Mâk 6
6
Ə paʼà pomə̂ Njisə̀s ə Nazalɛ̀t
(Matyò 13.53-58; Lûk 4.16-30)
1Njisə̀s ə ndò fumə ə kɛsə̂ kwɨlə̂ ə tɔ̂ŋ zɛ è tè fɨ ətəyn, yîghə̀ chùmtè èpàm sə vəynse. 2Tuʼve ə zo etuʼ endaʼ ə ghənəvè, è və ndùə zhə̂tə̀ se zaʼlê ə ndɛ àtsɨ̂ynte. Ghɨ ə tsɨə ghɛ ə tè zɨtə zaʼlê ətəyn e nyi è kaynze piə nə, “Wùə vɨ̂nə fɨ ghayn èghɛ ghɨyn ə? Ə̀ tè fo ndè kyi etɔf eghaʼâ zɨ̂nə̀ sê və̂ ə? È kwì zayn sə̂ mɔ̂mə̀ ə̀ghɛ ə kayntə ghɨyn ə? 3Piə ə nyi va wùə vɨ̂yn ə è kwìə kɔmə fɨa və? Pîə nyi vâ Mèli? Piə ghɔnyì ə vəynghe nyi Njə̂m, è Njosɛ̀f, è Njondàs, è Shimùyn? Piə ghɔnyì ə vəynghe zənə ndamə ə ghâsènì əfètəyn nə?” Kûmə̀ zamə ghənə zhə̀tə̀ sə̂ pànə̀ vəyn.
4Njisə̀s ə ke pì sê ghənə nə, “Ə ndamə ngɨmnə̂ fɨ̀aʼtè ə Fèzhə̀ nâʼàpî ghayn, ə̀ tsɛ̂ kə va elùʼ vɛ ə è fɨ ətəyn. Ghɨ ə ghənə ghə tɔ̂ŋ ghè è ghɨ vəyn ghe sas ə ndɛ nə̂ ngɨmnə̂ va vəyn.”
5Njisə̀s paʼà tiəmə̂ fɨnə kyîə èndom se nə̀yn eghɛ ekayntəze fu, ə tsɛ̂ kə va nə è ndəm gho əghɨ zafəghe ewìyn ə shyàʼ nyi, ghe ə tɛ. 6Njisə̀s ə fe kə ghənə tè kyi va pomə̂zè nyi è kaynze.
Njisə̀s ə tom chùmtè èpàm sə vəynse njò sepɛ̀
(Matyò 10.5-15; Lûk 9.1-6)
Njisə̀s ə ndò kwîə zaʼlə̂ ndûə ə̀ghɨ ə setə̀ʼ shise sɛ ə se paʼsə̂ fu. 7È və tɔŋɔ chùmtè èpàm sə vəynse njòse pɛ̀ ə tomə ghənə, kè ə pɛ̀ ə pɛ̀, ə fɨnə fo àtyaʼ sê ghənə nə ghənə ə chumə̀ fɨsə̂ sèzuʼ sepise ə ghɨghə mwìyn. 8-9È və pìə kəpî sê ghənə nə ə piə ndûə ndò, kə wùə nə̂ nji àfɨa ə̀ tsɛ kə va mbàŋ è pfɨ sə ghòlse, nə kə wùə nə̂ nji àfɨa ə zhike, kə wùə nə nji shəyn, kə wùə nə ndəm èkɛ ə vəyn ə shəyn, kə wùə nə nji sèndzɨs sepɛ̀. 10È və pîə kəpi sê ghənə nə, “Ə ghàyn nji ə tə̀ʼ, ə pɨŋə nâʼàpî ə ndɛ èkè, ə fi ghàyn, ghàyn ə ndamə kə fumə ndɛ nâʼà kə ghàyn tə ndo fu ə tə̀ʼ. 11Ghànə ndùə ə tɔ̂ŋ, ə tə nə ə fiə ndzɨsə̂ va ghàyn, ə tə nə ə zɨtə̂ va ghɛ zɛ ə ghàyn pìə, ghànə ndò fumə. Ghàyn pìə ə ndô ndò, ghànə puʼə sètsɨm saynse sê ghənə, se nə̀yn nə ke nə pîə ghənə ə faŋ sê ghənə.”
12Ghənə ə fɨə, zaʼlə̂ nə ghɨə kwiyne ə ghənə ə sepi. 13Ghənə tè chùm fɨsê pamə̂ tə satàyntè ə ghɨghə mwìyn, ghe tsɨ̂ə kə nyi ə fɨnə kɨmnə ə̀ghɨ ezafə ghe tsɨ̀ə kə nyi, ə tsuʼə ghənə.
Ekwuə Njɔyn fo m̀mòze
(Matyò 14.1-12; Lûk 9.7-9)
14Ghɨghe ə zɨə ə̀ghɛ ghɛ ə Njisə̀s tè nə̂ luʼte tekɨ̂m, fɔ̀yn Ɛlɔ̀t ə pɔŋɔ zɨə. Ə tè nyi za, ghɨghe kwîə pîə nə ə nyi Njɔyn Fo M̀mò kə è kɛse zômə̀, nə za nyi eghɛ zɛ ə è kyi tyaʼa sə̂ nə̂ ə̀ghɛ nə ghɨnə̀ nyi.
15Ghɨ nə ghɛ ə pìə za, yîghe pîə nə, ə nyi fɨ̀aʼtè Èlanjà kə è kɛse pə̀yn.
Yîghe tè piə nə ə̀ nyi fɨ̀aʼtè zhîzè ə è tè nyi etuʼ əshi.
16Ɛlɔ̀t ə zɨə zâ ə pìə nə, “Ə̀ nyi Njɔyn Fo M̀mò səmɔʼ. Mə tè nə̀yn, ə kwə̀ àtuə vəynke, pîza è və fɨnə zômə̀!” 17Ə nyi za, mə ə tè tom vəyn ghɨə nə kyi Njɔyn Fo M̀mò ə kol vəyn ə fa ə ndɛ ə̀chaʼ. È tè nəyn za kûmə̀ nə è tè nyi mə è və njì Ɛ̀londyàs zhwîə ànyìə vəyn Filìp, sə və zhwi 18Njɔyn Fo M̀mò ə faŋə ngwəʼtə̂ kə sê vəyn nə, “Ò nə̀yn ghɛze, saʼze pomə̂ va kə ò malə zhwîə ànɛ̂!”
19Ɛ̀londyàs ə kyîə faŋsə̂ vəyn Njɔyn endwɔ̀, kyiŋə èndom se zhwiə vəyn, pîza fe va, kûmə̀ Ɛlɔ̀t 20Ɛlɔ̀t tè nyîə fànə̀ kə̂ è tè ke nə Njɔyn tè nyi wùə chichi, fɨyn nyi èŋwaʼze. È tè pomə̂ tsɛ̂ va nə ə nəyn ghɛ epi sê Njɔyn, kɔ̀ŋɔ̀ kə sə̂ zɨtə̂ ə̀ghɛ ghɛ ə è pìə, nâʼàpî kə è tè zɨtə, ghɛ ətəyn ghe fɨmsə̂ vəyn nâʼà sə ŋaŋ.
21Tukə tsɔ̀fə fetuʼ fife, Ɛ̀londyàs ə kyîə èndom. Ə̀ tè nyi əfetuʼ fɛ Ɛlɔ̀t tè zhiə tuʼ vɛ ə tè piə və ətəyn. Ə fetuʼ nə fɛ mə, Ɛlɔ̀t ə ndàmnə̀ ə̀ghɨ vəynghe ghaʼlə̂ ghə ngômnànə è tuə sesokə̀ʼve è ghɨə ghaʼlə̂ əmɔ̀ʼɔ apàs endaʼ ə Ngalìlîkè. 22Ə fetuʼ nə fɛ, vayn Ɛ̀londyàs ve èzhɔyn ə njiə pə̂ sè pɨnə, zə nə̀ Ɛlɔ̀t yî ghɨ motə pə ə vəynghe e saŋnə̂, è və pìə sê vayn èzhɔyn ə̀təyn nə, “Pfɨf nâʼàpî ghè vɛ ò kɔ̂ŋɔ̀, ə m fo sê ghò,” 23ə fɨnə pîə èkàynə̀m sê vəyn nə, “Ò pfɨf nâʼàpî ghè sê mi, ə m fo sê ghò; ò kɔ̂ŋɔ̀ ə m chyate nâʼàpî àpâs kɨmke ndaʼ kɛ m saʼa ə m fo sê ghò.”
24Vâ ə̀təyn ə fɨə, ə ndùə pfɨfə sê nyìə vəyn nə, “M nə̀ pfɨfə nâʼà ghè se və?”
Nyìə ə pìə nə, “Nduə pfɨf tuə Njɔyn Fo M̀mòke.”
25È və kɛse njiə kə sə ashìŋə̀ ə ndùə pîə sê fɔ̀yn nə, “Fo tuə Njɔyn fo Mmòke sê mi ə tə kɨ èndyiə zôyn.”
26Ghɛ ətəynze ə nə̀ fɔ̀yn è saŋnə̂ va nâʼà sə kɔs, pîza fɨnə kɔ̀ŋɔ̀ va se pofsə̂ etsɨnè ə vəynze sê vayn nə vɛ, kûmə̀ nə è tè nyi mə è və kàyntè ghɛ ətəynze əghɨ motə pə vəynghe əshi. 27È və tomə sokə̀ʼ zhîzè, əfètə̂ sɛ ə se tsɨ̀ŋnə̀ tɔʼ ə pìə nə è ndu pəyn è tuə Njɔyn Fo M̀mòke. Sokə̀ʼ ə̀təyn ə ndùə ə ndɛ ə̀chaʼ ə tsoynə kâ àtu ə Njɔynke, 28ə pə̀ è kəynke ə kɨ èndyiə, ə fo sê vayn zhɔyn ə̀təyn, è və ndùə fo sê nyìə vəyn. 29Ə pə̀ kə chùmtè èpàm sə Njɔynse zɨ ghənə ndùə njìə èpfɨyn ə Njɔyn ə ndùə pfɨ̂mə̀.
Njisə̀s ə pfɨtê ghɨ kam se tâyn
(Matyò 14.13-21; Lûk 9.10-17; Njɔyn 6.1-14)
30Ghɨətom ghɛ ə Njisə̀s tè tom ə kɛsə̂ pə̂ sê vəyn ə tsâ ə̀ghɛ ə̀kɨ̂m ghɛ ə ghənə kwîə nə̂, fɨnə zaʼlə̂. 31Njisə̀s ə pìə sê ghənə nə, “Ghàyn pəyn ə ghâsènì ndu elùʼ e ndətəve ə zɨte.” È tè piə za kûmə̀ nə nɔ̂nə ghɨ̀kè tè mòtə kə nyî pə̂, môtə̀ kə̂ nyi ndô, ghənə e kyi va shîŋə̀ ghənə kə ngɨŋke pî se zhi. 32Ghənə ə njiə ə ngwùʼ èghaʼâ ə ghənə anɔ̀yn ə ndò sè ndûə elùʼ, wùə e va fu.
33Ghɨghe ə fɨnə fe, tsɨ̂ə kə nyî kə ghənə ndûə, ə kê nə ə nyi ghənə, ə fɨnə fɨə kə tɔ̂ŋ sekɨ̂m ə nyɨŋə kə ègholə ə ndùə fɨə sə shi elùʼ vɛ ə Njisə̀s yî chùmtè èpàm sə vəynse tè ndùə. 34Kè kə è tè fɨə pə̂ ə ngwùʼ èghaʼâ, ə fɨnə fe kə ànɔ̂yn əghɨ̀ kɛ, səyn ze sè ko vəyn sê ghənə kûmə̀ kə ghənə tè nyi kə sendzè kiva ngyəyn. È və zaʼlə̂ ghənə èghɛ, ghe tsɨ̀ə kə nyi. 35Shîŋə̀kè e sè tsɛ̂, chùmtè èpàm sə vəynse ə pə̀ ə pìə sê vəyn nə, “Luʼ vɨnə nyi è pamze, mə tuʼe sè chîə pə̂ ndò. 36Pì sê ghɨ ghɨ̀ynə ghənə kɛse nji ndu ə setə̀ʼ sɛ se paʼsə̂, ə zhɔyn fɨazhiəve ə zhi.”
37Njisə̀s ə pìə sê ghənə nə, “Nâʼà ghàyn fo fɨake, ə ghənə zhi.”
Ghənə ə pfɨfə sê vəyn nə, “Piə e za nyi nə ghàs ndu zhɔyn èfɨazhiəve shəynse kɛ sepɛ̀#6.37 Shəynse kɛ sepɛ̀:Ə̀ vɨnə tè nyi ekɛ vɛ ə tè kàʼa ndaʼ wùə èmɔ̀ʼ efɨ̀aʼ əsenjɔŋ se famə ə fo ə ghənə zhi mə?”
38È və fɨnə pfɨfə kə nə, “Ghàyn kyi èsene e pɨaynve e shɔ̀ʼɔ? Ghàyn nayne.”
Ghənə naynə̂, ə pìə nə, “Ve nyi ke e twɔ̂yn è mbwɔ̀ve èpɨ̀a.”
39È və pìə sê chùmtè èpàm sə vəynse nə ghənə nəyn ə ghɨ ətəynghe tsɨsə ə chi ewə̀yn ke enɔ̀yn enɔ̀yn. 40Ghənə ə tsɨsə̂, nɔ̂yn vîvè tè kyi əghɨ ewə̀, vîvè kyi ə̀ghɨ m̀ghɨm tâyn. 41Njisə̀s ə fiə esene e pɨayn vɛ ètwɔ̂yn è mbwɔ̀ vɛ, èpɨ̀a, ə naynə̂ kɔʼsə̂ ekwùtwəyn, ə fo àzɔ̀ŋnè sê Zhə̀fè, ə pɨaʼlə̂ èpɨayn ətəyn ə fo nə chùmtè èpàm sə vəynse chyate sê ghɨ ətəynghe. È və fɨnə njîə embwɔ̀ vɛ èpɨ̀a ə chyatə̂ sê ghɨ ghe ə̀kɨ̂m. 42Ghənə ə zhiə kolə nâʼà ə̀kɨ̂m. 43Chùmtè èpàm sə Njisə̀sè ə komtə̂ èpɨaʼle epɨaynve è èpɨaʼle embwɔ̀vè, və̂ lwinə ekwà njòse pɛ̀. 44Ndômnè ghɛ ə tè zhi fɨazhiə ətəyn tè nyi kamse tâyn.
Njisə̀s ə kwì etûə M̀mò
(Matyò 14.22-33; Njɔyn 6.15-21)
45Kè sə ashìŋə̀, Njisə̀s ə pìə sê chùmtè èpàm sə vəynse nə se njiə ə ngwùʼ èghaʼâ ə se tyaŋ ndu əshi ə Pètsayndà engyinə̂ enjwì. È və faŋə ə pìə nə nɔ̂yn əghɨ̀ kɛ ə kwɨlə̂. 46Kə è wàmnè za, yî ghənə ə tɔŋtə̂, è və ndò ə kɔʼɔ etûə pfɨ̀yn se tsə̀m. 47Tuʼve e sè chîə pə̂, chùmtè èpàm sə vəynse pa nyi fɛ ngwùʼ èghaʼâ əfètə̂ ènjwì, Njisə̀s è pa nyi engyinə̂ və̂yn nɨŋ. 48È və fe ghənə efɨmə se pàʼ ə ngwùʼ kûmə̀ nə fofa tè pə̂ èndomve ə ghənə əshi. Ə tè nyi ə təyn ə̀shi, è və ndò kwiə ndùə etûə m̀mò se fe chùmtè èpàm sə vəynse, ə ndùə tânə̀ ə ghənə ə ngwùŋ sè kyiŋə se tsɛ̀. 49Ghənə ə fe kə è kwìə pə̂ etûə m̀mò ghənə e kwaʼtə̀ nə ə̀ nyi wùəchi, sè puʼə àpɔ̂ŋ. 50Ghənə tè puʼə kûmə̀ nə kə ghənə əkɨ̂m tè fe vəyn fanə̀ sə ŋaŋ.
Kè sə ashìŋə̀, è ve wàmnə̀ ə pìə sê ghənə nə, “Kə ghàyn fayn. Ə̀ nyi mi. Ghàyn kyi təmə.” 51Kə è pì zâ ə njiə tsɨyntə̀ yighə̀ ghənə ə ngwùʼ èghaʼâ, kè sə ashìŋə̀ fof kɛ ə tənə̂ kə ndò. Choze ə zomə ghənə, 52ə nyi kûmə̀ nə ghənə tè pâʼà tɔ̀ʼ ke ghɛ e kayntə zɛ ə è tè nəyn ə pfɨtə̂ ə̀ghɨzè kamse tâyn tè tyə̀nə zəynze. Ghənə e fe kêva.
Njisə̀s ə tsuʼ ghɨghe ə Njɛ̀nɛsalɛ̀t
(Matyò 14.34-36)
53Kə ghənə tyâŋ mɨ̂sè njwîvè ə zaʼâ ə tə̀ʼ ə̀ Njɛ̀nɛsalɛ̀t, ghənə shìnə̀ ndûə sèngwùʼ etipìə tsò ə faŋə̂, 54kə ghənə fɨə pə̂ ə ngwùʼ eghaʼâ nyî, ghɨghe ə fe kê Njisə̀s, 55ə nyɨŋə njiə kə luʼte tèkɨ̂m apàs endaʼ nə kɛ ə pɨ̀aʼtə̀ ə̀ghɨ ghɛ ghe zafə ə tə m̀sə̀yn, ndûə è ghənə nâʼàpî ghayn kə ə zɨ nə Njisə̀s nyi fu. 56Njisə̀s tè ndùə nâʼàpî ghayn, kɨ̀sə ə̀ nyi ə tɔ̂ŋ è tətə̂, kɨ̀sə ə nyi əfètə̂ zə èghaʼâ, kɨ̀sə ə nyi pî ə sembvɨynə̀ sɛ əghɨ pɛ ətəyn, e fɨə ndə̀mə̀ kə əghɨ zafə ə efɨ̀af, e chyatə̂ vəyn nə è za ə ghɨ ezafə kom ke nâʼà èghaŋ ə sendzɨs ə vəynze. Zamə nâʼà ə̀ghɨ zafə ghɛ ə̀kɨ̂m ə tè kôm ndzɨsə vəyn sɛ ə tɛ.
ទើបបានជ្រើសរើសហើយ៖
Mâk 6: bfm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល