२ पाट्‌रुस 1

1
1येसु खिरिस्‍टमि सॆःक्‍ढुङ्‌पा हाङ् खोम् योम्‍पक् मुखुबा काङा सिमोनऎ ग साब्‍चिरा साप्‍मिम्‍पा यो। हाङ् काङॆ ग साब्‍चिरा कानिम् निवाँहाङ् नुङ् फाक्‍खुबा येसु खिरिस्‍टमि निवाँनेन् बाङ्‌कॆ कानिम् रक्‍मान एट्‌टान ढ्‌या निवाँयुङ् टक्‍चाखुबा आन्‍ना चोब्‍न साब्‍डानि। 2कानिम् निवाँहाङ्‌मि निवाँबाङ् येसु पारभुमि सान्‍टि हाङ् नाम्‍नावाँ आन्‍नाबि खेःॽल लिःर।
निवाँहाङ्ऎ सेःॽमॆ हाङ् सॆःक्‍मॆ खानावाँ
3आन्‍नॆ सॆङ्‌सॆङॆ हिङ्‌खामा हिङ्‌चामाम् लागि पाबुहा चोब्‍न खानावाँ निवाँहाङ्‌मि चॆक्‍मावाबाङ् टक्‍चाडाम्‍नि मान्‍ठाभनॆ टाङ्‌पाम् निङ्‌लावा नुङ् नाम्‍नावाँबाङ् सेःखुबा निवाँहाङ् काङ्‌कॆ लेकुङ्‌का 4गरहाङ्‌न खोसॆ आन्‍ना बाखाटेम्‍पिऎ काइसाहा खानावाँबाङ् फाक्‍से निवाँहाङ्‌मि रक्‍मान हिङ्‌खामाबि हिङ्‌चाआनॆ कामानुङ् खोसॆ कानि पिक्‍खानि कामानुङ् लोमिम्‍पा ढ्‌या बारडाना पिट्‌टि। 5मसॆ हेःर आन्‍नामि निवाँङ्‌युङ्‌बि नुऎ खानावाँ पुसे खॆॽमिॽमाम् लागि पाइटानॆ। हाङ् माङ् चाइ नुऎ लॆः म लॆसे निवाँबि पुसानॆ। 6हाङ् निवाँबि टाङ्‌पॆ टाङ्‌पान खाङ्‌हिमॆ खानावाँ येप्‍टिसाम्‍नॆ, हाङ् टाङ्‌पॆ टाङ्‌पान खाङ्‌हिमॆ खानावाँबि हुङ्‌हिमॆ, हाङ् हुङ्‌हिमॆ खानावाँबि भाक्‍टि, 7भाक्‍टिबि बुबुनानुसाचिम् नाम्‍नावाँ, बुबुनानुसाचिम् नाम्‍नावाँबि नाम्‍नाम् पिसिॽमॆ खानावाँ येराम्‍नॆ। 8मान्‍ठाभनॆ आन्‍ना पाब्‍कानिहा खानावाँ चाइ इघान हाङ् इघा खानावाँ आन्‍नाबि खेःॽल चुःॽहाङ्‌ग आन्‍नॆ कानिम् पारभु येसु खिरिस्‍ट लेॽमिम्‍पासॆ एट्‌टान योम्‍पक् पिक्‍खुबा हाङ् उम्‍चा सिखुबा लिकानि। 9टर इघा आचुखुबा याॽमिचि चाइ निवाँहाङ्‌मि खानावाँ आखाङ्‌टखुबा मिक्‍सुरुम्‍पाचि यो। हाङ् खोचिऎ ग उम्‍चि सःग्‍मिम्‍पा हिङ्‌वा सङ्‌क मिखॆॽमिम्‍पा लिक्।
10मसॆ बुबुनानुसाचो, निवाँहाङ्ऎ आन्‍ना सेःॽमिम्‍पा हाङ् सॆःग्‍मिम्‍पा खानावाँ चाइबानऎ लोमॆ खाङ्‌मिसि याॽलऎ बाङ्‌स चॆकुवॆ लिसानॆ। मान्‍ठाभनॆ गर लॆटाम्‍नि हाङ्‌ग आन्‍नॆ आम्‍नि टाङ्‌पाम् निवाँयुङ् हानाम्‍स लेॽलाङ्‌साम्‍निनि। 11गरहाङ् आन्‍नॆ कानिम् पारभु नुङ् फाक्‍खुबा येसु खिरिस्‍टमि हानाम्‍स लुक्‍खॆॽनॆ हाङ्‌डाम्‍पि निवाँहाङ्ऎ आन्‍ना लाखॆकानि।
12मसॆ इघा खानावाँ आन्‍ना हानाम् सङ्‌क मिॽलामिकानि। इमॆन हाङ्‌ग इघा चोब्‍न खानावाँ आन्‍नॆ लेकाम्‍निन हाङ् आन्‍नॆ टक्‍चाडाम्‍नॆ खानावाँबि चॆक्‍मावा नुङ्‌मा सङ्‌क लिडानि। 13हाङ् काङा हिङ्‌चारढारि इघा खानावाँ आन्‍ना मिॽलामिॽमा काम्‍नुक् मिन्‍ङा। 14मान्‍ठाभनॆ कॆ लेकुङ्, काम ग बाखामि सालुङ् सॆॽलन याइकुङ् लोमॆ खानावाँ कानिम् पारभु येसु खिरिस्‍टऎ नुःर खाङ्‌मिडिङ। 15काङा सिखॆङा हाङ्‌स आन्‍नॆ चाइ इघा खानावाँ हानाम्‍स मिॽलाहिसाम्‍नॆ कामानुङ् हेःर कॆ आन्‍ना हानाम्‍स मिॽलामिकानि।
खिरिस्‍टमि निङ्‌लावामि चुप्‍लाङ्
16मान्‍ठाभनॆ कानिम् पारभु येसु खिरिस्‍ट ढ्‌या निङ्‌लावामि नुङ् चॆक्‍मावाबि फेरि टा कामानुङ् काङ्‌कॆ हुन्‍न यामुम्‍पा हॆॽनॆ। टर काङ्‌कामि मिगॆॽन खोम् ढ्‌या निङ्‌लावा खाङ्‌डुङ्‌का। 17निवाँहाङ् आपॆ खो नुःर लॆटु हाङ् निवाँहाङ् बाङ्‌न ढ्‌या निङ्‌लावा टक्‍चाउ। हाङ् आपॆ खो “इग काम नाम्‍नाम् पिस्‍सिमिम्‍पा पासा, खोनुङ् काङा एट्‌टान चेन्‍चाडिङ्” कामानुङ् सङ्‌पिऎ निङ्‌लावाबाङ् लोमार काङ्‌का आक्‍कुबि चुइङ्‌का। 18काङ्‌का खोनुङ् सॆङ्‌सॆङॆ पॆस्‍सङ्‌पि चुइङ्‌कार पारुबाङ् टामिम्‍पा आक्‍क साम्‍ला काङकॆॽन खेमुम्‍का।
19निवाँहाङ्‌मि खानावाँ लोखुबाचिऎ इमिम्‍पा खानावाँबि काङ्‌कॆ ग झाना चाइबान निवाँयुङ् लॆकुङ्‌का। अन्‍नॆ ग खानावाँबि निवाँ टिमा नुऎ लि मान्‍ठाभनॆ गसॆ आक्‍क डिना मॆटारढारि हाङ् आन्‍नामि निवाँबि नाम्‍सऎ साङ्‌केम्‍मा माहाटारढारि माॽयाक्‍टबि हाखुबा ओप्‍लिङ्‌मि योम्‍पक् यिगुकु। 20टर चोब्‍बाङ् याॽल आन्‍नॆ माङ् खानावाँ वाप्‍मा लॆ भनॆ निवाँनेन साब्‍चिराबि साब्‍मिम्‍पा खानावाँ निवाँहाङ्‌मि खानावाँ लोखुबॆ उम् निवाँबाङ् लोमिम्‍पा हॆॽनॆ कामानुङ् वाबाम्‍नॆ। 21मान्‍ठाभनॆ निवाँहाङ्‌मि खानावाँ लोखुबाचिऎ इमिम्‍पा खानावाँ याॽमिचिम् निवाँबाङ् टामिम्‍पा हॆॽनॆ, टर खोचिऎ चाइ सॆङ्‌सॆङॆ लावाऎ माङ् लोसुचि मन इसुचि।

ទើបបានជ្រើសរើសហើយ៖

२ पाट्‌रुस 1: LBR

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល