Matye Mɛkpa mɛ mɛkɛn
Mɛkpa mɛ mɛkɛn
Matye nakwyal Mbɛɛ Bhaadal ɛ́ étɛp bot ɛ mbyak eYuda. Nyɛ nadi egu Ekwyala ee nadi tɔ ɛbhɛŋ ɛ na mwa ɛ ɛnyɔɛpe. Matye lɛɛ bot ɛ náá, Yezu nazyɛ ɛ́ étɛp ɛzɛsa náá, etɛp ee nakwyalaa tɔ bɛmɛkana menek ɛ neebela ɛsuk. Matye nakwyal ɛ́, é ghɛŋ ekeletyɛ yii mbyak eYuda nazesɔaa tɔ mendjaa mɛ mendjaala mɛ eYuda ɛ. Bɛ nadi ɛ́ tɔ ezɛɛga bot ɛ nadi emyaal náá, bot ɛ membyak mɛ sis sulal pɛ daa lɔɔ ɛ.
Yɛ bɛ Matye ɔɔ, nyɛy ke ɛ́ náá, Yezu ɛ́ Lyoel di elɛɛ nɛ eghɛŋ djas sa Zɛɛb di ewaab nɛ bot ɛ di edum koŋ nɛ Zɛɛb ɔ. Lyoel tak ɛpelyaal ɛzel na bes yii ɛmɛt mɛtiŋ mɛ di tɔ ɛbhɛŋ ɛ na mwa ɛ. Náá, Yezu ɛ́ Mɛsia mɛ eYuda nadi ebwood ɔ. É sok nyɛ di elii dum nɛ ɛyoŋ ɛ di tɔ gwoo ɛ, nyɛ dyeebake ɛ́ náá: Zɛɛb ɛ́ Mɛkoozi, eghɛŋ bɛ pe eezenyen kɔ bɔs.
Mbɛɛ Bhaadal ɛ Matye baazodu ɛ́ ɛzel ɛ wat nɛ bak bɛsɔ bɛlɛl.
Pɛ tɔ ɛzel ɛ tak, Matye nasɛɛg mɛkpa ɛ Yezu ɛ́, tɔ mwoob mɛtɛn: etɛp ee nyɛ nalii kana tɔ mɛlaŋel mɛ etɛn kɛkum ɛlaŋel etɛn nɛ ebá (5–7) ɛ, mɛkpa menek baadjóoaa ɛ́ mɛkpa mɛ kɔ ɛtsok. Ye kwyɛl ɛlyaal ɛ ko kyeed bɛdjekel ɛ Yezu nagoka nɛ ɛkɛ é tak ɛ. Ye nadyeebalyo ɛ́ kɔ ɛsu ɛ ɛdum koŋ nɛ Zɛɛb, dáa bot di egoka nɛ ɛdi nɛ ɛgwakel pak'ɔɔ ɛ, nɛ dáa bɛ di egoka nɛ ɛgwakel bɛ nɛ Zɛɛb'ɔɔ ɛ. Yɛ kabɛ ekwyala ee nakan é ɛlaŋel kam (10) ɔɔ, yenek lii ɛ́ dum nɛ ɛdul ɛ mɛlɔ nɛ mɛlyo étɛp bot aakɛgoola Mbɛɛ Bhaadal ɔ. Yɛ kabɛ mɛkpa mɛ di tɔ ɛlaŋel ɛ kam nɛ elɛl (13) ɔɔ, yenek sɛɛg ɛ́ etɛp ee di elyo bot esa ee di esael é sok di náá, Zɛɛb ɛ́ mɛkoozi ɛ. Tɔ ɛlaŋel kam nɛ etɛn nɛ elɛl (18), yenek lyaal ɛ́ dáa bot di nɛ ghwyil ɛdi é di wat bɛkɛl nɛ bɛdhem tɔ zɛɛga ekeletyɛ ɛ. Yɛ kabɛ ekwyala ee di kan tɔ ɛlaŋel mɛkam-mɛmbá nɛ ená kɛkum mɛkam-mɛmbá nɛ etɛn (24–25) ɔɔ, yenek lyaal ɛ́ dáa bɛdjekel di egoka nɛ ɛbwood mɛgham mɛ mɛsik ɛ.
Ɛsok nɛ bɛ nɛ bela mɛkpa menek, nɛ bhii mɛkpa menek, mɛkana mɛ Mbɛɛ Bhaadal ɛ Matye kaada ɛ́ dáa Yezu nadi etsik bot ɛ, nɛ dáa nyɛ nadi edjɛ mɛdhuu mɛ bot edee ɛ. Ye baakaadaa ɛ́ étɛp ɛpus bot náá, bɛ siiza ɛbuɛpe, nɛ ɛbe ɛ mɛso bɛ nɛ bɛlyoel yii eYuda.
Pɛ mɛkɛn mɛ Mbɛɛ Bhaadal ɛ Matye, nyɛ kaada ɛ́ etɛp e ɛbyel ɛ Yezu, edhɔma ɛ Yezu mot di mɛkoozi mɛ eYuda ɔ. Yɛ ɛ́ kwyala tɔ ɛlaŋel ɛ wat nɛ ɛlaŋel ɛ ebá (1–2). Pɛ mɛsik mɛ Mbɛɛ Bhaadal, Yezu, mɛkoozi mɛ eYuda eedjɛaa epɛ́ɛ e ɛsyee nɛ ɛbemaa é Mɛlaaba, yɛ ɛ́ kwyala tɔ ɛlaŋel mɛkam-mɛmbá nɛ etɛn nɛ ebá (27). Tin Zɛɛb naagomal nyɛ tɔ ɛsyee. Yezu eezɛtel bɛdjekel bɛ nyel. Nyɛ eezɛlwom bɛ, bɛ kɛgoola Mbɛɛ Bhaadal pɛ daa bot ɛ membyak djas kɔ ɛko ɛ bɔs, yɛ ɛ́ kwyala tɔ ɛlaŋel mɛkam-mɛmbá nɛ etɛn nɛ elɛl (28).
Ɛsok nɛ Yezu nɛ byel, nyɛ nadjóoaa ɛ́ Emanuɛl: ye kwyɛl ɛlɛɛ ɛ́ «Zɛɛb ɛ́ nɛ nena» (ɛlaŋel ɛ mɛkɛn, ze mɛkam-mɛmbá nɛ elɛl 1.23). Mbɛɛ Bhaadal Matye sik ɛ nɛ ekɛk ɛ Yezu bak: «Mɛ ɛ́ nɛ nen sam wat mɛlu djas kɛkum dwoo bɔs aakɛsi ɛ» (ɛlaŋel mɛkam-mɛmbá nɛ elɛl, ze mɛkam-mɛmbá 28.20). Yezu ɛ́ Zɛɛb pak bot.
ទើបបានជ្រើសរើសហើយ៖
Matye Mɛkpa mɛ mɛkɛn: bkwNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.