Mâk 15
15
Ə ndù è Njisə̀s sê Paylɛ̀t
(Matyò 27.1-2, 11-14; Lûk 23.1-5; Njɔyn 18.28-38)
1Tuʼve ə zo ghɨ kɔʼsə nə eshyə̀ engaŋtəghe, è ghɨ ghaʼlə̂ghè endaʼ, yî tyə̀ynsè sə alàŋsè, è ghɨə sesaʼ ghəkɨ̂m, ə zùŋtə̀ ə kyîə àtsɨ̂ynte. Ghənə ə kolə Njisə̀s è chaʼse ə ndùə fo vəyn ə Paylɛ̀t ə gho. 2Paylɛ̀t ə pfɨfə sê vəyn nə, “Ò nyi fɔ̀yn sê ghɨ Njûs ghə̂?”
Njisə̀s ə pə̀ynsə̀ nə, “E nyi ke kə ò pì.”
3Ghɨ kɔʼsə nə eshyə̀ engaŋtə ghe ghâmə̀ Njisə̀s əghɛ ghe tsɨ̀ə kə nyi. 4Paylɛ̀t ə pfɨfə kwəynsə̂ sê Njisə̀s nə, “Ò pə̀ynsə̀ vâ? Zɨ ghɛ ghɨ̀yn ə ghâmə̀ ghò sə ətəyn!”
5Pîza Njisə̀s ə tàʼa pa pə̀ynsè. Paylɛ̀t e nyi èkaynze.
Ə tsɛ̀sè saʼze nə ə zhwi Njisə̀s
(Matyò 27.15-26; Lûk 23.13-25; Njɔyn 18.39–19.16)
6Nâʼàpî zɨyn ə tè nyì se zhi azhi ə zaʼatsɛke, Paylɛ̀t e kyi se fɨsə̂ wùə ə ndɛ ə̀chaʼ èmɔ̀ʼ vɛ ghɨə kyiŋə. 7Ə̀ tè nyì fu ashìŋə̀, wùə vîve nyi ə ndɛ ə̀chaʼ, e tɔŋtə̂ nə Pàlapàs. È tè nyì yighə̀ ghɨ mə ghe tɛ ètuke sê ngômnàyn ə̀ Lûm, ə nò àngyə̀s ə zhwiə wùə. 8Nɔ̂yn ə ghɨ̀kè ə zùŋtə̀ ə̀ pìə sê Paylɛ̀t nə è fɨse wùə èmɔ̀ʼ ə ndɛ chaʼ kə è ndamə fɨsə. 9Paylɛ̀t ə pfɨfə sê ghənə nə, “Ghàyn kɔ̂ŋɔ̀ nə m fɨse fɔ̀yn əghɨ Njûsə̀ mə?” 10È tè nyîə ke nə ghɨ kɔʼsə nə eshyə̀ ə ngaŋtəghe fo Njisə̀s se vəyn kûmə̀ àghə̀ʼ.
11Ghɨkɔʼsə nə eshyə̀ ə ngaŋtəghe ə chiyntə̂ ànɔ̂yn əghɨ̀ kɛ nə ke pi nə Paylɛ̀t fɨse Pàlapàs. 12Paylɛ̀t ə fɨnə pfɨfə sê ghənə nə, “Ghàyn kyiŋə nə m ghayn ghe è vɛ ə ghàyn tɔŋtə nə fɔ̀yn ə̀ghɨ ə Njûs ghə?”
13Ghənə ə pɨa pîə nə, “Paynte vəyn ə awâmnè!”
14Paylɛ̀t ə pfɨfə nə “Kûmə̀ ghè? È pofse ghe?”
Ghənə ə kɛsə̂ pɨa pîə kə sə ŋaŋ nə, “Paynte vəyn awâmnè!”
15Paylɛ̀t tè kɔ̀ŋə se nə̀yn nə nɔ̂yn əghɨ̀ ətəynke ə saŋnə̂. È və fɨsə̂ Pàlapàs ə ndɛ ə̀chaʼ. È və fo àtyaʼ nə sokə̀ʼse pus Njisə̀s, ə ndu payntê awâmnè.
Sokə̀ʼse nyə̂ʼsə̀ Njisə̀s
(Matyò 27.27-31; Njɔyn 19.2-3)
16Sokə̀ʼse ə njìə Njisə̀s ə njiə è vəyn ezhɔyn ə tɔʼve, ə tɔŋnə̂ zûŋtə̀ sèsokə̀ʼ nâʼà sèkɨ̂m. 17Ghənə ə màʼà sèndzɨs se paŋəse, se fusə̂ sè ndzɨs sə tefɔ̀yntè, ə̂ Njisə̀s ewìyn. Ghənə pɛ àfɔ m̀sòlèndzɔŋke, ə sò ə Njisə̀s atu. 18Ghənə ə zhə̀tə̀ sə̂ pîŋtə̀ vəyn pîə nə, “Pomsê sê ghò ə Fɔ̀ynə̀ ə ghɨ̀ ə Njûsə̀!” 19Ghənə e pusə àtuə ə vəynke è mbàŋ, tsɨlə̂ m̀tɛ̂ ə vəyn ewìyn, ngwuʼə ə̀ ndzɨs kaŋkaŋə̂ tyə̂nə̀ nə ə ngɨmnə ndò vəyn. 20Kə ghənə nyə̂ʼsè mɨ̂sè vəyn, ghənə ə chɔʼɔ sendzɨs sepaŋa sɛ ə vəyn ewìyn, ə kɛsə̂ mâʼà sə vəynse. Ghənə ə njìə fɨə è vəyn se nduə payntê ə awâmnè.
Ə paynte Njisə̀s ə awâmnè
(Matyò 27.32-44; Lûk 23.26-43; Njɔyn 19.17-27)
21Ə tè nyi kə ghənə ndûə, ə kwəynə è wùə vîvè endom, mə tɔŋtə̂ nə Shimùyn. Shimùyn tè fɨ endaʼa Silênzè. È tè nyi pɨ̀a Àlɛ̀ksandà yî Lufùs. Shimùyn tè tsɛ njiə ndûə endaʼ. Sokə̀ʼse ə ke kyî ə vəyn ə pìə nə è pɨaʼa wâmnè ə Njisə̀skè. 22Ə njiə ndùə è Njisə̀s elùʼ e tɔŋtə̂ nə Ngolngotà, mə za nyi, “Eluʼ ewɔf atuve.” 23Ghənə ə ndûə tâ fu, ə fo mlɨ̂ sê vəyn mə ə ndə̀m fuve ətəyn, e tɔŋtə̂ nə mâyl. Pîza, è və tə nə è mɨə va. 24Ghənə ə tɨmə pə̀ʼ se chàtè ə sendzɨs sə vəynse. 25Ə̀ tè nyi pɨsə̀pɨsə̀ ə sechwîə epolə mɔ̀ʼ kə tè paynte vəyn awâmnè. 26Ə nyàʼà èghɛ zɛ ə tè pi nə è pofse ndô apàŋ afɨake, ə payntə̂ ə vəyn etûə awâmnè nə, “Fɔ̀ əghɨ Njûsə̀.” 27-28Ə payntə̂ kəpî ə̀ghɨ ə chɔŋɔ yîghe əpɛ̀ ə Njisə̀s əngwùŋ: èmɔ̀ʼ e nyi ə vəyn ekɔyntwɔve, è və mɔ̀ʼɔ ekɔyn ekôvè.#15.27-28 Ŋwàʼlè sə shi shise ə kwəynsê ndiŋa 28: 28 Kə zɨnə tè kyâyn, ghɛ ghɛ ə tè nyàʼ ə Ŋwàʼlè ə̀ Fèzhə̀ ə kwəynə kə tè nyaʼ. ‘Ə nyàʼ nə ə tə taŋa vəyn əfètə̂ ghɨ̀ ghɛ ghe nə̂ pi.’
29Ghɨghe e tsɛ̂ èndom, nəʼə̀ ètu, sôylə̀ vəyn pîə nə, “Àa! Ò tè pi nə Ò nə̀ pɨ̂ytè Ndɛ Ètsə̀mə, ə Ò kɛse pɛ sə mtuʼ mta! 30Sɔzà ngɨŋ zɛzè zôyn ə tso pə̂ fɛ awâmnè!”
31Ghɨkɔʼsə nə eshyə̀ ngaŋtəghe, è tyə̀ynsè sə alàŋsè e nyə̂ʼsə̀ kəpî Njisə̀s, pîə nə, “È nyiə tè sɔzâ ə̀ghɨ, va se sɔzà ə ngɨŋə̂ vəyn. 32Ghâsènì fe vɛ Zhə̀fè chɔʼ, ə fɔ̀yn ə̀ghɨ̀ Isìlâyghè, ə è tso pəyn awâmnè zôyn, ə ghâsènì sê pomə Vəyn.”
Ghɨ echɔŋə ghɛ ə tè paynte awâmnè ə Njisə̀s etipì e pɔŋɔ sôylə̀ kəpî Vəyn.
Njisə̀s ə kwu
(Matyò 27.45-56; Lûk 23.44-49; Njɔyn 19.28-30)
33Kə zhwize kɔʼ lo tso, lɨmke ə kɨlə tèluʼ tekɨ̂m, tə fɨ̀mə̀ sə sechwìə sèta. 34Ə sechwìə sèta, Njisə̀s ə pɨa pîə nâʼà è kyə̀ è tɛ nə, “Èli, Èli, lama sapatanì?” Mə è za pìə nə, “Zhə̀ fɨmfe, Zhə̀ fɨmfe, kûmə̀ ghè ə ò kyiyne miə?”
35Ghɨə mɔ̀ʼɔ ghɛ ə tè tyəm fu ə zɨə ə pìə nə, “Ghàyn zɨte, È tɔŋɔ Èlanjà nə è pəyn tsâmtè vəyn!” 36Wùə èmɔ̀ʼ ə ghənə fètəyn ə nyɨŋə ndûə njîə kwùynchaʼ ə tsɨ̀ə mlɨ̂ me ngwaŋə̂m ə fa ə fekàʼ, ə fo kɔʼsə̂ ndûə ə Njisə̀s echo nə È mɨ. È və pìə nə, “Ghàyn za Vəyn! Ə ghâsènì fe kə Èlanjà nə̀ pə̂ tsosə Vəyn.”
37Njisə̀s ə pɨa chîə ə zhwìsə̀ àzhwìsè e kwuŋsəke.
38Pâŋ ə sendzɨs kɛ ə tè ghaŋse ə Ndɛ Ètsə̀mə ə pàsə̀ pɨ̂asvè èpɨ̀a, se zhə̀tə̀ ekwù se tso fɨ etyə̀. 39Tuə sesokə̀ʼ kɛ ə ke tè tyəm fu ə fe èndom vɛ ə Njisə̀s kwu ətəyn ə pìə nə, “Səmɔʼ, wùə vɨ̀nə tè nyi ke nâʼà Vâ Fèzhə̀!”
40Zəyn yîghe tè nyì fu naynə̂ ə̀ghɛ ghɛ ə ghe tè kyànə sə aghaf. Ə ghənə ə fètəyn tè nyi Mèli Màkndàlɛ̂n, Sàlomè, è Mèli nyìə Njə̂m è tətə̂ yî Njosɛ̀f. 41Zəyn nə ghɨnə tè chùmtə Njisə̀s mə è nyi ə Ngalìlî, tsâmtə̀ Vəyn. Zəyn ə mɔ̀ʼɔ tè nyì fu se tsɨ̀ mə chùmtè pəyn Vəyn ə Njèlusalɛ̀m.
E pfɨ̂mə̀ ə Njisə̀szè
(Matyò 27.57-61; Lûk 23.50-56; Njɔyn 19.38-42)
42-43Wùə vîvè tè nyì e tɔŋtə̂ nə Njosɛ̀f. E tè ndò pə̂yn ə tə̀ʼ ə̀ Àlimàtiyà. Vəyn Njosɛ̀f tè nyi wùtwɔ əfètə̂ atsɨ̀ynte əghɨ̀ eghaʼâkè endaʼ. È tè ndamə lɨmtə̂ kə àshîŋə̀ kɛ ə fɔ̀yn ə Fezhə̀vè tə pə̂ ətəyn. Kə ə̀ tè se nyi fètuʼ fe pɨaʼtəfe (etuʼ endaʼ), e və kolə ə̀təm ə ndùə fe Paylɛ̀t ezhwikwɨlə nə è fo pfɨnə Njisə̀svè sê zhi. 44Paylɛ̀t tè nyi è kaynze se zɨ nə Njisə̀s se nyi mə è və kwu. È və tomə tɔŋɔ àtu ə sesokə̀ʼ kɛ ə pfɨfə sê vəyn nə Njisə̀s fə se nyi mə è və kwuə. 45Ə pə̂ kə Paylɛ̀t zɨ nə Njisə̀s ə ndɨŋ kwu, è və fo èpfɨyn ə vəyn sê Njosɛ̀f və Àlimàtiyâ. 46Njosɛ̀f ə zhɔnə àmbɛlaŋ ə koytə̂ è pfɨnə Njisə̀szè ətəyn. È və pfɨ̀mə̀ eshyə̀ zhîze mə ə tsof anayn. Epàm ətəyn è və pɨŋsə̂ èchi eghaʼazè ə fìnə̀ ècho eshyə̀ eghaʼâzè ətəyn. 47Mèli Màkndàlɛ̂n yî Mèli nyìə Njosɛ̀f tè nyîə naynə̂, ə fe eluʼ vɛ ə pfɨ̂mə̀ Njisə̀s ətəyn.
ទើបបានជ្រើសរើសហើយ៖
Mâk 15: bfm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mâk 15
15
Ə ndù è Njisə̀s sê Paylɛ̀t
(Matyò 27.1-2, 11-14; Lûk 23.1-5; Njɔyn 18.28-38)
1Tuʼve ə zo ghɨ kɔʼsə nə eshyə̀ engaŋtəghe, è ghɨ ghaʼlə̂ghè endaʼ, yî tyə̀ynsè sə alàŋsè, è ghɨə sesaʼ ghəkɨ̂m, ə zùŋtə̀ ə kyîə àtsɨ̂ynte. Ghənə ə kolə Njisə̀s è chaʼse ə ndùə fo vəyn ə Paylɛ̀t ə gho. 2Paylɛ̀t ə pfɨfə sê vəyn nə, “Ò nyi fɔ̀yn sê ghɨ Njûs ghə̂?”
Njisə̀s ə pə̀ynsə̀ nə, “E nyi ke kə ò pì.”
3Ghɨ kɔʼsə nə eshyə̀ engaŋtə ghe ghâmə̀ Njisə̀s əghɛ ghe tsɨ̀ə kə nyi. 4Paylɛ̀t ə pfɨfə kwəynsə̂ sê Njisə̀s nə, “Ò pə̀ynsə̀ vâ? Zɨ ghɛ ghɨ̀yn ə ghâmə̀ ghò sə ətəyn!”
5Pîza Njisə̀s ə tàʼa pa pə̀ynsè. Paylɛ̀t e nyi èkaynze.
Ə tsɛ̀sè saʼze nə ə zhwi Njisə̀s
(Matyò 27.15-26; Lûk 23.13-25; Njɔyn 18.39–19.16)
6Nâʼàpî zɨyn ə tè nyì se zhi azhi ə zaʼatsɛke, Paylɛ̀t e kyi se fɨsə̂ wùə ə ndɛ ə̀chaʼ èmɔ̀ʼ vɛ ghɨə kyiŋə. 7Ə̀ tè nyì fu ashìŋə̀, wùə vîve nyi ə ndɛ ə̀chaʼ, e tɔŋtə̂ nə Pàlapàs. È tè nyì yighə̀ ghɨ mə ghe tɛ ètuke sê ngômnàyn ə̀ Lûm, ə nò àngyə̀s ə zhwiə wùə. 8Nɔ̂yn ə ghɨ̀kè ə zùŋtə̀ ə̀ pìə sê Paylɛ̀t nə è fɨse wùə èmɔ̀ʼ ə ndɛ chaʼ kə è ndamə fɨsə. 9Paylɛ̀t ə pfɨfə sê ghənə nə, “Ghàyn kɔ̂ŋɔ̀ nə m fɨse fɔ̀yn əghɨ Njûsə̀ mə?” 10È tè nyîə ke nə ghɨ kɔʼsə nə eshyə̀ ə ngaŋtəghe fo Njisə̀s se vəyn kûmə̀ àghə̀ʼ.
11Ghɨkɔʼsə nə eshyə̀ ə ngaŋtəghe ə chiyntə̂ ànɔ̂yn əghɨ̀ kɛ nə ke pi nə Paylɛ̀t fɨse Pàlapàs. 12Paylɛ̀t ə fɨnə pfɨfə sê ghənə nə, “Ghàyn kyiŋə nə m ghayn ghe è vɛ ə ghàyn tɔŋtə nə fɔ̀yn ə̀ghɨ ə Njûs ghə?”
13Ghənə ə pɨa pîə nə, “Paynte vəyn ə awâmnè!”
14Paylɛ̀t ə pfɨfə nə “Kûmə̀ ghè? È pofse ghe?”
Ghənə ə kɛsə̂ pɨa pîə kə sə ŋaŋ nə, “Paynte vəyn awâmnè!”
15Paylɛ̀t tè kɔ̀ŋə se nə̀yn nə nɔ̂yn əghɨ̀ ətəynke ə saŋnə̂. È və fɨsə̂ Pàlapàs ə ndɛ ə̀chaʼ. È və fo àtyaʼ nə sokə̀ʼse pus Njisə̀s, ə ndu payntê awâmnè.
Sokə̀ʼse nyə̂ʼsə̀ Njisə̀s
(Matyò 27.27-31; Njɔyn 19.2-3)
16Sokə̀ʼse ə njìə Njisə̀s ə njiə è vəyn ezhɔyn ə tɔʼve, ə tɔŋnə̂ zûŋtə̀ sèsokə̀ʼ nâʼà sèkɨ̂m. 17Ghənə ə màʼà sèndzɨs se paŋəse, se fusə̂ sè ndzɨs sə tefɔ̀yntè, ə̂ Njisə̀s ewìyn. Ghənə pɛ àfɔ m̀sòlèndzɔŋke, ə sò ə Njisə̀s atu. 18Ghənə ə zhə̀tə̀ sə̂ pîŋtə̀ vəyn pîə nə, “Pomsê sê ghò ə Fɔ̀ynə̀ ə ghɨ̀ ə Njûsə̀!” 19Ghənə e pusə àtuə ə vəynke è mbàŋ, tsɨlə̂ m̀tɛ̂ ə vəyn ewìyn, ngwuʼə ə̀ ndzɨs kaŋkaŋə̂ tyə̂nə̀ nə ə ngɨmnə ndò vəyn. 20Kə ghənə nyə̂ʼsè mɨ̂sè vəyn, ghənə ə chɔʼɔ sendzɨs sepaŋa sɛ ə vəyn ewìyn, ə kɛsə̂ mâʼà sə vəynse. Ghənə ə njìə fɨə è vəyn se nduə payntê ə awâmnè.
Ə paynte Njisə̀s ə awâmnè
(Matyò 27.32-44; Lûk 23.26-43; Njɔyn 19.17-27)
21Ə tè nyi kə ghənə ndûə, ə kwəynə è wùə vîvè endom, mə tɔŋtə̂ nə Shimùyn. Shimùyn tè fɨ endaʼa Silênzè. È tè nyi pɨ̀a Àlɛ̀ksandà yî Lufùs. Shimùyn tè tsɛ njiə ndûə endaʼ. Sokə̀ʼse ə ke kyî ə vəyn ə pìə nə è pɨaʼa wâmnè ə Njisə̀skè. 22Ə njiə ndùə è Njisə̀s elùʼ e tɔŋtə̂ nə Ngolngotà, mə za nyi, “Eluʼ ewɔf atuve.” 23Ghənə ə ndûə tâ fu, ə fo mlɨ̂ sê vəyn mə ə ndə̀m fuve ətəyn, e tɔŋtə̂ nə mâyl. Pîza, è və tə nə è mɨə va. 24Ghənə ə tɨmə pə̀ʼ se chàtè ə sendzɨs sə vəynse. 25Ə̀ tè nyi pɨsə̀pɨsə̀ ə sechwîə epolə mɔ̀ʼ kə tè paynte vəyn awâmnè. 26Ə nyàʼà èghɛ zɛ ə tè pi nə è pofse ndô apàŋ afɨake, ə payntə̂ ə vəyn etûə awâmnè nə, “Fɔ̀ əghɨ Njûsə̀.” 27-28Ə payntə̂ kəpî ə̀ghɨ ə chɔŋɔ yîghe əpɛ̀ ə Njisə̀s əngwùŋ: èmɔ̀ʼ e nyi ə vəyn ekɔyntwɔve, è və mɔ̀ʼɔ ekɔyn ekôvè.#15.27-28 Ŋwàʼlè sə shi shise ə kwəynsê ndiŋa 28: 28 Kə zɨnə tè kyâyn, ghɛ ghɛ ə tè nyàʼ ə Ŋwàʼlè ə̀ Fèzhə̀ ə kwəynə kə tè nyaʼ. ‘Ə nyàʼ nə ə tə taŋa vəyn əfètə̂ ghɨ̀ ghɛ ghe nə̂ pi.’
29Ghɨghe e tsɛ̂ èndom, nəʼə̀ ètu, sôylə̀ vəyn pîə nə, “Àa! Ò tè pi nə Ò nə̀ pɨ̂ytè Ndɛ Ètsə̀mə, ə Ò kɛse pɛ sə mtuʼ mta! 30Sɔzà ngɨŋ zɛzè zôyn ə tso pə̂ fɛ awâmnè!”
31Ghɨkɔʼsə nə eshyə̀ ngaŋtəghe, è tyə̀ynsè sə alàŋsè e nyə̂ʼsə̀ kəpî Njisə̀s, pîə nə, “È nyiə tè sɔzâ ə̀ghɨ, va se sɔzà ə ngɨŋə̂ vəyn. 32Ghâsènì fe vɛ Zhə̀fè chɔʼ, ə fɔ̀yn ə̀ghɨ̀ Isìlâyghè, ə è tso pəyn awâmnè zôyn, ə ghâsènì sê pomə Vəyn.”
Ghɨ echɔŋə ghɛ ə tè paynte awâmnè ə Njisə̀s etipì e pɔŋɔ sôylə̀ kəpî Vəyn.
Njisə̀s ə kwu
(Matyò 27.45-56; Lûk 23.44-49; Njɔyn 19.28-30)
33Kə zhwize kɔʼ lo tso, lɨmke ə kɨlə tèluʼ tekɨ̂m, tə fɨ̀mə̀ sə sechwìə sèta. 34Ə sechwìə sèta, Njisə̀s ə pɨa pîə nâʼà è kyə̀ è tɛ nə, “Èli, Èli, lama sapatanì?” Mə è za pìə nə, “Zhə̀ fɨmfe, Zhə̀ fɨmfe, kûmə̀ ghè ə ò kyiyne miə?”
35Ghɨə mɔ̀ʼɔ ghɛ ə tè tyəm fu ə zɨə ə pìə nə, “Ghàyn zɨte, È tɔŋɔ Èlanjà nə è pəyn tsâmtè vəyn!” 36Wùə èmɔ̀ʼ ə ghənə fètəyn ə nyɨŋə ndûə njîə kwùynchaʼ ə tsɨ̀ə mlɨ̂ me ngwaŋə̂m ə fa ə fekàʼ, ə fo kɔʼsə̂ ndûə ə Njisə̀s echo nə È mɨ. È və pìə nə, “Ghàyn za Vəyn! Ə ghâsènì fe kə Èlanjà nə̀ pə̂ tsosə Vəyn.”
37Njisə̀s ə pɨa chîə ə zhwìsə̀ àzhwìsè e kwuŋsəke.
38Pâŋ ə sendzɨs kɛ ə tè ghaŋse ə Ndɛ Ètsə̀mə ə pàsə̀ pɨ̂asvè èpɨ̀a, se zhə̀tə̀ ekwù se tso fɨ etyə̀. 39Tuə sesokə̀ʼ kɛ ə ke tè tyəm fu ə fe èndom vɛ ə Njisə̀s kwu ətəyn ə pìə nə, “Səmɔʼ, wùə vɨ̀nə tè nyi ke nâʼà Vâ Fèzhə̀!”
40Zəyn yîghe tè nyì fu naynə̂ ə̀ghɛ ghɛ ə ghe tè kyànə sə aghaf. Ə ghənə ə fètəyn tè nyi Mèli Màkndàlɛ̂n, Sàlomè, è Mèli nyìə Njə̂m è tətə̂ yî Njosɛ̀f. 41Zəyn nə ghɨnə tè chùmtə Njisə̀s mə è nyi ə Ngalìlî, tsâmtə̀ Vəyn. Zəyn ə mɔ̀ʼɔ tè nyì fu se tsɨ̀ mə chùmtè pəyn Vəyn ə Njèlusalɛ̀m.
E pfɨ̂mə̀ ə Njisə̀szè
(Matyò 27.57-61; Lûk 23.50-56; Njɔyn 19.38-42)
42-43Wùə vîvè tè nyì e tɔŋtə̂ nə Njosɛ̀f. E tè ndò pə̂yn ə tə̀ʼ ə̀ Àlimàtiyà. Vəyn Njosɛ̀f tè nyi wùtwɔ əfètə̂ atsɨ̀ynte əghɨ̀ eghaʼâkè endaʼ. È tè ndamə lɨmtə̂ kə àshîŋə̀ kɛ ə fɔ̀yn ə Fezhə̀vè tə pə̂ ətəyn. Kə ə̀ tè se nyi fètuʼ fe pɨaʼtəfe (etuʼ endaʼ), e və kolə ə̀təm ə ndùə fe Paylɛ̀t ezhwikwɨlə nə è fo pfɨnə Njisə̀svè sê zhi. 44Paylɛ̀t tè nyi è kaynze se zɨ nə Njisə̀s se nyi mə è və kwu. È və tomə tɔŋɔ àtu ə sesokə̀ʼ kɛ ə pfɨfə sê vəyn nə Njisə̀s fə se nyi mə è və kwuə. 45Ə pə̂ kə Paylɛ̀t zɨ nə Njisə̀s ə ndɨŋ kwu, è və fo èpfɨyn ə vəyn sê Njosɛ̀f və Àlimàtiyâ. 46Njosɛ̀f ə zhɔnə àmbɛlaŋ ə koytə̂ è pfɨnə Njisə̀szè ətəyn. È və pfɨ̀mə̀ eshyə̀ zhîze mə ə tsof anayn. Epàm ətəyn è və pɨŋsə̂ èchi eghaʼazè ə fìnə̀ ècho eshyə̀ eghaʼâzè ətəyn. 47Mèli Màkndàlɛ̂n yî Mèli nyìə Njosɛ̀f tè nyîə naynə̂, ə fe eluʼ vɛ ə pfɨ̂mə̀ Njisə̀s ətəyn.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល