1 Ɓakolito 3
3
Ɓabayo ɓʉ Asʉɓɨɨ ɓa kʉ ngbanga
1Inu ɓayoo, ma꞉kwananakɔmʉ ninu kʉyakɨa moni ndʉ ɓombi ngiɓa ɓanʉ 'Ʉtʉma wʉ Asʉɓɨɨ. Ɨkyɛmɨngana, ma꞉nɨyakɨa ndʉ ɓombi ngiɓa ɓa‑zʉ tʉkʉ kʉkpata moni kʉ ɨtaka. Jʉ na‑zʉ tʉkʉ ndʉ ɓana ɓɔɔ ɗɛ ɗɛ ɗɛ akʉ baya ngia yɨ Klisito. 2Ɛmɛ ma꞉ninzo tʉkʉ maɓɛɛ, chʉkɔmʉ idyo yɛɛ ɓʉmbʉmʉ, jʉ ikanzi yɨ idyo ngiinanɨ ya꞉kwananakakɔmʉ ninu. Abana kʉndʉ ɨtakɨ‑takɨ ngiakɛ yambʉkɔmʉ akʉ inu, 3jʉ na‑zʉ tʉkʉ kʉkpata moni kʉ ɨtaka. Nʉ ati ʉndɛnʉ na‑zʉ tʉkʉ nʉ imi yɛɛ ɓɨɓɨ nʉ mangoi. Ajʉ iinanɨ yambʉkɔmʉ‑zʉ kʉpananiso ɓɔ ɨkyananakɨa ngiindɛnʉ ya tʉkʉ yɨ ndʉtʉ, nʉ na‑zʉ tʉkʉ kʉkpata moni kʉ ɨtaka ɓiɛ? 4Ndʉ mombi ati ʉndɛnʉ aɓio kusigo ɓɔ: « Ɛmɛ ma mombi wʉ Pɔlɔ, » wɔmɔ ambusigo ɓɔ « Ɛmɛ ma mombi wʉ Apɔlɔ. » Ajʉ ikanzi yɨ moni ngikʉnanɨ yambʉkɔmʉ kʉpana tʉkʉ ɨkyananakɨa yɨ ɓombi ɓʉ ɨtaka ɓiɛ?
5Apɔlɔ a‑zʉ anɨ? Nʉ Pɔlɔ a anɨ? Isu ka tʉkʉ ɓabayo ɓʉ Asʉɓɨɨ ngiɓa ka꞉nɨpana ɨngbaa yɛɛ nyɨɛ nʉ baya. Mombi kʉ nangana nangana ati ʉndɛsʉ aakyɨa kuu kʉkpatanakɨa tʉkʉ nʉ iya Makʉʉɓɨɨ a꞉munzo. 6Ɛmɛ kʉ ma꞉hʉnaka masɔɔ, Apɔlɔ ambukuchichoko nʉ mepo, ɨkyɛmɨngana tiga Asʉɓɨɨ a꞉kunaiso. 7Kʉ ɓwanɨ, mombi ngia aahʉna masɔɔ nʉ iya aakuchichoko nʉ mepo ɓa tʉkʉ ɨsʉkʉɓwanɨ. Ɨkyɛmɨngana, mombi ngia aakyɨa moni kɔɔ maja ya tʉkʉ Asʉɓɨɨ ngia aakunaiso. 8Mombi ngia aahʉna masɔɔ nʉ iya aakuchichoko nʉ mepo ɓa kʉ ɓuɓomu tʉkʉ kʉ ngbanga. Asʉɓɨɨ a꞊nzo mombi kʉ nangana nangana ʉkʉa kʉkpatanakɨa tʉkʉ nʉ kuu ngiangɔ a꞉kyɨa. 9Jʉ isu ka ɓombi ɓʉ kuu ngiɓa kakʉkyɨa kuu ɨzɔ nʉ ɔɔ Asʉɓɨɨ, inu na watɨnɨ wʉ Asʉɓɨɨ, nʉ na ɨkáa yɨ Asʉɓɨɨ.
10Kʉkpatanakɨa nʉ ɨjɨɔ ngia Asʉɓɨɨ a꞉pananiso ekoo asɛmɛ, ma꞉kyɨa kuu ngbanga ndʉ bʉbʉma ngia aambɨa kʉtɨa lɨkáa, mambʉtɨa 'ʉkʉpa wʉ mukopi. Kija mombi ɔmɔ a꞉ka kʉtɨa ɨkáa ekoo ɔngɔ. Tɔ, mombi kʉ uɓomu ʉkwanana kʉmbɨa iɗo ɓɔ akʉtɨa engo tanɨ. 11'Ʉkʉpa wʉ mukopi ngua wa mungono ɓʉ kpe ʉwɔ tʉkʉ uwa ɓa꞉napɨa jɛnɛ kʉpɛɛ uwa wa Yeso Klisito. Yambʉkɔmʉ nʉ mombi wɔmɔ iya a ikanzi ngia atɨa ɓata 'ʉkʉpa wʉ ɨkáa nga wɔmɔ. 12Mombi akwanana kʉtɨa ɨkáa ekoo ʉ 'ʉkʉpa wʉ mukopi nguʉnanɨ nʉ ɔlɔ, yɛmɔ nʉ uko ngua ɓaatuo nawɔ falanga, yɛmɔ nʉ mukopi kʉ ɨgabʉ, nʉ mɨkakaʉ, yɛmɔ nʉ soi gʉ ɓɔ lanza.
13Akʉ ɓisi ɓʉ 'ʉkɔmbɔ, kuu yɨ mombi kʉ nangana nangana ya꞊pananɨa akʉ ɓʉmba ɓʉ ngbanganya. Kuu yɨ mombi kʉ nangana nangana ya꞊ɓaa amati ʉ dyaa, kija dyaa ngiinanɨ yaɓio ɓisi ongo kʉkpɨma ɓɔ ajʉ kuu yɨ mombi ya ɨkwananakɛ gʉ ɓɔ chʉkɔɔ. 14Ndʉ kuu yɨ ɨkáa ngia mombi a꞉ɨtɨa ekoo ʉ 'ʉkʉpa yambukusioko nʉ dyaa, mombi ɔngɔ a꞊nyɨa nʉ ʉkʉa. 15Ɨkyɛmɨngana, ndʉ kuu yɨ mombi ya꞊sioko amati ʉ dyaa, ambʉkʉkwanana ɓata kʉnyɨa nʉ ʉkʉa nguangɔ. Ɨkyɛmɨngana, ɛyɔ makʉɔngɔ a꞊hɨa hɨaa, aɓio tiga ndʉ mombi ngia ʉɓwanaka akʉ dyaa.
16Ajʉ inu nambakambɨa‑zʉ ɓɔ na ɨkáa yɨ Asʉɓɨɨ, nʉ ɓɔ 'Ʉtʉma wʉ Asʉɓɨɨ wa amati ʉndɛnʉ ɓiɛ? 17Mombi ngia a꞊tambiso ɨkáa yɨ Asʉɓɨɨ, Asʉɓɨɨ a꞊tambiso mombi ɔngɔ kʉ tambisoo. Jʉ ɨkáa yɨ Asʉɓɨɨ ya Tu, nʉ inu na ɨkáa ngiinanɨ.
18Ɨkyɛmɛ yɛɛnɨpɨtɨakɔmʉ. Ndʉ mombi ati ʉndɛnʉ aɓio kʉnana ɓɔ anʉ 'ʉtʉma wɔɔ pimise moni kʉkpatanakɨa nʉ nɨna nga yɨ ɓombi ɓʉ ɨtaka, ʉkwanana‑zʉ kuɓio ndʉ ijangi, ambʉ mbise ɔngɔ ʉnɨtanaka tiga mombi wʉ 'ʉtʉma wɔɔ pimise moni ngua wʉ ingono. 19Jʉ 'ʉtʉma wɔɔ pimise moni ngua wʉ ɓombi ɓʉ ɨtaka ngiakɛ, wa tʉkʉ ɓujangi‑jangi akʉ mesu kʉ Asʉɓɨɨ. Jʉ Mubio kʉ Asʉɓɨɨ kaasigo ɓɔ:
« Asʉɓɨɨ aafa ɓombi ɓʉ 'ʉtʉma wɔɔ pimise moni
kʉ akʉ ipindi ngiindaɓʉ ɓakʉɓɔngɔ. »#Popoko Yɔb 5:13
20Nʉ kaasigo ɓata kʉ ɓɔ:
« Makʉʉɓɨɨ aambɨa itungwio yɨ ɓombi ngiɓa ɓanʉ 'ʉtʉma wɔɔ pimise moni kʉtaa,
aambɨa ɓɔ itungwio ngiindaɓʉ ya tʉkʉ ɨsʉkʉɓwanɨ. »#Popoko Mʉm 94:11
21Kʉ ɓwanɨ, mombi ɔɔɓio nʉ 'ʉtʉma wɔɔ ʉja aka ekoo ʉ ɓombi. Jʉ moni kʉ muɓomu ka tʉkʉ kʉndɛnʉ. 22Yiɓio Pɔlɔ, yiɓio Apɔlɔ, kʉndʉ Pɛtɛlɔ, yiɓio ɨtaka, ʉɓɨɨ wʉ mombi, ingyo, wati wʉ ɨtakɨ‑takɨ nguakɛ, kʉndʉ wati ngua wakʉnɨka. Moni ngikʉnanɨ kʉ muɓomu ka tʉkʉ kʉndɛnʉ. 23Ɨkyɛmɨngana, inu na ɓombi ɓʉ Klisito, nʉ Klisito a wʉ Asʉɓɨɨ.
ទើបបានជ្រើសរើសហើយ៖
1 Ɓakolito 3: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.