मरकुस 11

येसुन यरुशलेममा जाणो

(मत्ती 21:1-11; लुका 19:28-40; योहान 12:12-19)

1जेतार चे यरुशलेम साते जेतुनोन बोयळा पोर बेथफगे एने बैतनिय्याह गाव साते आव्या ती चू तेरा चेलामा गोथू दुय जोना काजे यो कोयीन मूकल्यु, 2“कि सामने वावा गावोमा जावू, एने चा पुगतेच एक गोदळीन पिलो, जीना पोर कोबी कुदू नि चोळ्या, बांदलो तुमु काजे जोळसे तीना काजे छुळीन लावू.” 3तेत्यार तुमु काजे कुदू पुछे, “यो काहा कोर रोया?” ती कोयजू, “कि प्रभू काजे एरी जोरुरोत छे, एने चू मामार तीना काजे न्या मुकली देसे.”

4चे दुय चेला जायीन तिना गोदळीन पिला काजे बारथे झोपला साते चौकमा बांदलो देखायो, एने छुळने बाज गोया. 5तीनुमा चे चा उबरोय रोया होता, काहना-काहना कोयने बाज गोया, “यो काहा कोर रोया, गोदळीन पिला काजे काहा छुळतेला?” 6जोसो येसु तीनु काजे कोयलु होतु, तोसाच चे तीनु काजे कोया; तेत्यार माणसे तीनु काजे जाणे देदा. 7एने चे गोदळीन पिला काजे येसुनचा लाविन तीना पोर तिंदरा कापळा नाख्या एने चू तीना पोर बोस गोयू. 8तेत्यार लोकेत जोना तिंदरा कापळा वाटी पोर आथरी देदा एने कानला खेतोमा गोथा डाव्या काटी-काटीन फेलाव देदा. 9जे तेरे ओगोव-ओगोव जातला एने पोछोव-पोछोव चालीन पोछा आवता होता, आयळीन-आयळीन कोयता जाता होता कि, “होसान्ना, सोयावू छे चू जू प्रभून नावोसी आवतेलु. 10आमरू बास दाऊदन राज जो आवने बाज रोयो; सोयावा छे सोरगोमा होसान्ना.”

11एने येसु यरुशलेममा पुगीण मंदीरमा आव्यु, एने चारू धोळे आखा चीजो काजे देखिन बारा जोना साते बैतनिय्याह गावमा गोयू, काहाकि सांतो होय गोयलो होतो.

शापित गुलोरोन झाड

(मत्ती 21:18-19)

12दिसरे दाहळे जेतार चे बैतनिय्याह गाव गोथा निकव्या ती तीना काजे भुक लागी. 13एने चू नांबे गोथू गुलोरोन एक निव्वो झाड देखीन साते गोयू कि काय मालूम कि तीनामा काहीन जोळे, बाकीन पानटा काजे छुळीन काहीन नि जोळ्यो; काहाकि फोवनेन टेम नि होती. 14इनापोरसी चू तीना काजे कोयू, “न्या गोथो कुदू तारो फोव कोबी नि खाय” एने तेरा चेला सोमवता होता.

धुंदा वावाकनुक मंदीरमा गोथा निकावनो

15एने चे यरुशलेममा आव्या, एने येसु मंदीरमा गोयू; एने चा जी लेन-देण कोर रोया होता तीनु काजे बारथे निकावने बाज गोयू, एने सोराफोन पिला एने पेरवा वेचने वावन बागळा उथलाव देदू, 16एने मंदीरमा गोथा कुदा काजे ठाहरा लीन आवने जाणे नि देदू. 17एने सिकाळीन तीनु काजे कोयू, “काय यो नि लिखलो होय कि मारा घोरोमा आखा जातीन कोरता प्रार्थनान घोर कोवायसे? बाकीन तुमु इना काजे लुटारून घोर बोनाव देदला छे.” 18यो सोमवीन प्रधान पुजारू एने शास्त्री तीना काजे नाश कोरणे कोरीन टेम हेरने बाज गोया; काहाकि चे तीना काजे बिहता होता, इनान कोरता कि आखा माणसे तेरा सिकापणसी वाहराय जातेला. 19एने सांतो होयताच चे सोहोरोन बारथे जात रोया.

भुरसान ताकत

(मत्ती 21:20-22)

20एने सोंदारे वेगात जेतार चे चा गोथा जाता होता ती चे गुलोरोन झाड काजे मुवोन चा तोक सुक गोयलो देख्या. 21पतरस काजे तिनी वातोन फोम आवी, एने चू तीनु काजे कोयू, “हे रब्बी, देख! यो गुलोरोन झाड जीना काजे तू श्राप आपलु होतु, सुक गोयलो छे.” 22येसु तीना काजे जोवाब आप्यू, “परमेश्वर पोर भुरसू मेकू.” 23मे तुमु काजे छाचलीन कोयो कि, “जु कुदू इना बोयळा काजे कोये, ‘कि तू उखवी जा, एने दोरीयामा जायीन पोळ,’ एने आपना मोनोमा शंका नी कोरे, एने भुरसू कोर कि जो कोयतेला चो होयसे, ती तेरेन कोरता ओसो होयसे. 24इनान कोरता मे तुमु काजे कोयो कि जो काहीन तुमु प्रार्थना कोरीन मांगसू, ती भुरसू कोर लेयू कि तुमु काजे जोळ गोयो, एने तुमरेन कोरता होय जासे. 25एने जेतार तुमु उबरोयीन प्रार्थना कोरतेला ती तेत्यार तुमरा मोनोमा कुदान बारामा कायबी खिलाप होय, ती माफ कोरु इनान कोरता कि तुमरू सोरगोन बास बी तुमरा पापोन माफी कोरे. 26एने जेतार तुमु माफ नि कोरे ती तुमरु बास बी चू सोरगोमा छे, तुमरा पापे माफ नि कोरे.”

येसुन होक पोर सवाल

(मत्ती 21:23-27; लुका 20:1-8)

27येसु एने चेला पोछा यरुशलेममा आव्या, एने जेतार चू मंदीरमा फिरतू होतु ती प्रधान पुजारू एने शास्त्री एने डाह-डाहा तेरेनचा आवीन पुछने बाज गोया, 28“कि तु यो काम काहना होकोसी कोरतेलू? एने यु होक तुसेक कून आपलु छे कि तू यो काम कोर रोयू”? 29येसु तीनु काजे कोयू, “मे बी तुमु काजे एक वात पुछो; मेसेक जोवाब आपु ती मे तुमु काजे कोयीस कि यो काम काहना होकोसी कोरतेलू. 30योहानोन बाप्तिस्मा काय सोरग गोथू होतु कि माणसो जुव गोथू होतु मेसेक जोवाब आपु.” 31तेत्यार चे एक दिसरा साते जोखळी पोळने बाज गोया कि हिमी आपनु कोयसू सोरगो भूनी गोथू छे, ती चू कोयसे, “ती तुमु तेरे पोर भुरसू काहा नी मेक्या?” 32एने हिमी आपनु कोयसू, “माणसो भूनी गोथू होतु,” ती माणसोन बिक छे, काहाकि आखाक मालूम छे कि योहान छाचलीन भविष्य कोरता होतु. 33आखरी चे येसु काजे जोवाब आप्या, “आमु नि जानतेला” येसु तीनु काजे कोयू, “मे बी तुमु काजे नि कोयतू कि यो काम काहना होकोसी कोरतेलू”.

ទើបបានជ្រើសរើសហើយ៖

मरकुस 11: BFBNT

គំនូសចំណាំ

ចែករំលែក

ចម្លង