Ruum Kopoilaan
Kopoilaan
Surat nopo diti nga tinulis di Poulus kumaa si di tongotulun si Bandar do Ruum. Kivaro tulun mitangar do tinulis disido ontok do siri isido Vonuvo Akaya toluno vulan linaid (Susuuon 20:2-30), barangkali siri isido Bandar Korintus di toun 55 atau 56 (Abad koiso).
Saralom surat di Poulus diti popoilo isido laaid di tongotulun si Bandar Ruum do kaangaianjo siri diolo. Kouvangan nopo daa di Poulus nga mindadapo piipiro linaid siri di tongotulun do Koristian, om mokianu isido diolo supaya tulungon isido ontok do lumombus silo Vonuvo Sapaniul. Kinoponulisan nopo di Poulus do surat diti nogi nga papatarang nong potingkuro i Kinoringan momijau di tulun om onu iri gaagaya di tulun Koristian di apatut.
Om kokirimpo dii di Poulus i salamjo diolo si poiuuntunan di tongotulun aparsaya silo Ruum, om kaabarpo dii disido i sambayangjo diolo, om pavantango nogi dii disido i pokitangarjo marong si suratjo do irad diti, “Do mantad diri Abar do Aandai poiloon do Kinoringan do pakabanaron Disido i tongotulun. Nontodon nopo do pakabanaron do Kinoringan i tongotulun nga irino kaparsayaan diolo Disido do mantad di kotimpuunon gosob do koovion,” (Ruum 1:17).
Om patarango nogi dii di Poulus i komoion diri pokitangarjo marong. Koiso: Bab 1-4. Kasangkat nopo do tulun, i tulun do Joudi om i okonko bansa do Joudi nga misti pakabanaron di Kinoringan, sabap kasangkat diolo nga saralom di kuasa do duso. Nga pakabanaron iolo di Kinoringan sabap aparsaya iolo di Yisus Koristus. Om patarango nogi dii di Poulus i gaagaya do kovijaan vagu di tulun sabap kopiiso di Koristus, om kinoonuan nopo diolo do kovijaan vagu nga sabap do pinakabanar iolo di Kinoringan. Iri nopo tulun di aparsaya di Yisus nga nokopiandaino si di Kinoringan, om poiduan di Tatod do Kinoringan iolo mantad di kuasa do duso om kapatajan. Koduvo: Saralom diti bab 5-8 pinatarang di Poulus kogunaan di Undang-undang Ugama mantad do Kinoringan, om i kuasa di Tatod do Kinoringan saralom kovijaan di tulun do aparsaya. Kotolu: Bab 9-11. Om patarangopo di Poulus do ii nopo tulun Joudi om i okonko bansa do Joudi nga sasama kaanu kasangkat diri natantu laaid do Kinoringan. Om patarangono di Poulus do kinapagadaan nopo do tulun Joudi di Yisus nga natantu laaid do Kinoringan, supaya kadapat Isido monulung di tongotulun di okonko bansa Joudi do opuavang Isido di tongotulun sabap do aparsaya iolo di Yisus Koristus. Nga atantu marong di Poulus do aui otilombus do mangada i tulun Joudi di Yisus. Kaapat: Bab 12-16. Tinulisan nopo di Poulus di kolimumusonno nga monuduk isido nong potingkuro gaagaya di tulun do aparsaya di Yisus; om koisono marong potingkuro i gaagaya do popointalang do au kojuu di tulun vokon. Om iri nogi pinatarang di Poulus i piipiro guvas do ponudukan irad diti: potingkuro kumaraja si di Kinoringan, tonggungan do tulun di aparsaya si pomorinta, om si sasama tulun di aparsaya, om nogi pasal do kopurimanan do ginavo. Om kolimumusonno dii di tangar di Poulus siti suratjo nga kivaro piipiro nibilinjo om rarajoujo di Kinoringan.
Saralom diti Buuk
1. Kotimpuunon 1:1-17
2. Oporlu i tulun do onuan do kovijaan di auso koovion 1:18-3:20
3. Ralan do Kinoringan momijau diti tulun 3:21-4:25
4. Kovijaan vagu di tulun do kopiiso di Koristus 5:1-8:39
5. I natantu do Kinoringan kumaa si di tulun Israil 9:1-11:36
6. Gaagaya do tulun di aparsaya 12:1-15:13
7. Pongovian om salam di Poulus 15:14-16:27
Nong kivaro tanda bintang (*) siri tinangaran, nga obuli iumon i komoion diri tinangaran si Kamus Kadajan.
ទើបបានជ្រើសរើសហើយ៖
Ruum Kopoilaan: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.