Деяния 5
5
Ананиянкук, Сапфиранкук
1Та̄ўаңуқ ю̄к а̄тҳа Анания, нулиҳа Сапфира. Акикыхка̄ налиӷныӷа нунами. 2Нулӣӷми лӣсиманӷани аксяқыхка̄ иляңа маним лъңанун пиңулюку. Та̄на сӣпныни тӯныхка̄ апостолытун сюмыӷмини қамахлъюку тӯнилюку писқылъюку. 3Йыӷлыги Петырым а̄птыка̄: «Сяңан қа̄ткысигу Туӷныӷа̄м нанӷӣқулъҳа иқлъыңиқысқылъютын Аглыӷналӷӣгнун Таӷныӷагнун аксяқылъыҳпыгун иляңа маним? 4Сяңан таўатын сюмыҳтаӷа̄мазин? Югнун иқлъыңиқынӷитутын, Кияӷныӷмун иқлъыңиқутын. Акикылъҳилъюку нунан лъпык пиксяӷан, ынка̄м акикақңавгу маниңалъю та̄на пиюкылъыҳпытун пияҳқақсяӷан». 5-6Лыган Ананиям Петр нагалъюку ӯлъҳаҳлъюни туқукақ. Нукалъпигат итыӷлютың қӣпаӷакун ӣмгулъюку югусӣ а̄нулъюку лъӣфқа̄т. Уңипақ Ананиям иқлъыңиқылъҳалъю, туқулъҳалъю миңиткақ, ынка̄м нагақӯткат алиңрӯӷутыҳлъякат.
7Пиңают афлъют атуӷлюки Ананиям туқулъҳаның, нулиҳа ӣтқақ налъюклъюку угини сяматаңа. 8Петырым а̄птыка̄: «Таўатын акитутка̄н акикыстыхӯ нунази?» Сапфирам кӣмсиқа̄: «А̄а». 9Петырым а̄плъя̄тақа̄: «Сяңафси угикулъҳӣгни сюмыҳтаӷа̄мастык нанӷӣқуналюкык Атанӷым Таӷныӷакык? Югыт лъӣвӷикат угихпының қакма мануӷамытут. Лъпыклъю таўатын пилъықа̄тын». 10Таўаниҳлъюхӣнақ лъңалъю ӯлъҳаҳлъюни туқукақ. Нукалъпигат итыӷьялӷӣмың Сапфиралъю та̄ўа туқумалӷӣ, ынка̄м а̄нулъюку угиңан ся̄ӷўакун лъӣфқа̄т. 11Қамахтыңъўа̄ӷлютың ухпықат, қамахлъютыңлъю нагақӯлъҳӣт Ананиямлъю, Сапфирамлъю туқулъҳыхкының алиңрӯӷутыҳлъякат.
Апостолыт Алъя̄ҳлъюхўаҳтилъҳит
12Юлӷутыт қуңаңитни апостолыт алъя̄ҳлъюхўаҳтиҳлъягумаңинақат. Қамахлъютың ухпықатлъю, апостолынилъю қырңуӷутақылӷӣт Храмым мануӷа̄ни а̄тқылӷӣми, Соломоным притворыңани. 13Иўырңа югыт ухпықилъҳилңӯт Иисусымың илясигалңӯт ухпықанун қаюҳлъяк алиңыканиӷақылӷӣт, нақам пиниӷнӣқыхкаңит. 14Иўырңа угля̄пихлъыӷӣт югытлъю, аӷнатлъю ухпықңукаңат Атанық Иисус, ынка̄м ухпықат нулямаңинақат. 15Апостолыт алъя̄ҳлъюхўаҳтилъҳит апалъюқлъюки килъю алңунак қинуюхтӣтың алъиӷӣтхун тагилъюки тумытхун лъӣқыхкаңит. Таўатын пикӣт қаюҳлъяк Петырым наӷуҳтыкаки лю̄рақ таӷныӷаңутылъҳан на̄лъҳунъаюкаки қинуюлӷӣт. 16Ынка̄м Иерусалимымун қантаӷанлыңуӷның нунаның тагиляӷа̄ткақ юлӷун Иерусалимымун. Қинуюхтӣтыңлъю, тама̄кутлъю туӷныӷалгыт илюмыхтыхун тагиткӣт апостолытун, ынка̄м қамахлъютың тагиткӣт на̄лъҳуқӯткат.
Амью̄ткыхкаңит Апостолыт
17Первосвященниглъю, илякулъҳӣт Саддукеит ақинаткат апостолымың 18ынка̄м тугуслъюки канаҳтыстыкӣт анусимиңлъяӷвигмун. 19Иўырңа унугьян яқулган Атанӷым қылъпыҳтыкӣ анусимиңлъяӷвигым амиги. Ынка̄м а̄нулъюки апостолыт пикӣ: 20«Агляӷлюси Храмымун, қамахлъюку апыҳтыху уна нутаӷақ кияҳта̄лъық Иисус Христосыкун аюқылӷӣ». 21Апостолыт қа̄ткыхка̄т яқулык. Аҳтаӷаӷақа̄лъю итыӷлютың Храмымун апыҳтуӷикат.
Первосвященниглъю, илякулъҳӣт қырңуҳтыкӣт Иудеит сӣванлъыӷытлъю, қамахлъюкилъю агӷистыт, агӷиткынъалюки апостолыт. Та̄хкын анусимиңлъяӷвигым умӣлўа̄ӷитнун ақфастыкӣт апостолыт. 22Иўырңа умӣлўа̄ӷыт анусимиңлъяӷвигмун ка̄сялӷӣмың апостолыт авӣтыфтут. Ынка̄м агӷистынун агляӷлютың уңипа̄ткӣт: 23«Анусимиңлъяӷвигмун ка̄сялӷӣкут амигыт маҳқатқуӷўа̄ӷңафтут, кылыңакистытлъю амигнитутыфтут нақам итыӷьялӷӣкут па̄ҳқитыфтуқ!» 24Храмым кылыңакистыңита умӣлгатлъю, первосвященнигытлъю уңипа̄систың кукшиқуткыхкӣт сяматаңи апостолыт. 25Та̄хкын китум итыӷлюни пикӣ: «Та̄кут югыт анусимиңлъяқақсяқыси иңа Храмыми апыҳтуӷӣқут». 26Кылыңакистыт умӣлъкулъҳӣт ақфакӣт апостолыт. Сыӷлытун пимаңилъкаңит, қаюҳлъяк алиңылӷӣт югның Храмымылңуӷның туқунъаюкаңистың милюҳпага̄таҳӣнақ.
27Тагилъюки итҳуткӣт агӷистынун ынка̄м первосвященнигым пикӣ апостолыт: 28«Иныҳтыңъўа̄қақсяӷамси алъямыңлъю апыҳтуӷифқа̄фси А̄тҳакун Иисусым писқылъюси, иўырңа қа̄ткумаңитаҳпысикут! Йыӷлыги алъюлъютың Иерусалимыӷмӣт лӣта̄т апыҳтӯсяҳси, хўаңкуталъю авуткыснақуткаҳпыкут Иисусым туқулъҳанун».
29Петырым кӣмсӣткӣ апостолыт: «Қа̄ткысяҳқақаҳпут Кияӷнық авылӷаӷлюки югыт. 30Қақӯраӷлюку туқутыстыкақаҳси Иисус, иўырңа Кияӷныӷым, сивунымта манигуқӣта уңуваҳтыстыкақа̄ туқулъыӷмың. 31Ынка̄ңам қӯлваӷналюку Иисус аӷынқигныӷмикун ныкыхтыкақа̄ Иглыӷутистыңулюкулъю, Югулиӷистыңулюкулъю. Таўатын пикақа̄ Израилыӷмӣт авутыҳқысяҳқа̄ҳтысқылъюки сыӷлыҳқынъанӣсқылъюки, қӣвысқылъюки Кияӷныӷмун, сыӷывунъалюкилъю сыӷлыҳқылъҳитның. 32Хўаңкута уңипаҳтыңӯкут тама̄кунун пилъыӷнун, малигулъюта Аглыӷналӷӣгнун Таӷныӷагнун Кияӷныӷым тӯныхкахкынун тама̄кунун қа̄ткулъҳӣнун лъңанун».
33Агӷистыт сякшитутка̄лӷӣт Петырым кӣмсиӷьястың таўатын, рыпалъ туқусюкақыхкаңит апостолыт. 34Иўырңа ата̄сиқ агӷиста ныкывыхкақ акузиналюни. Гамалиилыңуфтуқ, Фарисей, апыҳтуӷистыңат Иудеит Лӣлиҳтӯсӣта, ынңа̄талъ китум алңунак қа̄ткумта̄ӷа. Кылыңакистынун а̄нутаҳтысқыхкӣ апостолыт. 35Та̄хкын агӷистылгутни пикӣ: «Израилыӷмӣлгутымни, пира̄мсилъюки та̄кут югыт пикатыки. 36Нықамикынӷистыхӯ қавңанҳақ Февда пика̄лӷӣ иглыӷутыстыҳлъягунилюни. Ынка̄м 400 ю̄к малихся̄ӷикақ лъңаның. Иўырңа Февда туқусятху малихся̄ҳтыңи қимагӯткат, талўа китум алңунак алъямыңлъю акузиткысюгумаңилъкаңат. 37Та̄кўаниңани Иудалъю Галилеяӷмӣ, қырңуҳтикақ юхкамың управлениям кыстистӣқңан югым угляҳталяңаның. Иўырңа лъңалъю туқутақңатху юги миңитка̄гут. 38Ынка̄м хўа̄ сюмымни итагнаӷнаяҳтукут сяфқӣта қакымкут югыт пияқумтыки. Лъмыхның пиңукумың таўатын пилъҳат сятңунаниҳлъықуқ. 39Иўырңа Кияӷныӷым пилъқыхкагу аӷулӣҳна̄нӷитаси, кипулъхина̄ҳлъықаҳсилъю Кияӷнық».
Ынка̄м агӷистыт қа̄ткыхка̄т Гамалиил. 40Та̄хкын кылыңакистынун итҳутыслъюки апостолыт кахсягмихтыстыкӣт. Иныҳтыңъўа̄қӣтлъю уңипақнанӣсқылъюку Иисус. Апыӷӣӷьямыхтыки а̄ныстыкӣт. 41Апостолыт а̄нысистың қуяҳлъякат, қаюҳлъяк Кияӷныӷым кайңусяӷа̄тыстыкақыхкаңи Иисус апалъюқлъюку. 42Аҳутаңа тамаҳа̄н Храмымилъю, кинкунилъю уңипақақыхкаңат, апыҳтӯсяқақыхкаңат Иисус, Христосыңунилюку Кияӷныӷым накмикыхка̄.
ទើបបានជ្រើសរើសហើយ៖
Деяния 5: ess2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe Bible Translators, Inc. All rights reserved.
