Nʋnʋgbɩɩ 10

Sezaleeduu' Laagɔ ‑ghla Kɔnɛyö wälɩ 'yii

1'Duu wa laa lä Sezalee nä, ‑mɔɔ' nyɩkpɔ ‑bhlo, ɔmɔ wa laa bhä Kɔnɛyö. Wlomɛɛnyʋa 'sʋjaa ‑zajɛɛ wa laa lä Yitalii nä, ɔmɔɔ‑ 'kämänɩɛ bhlä. 2‑Mä Kɔnɛyö nä, kɔ ŋʋ bhä kpänyɩ Laagɔ 'klʋkpää! Ɔ ‑yä ɔɔ' gbünyʋa 'sɔ ŋʋ bhä Laagɔ 'klʋkpää'. Ɔ klää bhä 'sɩɩ kpänyɩ 'bhlɩɛ 'mnö ŋäzönyʋa. 'Nɩ ɔ bhibhie bhä ylɩɩ 'fɩɩn 'kʋ Laagɔ. 3Ylʋʋ ‑bhlo ‑kʋ ‑lɔɔ, 'sää ‑kugbësää' 'gliyi taa' 'tänyɩɩ, 'nɩ ‑Laagɔzuzu ‑ghlɔ 'yii. Ɔ niu‑ 'sää 'yi wɩa. ‑Laagɔzuzuu ‑plä Kɔnɛyöö 'gbëa 'mnö, 'nɩ ʋ yio soo, ʋ lä Kɔnɛyö‑! 4‑Mä Kɔnɛyö ‑ŋänö ‑plɔɔ 'nɩ ɔ wloo bhɛ ‑Laagɔzuzuu ‑plɩɩ. Ɔ lä Kwlienyɔ‑, wälɩ ‑sa ‑kɛ 'noo? ‑Laagɔzuzuu lä Kɔnɛyö‑, ‑naa bhibhie, ɩyä ‑naa 'nää‑ ‑n nʋ lä ‑ŋäzönyʋa nä, Laagɔ yä 'ɩɩ dä 'kʋ luë ‑mä ʋ 'nö‑ö ‑wʋ 'kʋ bë! 5‑Pɛpɛɛ nä, ‑n lobho nyɩkpa ‑yä wa mʋ Zopeeduu'. Nyɩkpɔ ‑bhlo ‑kʋ ‑mɔɔ 'nɩ wa lɔɔ Simɔɔ, ‑mä wa ‑zienöɔ 'sɩɩ Pɩɛlö. ‑N gbä ‑yä wa sonöɔ ‑yä ɔ yi. 6Nyɩkpɔ ‑bhlo ‑kʋ ‑mɔɔ 'nɩ wa lɔɔ 'sɩɩ Simɔɔ 'nɩ ɔɔ' 'gbëa 'tënö jiee, ‑mä mnäkwi ɔ bhlä. ‑Lɔɔ' nyɩkpɔɔ' daa, ‑lɔɔ Pɩɛlö ‑plä lä 'kʋ.

7'Tänyɩɩ' ‑Laagɔzuzuu ‑soo lä Kɔnɛyö 'nɩ ʋ ‑mʋ ylä 'fɩa nä, kä Kɔnɛyö ‑lobho ɔɔ' ‑gänʋnyʋä 'sɔ. 'Nɩ 'sʋjaa ɔ 'kämä bhlä nä, ɔ ‑gbɩwa waa' lɔɔ ‑bhlo 'kʋ. 'Sʋjäyu 'yɩ nä, kɔ ŋʋ bhä kpänyɩ Laagɔ 'klʋkpää. Kɔ ‑yä Kɔnɛyö 'sɔ 'jɛnyɩ‑ bhä kpänyɩ 'nɩ wa nʋ bhlä lebhe. 8Kɔnɛyö ‑säsänʋwa 'fɩa wälɩɩ, 'nɩ ɔ yiwa Zopeeduu' lobho.

Zopeeduu' Laagɔ ‑ghlä Pɩɛlö wälɩ 'yii

9Zeli ‑ze ylä nä, nyɩkpaa Kɔnɛyö ‑lobho bhlä Zopee' nä, wa ‑kʋ bhä ‑lätee ‑blɔkʋ, ‑mä wa mɛ bhɛ Zopee‑duu yëku. 'Nɩ ‑lɔɔ' 'tänyɩɛ ‑bhlobhlo 'mnö, ‑bhutuu Pɩɛlö ‑kʋ bhlä 'mnö nä, ɔ gblää‑ ʋʋ' ‑gwlɛɛda ‑yä ɔ 'kä bhibhie. 'Ylʋ yä bhɛ yiosä ‑tiin 'kʋ ŋëë. 10‑Lɔɔ' 'tänyɩɩ ‑gbugbe bhlɔɔ bhä nä, ɔ ylä bhɛ nynä ‑mä ɔ 'kä lʋʋ lü. Nä wa ‑kʋ bhɛ ɔɔ' lülülɩɩ pi dä 'nɩ Laagɔɔ' 'päwa kwlinöɔ‑ 'kʋ. 11'Nɩ wälɩ yio 'yi ghlä. Ɔ nii‑ ‑laagɔɔ' 'yi 'nɩ ‑mɔɔ ‑känöɔ 'klʋ. 'Nɩ lʋʋ ‑bha ‑mɔɔ. Ʋ ‑kʋ bhä nynä 'taplee 'nɩ ɛɛ' 'kwëtüü ‑mɔɔnä ‑kä sä. Ɛ kwlii‑ ‑aaa 'nɩ ɛ yi ‑dʋdʋʋ yëku 'mɛ. 12‑Mä 'tapleenɛ 'mnö, mnaa' nü nü nü ‑kʋ bhä ‑mɔɔ. Mnaa' laa ‑a nämnö lä bhɩ ‑mɔɔnä 'yii nä, 'nɩ mnaa' laa‑ ‑a bɩbɛ lä nä, ɩyä ŋɔkʋʋ' nümnüü. 13'Nɩ nuwälɩ yi Pɩɛlö soo, ɩ lä, Pɩɛlö‑, ‑n ‑bha 'kʋ ɩyä ‑n 'bhlä ‑n 'gä lü! 14Pɩɛlö lä ‑ɔ! Kwlienyɔ‑, 'nn ‑läzä 'naa 'gbä lü. Bʋkʋ 'nɩ, lülülʋʋ' lʋʋ‑ ‑kä lä ‑gesi yëku nä, n 'nʋʋ ‑läzä 'naa nënä 'mnö 'ŋʋ!#10.14 'Zufʋnyʋaa' ‑jlämaa 'mnö nä, mnaa' ‑näna ‑kʋ ‑lɔɔ 'nɩ waa' lüa bhɔɔ. Zɛɛ 'sɩɩ Levi 11.1‑47; Eze 4.14. 15'Nɩ nuwälɩɩ yi bʋkʋ ci, ɩ lä lʋʋ' lʋʋ Laagɔ cii‑ lä nynä ‑mä kʋ ‑kplɔɔ nä, ‑naa 'ŋʋʋ ‑lä ‑gesi yëku! 16‑Mä wälɩnɩ ‑ghlɔ 'yi 'ci taa 'fɩa, 'nɩ 'taplee yi ‑laagɔɔ' ‑gblää.

Nyɩkpa Kɔnɛyö ‑lobho lä nä wa yä Pɩɛlöö' daa ŋëë

17‑Mä Pɩɛlö wälɩɩ‑ ‑ghlɔ lä 'yi nä, ɔɔ' 'nui bhɔɔ 'mʋ. Nä, ɔ ylä bhɛ ɔ yëku. Ɔ ‑kʋɩ bhobho dä 'nɩ, ‑lɔɔ' 'tänyɩɛ ‑bhlobhlo 'mnö, nyɩkpaa Kɔnɛyö ‑lobho lä nä, wa yi Simɔɔ' daa bʋkʋ 'ylä, wa ‑kʋ bhä ɔɔ' ‑glënëa nëkʋ. 18Wa ‑ŋëë lä ‑lɔɔ nä, wa laa‑ nyɩkpa 'nɩ wa yi 'ylä wlä ‑mä nyɩkpɔɔ wa laa lä Simɔɔ 'nɩ wa ‑zie lä Pɩɛlö nä, ‑lää ɔ ‑plä bhä 'kʋ ‑a?

19‑Mä ‑lɔɔ' 'tänyɩɛ 'mnö nä Pɩɛlö bhobho bhɛ 'kɔɔkɔ wälɩklëa ‑a ‑ghlɔ lä 'yii nä. 'Nɩ Laagɔɔ' 'Wugɔɔ yio soo‑, ʋ lä nyɩkpa taa ‑yi ‑mää, ‑mɔɔ wa tään lä. 20Nä, ‑n kwli ‑yä ‑n ‑yʋwa mʋ ‑mä, ‑naa 'ylä ‑lä ‑n yëku. ‑Amʋʋ‑ ‑lobhuwa lä. 21'Nɩ Pɩɛlö yi kwli 'nɩ ɔ yi nyɩkpaa soo, ɔ lä nyɩkpɔɔ a tään lä nä, ‑amʋ lä! Anyɩa bʋkʋʋ' 'dö bhää? 22Nyɩkpaa lä Kɔnɛyö mɔɔ‑ ‑lobhu‑anyɩ lä. Ɔ ‑glö Wlomɛɛnyʋaa' 'sʋjaa 'kämänyɔ. Ɔ ‑glö nyɩkpɔɔ' lɔɔ ‑ɔnö nʋnʋgbɩ‑ gëë‑ lä 'yi nä. Ɔ ŋʋ kpänyɩ Laagɔ 'klʋkpää', 'nɩ 'Zufʋnyʋa 'fɩɩn ci ɔɔ' 'nää. Kɔnɛyönɔ 'mɔ kplɔɔkplɔɔ ‑Laagɔzuzu ‑ghlä lä 'yii. Ʋ ‑sonöɔ nynä ɔ yi‑i ‑gʋʋ ‑mä, ‑n ‑kä wälɩ ‑n 'gɔ soo. 23Ɩ ‑kʋ bhɛ lä sɔɔ nä, kä Pɩɛlö ‑gbä yɩ 'nɩ wa ‑plä gbëë'. ‑Lɔɔ wa ‑goo.

Zeli ‑ze ylä nä, kɔ ‑bha 'kʋ, 'nɩ ɔ ‑yʋwa 'sɔ yi mʋ. ‑Mä ɔ ‑yʋwa 'sɔ mʋ lä nä, ‑mɔɔ Zopeeduu' bhelie zio ‑fänöɔ ‑blɔkʋ.

Pɩɛlö ‑mʋ Kɔnɛyöö' ‑gbäsɩɩ

24Zeli ‑ze ylä bʋkʋ nä, ‑lɔɔ wa ‑ŋëë Sezaleeduu'. Kɔnɛyö ‑bɛɛnʋwa bhä nä, ɔɔ' gbünyʋa ‑yä ɔ 'nagwɩa 'titi, ɔ 'wlänʋwa bhä 'wlu. 25Sä Pɩɛlö ‑plä lä 'gää gbëë' nä, kä Kɔnɛyö ‑yio ‑blɔkʋ, 'nɩ ɔ pɔɔ‑ dëlü ‑kokoowli glu 'nɩ ɔ yi 'wlu sä glaa ‑yä ɔ 'kɔ bhɛ bhää. 26Mä Pɩɛlö ‑klɔɔ, 'nɩ ɔ yio 'kʋ bhɛlɩä, ɔ lä ‑n ‑bha 'kʋ! ‑Amʋ nä, n ‑glö 'ylʋzɔkʋnyɔ ‑mɔɔ 'bhisäkʋ. 27Ɔ ‑yä Kɔnɛyö 'sɔ ‑kʋ cidä, 'nɩ ɔ yi ‑bhutuu' plä. Ɔ lɔ wloo nä, nyɩkpa ‑bhutukpä 'wlää‑ ‑mɔɔ 'wlu. 28'Nɩ ɔ yiwa soo, ɔ lä anyɩ 'titi a ‑yi sɔɔ nynä ‑mä 'Zufʋyu, ɔɔ' ‑Laagɔ‑lebhee 'mnö nä, ɩɩ' ‑wʋ 'kʋ ‑ŋwa nynä ɔ ‑yä lowuyu 'sɔ nämnö‑ 'kʋ 'nɩ ɩɩ' ‑wʋ 'sɩɩ 'kʋ ‑ŋwa nynä ‑mä ɔ plä lowuyuu' ‑bhutu ‑zɔɔ. Mä, Laagɔ yä'ä wälɩklë cɩa. Ʋ panö'ö nynä ‑mä 'naa gbäzö ‑lä nyɩkpaa' ɩyä 'naa 'ŋʋ ‑lä nyɩkpɔ ‑gesi yëku nynä ‑mä ɔɔ' ‑wʋ ‑kplɔɔ. 29Ɩmɩɩ‑ ‑kä 'ŋnö 'nɩ a ‑lobho'o lä nyɩkpa 'kʋ 'nɩ n ŋoo‑ 'nɩ n ‑yi lä. Nä, lʋʋ ‑sä 'titi ‑ʋnözä a lä n yi bhä ‑zi 'naa‑? 30Kɔnɛyö lä ɩ nʋ yɩ ylɩɩ ‑taa, 'sää ‑kugbë‑gliyi taa' 'tänyɩɩ', ‑n ‑näsä 'tänyɩnɛ ‑kʋ lä ‑lää nä, n bhibhie bhä ‑mää ‑bhutuu', 'nɩ ‑bla! nyɩkpɔ yi 'kʋ ghlä 'nɩ ɔ yi'i 'yikʋ 'nynigo. Ɔ ‑plä lä 'kwëtii' lɩɩ ‑ɩ lie lä nä. 'Nɩ ɔ yi'i soo, 31ɔ lä Kɔnɛyö‑, ‑naa bhibhie ‑yä ‑naa 'nää ‑n nʋ lä ‑ŋäzönyʋa nä, Laagɔ luë yɩ 'ɩɩ dä 'kʋ ‑mä ʋ 'nö‑ö ‑wʋ 'kʋ bë! 32‑Pɛpɛɛ nä, ‑n lobho nyɩkpa ‑yä wa mʋ Zopeeduu'. Nyɩkpɔ ‑bhlo ‑kʋ ‑mɔɔ 'nɩ wa lɔɔ Simɔɔ, ‑mä wa ‑zienöɔ Pɩɛlö. ‑N gbä ‑yä wa sonöɔ ‑yä ɔ yi. Nyɩkpɔ ‑bhlo ‑kʋ lä ‑mɔɔ 'nɩ wa laa lä 'sɩɩ Simɔɔ nä, ɔɔ' 'gbëa 'tënö jiee, ‑mä mnäkwi ɔ bhlä. ‑Lɔɔ' nyɩkpɔɔ' daa, ‑lɔɔ Simɔɔ Pɩɛlö ‑plä lä 'kʋ. 33Ɩmɩɩ‑ ‑kä 'ŋnö 'nɩ n ‑lobho‑o lä nyɩkpa 'kʋ. Nä, ‑n ‑yi lä nä, ‑n ‑nʋ 'nää. ‑Pɛpɛɛ' nä, ‑anyɩ 'fɩɩn yä‑ä yɩ dëlü 'wlu 'wlää nä, saa 'fɩɩn Kwlienyɔɔ nyɛɛ‑ lä nynä ‑mä ‑n ci nä, ‑n ‑sonö‑anyɩ 'sɔɔ ‑mä ‑a ‑poo 'nyukwli.

Pɩɛlö soo Kɔnɛyöö' daa' nyɩkpaa Laagɔwälɩ

34 Pɩɛlö bhlüü‑ lä nuwälɩ 'kʋ nä, ɔ lä ‑pɛpɛɛ' n nu ylä nynä ‑mä Laagɔ nä, ʋʋ' gbäzö ‑wʋ 'zaazɩ nyɩkpaa'. 35'Ylʋnʋzɔɔ, nyɩkpɔ kä ʋʋ' 'klʋkpää' ‑kä 'nɩ ɔ kä 'yigëgbɩ nʋ nä, kä Laagɔ waa ɔɔ' wälɩ. 36Laagɔ nä, kʋ ‑lä lä 'Yizlɛnyʋä#10.36 'Yizlɛnyʋä nä, Zozii ɔ 'bhunyʋä lä. Wa lʋwa 'sɩɩ 'Zufʋnyʋä. 'dö. 'Nägädöö ‑ɩ nyɛ lä 'kʋ wɔtɔlɩɩ nä, kʋ ‑ghlää Zozi Klisö 'kʋ 'nɩ ɔ ‑sänʋwanyɩ. Zozi Klisö 'mɔɔ‑ plöö‑ lä nyɩkpaa 'fɩɩn Kwlienyɔ. 37Zään Badisö cii‑ lä Laagɔwälɩɩ nä, 'nɩ ɔ ŋʋʋ‑ lä nyɩkpaa 'nyu 'wlu nä, ɩɩ' wälɩɩ 'fɩɩn ‑ɩ plöö‑ lä Galilee‑bhlɩɛ 'mnö 'kʋ nä, 'nɩ ‑ɩ ‑ŋëë lä zudee‑bhlɩɛ 'mnö nä, ‑lɔɔ' wälɩɩ a ‑yii. 38A yi 'sɔɔ nynä Laagɔ nä, ʋ ‑lä Kplɔɔkplɔɔ‑wugɔɔ' 'päwa 'nɩ ʋ kwlienöa‑ Nazalɛtöö' Zozii 'kʋ. ‑Mä Zoziinɔ mʋ bhä daa 'fɩɩn 'nɩ ɔ nʋ bhä nyɩkpa 'nää. 'Nɩ nyɩkpaa 'fɩɩn‑ ‑kʋ bhlä 'Dëvloo' ‑säklöö 'mnö nä, ɔ yamänʋwa bhä. Zozii nä, kä Laagɔ ‑kʋɔ bhä yëku. 39Wälɩɩ 'fɩɩn ɔ ‑nʋ lä 'Zufʋ‑bhlɩɛ 'mnö ‑yä Zolizalɛmʋ‑duu' 'titi nä, ‑anyɩ, ‑a 'nii‑ ɩɩ' dä. Wa ‑bhuo 'kusu 'yii 'nɩ ɔ kuu‑. 40‑Mä ɔ kuu‑ lä nä, tanaylʋʋ 'kʋ kä Laagɔ ‑gbä 'nɩ ɔ ‑glɔɔ 'kuëë, 'nɩ ɔ yi ɔ yëku nyɩkpa pana yä wa 'kɔ 'yi 'ni. 41Ɔɔ' ‑wʋ ɔ yëku nyɩkpaa 'fɩɩn pana‑ ‑mä, ‑anyɩ, ‑anyɩ‑ Laagɔ ‑sä lä 'fɩa tɛɛ nynä ‑mä ‑a lü ‑lɔɔ' ‑dläfʋɛɛ. Ɔ ‑glɔɔ lä 'kuëë nä, ‑anyɩ, a ‑yɔsɔ ‑lüü 'kʋ 'nɩ ‑a 'mnää 'kʋ. 42Kä Zozii ‑sono‑anyɩ nynä ‑mä, ‑a mʋ ‑yä Laagɔɔ' 'Nägädöö, ‑a ‑sänɩ 'bhlɩɛ 'mnö nyɩkpaa ‑yä, ‑a pana nynä ‑mä Zozii 'mɔ Laagɔ ‑sä ‑yä ɔ 'kä 'kudukua ‑yä ‑yäyänyʋä 'sɔɔ wälɩɩ' ‑döö. 43'Plɔfɛtɩnyʋa 'fɩɩn cii‑ ɔɔ' ‑za nynä ‑mä nyɩkpɔɔ' lɔɔ ‑ɔ yi lä Zozii' wälɩɩ ‑nʋawlɛ laa nä, ‑lɔɔ' nyɩkpɔɔ' nyenyii yi cienöɔ ɔɔ' 'ŋnöö 'mnö.

Kplɔɔkplɔɔ‑wugɔɔ kwlii‑ Kɔnɛyöö' 'gbëa 'mnö nyɩkpa 'kʋ

44 Pɩɛlö ‑kʋ ‑lätee cidä 'nɩ, nyɩkpaa 'fɩɩn‑ ‑puo bhlä 'nyukwli nä, Kplɔɔkplɔɔ‑wugɔɔ kwlinʋwa‑ 'kʋ. 45Mä sä nyɩkpa Kplɔɔkplɔɔ‑wʋgɔɔ kwlii‑ lä 'kʋ nä, waa' bhɔɔ lä 'Zufʋnyʋä plöö‑ 'nɩ ‑wa ŋoo‑ lä Kwlienyɔ 'kʋ 'nɩ wa ‑yä Pɩɛlö 'sɔ nää‑ bhlä nä, kä nükpëë' ‑slʋwa. 46Wa ‑poo bhä 'nyukwlii 'nɩ, Kplɔɔkplɔɔ‑wugɔɔ gbä, 'nɩ wa ci bhä lowu‑wälɩ, 'nɩ wa fään bhä Laagɔ 'ŋnu. Ɩ ‑kä 'ŋnö nä, kä Pɩɛlö cii‑ bʋkʋ, 47ɔ lä nyɩkpaa nä, Laagɔɔ' Kplɔɔkplɔɔ‑wugɔɔ wa yʋ 'ni ‑anyɩ 'bhisäkʋ. ‑Pɛpɛɛ' nä, waa' 'nyu 'wlu ‑ŋʋlɩɩ' yɩɔ gbʋ 'kʋ ‑kʋ. Kwa yi lä 'nyie 'nyu 'wlu ŋʋɔ. 48'Nɩ Pɩɛlö yi gbä 'nɩ Zozi Klisöö' 'ŋnöö 'mnö, wa yiwa 'nyu 'wlu 'ŋʋɔ. Ɔ ŋʋwa‑ ylä 'nyu 'wlu nä, kä wa ‑sonöɔ nynä ‑mä ɔ gonʋwa yëku ylɩɩ zioo' ‑za.

ទើបបានជ្រើសរើសហើយ៖

Nʋnʋgbɩɩ 10: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2

ខគម្ពីរពេញនិយមពី
Nʋnʋgbɩɩ 10

ស្ដាប់នូវ Nʋnʋgbɩɩ 10

វីដេអូសម្រាប់ Nʋnʋgbɩɩ 10

ទិដ្ឋភាពទូទៅ៖ កណ្ឌគម្ពីរកិច្ចការ ១-១២

BibleProject

Nʋnʋgbɩɩ 10

ខគម្ពីរពេញនិយមពី
Nʋnʋgbɩɩ 10

ស្ដាប់នូវ Nʋnʋgbɩɩ 10

វីដេអូសម្រាប់ Nʋnʋgbɩɩ 10

ទិដ្ឋភាពទូទៅ៖ កណ្ឌគម្ពីរកិច្ចការ ១-១២

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 10

Nʋnʋgbɩɩ 10

ខគម្ពីរពេញនិយមពី Nʋnʋgbɩɩ 10

ស្ដាប់នូវ Nʋnʋgbɩɩ 10

វីដេអូសម្រាប់ Nʋnʋgbɩɩ 10

ទិដ្ឋភាពទូទៅ៖ កណ្ឌគម្ពីរកិច្ចការ ១-១២

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 10

ខគម្ពីរពេញនិយមពី
Nʋnʋgbɩɩ 10