི་ ན་ཧ་གོ་དང་པ་ འཐེན་ལེག་པུ་ བཤད་པ་ཀབ་ཉི་ ན་ཤི་ ཇ་ག་མ་ལེག་པ་མ་ཨན་ཤི། 13ཇང་མར་བ་ཨ་དེན་གེ་ ཇི་གི་གོ་དང་པ་ ན་ཧ་ཏཱན་ འཐེན་ལེག་པུ་བཤད་པ་གི་ལ་དག་ཉི་ ན་ཤི་སེན༌ཅ། 14ཇང་མར་བ་ཨ་དེན་གེ་ ན་ཧ་བ་ གནམ་མེད་ས་མེད་ དཀའ་ཝ་ཅཱད༌པ། ཨོ་ཉེ་རང་གི་ནེ་བུ་ ན་ཤི་ ཇང་མ་ཐོག་པཱན་ མ་ཟེས་པཱན་མ་ཨན་ཤི། ལག་ཏང་ ཇང་དཀོན་མཆོག་ག་ཞིང་ཁམས་ག་འཐེན་པ་དང་ ཁིརིས་ཡི་ཤུ་ རོག་ཏེན་གི་ཝ་པུརུས་ཀིན་ཨ་ཉི་ ན་ཤི་ཇ་ག་གནམ་མེད་ས་མེད་ ལེག་པུ་ཨ༌ཝ། 15ན་ཧ་བ་ གནམ་མེད་ས་མེད་ ཤོ་ནང་ཕེ་ཝ་ཆོ༌ཝ། ཉི་ཨུ་ཉུ་ཤོ་ ཨོ་ག་ཏཱན་ཇོང་མ་ཡ། ཨུ་ཉུ་གང་ཀ་ ན་ཤི་ཨ་ལེ་རེ་བ་གི་ནེ་ལ་ ན་ཤི་ ན་ཧ་མིང་བུ་ཇེག་ཐཱན་ ཇ་ག་ཏཱན་ ག་ཝ་ཨོ་ཕེ་དག་ཉི་ ཇི་གི་སེན༌ཅ། 16ཇི་གི་ ན་ཧ་ཏཱན་ དེན་པ་ཡེག་པ་ཨ་དེན་གེ་ ཇང་ཤོ་ ཨོམ་ ན་ཧ་དགྲ་བྱང་ཕིཤི་ རི་ཝ་གི་ལ་སྨོ།

17ན་ཧ་བ་ ཤོ་ནང་ཕེ་ལེ་བི་ལེ་དེན་གེ་ གནམ་མེད་ས་མེད་ ཙ་དྲེག་ཁཱན་ སློབ་དཔོན་རྫུས་མ་བ་ཀི་ ན་ཧ་ཕཱན་ཏོག་པེ་དེན་གེ་ ཨན་ཅ་མང་གི། དག་པ་ཀབ་ཉི་ ན་ཤི་ རོག་ཏེ་བ་ཀི་ ཡེག་ཁཱན་ཆཱས་ ཉཱན་ཅེན་དག་པ་གི་ རོག་ཏེ་བ་ཀི་ ན་ཧ་བ་ ཇང་གེ་ བེརེ་ཉི་བུ་ལེ་གོད༌ལ། 18ན་ཤི་བཱརའ་ག་ ལེག་པུ་ཨ་ལེ་ག་ སེམས་ཨ་ཁཱན་ཁེ་པ་ ལེག་པུ་གི༌ལ། དག་པ་ཀབ་ཉི་ ཙོ་རང་ ཇང་ན་ཧ་བ་ཀབ་ཉི་ མ་ལཱན་ཆོ་ལེ་གང་ཀ་ ན་ཤི་ལེག་པུ་ཨ་ལེ་ཁེ༌ལེ།

19ཇི་གི་ཕང་ཁཱན་ ཝག་ཙ་བ་ ན་ཧ་བ་ཀ་ཚེ་ཁེ་པ་ ཁིརིས་གི་ མ་ཕུང་མ་སག་པུ་ ཝག་ཙ་སིང་མེ་གང་ཀ་ ཨ་མ་ནང་དོག་པ་ད་བུ་རང་ ཇང་ནང་དོག་པེ་གང༌ཅ། 20ཇང་ཨོ་མ་ ན་ཧ་པོང་ཀ་ ཆོ་ཝ་གི་ནེ་ལ་ དྲིག་པེ་ཆོ༌ཝ། ཧང་ཡ་དག་ནེ་ལ་ ཇི་གི་ཇམ་པུ་ཨ་ཉི་ ན་ཧ་བ་ཀབ་ཉི་ ཆཱས་ཨ་ལེ་ཆོ༌ཝ། ཨོ་ཉེ་རང་གི་ནེ་བུ་ ཇང་ན་ཧ་ཀོར་གེ་ ངག་ཉི་ཆོ་ཝ༌ཅ༎

ཧ་གར་དང་ས་ར།

21བཀའ་ཁྲིམས་ག་ཕརའ་ཁེ་ ཆོ་ལེ་གོད་ཁཱན་ སོ་ངོ་བ་ཀ་ ཇི་གི་ཆཱས་ཐུར་ཇི་མེ་ ཧང་ བཀའ་ཁྲིམས་གེ་ ཧང་ཤོན་ཅ་གི་ལ་སྨོ་ ན་ཤི་སེ་ལུ་མཱན་ཅ་སྨོ། 22གསུང་རབ་གེ་ཤོན་ཅ་ ཨ་བཱརའ་ཧམ་ག་ ཟ་ཉིག་ཙིང་ཆོ་ཝ་དག༌ཉི། ཐུར་ཤོ་ རོ་ཀ་མེ་ཝག་ཙ་ག་ གཡོག་མིན་གེ་ གི་ཝ་ཆོ༌ཝ། ཉི་ཐུར་ཤོ་ ཟ་པ་མང་གི་ཁཱན་ མེ་ཝག་ཙ་གེ་ གི་ཝ་ཆོ༌ཝ། 23རོ་ཀ་ཕརའ་ཁེ་ གཡོག་ཨ་ཁཱན་མེ་ཝག་ཙ་གི་སིང་ཁཱན་ ཝག་ཙ་ཁེ་པ་ རང་བཞིན་གེ་ཨ་ཉི་ ཀེ་ཝ་ཆོ༌ཝ། དག་པ་ཀབ་ཉི་ ཟ་པ་མང་གི་ཁཱན་ མེ་ཝག་ཙ་གི་སིང་ཁཱན་ ཝག་ཙ་ཁེ་པ་ དཀོན་མཆོག་གི་ དབུ་མནའ་བཞེས་ཝ་དང་ཏུ་ཉི་ སིང་མ་གི་ཝ་ཆོ༌ཝ།

24ཉི་ཨོམ་ ཨོ་ཐ་མེ་ཝག་ཙ་ཉིག་ཙིང་གི་ དཀོན་མཆོག་ག་ འགན་རྒྱ་ཉིག་ཙིང་ག་ དཔེ་གེན་ཅ་གི༌ལ། ཟ་པ་ཨ་ཉི་ཆོ་ཁཱན་མེ་ཝག་ཙ་ ཧ་གར་གི་ ཕུ་སི་ནའི་#4:24 སི་ནའི་དག་ཁཱན་ཤོ་ ཨ་ར་བི་ཡ་ག་ ས་ཏོང་པ་ནང་ཀ་ཆོ་ཁཱན་ ཕུ་ཐུར་ག་མིང་གི༌ལ། ཉི་ཨོ་ཐ་ཕུ་ཐུང་ཀ་ དཀོན་མཆོག་གི་ ཨིས་རེལ་ག་ སོ་ངོ་བ་ཀ་དེན་གེ་ མོ་ས་ག་ཏཱན་ བཀའ་ཁྲིམས་སེ་པ་གནང་མ༌ལ།ག་ཐུང་ཀ་ དཀོན་མཆོག་གི་ འགན་རྒྱ་མཛད་ཁཱན་ག་ཏཱན་ གེན་ཅ་གི༌ལ། ཕུ་སི་ནའི་གེ་ཨ་ཉི་ སོ་ངོ་བཀའ་ཁྲིམས་ག་ ཟ་པ་རི་ཝ་གི༌ལ། 25ཉི་ཨོ་མ་ཆོ་ཁཱན་ ཡ་རུ་ཤ་ལེམ་ཁེ་པ་ ཨ་ར་བི་ཡ་ག་ཆོ་ཁཱན་ ཕུ་སི་ནའི་ད་བུ་ཐུར་གི༌ལ། ཧང་ཡ་དག་ནེ་ལ་ ཡ་རུ་ཤ་ལེམ་དང་ ཉ་ག་ཆོ་ཁཱན་སོ་ངོ་ ཐམས་ཅན་རང་ ཟ་པ་རི་ཉི་ཆོ་ཝ༌ཅ། 26དག་པ་ཀབ་ཉི་ ག་ཞིང་ཁམས་ག་ཆོ་ཁཱན་ ཡ་རུ་ཤ་ལེམ་ཁེ་པ་ ཟ་པ་རི་ཝ་མཱན༌ཅ། ཉི་ཨུ་ཉུ་ཤོ་ ཨ་ཧ་ཨ་མ་གི༌ལ། 27ཧང་ཡ་དག་ནེ་ལ་ གསུང་རབ་གེ་ཤོན་ཅ་

ངེ་མ་ཨ་ཉི་ཆོ་ཁཱན་མེ་ཝག་ཙ་ ཤོ་ནང་ཕེ། ཉི་ནཱན་གི་ཝག་ཙ་ མ་སིང་ཐཱན་རང་གི་ནེ་བུ་ གནམ་མེད་ས་མེད་ ཀཱན་ཤུག་ཅཱན་ཨ་ཉི་ ཤོ་ནང་ཕེ་ཝ་ག་ ངང་ཇང༌ཅོ། ཧང་ཡ་དག་ནེ་ལ་ ཕེ་ཝག་ཙ་གི་ ཐུབ་མ་ཐ་ཁཱན་ མེ་ཝག་ཙ་གེ་ལག་ཉི་ ཕེ་ཝག་ཙ་གི་ཐུབ་ཐ་ཁཱན་ མེ་ཝག་ཙ་གི་ ཝག་ཙ་མང་པུ་སིང་མེ་#4:27 ཡ་ཤའི་ཡ་ག་དཔེ་ཆ་ 54:1 དག༌ཉི།

28ཉི་ཇ་ག་ཡུང་ཟི་བ་ ན་ཧ་བ་བུ་ ཨི་སག་ད་བུ་རང་ དབུ་མནའ་བཞེས་ཝ་ཨ་དེན་གེ་ དཀོན་མཆོག་ག་ སྲས་སྲས་མོ་རི་ཝ་གི༌ལ། 29རང་བཞིན་གེ་ཨ་ཉི་སིང་ཁཱན་ ཝག་ཙ་གི་ དཀོན་མཆོག་ག་ ཐུགས་ཉིད་གེ་ཨ་ཉི་སིང་ཁཱན་ ཝག་ཙ་ག་ མ་ལེག་པ་ཨ་ཝ་ཆོ༌ཝ། ཉི་ཨོ་མ་བུ་ ཨུ་ཉུ་ད་བུ་རང་ཇུང༌ལ།

30དག་པ་ཀབ་ཉི་ གསུང་རབ་གེ་ ཧང་ཏེན་ཤོ་ན་ཡ། ཟ་པ་ཨ་ཉི་ཆོ་ཁཱན་ མེ་ཝག་ཙ་ག་ཟ་ཁེ་པ་ ཤོ་ཉི་གེམ༌ཤོ། ཧང་ཡ་དག་ནེ་ལ་ ཟ་པ་ཨ་ཉི་ཆོ་ཁཱན་ཟ་གི་ ཨ་པ་ག་རྒྱུ་ནོར་ཁེ་པ་ ཟ་པ་ཨ་ཉི་མ་ཆོ་ཁཱན་ མེ་ཝག་ཙ་ག་ཟ་ཀབ་ཉི་ བོང་མེ་མ་ཉོང་པ་#4:30 ཇུན་པ་ག་དཔེ་ཆ་ 21:10དག༌ཉི། 31ཨོ་ཉི་ཨ་དེན་གེ་ ཇི་གི་ཕང་ཁཱན་ཡུང་ཟི་བ་ ཨ་ཧ་བ་ཤོ་ ཟ་པ་ཨ་ཉི་ཆོ་ཁཱན་ མེ་ཝག་ཙ་ག་ ཝག་ཙ་བ་མང་གི་ཝ་ ཟ་པ་ཨ་ཉི་མ་ཆོ་ཁཱན་ མེ་ཝག་ཙ་ག་ ཝག་ཙ་བ་གི༌ལ༎

ទើបបានជ្រើសរើសហើយ៖

ག་ལ་ཏི། 4: TNTB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

Tshangla New Testament

ស្វែងយល់បន្ថែមទៀតអំពី Tshangla New Testament (BSI)