Susuuon 15
15
Poiupapakatan di Tongokotua si Yorusalim
1Nga kivaro piipiro tulun nokorikot siri Bandar Ontukia mantad soi Vonuvo Yudia. Om timpuunno dii iri tongotulun monuduk di tongosulod do okonko bansa do Joudi i naparsaya di Yisus irad diti, “Nong aupo nosunatan kou irad diri adat-adat dagai tulun Joudi i nitulis di Musa nga au kou kaanu do kovijaan do auso koovion,” kadiolo. 2Om okonko aalang-alang i Poulus om i Banabas kumisival di tongotulun mantad Vonuvo Yudia pasal diri ponudukan diolo. Jadi pinili di tongosulod saralom di Yisus i Poulus om i Banabas om piipiro sulod vokon do mongoi soi Yorusalim do moiupapakat di tongosusuuon di Yisus om i tongokotua di tulun i naparsaya di Yisus siri poiuuntunan pasal diri pisivalan diolo.
3Om sinuu dii di tongotulun siri poiuuntunan si Bandar Ontukia i Poulus om i songkoruanganjo do mongoi soi Yorusalim. Ontok do mampanau iolo mongoi siri Yorusalim minoguapit iolo siri Vonuvo Puniki om Vonuvo Somoria. Om popoilo i Poulus om i Banabas di tongosulod i naparsaya di Yisus siri Puniki om siri Somoria do oguu i tongotulun di okonko bansa Joudi ginumotuvang do Kinoringan do aparsaya iolo di Yisus. Om aandaian dii marong i ginavo di tongosulod saralom di Yisus do nokorongou di abar diri. 4Korikot nopo dii i Poulus om i songkoruanganjo soi Yorusalim om somungono dii di tongosusuuon di Yisus om i tongokotua om i tongotulun vokon siri poiuuntunan do osuau do popoindakod diolo. Om popoilo i Poulus om i Banabas diolo kasangkat diri vinaal do Kinoringan do monulung diolo.
5Nga kivaro piipiro tulun i naparsaya di Yisus do maja di kumpulan Porisi, om kadiolo, “I tongotulun do okonko bansa do Joudi misti do osunatan om suuon nogi do maja di Undang-undang di Musa,” ka.
6Om untunno dii i tongosusuuon di Yisus om i tongokotua siri poiuuntunan do moiupapakat diri pisivalan. 7Alaidno iolo moisusuvoli mitangar om ingkakat nogi dii i Pitrus mitangar di tongotulun Joudi i naparsaya di Yisus do irad diti, “Kosusuladanku, oilaan mujuno do iokuno i pinili do Kinoringan di pogulu supaya mongoi si di tongotulun di okonko bansa Joudi, om popoilo oku diolo di Abar do Aandai supaya korongou iolo om aparsaya di Yisus. 8Om koilo i Kinoringan do ginavo di tongotulun, jadi inonuan Disido di TatodJo Tolidang i tongotulun di okonko bansa Joudi do irad nogi daton#15:8 daton: ditokou do inonuan di TatodJo Tolidang. Irino tandajo do monorima i Kinoringan di tulun di okonko bansa Joudi. 9Om tokou nopo om iolo nga piniiradi di Kinoringan, do inugasan Disido i duso diolo do aparsaya iolo di Yisus. 10Jadi nong irad dino, ada kou monginam do Kinoringan. Ada muju potonggungo iri Undang-undang di Musa siri di tongotulun do okonko bansa do Joudi i naparsaya di Yisus. Do insan iodu-aki tokou ko itokou kondiri nga au katanggung diri Undang-undang di Musa. Nga okonko maja di Undang-undang di Musa om kaanu do kovijaan do auso koovion. 11Nong aparsaya tokou tulun Joudi di Tuhan Yisus nga opuavang Isido manaak daton do kovijaan do auso koovion irad nogi di tongotulun do okonko bansa do Joudi nga onuan do kovijaan do auso koovion,” kadi Pitrus.
12Om ootosno dii i tongotulun siri, om rumongou iolo di Banabas om i Poulus popoilo diolo di tongopongintutunan om kosunduvan vinaal diolo siri di tongotulun di okonko bansa Joudi do tinulung iolo di Kinoringan. 13Nokoopod nopo dii i Banabas duvo di Poulus mitangar om sinumuvoli dii kavagu i Yakub#15:13 I Yakub nopo diti nga iadiJo di Yisus. Antangai Yak. 1:1. mitangar do irad diti, “Kosusuladanku, rongoo mujuno iti tangaronku. 14Pinopoilo i Simun Pitrus dikovu maino do minongoi isido siri tongotulun di okonko bansa Joudi di togina. Om ontok nopo diri nga nipoontong di Kinoringan iri kosiananJo si diolo, do nopili Disido laaid iri tongotulun di okonko bansa Joudi do songonuvonJo. 15Ii nopo tinangaran di tongonabi, i popolombus di tinangaran do Kinoringan, nga miinongi di komoion diti, do irad ditino i poiradan do nitulis siri Kitab,
16‘Kadi Tuhan, “Touri#15:16 Touri: Toudi tadau om gumuli Oku kavagu,
om poingkokotonKu kavagu i valai di Daud iri naaba,
irino komoion do pogulionKu i kuasa si di koturunan di Daud
17supaya i tongotulun vokon nga mogium Dogo,
irino tongotulun di okonko bansa Joudi i songonuvonKu nogi,”
18kadi Tuhan, do popoilo Isido diti di pogulupo,’ kadi nabi.#Antangai Amus 9:11-12.
19Irad nopo diri,” kadi Yakub, “soromononku nopo nga au tokou buli monusa di tongotulun di okonko bansa Joudi, do tumoguvang iolo do Kinoringan om aparsaya Disido. Jadi ada tokou pajalo iolo maja di Undang-undang Ugama tokou tulun Joudi. 20Nga aandai daa do monulis tokou do surat di tongotulun di okonko bansa Joudi do itino iti isuu tokou diolo: Ada iolo mangakan diri itaak di moroijan do patung do au apatut iri. Om ada iolo lumapau. Om ada iolo mangakan do raa, om ada iolo mangakan do tonsi do dupot diri inokog do au nakalabus iri raa. 21Om aandai do maja iolo diti tinangaranku supaya aui aasaban i tongotulun Joudi diolo. Do mantad di pogulupo pibabasa di tulun Joudi i tinangaran di Musa pasal diri. Om ituduk nogi di tulun i tinangaran di Musa di tikid-tikid Tadau Koingkajadan siri valai sasambayangan do tulun Joudi pointikid-tikid do kampung,” kadi Yakub.
I Surat Nipoovit si di Tongotulun di Okonko Bansa Joudi
22Jadi tinantu di tongosusuuon di Yisus om i tongokotua om kasangkat di tongotulun vokon siri poiuuntunan do momili piipiro tulun do suuon diolo maja di Poulus om i Banabas do gumuli kavagu soi Bandar Ontukia. Pinili diolo duvo kojuvan iri rinajou#15:22 rinajou: inompod di tongosulod vokon i naparsaya di Yisus, ngaran nopo diolo nga i Silas om i Yudas. I ngaran nopo koduvo di Yudas nga i Barsabas. 23Om nipoovit diolo iti surat soi di tulun di okonko bansa Joudi.
“Kosusuladanja i naparsaya di Yisus Koristus i Tuhan tokou.
Ikoi nopo tongosusuuon di Yisus om tongokotua do poiuuntunan siti Yorusalim nga pokirim salam kasangkat dikovu tongosulod do okonko bansa Joudi sino Bandar Ontukia om sino Vonuvo Siria om sino Vonuvo Kilikia.
24Nokorongou ikoi do kivaro piipiro tulun mantad siti dagai minongoi sino dikovu do momoringou om poposusa di ginavo muju sabap ponudukan diolo. Nga okonko sinuuja iolo irad diri. 25-27Jadi nokopoiupakat ikoi om nokopiiso ginavo dagai do monuu di Silas om i Yudas mongovit diti surat mongoi sino dikovu, om popoilo nogi dikovu diti tinulisanja. Povojoonja i Silas om i Yudas di Banabas om i Poulus. I Banabas om i Poulus nopo nga au kojuuanja, om tinumomod iolo masu do kapatajon mamaal di karaja di Yisus Koristus i Tuhan tokou. 28Ontok do minoiupakat ikoi nga miiso ginavo dagai di Tatod Tolidang do au potonggungonja dikovu i Undang-undangja vokon. Do itino iti isuuja dikovu do misti vojoon muju. 29Kumoiso, ada kou mangakan do taakanon i nitaak di moroijan do patung. Kumoinduvo, ada kou mangakan do raa. Kumointolu, ada kou mangakan do tonsi do dupot diri inokog do au nakalabus iri raa. Kumoinggapat, ada kou lumapau. Itino iti i misti do vojoon muju.
Iti itino abar mantad dagai,
Tongosulod muju.”
30Koopod nopo dii iolo monulis di surat, om suuono dii di tongosulod saralom di Yisus i Yudas om i Silas do maja di Poulus om i Banabas do mongovit diri surat mongoi soi Bandar Ontukia si Vonuvo Siria. Korikot nopo dii iolo siri om untunono dii diolo i tongotulun i naparsaya di Yisus, om pataako nogi dii diolo iri surat diri. 31Binasa di tongotulun siri Ontukia iri surat om aandaian marong i ginavo diolo do notoluadan#15:31 notoluadan: noinsasamadan di ponudukan diri. 32Om i Yudas om i Silas nga nabi nogi do polombus iolo do tinangaran do Kinoringan. Oguu iri nituduk diolo di tongosulod do monosiat om popogirot di ginavo diolo. 33Om poingijon i Yudas om i Silas siri Ontukia piipiro linaid. Om ontok do muli iolo mongoi soi Yorusalim, om kadi tongosulod i naparsaya di Yisus, “Antatangai mujuno,” ka. Om ulino dii iolo soi di tongokosuladan saralom di Yisus i minonuu diolo poongoi soi Ontukia. 34[Nga i Silas nopo om aandaianpo isido minindada siri Ontukia.]
35Nga minijonpo dii i Poulus om i Banabas siri Bandar Ontukia piipiro linaid. Om monuduki iolo di tongotulun iri naparsaya di Yisus, om mangaabari iolo di tinangaran do Tuhan. Om oguupo tongosulod vokon nogi nga monuduk do tinangaran di Tuhan.
Minirijang i Poulus om i Banabas
36Piipiro linaid mantad diri, om kadi Poulus di Banabas, “Kayono, gumuli kitopo kavagu siri inabaranto di pogulupo. Mongoi kito mandaa di tongosulod i naparsaya silo pointikid-tikid do bandar nong potingkuro iolo,” ka. 37Nga kouvangan di Banabas pavaja daa di Yaya Markus. 38Nga soromonon di Poulus do au aandai pavaja di Markus do iniduan iolo di Markus siri Vonuvo Pompilia do minundur isido om auno dii maja diolo kumaraja. 39Om piodu dii i Poulus om i Banabas gosob do minirijang iolo. Jadi inangatan dii di Banabas i Markus do sumako di kapal laut mongoi siri Puru#15:39 Puru: Pulau Siprus. 40Nga i Poulus nopo om minongongoi di Silas do povojoonjo. Ontok di mampanau iolo, sinambayangan iolo di tongosulod i naparsaya di Yisus supaya piarawon iolo di Tuhan. 41Om pampanauno dii i Poulus om i Silas do tumongkop siri Vonuvo Siria om siri Vonuvo Kilikia, do popogirot iolo di ginavo di tongosulod i naparsaya di Yisus siri pointikid-tikid do poiuuntunan.
ទើបបានជ្រើសរើសហើយ៖
Susuuon 15: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.
