དང་པ་ཀོ་རིན་ཐི། 11

1ཇི་གི་ཁིརིས་ག་ དཔེ་གོད་པ་པུརུས་ཀིན་ཨ་ཉི་ ན་ཤི་ཇ་ག་དཔེ་གོད༌ཅོ༎

གསོལ་ཝ་ཏབ་ཐང་།

2ན་ཤི་ ཇང་ཡིད་ཀ་ཨ་ཉི་རང་ ཆོ་ཝ་ཨ་དེན་གེ་ ཇི་གི་ ན་ཧ་བསྟོད་པ་ཕིན༌ཅ། ཉི་ཇི་གི་ ན་ཧ་ཡེ་ཝ་དང་ཏུ་ཉི་ ན་ཤི་ཨ་ཝ་ཨ་དེན་གེ་བུ་ ཇི་གི་ ན་ཧ་བསྟོད་པ་ཕིན༌ཅ། 3ཉི་ཨོམ་ ན་ཤི་སེ་ལེ་ཁེ་ལེ་ ཕེ་ཝག་ཙ་ཐམས་ཅན་ག་ ཤ་རང་ཤོ་ ཁིརིས་གི༌ལ། ཉི་ཕེ་ཝག་ཙ་ཤོ་ མེ་ཝག་ཙ་ག་ ཤ་རང་གི༌ལ། ཉི་དཀོན་མཆོག་ཤོ་ ཁིརིས་ག་ཤ་རང་གི༌ལ། 4ཨོ་ཉི་ཨ་དེན་གེ་ ཕེ་ཝག་ཙ་ ཨི་བི་གི་ནེ་བུ་ རོ་ཀ་ཤ་རང་བུག་ཐཱན་ སྨོན་ལམ་ཏབ་ནེ་ལ་ ཡང་ན་ལ་ ལུང་བསྟན་མ་ད་བུ་ཨ་ནེ་ལ་ རོ་ཀི་རོ་ཀ་ཤ་རང་ག་ གུས་ཞབས་མ་ཨན་ཅ་གི༌ལ། 5དག་པ་ཀབ་ཉི་ མེ་ཝག་ཙ་ ཨི་བི་གི་ནེ་བུ་ རོ་ཀ་ཤ་རང་མ་བུག་པཱན་ སྨོན་ལམ་ཏབ་ནེ་ལ་ ཡང་ན་ལ་ ལུང་བསྟན་མ་ད་བུ་ཨ་ནེ་ལ་ རོ་ཀི་རོ་ཀ་ཤ་རང་ག་ གུས་ཞབས་མ་ཨན་ཅ་གི༌ལ། ཨུ་ཉུ་ཤོ་ རོ་ཀ་ཤ་རང་ ཀེརེག་ཏོང་ཏྲེག་པ་ད་བུ་ཐུར་གི༌ལ། 6མེ་ཝག་ཙ་གི་ ཤ་རང་མ་བུག་པ་དག་ནེ་ལ་ རོ་ཀི་ རོ་ཀ་ཚམ་ཅཱད་པེ་ཁེ༌ལེ། ཉི་ཚམ་ཅཱད་པ་ཀབ་ཉི་ ཡང་ན་ལ་ ཀེརེག་ཏོང་ཏྲེག་པ་ཀབ་ཉི་ ལོ་ཙོང་མེ་གི་ནེ་ལ་ རོ་ཀི་ རོ་ཀ་ཤ་རང་བུག་པེ་ཁེ༌ལེ།

7ཕེ་ཝག་ཙ་གི་ རོ་ཀི་རོ་ཀ་ཤ་རང་ བུག་པེ་མང་ཕ། ཧང་ཡ་དག་ནེ་ལ་ ཕེ་ཝག་ཙ་ཤོ་ དཀོན་མཆོག་ག་པར་གི༌ལ། ཉི་རོ་ཀི་དཀོན་མཆོག་ག་གཟི་བརྗིད་ཕུལ༌ཅ། དག་པ་ཀབ་ཉི་ མེ་ཝག་ཙ་གི་ ཕེ་ཝག་ཙ་ག་ གཟི་བརྗིད་ཕིན༌ཅ། 8ཧང་ཡ་དག་ནེ་ལ་ ཕེ་ཝག་ཙ་ཤོ་ མེ་ཝག་ཙ་གེ་ཨ་ཉི་ བཀོད་པ་མང་གི། དག་པ་ཀབ་ཉི་ མེ་ཝག་ཙ་ཤོ་ ཕེ་ཝག་ཙ་གེ་ཨ་ཉི་ བཀོད་པ་གི༌ལ། 9ཉི་ཕེ་ཝག་ཙ་ཤོ་ མེ་ཝག་ཙ་ག་དེན་གེ་ བཀོད་པ་མང་གི་ཝ་ མེ་ཝག་ཙ་ཤོ་ ཕེ་ཝག་ཙ་ག་དེན་གེ་ བཀོད་པ་གི༌ལ། 10ཨོ་ཉི་ཨ་དེན་གེ་ ཞིང་ཁམས་ག་འཐེན་པ་བ་ཀ་ཡོར་ཀེ་ མེ་ཝག་ཙ་གི་ རོག་ཕེ་ཝག་ཙ་ག་ དབང་ཚད་ག་ཕརའ་ཁེ་ཅ་དག་ཉི་ རྟགས་གེན་མེ་དེན་གེ་ རོ་ཀི་རོ་ཀ་ཤ་རང་ བུག་པེ་ཁེ༌ལེ།

11དག་པ་ཀབ་ཉི་ གཙོ་བོ་ག་ནང་ཀ་ མེ་ཝག་ཙ་མ་ནེ་ལ་ ཕེ་ཝག་ཙ་མཱན༌ཅ། ཉི་ཕེ་ཝག་ཙ་མ་ནེ་ལ་ མེ་ཝག་ཙ་བུ་མཱན༌ཅ། 12ཧང་ཡ་དག་ནེ་ལ་ མེ་ཝག་ཙ་ཤོ་ ཕེ་ཝག་ཙ་གེ་ཨ་ཉི་ བཀོད་པ་གི༌ལ། དག་པ་ཀབ་ཉི་ ཕེ་ཝག་ཙ་ཤོ་ མེ་ཝག་ཙ་གེ་ཨ་ཉི་ ཀེན་ཅ་གི༌ལ། དག་པ་ཀབ་ཉི་ ཐམས་ཅན་རང་ དཀོན་མཆོག་གེ་ ཇུན་པ་གི༌ལ།

13ཉི་ན་ཤི་ མི་ཉི་གོད༌ཅོ། ཧང་མེ་ཝག་ཙ་གི་ ཤ་རང་མ་བུག་པཱན་ དཀོན་མཆོག་ག་ སྨོན་ལམ་ཏ་པེ་ག་ ལེག་པུ་གི་ལ་སྨོ། 14ཕེ་ཝག་ཙ་གི་ ཚམ་རིང་མུ་ཐ་ནེ་ལ་ ལེག་པུ་མང་གི་ཨ་ཉི་ རང་བཞིན་གི་རང་ ན་ཧ་ཡེ་ལུ་མ་ལ་སྨོ། 15དག་པ་ཀབ་ཉི་ མེ་ཝག་ཙ་ག་ཚམ་ རིང་མུ་ཐ་ལ་ཀབ་ཉི་ ཨུ་ཉུ་གི་ རོག་ཅེམ་པུ་ཐོང་མེ་རིག༌ཅ། ཧང་ཡ་དག་ནེ་ལ་ རོ་ཀ་ཤ་རང་ བུག་ཅེན་དག་པ་གི་ རོ་ཀ་ཚམ་རིང་མུ་གནང་མ་གི༌ལ། 16ཨོ་ཐ་ཆཱས་ཀབ་ཉི་ ཤག་རུམ་ཁཱན་ སོ་ངོ་ཏེ་ཆོ་ནེ་ལ་ ཇི་གི་ཡེག་པེ་ཁེ་ཝ་ཆཱས་རང་ ཨུ་ཐུ་ཤ་གི༌ལ། ཨོ་ཐ་གེ་སོ་སུ་ཨ་ཉི་ ཨ་ཤི་ཨ་ལུ་མཱན༌ཅ། ཉི་དཀོན་མཆོག་ག་ བཱརའ་ཆོས་ཚོགས་བ་ཀི་བུ་ ཨོ་ཐ་གེ་སོ་སུ་ཨ་ཉི་ ཨ་ལུ་མཱན༌ཅ༎

གཙོ་བོ་ག་ཚོགས།

17ཨོ་ཐ་ཕརའ་ཁེ་ འབྲི་ཁཱན་ག་ནང་ཀ་ ཇི་གི་ ན་ཧ་བསྟོད་པ་མ་ཕི༌ལ། ཧང་ཡ་དག་ནེ་ལ་ ན་ཧ་བ་ཛོ་མ་ཀབ་ཉི་ ལེག་པུ་གེ་ལག་ཉི་ ནོད་པ་ཀེ༌ལ། 18གོ་རང་ ན་ཧ་བ་ ཆོས་ཚོགས་ཨ་ཉི་ ཛོམ་ཅ་ཨ་ཉི་ ན་ཧ་བ་ནང་དོ་ དྲིག་པུ་མ་ལ་དག་ཉི་ ཇི་གི་ན་ཐ༌ཝ། ཉི་ཇི་གི་ ཤ་མ་སག་པུ་ཏ་ ཨོ་ཉ་ཆཱས་ག་ལོ་དིན༌ཅ། 19མ་པ་ ན་ཧ་བ་ནང་དོ་ ཨི་བི་ཏེ་ངོ་མ་ཅ་གི་ལ་སྨོ་ ཙ་ཆོད་པེ་དེན་གེ་ ན་ཧ་པོང་ཀ་ མ་དྲིག་པ་ ཨོ་ཕུ་ཏ་ ཨོ་ཕེ་ཁེ༌ལེ།

20ན་ཧ་བ་ ཏབ་ཐུར་ཛོམ་ཅ་ཨ་ཉི་ ན་ཤི་ གཙོ་བོ་ག་ཚོགས་ ཞུ་ལུ་མ༌ལ། 21ཧང་ཡ་དག་ནེ་ལ་ ན་ཧ་བ་ཟཱན་ཅ་ཨ་ཉི་ ནའི་ཐམས་ཅན་གི་ བཱརའ་ག་མ་ནོང་མཱན་ རང་ཏེན་ག་ལྟོ་ཟ་ན། ཉི་ཚེ་བང་ བི་ནང་ཁུ་ཉི་ལུས་པ་ཀབ་ཉི་ ཚེ་བང་ཞུ་སུང་ཁུ་ཝ་རི་ན། 22ཧང་ ན་ཧ་བ་ཟ་ཉི་ ཇ་མེ་ག་དེན་གེ་ རང་རང་ས་ཕའི་མཱན་ཅ་སྨོ། ཨུ་ཉུ་མ་ནེ་ལ་ ཧང་ ན་ཤི་དཀོན་མཆོག་ག་ཆོས་ཚོགས་ ཇུང་ཁུངས་མ་ཝ་ཙི་ཉི་ ཧང་རང་མ་ཁཱན་ སོ་ངོ་བ་ ངི་ནང་ཁུ་ཝ་ཅོད་ཅ་ཡ། ཇི་གི་ན་ཧ་ ཧང་ཡེག་པེ་ཡ། ཧང་ཨོ་ཐ་དེན་གེ་ ཇི་གི་ན་ཧ་བསྟོད་པ་ཕི་ལེ་སྨོ། ཏི་ངེ་རང་མ་ཕི༌ལ།

23ཧང་ཡ་དག་ནེ་ལ་ ཇི་གི་ གཙོ་བོ་གེ་ཞུ་ཁཱན་ཁེ་པ་ ན་ཧ་ཏཱན་སྤྲོད༌ཅ། གཙོ་བོ་ཡི་ཤུ་ མགུ་སྐོར་ཕི་ལེ་ག་ནོང་ཀ་ ངེ་རི་དག་པ་ཀབ་ཉི་ རོ་ཀི་ཀེབ་ཏང་བསྣམས་ཐཱན་ 24བཀའ་དྲིན་བསམ་ཉི་ ཆུམ་དེན་གེ་ ཨོ་ཉ་ཀེབ་ཏང་བིརིང་ཐཱན་ གསུངས་མ་ལ་ ཨུ་ཐུ་ན་ཧ་དེན་གེ་ ཇ་ག་ལུས་པུ་གི༌ལ། ཉི་ན་ཤི་ ཨོ་ཐེན་ཨ་ལ་ཀབ་ཉི་ ཇང་ཡིད་ཀ་ཨའི་ན་དག༌ཉི། 25ཚོགས་བཞེས་ཉི་ཆུམ་དེན་གེ་ ཨུ་ཉུ་པུརུས་ཀིན་ཨ་ཉི་ རོ་ཀི་བཞེས་ཆ་བསྣམས་ཐཱན་ གསུངས་མ་ལ་ ཨོ་ཐ་གུར་བུ་ཤོ་ ཇ་ག་ཞི་གི་ ཐེལ་ཙི་ཕི་ཁཱན་ འགན་རྒྱ་སིང་མ་གི༌ལ། ཉི་ན་ཤི་ ཨོ་ཐེན་ཨ་ལ་ཀབ་ཉི་ ཇང་ཡིད་ཀ་ཨའི་ན་དག༌ཉི། 26ཨོ་ཐ་དེན་ཐ་ཤོ་ ན་ཤི་ ཨོ་ཐ་ཀེབ་ཏང་ཟ་ཉི་ ཉི་བཞེས་ཆ་གེ་ ཇ་མེ་དྲང་རང་ རོག་ལོག་ཉི་མ་བྱོན་མ་སག་པུ་ གཙོ་བོ་གཤགས་པ་ཀོར་གེ་ བཤད་ཅ་གི༌ལ།

27ཨོ་ཉི་ཨ་དེན་གེ་ ཨི་བི་གི་མ་རུང་པ་ཨ་ཉི་ ཨོ་ཐ་ཀེབ་ཏང་ཟ་ཉི་ ཉི་བཞེས་ཆ་གེ་ཇ་མ་ཐུར་ ཨོ་ཉ་སོ་ངོ་གི་ གཙོ་བོ་ག་ སྐུ་གཟུགས་དང་ སྐུ་ཁྲག་ག་དགྲ་ཨ་ཉི་ སྡིག་པ་ཨན་ཅ་གི༌ལ། 28ཀེབ་ཏང་ མ་ཟ་ལེ་གོ་མ་དང་ བཞེས་ཆ་གེ་ མ་ཇ་མེ་གོ་མ་ སོ་ངོ་གི་ རང་ཏེན་ཧང་ད་བུ་ཅ་གི་ལ་སྨོ་ ལེག་པུ་ཨ་ཉི་མི་ཉི་ གོད་པེ་ཁེ༌ལེ། 29ཧང་ཡ་དག་ནེ་ལ་ ཨི་བི་གི་ གཙོ་བོ་ག་ སྐུ་གཟུགས་ཁེ་པ་ གུམ་མ་ཡེ་ལཱན་ ཟ་ཉི་ཇ་མ་ཐུར་ ཨོ་ཉ་སོ་ངོ་གི་ རོག་ཏེན་ག་དེན་གེ་ དཀོན་མཆོག་ག་ཁྲིམས་ ཟ་ཉི་ཇམ་ཅ་གི༌ལ། 30ཨོ་ཉི་ཨ་དེན་གེ་ ན་ཧ་པོང་ཀ་མང་པུ་ཐུར་ ཤུག་མ་ཁཱན་དང་ མར་ཁཱན་རི་ཝ༌ཅ། ཉི་མང་པུ་ཤི་ལེ་བུ་ཁེ༌ཝ།

31དག་པ་ཀབ་ཉི་ གོ་མ་རང་ ཨ་ཤི་ ཨའི་ཧང་ད་བུ་ཅ་གི་ལ་སྨོ་ གོད་ནེ་ལ་ ཨ་ཤི་ཁྲིམས་བང་མེ་མ་ཁེ༌ལ། 32དག་པ་ཀབ་ཉི་ གཙོ་བོ་གི་ ཨ་ཧ་ཁྲིམས་ཀེ་བ་ཀབ་ཉི་ འཛམ་གླིང་ག་ སོ་ངོ་བ་ཀབ་ཉི་ དམྱལ་བ་ག་དི་ལེ་ མ་ཁེན་ཆེན་དག་པ་གི་ རོ་ཀི་ ཨའི་སྒྲིགས་ཀ་ཙུག་ཉི་ གནང་ཅ་གི༌ལ།

33ཨོ་ཉི་ཨ་དེན་གེ་ ཇ་ག་ཡུང་ཟི་བ་ ན་ཧ་བ་ ཏབ་ཐུར་ཛོ་མ་ཀབ་ཉི་ ཐུར་དང་ཐུར་ག་དེན་གེ་ནོང༌ཤོ། 34ཉི་ན་ཧ་བ་ བི་ནང་ཁུ་ཝ་ཆོ་ནེ་ལ་ ཕའི་ག་ཟཱན་ཐཱན་ཨོ་དོ། ཨུ་ཉུ་མ་ནེ་ལ་ ན་ཧ་བ་ཛོམ་ཅ་ཨ་ཉི་ ལག་ཏང་ དཀོན་མཆོག་གེ་ ཁྲིམས་ཤ་ཉོང༌པེ། ཉི་ཇང་ ན་ཧ་བ་ཆོ་ས་ག་ ཨོ་ཕ་ཀབ་ཉི་ ཇི་གི་ ན་ཧ་ཨོམ་ཆང་རང་ མང་པུ་ཐུར་ཡེན་བི༌ལེ༎

ទើបបានជ្រើសរើសហើយ៖

དང་པ་ཀོ་རིན་ཐི། 11: TNTB

គំនូសចំណាំ

ចែករំលែក

ចម្លង