Mâk 8
8
Njisə̀s ə pfɨtê ghɨ kamse kyàʼ
(Matyò 15.32-39)
1Ə tè nyi tuʼ fîfe kèpî ə shɨŋ nə zɛ, nɔ̂nə ghɨ̀kè ə fɨnə pə̂ zùŋtə̀ ə Njisə̀s ə ngwùŋ. Fɨake e va kə ghənə zhi. È və tɔŋə̂ sechùmtè èpàm sə vəynse, ə pìə sê ghənə nə, 2“Sə̂yn nyîə ko mi sê ghɨ ghɨ̀yn. Kûmə̀ nə ghənə nə̀yn tuʼm̀ m̀ta ghasè ghənə, kyi va fɨake se zhi. 3Ə m pî nə ghənə ndo kwɨlə̂ sə chɨŋ, ə yîghe fɨ ə pɔylê pfɨ endom, kûmə̀ nə yiə ndo ətelùʼ te tyâtè.”
4Chùmtè èpàm sə vəynse ə pfɨfə sê vəyn nə, “Wùə nyiə kàʼa è nji ghayn fɨazhiəve fa elùʼ ashəshə ve se pfɨte əghɨ ətəyn, ghe tsɨ̂ə nyi ə?”
5Njisə̀s ə pfɨfə sê ghənə nə, “Ghàyn kyi èsəyne epɨaynve eshɔ̀ʼ fɛ?”
Ghənə ə pə̀ynsə̀ nə, “Ghàs kyi èsəyne èsɛ̀mbɛ.”
6È və pìə sê nɔ̂yn ə ghɨ nə kɛ nə ke tsɨsə ə chi, è və fiə èsəyne epɨayn vɛ èsɛ̀mbɛ̂, ə fo àzɔ̀ŋnè sê Zhə̀fè ə pɨaʼlə̂ fo, chùmtè èpàm sə vəynse nə ghənə chyate sê ghɨ nə ghɛ. 7Ghənə tè kyi kepî m̀mbwɔ̀tə̀ m̀shyàʼ nyî. Njisə̀s ə fo àzɔ̀ŋnè sê Zhə̀fè, ə fo nə chùmtè èpàm sə vəynse chyate sê ghɨ ətəynghe. 8-9Ghɨ nə ghɨynə tè kɔʼɔ ndùə kam sè kyàʼ, nâʼàpî ndè ə zhiə kolə, chùmtè èpàm sə vəynse ə komtə̂ èpɨaʼle vɛ ə ve faŋ, ve ə lwinə kwàve esɛ̀mbɛ̂. 10Njisə̀s ə pìə nə ghənə ndo kwɨlə̂. Ghənə piə kwɨlə ndò, è və njiə ə ngwùʼ eghaʼâ yî chùmtè èpàm sə vəynse, ə tyaŋə̀ ndûə apàs andaʼa Ndàlàmànutàkè.
Ghɨə Falàsîə kyiŋə chwìə
(Matyò 16.1-4)
11Ghɨə Falàsî ghə pə̀ sè saʼnə̂ ə̀ghɛ yîghə̀ Njisə̀s. Pfɨtə̂ se ghâmə̀ vəyn pîə nə è nəyn ghɛ ekaynə zhîze sə chwìə se tyə̀yn nə È ndò pə̂yn sè Zhə̀fè. 12Njisə̀s ə tɨ̀mnə̀ nyi ə sɔmə, ə pfɨfə nə, “Kûmə̀ ghè ə ngwàʼ zɨnə kyiŋə se fe chwìə? M pîə sê ghàyn səmɔʼ nə, ghâŋ fɨ̂nə̀ nə fe va chwìə.”
13Kə è wàmnè za, ə zà ghənə ə kɛsê njiə ə ngwùʼ eghaʼâ yî chùmtè èpàm sə vəynse, ə tyàŋə engyinə̂ enjwì.
Fèsə̀ʼ fə ghɨə Falàsîfè è fə Ɛlɔ̀tfè
(Matyò 16.5-12)
14Njisə̀s yî chùmtè epàm sə vəynse tè piə njiə ə ngwùʼ ə lɛ̀sə̀ se njì apayn ə kwaŋke. Ə tè nyì ke àpayn àmɔ̀ʼ fumə ngwùʼ èghaʼâ. 15Njisə̀s ə pìə se ghənə nə “Ghàyn e tɔ̂ʼnə̀ kûmə̀ fèsə̀ʼ fɛ ə ghɨə Falàsîghè yî Ɛlɔ̀t kyi ə ghənə əfètəyn.”
16Ghənə e sè kâtə̀ èghɛ ətəynze ə ghənə əfètəyn pîə nə, “È wàmnə̀ nyî kûmə̀ nə ghâsènì kyi va payn ə kwaŋke.”
17Njisə̀s ə kê èghɛ zɛ ə ghənə kâtə̀ ə pfɨfə sê ghənə nə, “Kûmə̀ ghè ə ghàyn wàmnə̀ kûmə̀ àpayn ə kwaŋ kɛ ə ghàyn kyi va ə? Piə e za nyi nə se zaʼâ zôyn ghàyn paʼà nyìəm kê ghɛzə, pa zɨə kê va ə? Kûmə̀ ghè ə ghàyn tɛ ètəmə nyiə? 18Kûmə̀ ghè ə ghàyn kyi shiə, fe va, kyi ètûŋne, zɨə va ə? Se zaʼâ zôyn ghàyn pa pɨ̂əytə̀ va ghɛ nâʼà səkɔs ə? 19Ə tè nyi kə m pɨaʼlə̂ səyne epɨayn vɛ ètwɔ̂yn ə pfɨtə̂ ə̀ghɨ, kam setâyn, ghàyn tè komtə̂ epɨaʼle, və̂ lwinə èkwà èshɔ̀ʼ za ə?”
Ghənə ə pìə nə, “Ə tè nyi ekwà njòse pɛ̀.”
20Njisə̀s ə fɨnə pfɨfə nə, “Ə tè fɨyn nyi kepî kə m pɨaʼle vɛ èsɛ̀mbɛ̂ ə chyâtə̀ sê ghɨ kam sekyàʼ, ghàyn tè komte epɨaʼle ətəyn ə lwiynsə̂ ekwà èshɔ̀ʼ za ə?”
Ghənə ə pìə sê vəyn nə, “Ə tè nyi ekwà èsɛ̀mbɛ̂.”
21Njisə̀s ə pfɨfə sê ghənə nə, “Ghàyn pa nyîəmə̀ zɨə kê va ə?”
Njisə̀s ə tsuʼ wùə e fòfə ə Pètsayndà
22Njisə̀s yî chùmtè èpàm sə vəynse ə pə̀ ə Pètsayndà. Ghɨ yîghe ə pə̀ è wùə se vəyn, mə è və fòf ə chyatə̂ nə è ndəm ghoke ə vəyn ewìyn. 23Njisə̀s ə kyîə vəyn akɔyn, yî vəyn ə fɨə fu ə tə̀ʼ. Ə pə̀ kə è tsɨte tɛ̂m ə və əshi ə ndə̀mə̀ ə̀gho ə vəyn atu, ə pfɨfə sê vəyn nə, “Ò fe ndò fɨa kə?”
24Wùə ə̀təyn ə ndwìsə̀ naynə̂ ə pìə nə, “M fe ə̀ghɨ ghe kyaʼà kə̂ mkâʼ ə m̀ kwìə.”
25Njisə̀s ə fɨnə ndə̂mə̀ kwəynsə̂ ə̀gho ə wùə è fofə nə vɛ əshi, wùə ə̀təyn ə fɛtə̂ naynə̂ shi ə vəynghə zo, è və nyaʼâ sè fɛtə̂ fe tèluʼ. 26Njisə̀s ə pìə nə è kɛse kwɨlə̂, ə pîə se vəyn nə, “Kə kɛse nji ə tə̀ʼ.”
Pità ə tsàyn wùə vɛ Njisə̀s nyi vəyn
(Matyò 16.13-20; Lûk 9.18-21)
27Njisə̀s yî chùmtè èpàm sə vəynse ə ndò ə ndùə ə tèndâʼà tɛ ə te tè nyi apàs endaʼa Kàisalyà Filìpây. Ə pə̀ kə ghənə kwîə ndûə endom, è və pfɨfə sê ghənə nə, “Ghɨghe pîə nə m nyi nde?”
28Ghənə ə pìə sê vəyn nə, “Yîghe pîə nə ò nyi Njɔyn Foə M̀mò, yîghe pîə nə ò nyi fɨ̀aʼtè Èlanjà, yîghe pîə nə ò nyi Fɨ̀aʼtè èghaʼâ zhîzè.”
29Njisə̀s ə pfɨfə sê ghənə nə, “Nâʼà ghàyn pîə nə m nyi nde?”
Pità ə pìə sê vəyn nə, “Ə̀ nyì Ghò Vɛ ə Zhə̀fè chɔʼ ndə̂m.”
30Njisə̀s ə kàynə̀ nə kə ghənə nə̂ tsayn èkyì ə wûə vɛ Zhi nyi və̂yn.
Njisə̀s ə wàmnə̀ kûmə̀ ètsôs ə vəyn è kwu ə vəynze
(Matyò 16.21-28; Lûk 9.22-27)
31Njisə̀s ə zhə̀tə̀ sè zaʼlə̂ ə sechùmtè èpàm sə vəynse nə, “Va wùə kyi se fe ngəʼ èghaʼâ. Ə chəʼse yî ghɨ kɔʼsə nə eshyə̀ ndɛ̂ Fèzhə̀ghe ghaʼâghè, è tyə̀ynsè sə alàŋsè tə vəyn. Ə zhwi vəyn, ə ə̀ nyi ə mtuʼ mta ə è kɛse zômə̀.” 32Njisə̀s ə wàmnə̀ paynsə̂ sê ghənə nyi kè sə ashìŋə̀, Pità ə shìyntə̀ fɨə ndûə è vəyn epàm, ə zɔ̂. 33È və kə̀mnə̀ ə naynə̂ sechùmtè èpàm sə vəynse, ə zɔ̀ sê Pità ə pìə nə, “Ndo ə mì əshi ə Satàyn! Ò kyi va kwàʼtè ə Fezhə̀zè, ò kwàʼtə̀ kə kə wùə.”
34Njisə̀s ə tɔŋɔ ànɔ̂yn ə ghɨ̀ kɛ è chùmtè èpàm sə vəynse ə pìə sê ghənə nə, “Ə̀ kɔ̀ŋɔ pindè se chùmtə̀ mi, è və màʼà ngɨŋ ə vəyn ə pɨàʼà awâmnè ə vəynke ə chùmtə̀ mi. 35Kûmə̀ nə ə mɔ̀msè pîndè se sɔza ngɨŋə̂ vəyn ə è kwu, mə ə kwu pindè kûmə̀ mi è tom èchùŋ zɨ̂mè, ə è ndam faŋ. 36Wùə za kàʼa è zhi nâʼà ghè ezhoghɛ è kyi ke mbi ekɨ̂m pîza ə njisə̀ ngɨŋə̂ vəyn ə? 37Wùə za kàʼa è fo nâʼà ghè se kɛsə kyîə ngɨŋə̂ vəyn ə? 38Ə nâʼà pîndè vɛ è ghomə kûmə̀ mi è zaʼlê zɨme əghɨ mbighe əshi ghɛ ə pomə va Zhə̀fè, ə Vâ wùə tə pɔŋ ghomə̂ kûmə̀ vəyn ezhoghɛ è kɛse pə̂yn əfètə̂ èpomsê ə Pɨ̀a vəynze yî tsì sə vəynse ŋwaʼase.”
ទើបបានជ្រើសរើសហើយ៖
Mâk 8: bfm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល