Elōg-Lóma 6
6
Nzoɓan ɛg at ɓɛ́hɛ la Yésus Kilístus
1Á élōgyāŋ, mi lágá pɛ yéé é? Ɓaá, bi kóndyé jā lí niŋle á áɓē á lí ɓɔŋ nɛ́ mikaale mí Ɔ́lolómɛ̄ mí bul é? 2Á mbálɛ kɛ́m! Kasig ɓaá wú á áɓē, nɛ́-láá hɔ́ bi ŋgí niŋlégé pɛ á áɓē é? 3Ɓaá, miníg yég nɛ́ kaa ɓɛ́hɛ bísɛ ɓá ɓaá āt la Yésus Kilístus li kele la nzoɓan ɓaá kuh, náŋ ki nɛ́ ɓaá āt la nyɛmb yɛɛ́ é? 4Li kele la nzoɓan nyí ɓaá kūh, ɓaá wú élɔŋ la nyɛ́, bu jéɓɛ̄ ki élɔŋ la nyɛ́, á li ɓɔŋ nɛ́, kaa ŋguu nyí lipém lí Étāa Ɔlolómɛ̄ ya pāhyɛ́ Yésus Kilístus á póla ɓá ɓá wū, ɓɛ́hɛ ki bi kúh eniŋ ɛ́ péná. 5La mbálɛ, kasig ɓaá āt kɔɔ la nyɛ́, bú wú nyɛmb ɛ ŋga púnan la ɛyɛɛ́, náŋ ki nɛ́ bi ŋga kɛ́ li kuh lí lipahye jé lí ŋga púnan la ɛjɛ́ɛ́. 6Bi sɔ́ŋtánɛ m̀ɓɛɛŋ nɛ́, nlom á mut bi ɓɛ́ɛ́, wá tomlɛ́ á mbásá élɔŋ la nyɛ́, nɛ́ ndí nyíŋ nyuú yāhá miɓé ɛh ɓɛ́ɛ́g ɓé pɛ, la ki nɛ́ bih ɓɛ́ɛ́g ɓé pɛ miyɔ́ŋ mí áɓē. 7Ányúū nɛ, nyɔ́ la nyɔ́ a ŋga wú a ɓógó á ŋgatka nyí aɓé. 8Ndí kasig ɓaá wú élɔŋ la Kilístus, bi lɛ́ mbáki nɛ́ biíg kɛ ki li niŋ elɔŋ la nyɛ́. 9Biíg yí kɔɔ nɛ́, kaa Kilístus a pāhyé á póla ɓá ɓá wū, a ŋgá wú ɓé pɛ, nyɛmb ɛ ŋgá la ɓé pɛ nyɛ́ lí ɓɔŋ lí tɔ̄ jam. 10A wú ányúū li manɛ lí áɓē ŋgele ya ányúū yɔ́ ɛ́sɛ. Ndí nyí vɔ́ŋɔ́ɔ a lɛ á éniŋ, ag niŋ ányúū Ɔlolómɛ̄. 11Nlemlem ki la ɓɛ́nɛ, nyɔŋáŋ ɓɛ́nɛ-mɛ̄n kaa ɓot ɓá wú á yé ɛ́ ŋga légɓe li ɓɔŋ lí áɓē, la kaa ɓot bí ŋga nīŋ ányúū Ɔlolómɛ̄ á ŋ̀atanɛ́ la Yésus Kilístus.
12Ɛ́ ŋgá somlɛ hɔ́ ɓé pɛ nɛ́ aɓé á kanʼyɛ́ nyí nyúū yāná ɛ ŋga wú, jɔ́ nɛ́, miníh óglégé ɓé pɛ kóó yí nyúū. 13Miníh byelénégé ɓé pɛ bijo byáná bí nyúū á lí ɓɔŋ lí áɓē, miníh yaanɛ́gɛ́ ɓé byɔ kaa biɓɔŋlé bí mísɔ̄n míh tɛ́ɛ́ ɓé. Ndí, kaa ɓot ɓá ɓógyéné á nyɛmb li timan á éniŋ, la bijo byáná bí nyúū, bí bí lɛ́ biɓɔŋlé bí mísɔ̄n mí tɛ́ɛ́ sim, miní níŋgí á nsɔ́n á Ɔ́lolómɛ̄. 14Átɔm nɛ́, aɓé á ŋgá ɓɛ́la ɓé pɛ ŋguu nyí li ɓɔŋ lí ɓɛ́nɛ jam, kasig miní sē ɓé pɛ á sí mbéndá, ndí miní niŋle á sí míkaale mí Ɔ́lolómɛ̄.
Li sál ányúū etɛ́l-sim
15Ndí yéé hɔ́ é? Ɓaá, biíg nyɛɛ hɔ́ ja lí ɓɔŋ lí áɓē ányúū nɛ bi sē ɓé pɛ ɓɛ́hɛ á sí likanʼyɛ lí mbéndá, ndí bu ɓɛ́ ja á sí mikaale mí Ɔ́lolómɛ̄ é? Á mbálɛ, kɛ́m! Ɓāh nyɛɛ ɓé ɓɛ́hɛ li ɓɔŋ náŋ! 16Miní ŋgá yí ɓé nɛ kí miníg sále mut kaa miyɔ́ŋ#6.16 1. Ŋyɔ́ŋ (Miyɔ́ŋ): eceg bí ŋga sále mut. 2. Ǹdimí (Mindimí) eceg mut nɛ́ a vá nyɛ́-mɛ̄n á sí likanʼyɛ lí jam., á lí ógle lí nyɛ, ɛnɛ miní lɛ́ míyɔ̄ŋ mí nyɔ́ŋ mut miní ŋga ógle é? Náŋ ag somo li laga nɛ́, miní lɛ́ míyɔ̄ŋ mí áɓē nyú á ŋga óm á nyɛmb, tɔ nɛ́ miní lɛ́ ɓáōgle Ɔlolómɛ̄ nyɔ́ a ŋga tɛ́ɛ́yɛ ɓɛ́nɛ sim. 17Bi tí Ɔlolómɛ̄ mítamlan, átɔm nɛ́ miní ɓɛ́ɛ́ míyɔ̄ŋ mí áɓē, ndí nyí vɔ́ŋɔ́ɔ, maná lɛ́glé yé ɓá yéglɛ́ ɓɛ́nɛ, munú óglé ki yɔ́ la m̀mím wáná ásɛ. 18Maná kūhlɛ́ á ŋgatka nyí aɓé la ɓɛ́nɛ munú yāán míndimí mí étɛ̄l-sim. 19Mag nyɔŋle ŋget á mam mí ŋga lóo á póla ɓot-bí-bínam, á li ɓɔŋ nɛ́ miní sɔ́ŋtánɛ m̀ɓɛɛŋ. Nlemlem kaa miní yaanɛ́ɛ bijo byáná bí nyúū míyɔ̄ŋ mí mísɔ̄n mí nyɛ́gā la mí mí mpuŋgú, misɔ́n mí mí ŋgí óm ɓɛ́nɛ á lí ndɔ́gɓéne lí Ɔ́lolómɛ̄. Nyí vɔ́ŋɔ́ɔ, miní yáanɛ́ byɔ́ míyɔ̄ŋ mí mísɔ̄n mí étɛ̄l-sim yé ɛ́ ŋga yáanɛ ɓɛ́nɛ ɓápūán. 20Eceg miní ɓɛ́ɛ́ míyɔ̄ŋ mí áɓē, miní ɓɛ́ɛ́ kundɛ li ɓen lí lí ɓɔŋ lí yé ɛ́ tɛ́ɛ́. 21Yé hɔ́ maná tombánɛ́ á míŋ misɔ́n é? Nyí lɛn, míg kɔnhanɛ ɓɛ́nɛ mbɔɔla, átɔm nɛ́ lisúg jáɓá lí lɛ́ jā nyɛmb. 22Ndí nyí vɔ́ŋɔ́ɔ, maná kūhlɛ́ á ŋgatka nyí áɓē la ɓɛ́nɛ munú yāán míndimí mí Ɔ́lolómɛ̄. Miníg sál mísɔ̄n mí ŋga yáanɛ ɓɛ́nɛ ɓápūán, lisúg jáɓá ki lí lɛ́ éniŋ éɓem. 23La mbálɛ, nsála á áɓē á lɛ́ nyɛmb, ndí likaale Ɔlolómɛ̄ a ŋga tíi yɛmɛ́ lí lɛ́ éniŋ éɓem yé ɛ́ lɛ́léné á ŋ̀atanɛ́ la Yésus Kilístus, Ɛtáŋɛ wahá.
ទើបបានជ្រើសរើសហើយ៖
Elōg-Lóma 6: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
Elōg-Lóma 6
6
Nzoɓan ɛg at ɓɛ́hɛ la Yésus Kilístus
1Á élōgyāŋ, mi lágá pɛ yéé é? Ɓaá, bi kóndyé jā lí niŋle á áɓē á lí ɓɔŋ nɛ́ mikaale mí Ɔ́lolómɛ̄ mí bul é? 2Á mbálɛ kɛ́m! Kasig ɓaá wú á áɓē, nɛ́-láá hɔ́ bi ŋgí niŋlégé pɛ á áɓē é? 3Ɓaá, miníg yég nɛ́ kaa ɓɛ́hɛ bísɛ ɓá ɓaá āt la Yésus Kilístus li kele la nzoɓan ɓaá kuh, náŋ ki nɛ́ ɓaá āt la nyɛmb yɛɛ́ é? 4Li kele la nzoɓan nyí ɓaá kūh, ɓaá wú élɔŋ la nyɛ́, bu jéɓɛ̄ ki élɔŋ la nyɛ́, á li ɓɔŋ nɛ́, kaa ŋguu nyí lipém lí Étāa Ɔlolómɛ̄ ya pāhyɛ́ Yésus Kilístus á póla ɓá ɓá wū, ɓɛ́hɛ ki bi kúh eniŋ ɛ́ péná. 5La mbálɛ, kasig ɓaá āt kɔɔ la nyɛ́, bú wú nyɛmb ɛ ŋga púnan la ɛyɛɛ́, náŋ ki nɛ́ bi ŋga kɛ́ li kuh lí lipahye jé lí ŋga púnan la ɛjɛ́ɛ́. 6Bi sɔ́ŋtánɛ m̀ɓɛɛŋ nɛ́, nlom á mut bi ɓɛ́ɛ́, wá tomlɛ́ á mbásá élɔŋ la nyɛ́, nɛ́ ndí nyíŋ nyuú yāhá miɓé ɛh ɓɛ́ɛ́g ɓé pɛ, la ki nɛ́ bih ɓɛ́ɛ́g ɓé pɛ miyɔ́ŋ mí áɓē. 7Ányúū nɛ, nyɔ́ la nyɔ́ a ŋga wú a ɓógó á ŋgatka nyí aɓé. 8Ndí kasig ɓaá wú élɔŋ la Kilístus, bi lɛ́ mbáki nɛ́ biíg kɛ ki li niŋ elɔŋ la nyɛ́. 9Biíg yí kɔɔ nɛ́, kaa Kilístus a pāhyé á póla ɓá ɓá wū, a ŋgá wú ɓé pɛ, nyɛmb ɛ ŋgá la ɓé pɛ nyɛ́ lí ɓɔŋ lí tɔ̄ jam. 10A wú ányúū li manɛ lí áɓē ŋgele ya ányúū yɔ́ ɛ́sɛ. Ndí nyí vɔ́ŋɔ́ɔ a lɛ á éniŋ, ag niŋ ányúū Ɔlolómɛ̄. 11Nlemlem ki la ɓɛ́nɛ, nyɔŋáŋ ɓɛ́nɛ-mɛ̄n kaa ɓot ɓá wú á yé ɛ́ ŋga légɓe li ɓɔŋ lí áɓē, la kaa ɓot bí ŋga nīŋ ányúū Ɔlolómɛ̄ á ŋ̀atanɛ́ la Yésus Kilístus.
12Ɛ́ ŋgá somlɛ hɔ́ ɓé pɛ nɛ́ aɓé á kanʼyɛ́ nyí nyúū yāná ɛ ŋga wú, jɔ́ nɛ́, miníh óglégé ɓé pɛ kóó yí nyúū. 13Miníh byelénégé ɓé pɛ bijo byáná bí nyúū á lí ɓɔŋ lí áɓē, miníh yaanɛ́gɛ́ ɓé byɔ kaa biɓɔŋlé bí mísɔ̄n míh tɛ́ɛ́ ɓé. Ndí, kaa ɓot ɓá ɓógyéné á nyɛmb li timan á éniŋ, la bijo byáná bí nyúū, bí bí lɛ́ biɓɔŋlé bí mísɔ̄n mí tɛ́ɛ́ sim, miní níŋgí á nsɔ́n á Ɔ́lolómɛ̄. 14Átɔm nɛ́, aɓé á ŋgá ɓɛ́la ɓé pɛ ŋguu nyí li ɓɔŋ lí ɓɛ́nɛ jam, kasig miní sē ɓé pɛ á sí mbéndá, ndí miní niŋle á sí míkaale mí Ɔ́lolómɛ̄.
Li sál ányúū etɛ́l-sim
15Ndí yéé hɔ́ é? Ɓaá, biíg nyɛɛ hɔ́ ja lí ɓɔŋ lí áɓē ányúū nɛ bi sē ɓé pɛ ɓɛ́hɛ á sí likanʼyɛ lí mbéndá, ndí bu ɓɛ́ ja á sí mikaale mí Ɔ́lolómɛ̄ é? Á mbálɛ, kɛ́m! Ɓāh nyɛɛ ɓé ɓɛ́hɛ li ɓɔŋ náŋ! 16Miní ŋgá yí ɓé nɛ kí miníg sále mut kaa miyɔ́ŋ#6.16 1. Ŋyɔ́ŋ (Miyɔ́ŋ): eceg bí ŋga sále mut. 2. Ǹdimí (Mindimí) eceg mut nɛ́ a vá nyɛ́-mɛ̄n á sí likanʼyɛ lí jam., á lí ógle lí nyɛ, ɛnɛ miní lɛ́ míyɔ̄ŋ mí nyɔ́ŋ mut miní ŋga ógle é? Náŋ ag somo li laga nɛ́, miní lɛ́ míyɔ̄ŋ mí áɓē nyú á ŋga óm á nyɛmb, tɔ nɛ́ miní lɛ́ ɓáōgle Ɔlolómɛ̄ nyɔ́ a ŋga tɛ́ɛ́yɛ ɓɛ́nɛ sim. 17Bi tí Ɔlolómɛ̄ mítamlan, átɔm nɛ́ miní ɓɛ́ɛ́ míyɔ̄ŋ mí áɓē, ndí nyí vɔ́ŋɔ́ɔ, maná lɛ́glé yé ɓá yéglɛ́ ɓɛ́nɛ, munú óglé ki yɔ́ la m̀mím wáná ásɛ. 18Maná kūhlɛ́ á ŋgatka nyí aɓé la ɓɛ́nɛ munú yāán míndimí mí étɛ̄l-sim. 19Mag nyɔŋle ŋget á mam mí ŋga lóo á póla ɓot-bí-bínam, á li ɓɔŋ nɛ́ miní sɔ́ŋtánɛ m̀ɓɛɛŋ. Nlemlem kaa miní yaanɛ́ɛ bijo byáná bí nyúū míyɔ̄ŋ mí mísɔ̄n mí nyɛ́gā la mí mí mpuŋgú, misɔ́n mí mí ŋgí óm ɓɛ́nɛ á lí ndɔ́gɓéne lí Ɔ́lolómɛ̄. Nyí vɔ́ŋɔ́ɔ, miní yáanɛ́ byɔ́ míyɔ̄ŋ mí mísɔ̄n mí étɛ̄l-sim yé ɛ́ ŋga yáanɛ ɓɛ́nɛ ɓápūán. 20Eceg miní ɓɛ́ɛ́ míyɔ̄ŋ mí áɓē, miní ɓɛ́ɛ́ kundɛ li ɓen lí lí ɓɔŋ lí yé ɛ́ tɛ́ɛ́. 21Yé hɔ́ maná tombánɛ́ á míŋ misɔ́n é? Nyí lɛn, míg kɔnhanɛ ɓɛ́nɛ mbɔɔla, átɔm nɛ́ lisúg jáɓá lí lɛ́ jā nyɛmb. 22Ndí nyí vɔ́ŋɔ́ɔ, maná kūhlɛ́ á ŋgatka nyí áɓē la ɓɛ́nɛ munú yāán míndimí mí Ɔ́lolómɛ̄. Miníg sál mísɔ̄n mí ŋga yáanɛ ɓɛ́nɛ ɓápūán, lisúg jáɓá ki lí lɛ́ éniŋ éɓem. 23La mbálɛ, nsála á áɓē á lɛ́ nyɛmb, ndí likaale Ɔlolómɛ̄ a ŋga tíi yɛmɛ́ lí lɛ́ éniŋ éɓem yé ɛ́ lɛ́léné á ŋ̀atanɛ́ la Yésus Kilístus, Ɛtáŋɛ wahá.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL