Matiw 21
21
Jesu dhel dhighin Urshalima naar sheerr kihh waaw
(Mar 11:1-11; Luk 19:28-40; Yoh 12:12-19)
1Kaarooh Jesu kihh zheppkamm keeniy mwopp kuss kihh wull Urshalima, harr baa mwopp ji wull kuss kihh kwangyill Betfaji kih Bwumm Paatt, bhi Jesu lop vel dhighin zheppkamm keeniy mwopp. 2Lop mwopp satt le, “Wu dum takhann kwangyill w'u kihkyeen wu seh. Nhighin pwoo kwangyill ni, bhi wunn p'ee kad mwopp kukhul m'ee jaa'kiy kihh l'aa keera nhighin sh'i sat. Wu shwat mwopp lhitaah se a'n. 3Mihh menguh satt mee'bii wunn, bhi wu satt nyi wu le, a Gwoohyon kihh t'ang sh'in dhakk kihh mwopp dhangg nyi p'ee shikhir shenn mwopp lhiba ja abet.”
4Bii mihhse sh'in a tihh bii w'u gyet Naan satt sh'i pwoo khi m'ee gu'wanggshiiy gam diy, w'u satt le:
5“Wu satt Reep khi Sihiyona wu le,
‘Yi naah miskakhamm keeyi ji wull yi,
nyi a gu'kaahlokhomm harr kihh l'ang a kih jaa'kiy,
kihh l'ang a kih l'aa jaa'kiy, reb l'aa jaa'kiy wu'shomm.’ ”#21:5 Zak 9:9
6Zheppkamm wu'vel mhizeh mwopp dum sh'in kaa Jesu satt mwopp seh. 7Mwopp ji kihh jaa'kiy ni kihhsheh kihh l'aa keera Jesu, bhi mwopp shwat n'an bh'aar keeru bihr kih jaa'kiy ni mwopp, bhi Jesu k'aa tong dyikihh. 8Dw'uu gurum mwopp shwat looh keeru mwopp kihh bihr lhidum kih arr; pakk mwopp challang y'im mwopp kihh puk lhidum kih arr ni zag. 9Gihd dw'uu gurum w'u mwopp kihh tuud dum kihkyeen, kihh mwooh kihh tuud ja kihbwoon, mwopp kihh shwat waaw mwopp le,
“Hosanna, Em khi Dauda!”
“Naan le'wurett gwooh ji dhighin shumm khi Puup mu Naan!”
“Hosanna wa'khat sat tihngg kih dhengNaan!”
10Kaarooh Jesu ji dhel Urshalima, bhi pee tungg dhighin khishikhitt ni kihhdihng'dihng, bhi gurum mwopp kihh nang le, “A mee'wuyeh kihhshe se pwetd?”
11Bhi dw'uu gurum ni mwopp kihh satt le, “Ai a Jesu gu'wanggshiiy w'u put Nazaret dhighin yill Galili.”
Jesu pwoorr mhi'glong lhipwat kihfur LuhNaan
(Mar 11:15-19; Luk 19:45-48; Yoh 2:13-22)
12Kaarooh Jesu ji dhel kihfur LuhNaan, bhi pwoorr kapp v'ur mwooh mwopp kaah gl'ong nhighin kihfur LuhNaan ni lhipwat kwellelleh. Kok tebul khi mhi-pringshaghal mwopp, kihh tagham khi mhi'woor duu'duu mwopp kabhan kaah'zoo. 13Satt mwopp le, “Nyi a rih-ran le, ‘Luh keena p'ee kwed a luh dhangNaan,’#21:13 Ish 56:7 weett kihhsheh bhi wu'wunn wu shikhir kihh nyi dheeh a goghod lakham khi watt mwopp.”#21:13 Irm 7:11
14V'ur mhi-vughum kihh kud mwopp kihh ja kihpee nyi diy nhighin kihfur LuhNaan, bhi kihh bar mwopp. 15Dhangg kaarooh prist wu'nan mwopp kihh Mhikamm-w'aar mwopp naah n'an v'ur bii'aapwoo w'u Jesu phi sh'in nyi, kihh rooh zhepp wu'dyeen mwopp kihh shwat waaw nhighin kihfur LuhNaan ni mwopp le, “Hosanna Em khi Dauda,” bhi shaan mwopp k'aa dughur pwetd.
16Bhi mwopp nang phi nyi le, “Kan ghi klihng bii w'u zhepp mhize mwopp phi satt nyi seh maah?”
Bhi Jesu lapp mwopp le, “Ee'h ih klihng o'h. Kan wu khi cham t'ang pee w'u pwoo khi Naan satt diy le,
“ ‘Ghi l'e kwoobpee a pwoo zhepp mwopp,
kihh pwoo zhepp w'u pwoo'yukhur mwopp zag.’ ”#21:16 KwN 8:2,3
17Bhi Jesu yakhal put yet mwopp, bhi dum Betani, dum teer nhighin.
Tihngg koon w'u noott zhepp
(Mar 11:12-14,20-24)
18Tarrbyitt, kaarooh Jesu yakhal Betani p'ee baa'dum khishikhitt Urshalima, bhi kussum laah nyi. 19Naah m'ee tihngg koon kihh yillim dharr pwoo arr, dhangg kaarooh taah dum kug tihngg koon ni bhi kad baah nyi kihh m'ee l'aa mou, a kom kyekk kihh yillim. Bhi satt tihngg koon ni le, “Baah yi p'ee cham la zhepp dyi mou, kooh lee!” Abet bhi tihngg koon ni f'ii.
20Kaarooh zheppkamm khinyi mwopp naah bii mihhseh, bhi aa'phi mwopp. Bhi mwopp nang le, “Hah, lukk a ranggyeh bhi sheep ni shikhir f'ii kihhshe abet ayeh?”
21Bhi Jesu pring mwopp le, “Ih kihh satt a zeenn wunn, mihh wunn kihh pihhzeenn noott sakkrihkk, bhi baah wunn p'ee sh'in a bii w'u ih sh'in tihng koon mhize kyekk mou, wunn p'ee mak satt bwumm mhize wu le, ‘Yi yakhal, dum yi taah dhighin kur'am,’ bhi bii w'u wu satt seh p'ee sh'in. 22Mihh wu pihhzeenn, bhi wunn p'ee lapp koohmeeh w'u wu dhang sh'i dhangNaan.”
Mwopp sh'in t'al kaah dhakk khi Jesu
(Mar 11:27-33; Luk 20:1-8)
23Jesu dhel kihfur LuhNaan; bhi kaarooh nyi kaah kamm, bhi prist wu'nan kihh mwoohnan mwopp ja kihpee nyi diy. Bhi mwopp nang phi nyi le, “Ghi satt munn, gha phi sh'in bii mihhse mwopp a sh'i satt mhi wuyeh, a wuyeh pihh pee mhi sh'in mwopp gha?”
24Bhi Jesu lapp mwopp satt le, “Wu'an zag p'ee sh'in m'ee t'al wunn. Mihh wu lapp t'al ni, bhi wu'an zag p'ee satt nyi wunn kooh a'n phi sh'in bii mihhse mwopp a sh'i satt mhi weeh oh. 25Baptisma khi Yohanna, gyet a Naan l'e nyi sh'in nyi aa'h, h'aa kooh gyet a zhepp gurum kyekk mwopp l'e nyi sh'in nyi ayeh?” Bhi mwopp dum bheett orr mhizeh phishag mwopp le, “Mihh mu lapp mu le ‘A Naan gyet l'e nyi,’ bhi nyi p'ee nang nyi pwoo mu le, ‘Dheeh a mihyeh l'e bhi baah gyet wu pihhzeenn Yohanna ni mou?’ 26Mihh mu lapp mu le, ‘A zhepp gurum kyekk gyet mwopp l'e nyi sh'in nyi,’ kai, mu kihh kihkhir mwopp'muun, p'ee mwopp weett m'ang, baah m'ee satt kihhshe, le Yohanna a gu'wanggshiiy.” 27Bhi mwopp lapp Jesu le, “Baah mu man gwooh gyet l'e Yohanna sh'in baptisma ni mou.” Bhi Jesu pring mwopp le, “Wu'an zag p'ee cham satt nyi wunn kooh a'n phi sh'in bii mihhse mwopp a sh'i satt mhi weeh mou.”
Shumpwoo kaah m'ee zhepp mwopp vel
28Jesu satt le, “Ih nang dhak kihhshe 'y. Gyet m'ee gurum nhighin kihh zhepp niy mwopp vel. Gwoh ni dum satt em niy wu'shee le, ‘Dum ghi sh'in dhakk bongg-anab keemu shinn.’
29“L'aa ni lapp pukhun le, ‘Hai daa, a'n p'ee dum nah mou.’ Dhangg l'ang dyi lee, bhi l'aa ni shwan en niy, bhi dum yaghal ni.
30“Puup khi zhepp mhizeh ni dum satt em niy wu'zeh a kihhsheh zag. Em khinyi wu'zeh ni lapp'uwou pukhun a pin'shig gurum le, ‘Uwou, daa, a'n p'ee dum.’ Dhangg yakhal dum mou.
31“T'o, dhighin zhepp w'u vel mhizeh ni mwopp, bhi a m'ee mwopp wu'rangg sh'in bii w'u puup khinyi kihh dh'om?”
Bhi prist wu'nan kihh mwoohnan ni mwopp lapp nyi le, “A l'aa wu'shee ni.”
Bhi Jesu satt mwopp le, “T'o, ih kihh satt a zeenn wunn, mhi-lappwapp kihh shwarabgaa mwopp kaah dhel dhighin dhenglong khi Naan ky'een wunn. 32Wu naah, Yohanna Gu-Baptisma ji p'ee kamm arr shigrett wunn, dhang baah wu pihhzeenn nyi mou, weett kihhsheh bhi mhi-lappwapp kihh shwarabgaa mwopp pihhzeenn nyi. Dhangg kooh bwoonrooh wu naah mwopp pihhzeenn, weett kihhsheh bhi baah wu'wunn wu tu'wapp wu pihhzeenn mou.”
Shumpwoo kaah mhiwapp-maarr w'u bwutdhood
(Mar 12:1-12; Luk 20:9-19)
33Jesu waa satt dyi mwopp le, “Wu lang kom wu, a'n kihh m'ee shumpwoo wu'zeh dyi p'ee satt wunn. M'ee Gubhokk gyet kopp gag m'ee bongg-anab keeniy. Tapp'pee bongg nyi okhor kihh pangg, yakhal bwan tughul laar p'ee dwat am'anab dhighin, yakhal dyik luh-bhonggpee nhighin, bhi wapp bongg-anab ni m'ee mhimaarr mwopp, bhi yakhal mwaan. 34Kaarooh tarr nung khi zhepp'anab l'ang kuss, bhi gwoh ni lop kromm keeniy mwopp lhidum kihpee mhiwapp-maarr ni tihh mwopp lapp zhepp'anab diy lhi'ji riy. 35Dhangg mhiwapp-maarr ni mwopp yak kromm khi gwoh ni, mwopp m'ang m'ee nas, mwopp t'u m'ee, yakhal mwopp vat m'ee kihh pangg. 36Bhi gwoh ni waa lop m'ee kromm w'u mett mwooh sh'ee seh lhidum kihpee mhiwapp-maarr ni mwopp diy. Weett kihhsheh, bhi mwopp sh'in a bii w'u deh mwopp sh'in kromm wu'shee seh, mwopp mhize ni zag. 37Kyess nyi, bhi gwoh ni lop em niy lhidum kihpee mhiwapp-maarr ni mwopp diy, kihh ryeeh le, ‘Ai mwopp p'ee pihhdhess wu'nyi.’
38“Dhangg kaarooh mhiwapp-maarr ni mwopp naah l'aa ni kihh ji, bhi mwopp satt shag le, ‘Dyau'matt oou! A mihhse a gu'sokopp khi gwoh ni, mu tih'tu nyi fyaad tihh mu dheeh diy kaah koppuup khinyi.’ 39A nyi seh, bhi mwopp y'aa l'aa ni lhiput dhighin bongg-anab ni sh'i bhall, mwopp t'u meng seh.
40“T'o, naah mug, mihh g'u bongg-anab ni b'aa ji, bhi a mihyeh a bii w'u nyi p'ee sh'in kihh mhiwapp-maarr mhizeh ni mwopp?”
41Bhi prist wu'nan kihh mwoohnan ni mwopp lapp le, “Ai nyi p'ee twa gurum wu'bis mhizeh ni mwopp sh'i arr w'u shi-shwal, yakhal nyi p'ee wapp bongg-anab ni m'ee mhiwapp-maarr w'u wu'mwopp p'ee pihh ruh shap zhepp'anab mhi g'u bongg-anab ni nyi tarr nung khi anab ni.”
42Bhi Jesu satt mwopp le, “Kan wu khi cham t'ang dhighin Ran'Wubhangg maah? Pee w'u satt le,
“ ‘Pangg w'u mhi'dyik mwopp shiih kihh nyi,
a nyi yakhal dheeh pangg kwang'luh;
a Daah Naan sh'in bii mihhse,
nyi a bii'aapwoo kihpee mu diy.’#21:42 KwN 118:22,23
43“Pee'mhinyi, bhi ih kihh satt wunn, Naan p'ee y'aa dhenglong keeniy lapp kaah wuh, pihh m'ee gurum w'u mwopp p'ee sh'in mihhseh'wurett w'u mw'aan kihh t'ong mhi dhenglong ni. 44Koohweeh w'u mihh pal kih pangg mhize ni, bhi gwoh ni p'ee tih-trep rukhupp-rukhupp; gwooh pangg ni mihh taah kih nyi, bhi pangg ni p'ee biakhas gwoh ni lakhass-lakhass.” 45Kaarooh prist wu'nan mwopp klihng shumpwoo w'u Jesu satt seh, bhi mwopp man le nyi phi kadpwoo a kaah ruh. 46Bhi mwopp y'aa rengg arr w'u tihh mwopp y'aa nyi diy, dhangg mwopp kihkhir dw'uu gurum w'u mwopp nhighin, p'ee gurum ni mwopp m'ang l'e Jesu a gu'wanggshiiy.
ទើបបានជ្រើសរើសហើយ៖
Matiw 21: Chakfem
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation
