Nʋnʋgbɩɩ 4

Wa ‑fä Pɩɛlö ‑yä Zään 'sɔ 'Zufʋnyʋaa' Tlobinaa' daa

1‑Maa, Pɩɛlö ‑yä Zään 'sɔ ‑kʋ nyɩkpaa soo dä 'nɩ, 'Cibhisänyʋa ‑yä Laagɔ‑bhutu 'kädʋʋ' 'klʋbɛɛnyʋa' 'kämänyɔɔ, ɩyä Sadisɩɛnyʋa, wa yi 'kʋ ghlä. 2Pɩɛlö ‑yä Zään 'sɔɔ cɩalɩɩ 'mnö nä, kwa ci bhä nynä Zozii ‑glɔɔ 'kuëë. Ɩ ‑kä 'ŋnö nä, waa' 'mnö bhɔɔ mɛɛ‑. 3Wa ‑klä lä Pɩɛlö ‑yä Zään 'sɔ nä, kä wa ŋʋwa ‑jɩɩ'. Sä 'ylʋ yä bhɛlä bhlü nä, wa ‑kʋ ‑mɔɔ ‑aaa 'nɩ zeli yi ze. 4‑Mä nyɩkpaa 'fɩɩn ‑wa poo bhlä Pɩɛlö ‑yä Zään 'sɔɔ cɩalɩɩ 'nyukwli nä, waa' bhutukpä lɩɩ‑ bhä nyaasäsä. Ɩ ‑kä 'ŋnö 'nɩ nyɩkpaa' ‑lʋa ŋoo‑ lä Zozii' 'kʋ nä, waa' ‑zunɔɔ ‑ŋëë yiosä nyɩkpaa' ‑bhɛgö ‑ngbü (5.000).

5Zeli ‑ze ylä nä, Laagɔ‑bhutuu' 'cifinyʋa ‑yä ‑Dɔɔpänyʋa ɩyä ‑Jlämöcɩanyʋa, wa 'wlää‑ Zolizalɛmʋduu' 'wlu. 6'Cibhisänyɔ 'kädɔɔ Anö, ‑yä Kayifʋ, ‑yä Zään, ‑yä Alɛzadlö ɩyä 'Cibhisänyɔ 'kädɔɔ ‑yä ɔɔ' ‑zajɛɛ 'fɩɩn, wa 'wlää‑ 'wlu. 7'Nɩ wa yi Pɩɛlö ‑yä Zään 'sɔ ‑jlëë' ‑lä, 'nɩ wa yiwa 'ylä nynä ‑mä 'bhlʋlɛ‑käänyɔɔ a ‑yamä lä nä, 'päwää' 'cesä a bhlüü‑ bhä 'kʋ 'nɩ a ‑yamänöɔ bhä? ‑Ɔnö 'ŋnö 'mnö a ‑yamänöɔ bhää? 8‑Mä Pɩɛlö Laagɔɔ' Kplɔɔkplɔɔ‑wugɔɔ kwlinöɔ‑ bhä 'sää kpänyɩ 'kʋ, 'nɩ ɔ bhlüü‑ nüwälɩ 'kʋ 'nɩ ɔ yiwa soo, ɔ lä anyɩ 'bhlɩnɛɛ' 'kämänyʋa ‑yä ‑Dɔɔpänyʋa nä, 9'nää ‑a ‑nʋ lä 'bhlʋlɛ‑käänyɔɔ ‑zɩkä nä, aa' ‑zä a yla‑anyɩ lä walɩ 'kʋ. Kä a yla‑anyɩ ‑lä sɩ plöö‑ 'kʋ 'nɩ ɔ ‑yamää lä nä! 10A ni 'yi ‑a! Ɩ ‑ŋwa 'kʋ nynä ‑mä, a yibhë wälɩklënä anyɩ 'fɩɩn, ɩyä 'Yizlɛnyʋa 'fɩɩn. Nyɩkpɔɔ wa laa lä Zozi Klisö 'nɩ ‑ɔ plöö‑ lä Nazalɛtö‑duyuo a 'bhlää‑ lä 'kusuu 'yii 'nɩ Laagɔ ‑gälɩä lä 'kuëë nä, ɔɔ' 'ŋnöö 'mnö nyɩkpɔnɔ ‑yamä lä, 'nɩ ɔ 'nynigo‑ lä ‑lää anyɩ 'fɩɩn 'yikʋ. 11Zoziinɔ, ɔmɔ Laagɔ‑bɔɔgʋʋ sä bhlä. Ɩ ‑jɩjlɔ nynä ‑mä,

Cɛkʋbhëa anyɩ ‑bhiti‑slänyʋa aa' bhɔɔ lä 'mänyɩ‑ nä,

Amää‑ ‑kään ylä ‑bhutuu sä. # 4.11 Ɩ bha Lɔlɔ 118.22.

12Zozii nä, ɔmɔ ‑bhlo 'coo‑ yi lä nyɩkpɔɔ' ‑lɔɔ' nëë' ‑sälɩ mii. ‑Mää 'ylʋzɔɔ nä, 'nɩ ‑ɔnö yɩ Zozii' 'ŋnöö 'mnöö‑ nä, Laagɔɔ' ‑lä 'yigäda‑nyɩkpɔɔ' 'ŋnö 'mnö nyɩkpɔ ‑lɔɔ nëë' ‑sä.

13Mä Pɩɛlö ‑yä Zään 'sɔɔ ciciwälɩɩ ‑kä 'ŋnö 'nɩ 'Zufʋnyʋaa' ‑jɛnyɩɛ 'mnö nyɩkpaa plɛkʋ 'niniwa‑. Wa ni bhä 'yi nynä ‑mä sä Pɩɛlö ‑yä Zään 'sɔ ci bhlä Laagɔwälɩɩ nä, wa ‑känɩ bhä 'zaazɩ 'sɔɔ plɛkʋ. ‑Bhlɛ Pɩɛlö ‑yä Zään 'sɔ, nyɩkpaa ‑yi bhä 'sɩɩ sɔɔ nynä ‑mä waa' bhɔɔ 'bɔɔgʋ ‑yi, ‑mä wa ‑yä Zozii 'sɔ nää‑ bhä 'zaazɩ. 14‑Mä nyɩkpɔɔ wa ‑yamä bhlä nä, wa nio bhlä 'yi 'nɩ ɔ 'nynigo‑ bhɛ lä Pɩɛlö ‑yä Zään 'sɔ yëku nä, waa' bhɛ bʋkʋ ciciwälɩ nii‑. 15Kä wa ‑sonʋwa yɩ nynä ‑mä wa ‑bha ‑jlëë'. 'Nɩ wamä ‑bhlobhlo yi 'nii‑, 16wlä 'nɩ sä ‑a yiwa bhä klää? 'Yiziziogbɩɩ wa ‑nʋ lä nä, Zolizalɛmʋ‑dunʋ 'mnö nyɩkpaa 'fɩɩn nii‑ 'yi, 'nɩ anyɩ ‑mä 'sɩɩ ‑anyɩa nëëdë' nyɩkpɔ 'nɩ ‑lä cɛɛ. 17‑Maa, ɩ ‑ŋwa 'kʋ nynä ‑mä ‑a nʋ saa 'fɩɩn ‑yä, ɩɩ' kplüü' kä ‑kä 'bhlɩɛ 'mnö dää 'fɩɩn ŋëë. Kä ‑a 'gwa lä 'yizlɛ 'kʋ 'ŋʋʋ nynä waa' cɩa ‑läyɩɔ Zozii' 'ŋnöö 'mnö.

18'Nɩ wa yi bʋkʋ Pɩɛlö ‑yä Zään 'sɔ laa, 'nɩ wa yiwa soo‑, wlä aa' ci ‑läyɩɔ bʋkʋ Zozii' wälɩ. Aa' cɩa ‑läyɩɔ 'sɩɩ ɔɔ' 'ŋnöö 'mnö! 19‑Mä, wa cii‑ lä sɔɔ nä, kä Pɩɛlö ‑yä Zään 'sɔ ‑sonʋwa, wlä 'Klüü ‑ɩ ‑ŋwa lä ‑lɔɔ nä, ɩmɩ a laa ci. Anyɩ‑ ‑a ‑la 'ŋʋ bhä 'klʋkpää' ‑a? ‑Mä Laagɔ‑ ‑a ‑la 'ŋʋ bhä 'klʋkpää' ‑a? 20‑Anyɩ nä, ‑aa ‑lä mii‑ 'nɩ ‑a 'gä ‑plɩɩ kʋ! Wälɩɩ ‑lɩɩ ‑a nii‑ lä 'yi nä, 'nɩ sä ‑a nuu lä nä, ‑a yi sɔɔ ci. 21Wa cii‑ lä sɔɔ nä, kä nyɩkpaa 'ŋʋnʋwa bʋkʋ 'yizlɛ 'kʋ. Waa' yɩɔ bʋkʋ gbëgëdë nii‑ ‑yä wa 'kwa gbʋ klaa. 'Nɩ sä 'bhlɩɛ 'mnö nyɩkpaa fään bhɛlä Laagɔ 'ŋnu 'yiziziogbɩɩ' ‑za nä, kä wa ‑tanʋwa 'yi. 22Nyɩkpɔɔ Pɩɛlö ‑yä Zään 'sɔ ‑yamää bhlä plɛkʋ 'niniesaa nä, ɔ ‑kä bhä 'ylʋbɔɔ' gwlɩ 'sɔ 'nɩ ɩ pää‑ 'kʋ.

'Cɔcɩnyʋa bhibhie

23Wa ‑taa ylä Pɩɛlö ‑yä Zään 'sɔ 'yi nä, kwa ‑mʋ waa' 'kʋnämʋnyʋaa' ‑jlëa 'mnö 'nɩ, sä 'Cibhisänyʋaa' 'cifinyʋa ‑yä 'Zufʋnyʋa ‑Dɔɔpänyʋa 'sɔ ‑sonʋwa lä nä, wa yi ‑lɔɔ' 'döö ‑sää. 24Waa' 'kʋnämʋnyʋa nuu‑ lä wälɩɩ nä, kä wa 'jɛnyɩ‑ 'nɩ wa ‑bhibhie, wlä Kwlienyɔ Laagɔ‑, ‑mɔɔ ‑nʋ lä ŋɔkʋ, 'nɩ ‑ɔ ‑nʋ lä ‑dʋdʋkʋ. ‑Mɔɔ ‑nʋ lä jie ‑yä ‑lɩɩ 'fɩɩn‑ ‑kʋɛ lä 'mnö nä, 25‑mɔɔ ŋʋʋ‑ lä ‑naa Kplɔɔkplɔɔ‑wugɔɔ ‑a tötɔ Davidö 'kʋ, 'nɩ ʋ cinöɔ‑ bhlä nëë' nynä ‑mä,

‑Ɔnözä 'nɩ 'ylʋzɔkʋnyʋä 'tɩtɔ bhää?

Wa bhobho 'klüü lɩɩ‑ ‑wʋ lä gba ‑kä nä.

26 'Ylʋzɔɔ' 'loyua ‑yä 'jɛnyɩ.

‑Mɔɔ' 'cifinyʋa yä 'wlu 'wlää.

Wa yä 'jɛnyɩ ‑yä,

Kwlienyɔ Laagɔ ‑yä Klisöɔ 'sɔ,

Wa 'kwä zɔgblö ‑lä. # 4.26 Ɩ bha Lɔlɔ 2.1‑2.

27‑Nʋawlɛɛ 'mnö, ‑mää 'dunʋ 'mnö, kä Elodö Atipasö ‑yä Pɔsö Pilatö 'sɔ 'ŋʋʋ‑ 'kʋ. Wa ‑yä lowia ‑yä 'Yizlɛnyʋä 'sɔ 'jɛnyɩ‑ 'nɩ, Zozii ‑n ‑sä 'nɩ ‑n ŋʋʋ‑ lä ɔɔ' dä nä, ‑naa kplɔɔkplɔɔ‑gänʋnyɔɔ, wa ‑lɔɔ zɔgblö. 28'Nɩ ‑naa 'päwaa 'mnö, sä ‑n cii‑ bhɛlä ‑zä nynä wa yi nʋ nä, wa ‑nʋ 'zaazɩ 'sɔɔ. 29‑Pɛpɛɛ' nä Kwlienyɔ‑, sä wa bhobho lä ‑anyɩa nyenyi nä, ‑n 'ni yɩ 'sɔɔ 'yi ‑yä, ‑n gbä ‑yä ‑a 'gä pɔlötɛtɛ 'kʋ 'bhlü ‑a 'gä ‑naa ciciwälɩɩ bie! 30‑N gbä ‑yä ‑naa kplɔɔkplɔɔ ‑gänʋnyɔɔ Zozii' 'ŋnöö 'mnö, nyɩkpa yamä ɩyä 'yiziziogbɩ ‑yä ‑daminë 'sɔ nʋɔ.

31‑Mä wa ‑bhɩä ylä bhibhielɩ nä, dä wa 'wlää‑ bhlä 'wlu 'nɩ wa bhibhie bhlä nä, kä ‑lɔɔ ‑tɩtɛ 'nɩ Kplɔɔkplɔɔ‑wugɔɔ kwlii‑ waa' ‑lefɩɩn 'kʋ 'sää kpänyɩ. Ɩ ‑kä 'ŋnö 'nɩ wa ‑kä bhɛ 'tɛtɩ 'nɩ wa ci bhɛ Laagɔwälɩɩ.

'Cɔcɩnyʋa 'wlää‑ waa' kääkäälɩɩ 'kʋ

32'Cɔcɩnyʋa ‑zu bhä ‑mä, waa' ‑lefɩɩn plöö‑ bhä ‑bhlo. Waa' nëëdëë' nyɩkpɔɔ' ci bhɔɔ nynä ‑mä ‑nʋnʋ, ‑amʋ ‑bhlo, 'naa lʋʋ lä! Kä wa ‑känö bhä ‑lɩɩ 'fɩɩn 'kʋ. 33'Nɩ Zozii' lobho lobhonyʋa ‑kä bhä 'sää 'päwä 'kädä, 'nɩ wa lü bhlä ‑dläfʋɛ nynä Kwlienyɔ Zozii ‑yä 'kuëë glɔɔ nä, ɩ gbä bhä 'nɩ, Laagɔɔ' 'nyupälɩ 'kädɩɩ ‑kʋ bhä waa' zëkpëa 'mnö. 34Waa' nëëdë nä, nyɩkpɔɔ' bhɔɔ ‑mɔɔ ‑kʋ 'nɩ, ɔ 'kä bhä lʋʋ bɔɔ. Waa' nëëdëë' ‑lʋa ‑wa ‑kä bhlä 'kälö nä, ɩyä ‑wa ‑kä bhlä ‑bhiti nä, wa ŋʋɩ bhä 'kpä. 'Nɩ ɩɩ' monie wa ni bhlä nä, wa lɛɛ bhä 35Zozii' lobho lobhonyʋa dëlü 'nɩ ɛ dënöɔ bhä. Wa nyɛ bhä nyɩkpɔ nyɩkpɔɔ' sä ɔ ‑ŋwa bhlä 'kʋ nä.

36Naa, nyɩkpɔ ‑bhlo wa lɔɔ bhä Zozɛfʋ, ɔ ‑glö bhä 'Cibhisänyʋa' kläänyɔ. Ɔ ‑glö bhä Siplöbhlɩ 'kʋʋ nyɩkpɔ. Ɔmɔ Zozii' lobho lobhonyʋa bhizie bhlä Banabasö. Banabasö‑ŋnöö, kɩ sä lä ‑zɔɔ nynä ‑mä nyɩkpɔnɔ kɔ ŋʋ nyɩkpa 'tɛtɩɩ'. 37Nyɩkpɔnɔ ŋʋʋ‑ ɔɔ' 'klaa 'kpä, 'nɩ monie ɔ nii‑ lä nä, ɔ ‑lɛɛ lobho lobhonyʋa dëlü.

ទើបបានជ្រើសរើសហើយ៖

Nʋnʋgbɩɩ 4: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2