Деяния 2
2
Кияӷныӷым Каяхтыкык Аглыӷналӷӣк Таӷныӷак
1Пятидесятницам аӷныӷанун Иерусалимыӷмӣт ухпықат қырңуӷуткат ата̄сими мыңтыӷами. 2Та̄хкын нӯскахлъяган ануқыҳлъягыстун сюлюхлъягым қилягмың памакын укиглюни имиқа̄ мыңтыӷақ. 3Та̄хкын лъяңақа улюсюгнилңӯт кынҳа̄т алъхықат, ысҳапакӣт илямыхнун ныкыҳқа̄лъҳӣт. 4Ынка̄м Кияӷныӷым имиқӣ Аглыӷналӷӣгның Таӷныӷагның қамахлъюки таўанлыңӯт. Таӷныӷам аҳтуӷьяҳқа̄нӷилъыӷмикун акузистыкӣ накумӣстун.
5Тама̄ңуқ Иерусалимыми, Иудеит Кияӷныӷмун қа̄ткутңалӷӣт. Накын нунаның тагӣқлъютың Иерусалимыӷмӣңуҳқӯткат. 6Нагақӯсямың сюлюхлъягмың уплъыгутка̄т ухпықат қырңуҳфигитнун. Ка̄сялӷӣмың накумӣстун ухпықат акузитыҳлъягуфтут рыпалъ кукшиқуткыхкӣт. 7Сяӷӣӷаягусимӣта пикат: «Укут акузилъҳӣт Галилеяӷмӣңӯт. 8Натын укут қамахлъютың акузилъымтыстун акузӣт налъюкңўа̄қамыхның? 9Хўа̄ хўа̄нтутут Парфыӷмӣт, Мидыӷмӣт, Еламыӷмӣт, Месопотамияӷмӣт, Иудеяӷмӣт, Каппадокияӷмӣт, Понтыӷмӣт, Асияӷмӣт, 10-11Фригияӷмӣт, Памфилияӷмӣт, Египетыӷмӣт, Ливияӷмӣт Киринеям туңаңаның пикат, Критыӷмӣт, Аравияӷмӣт, хўа̄ хўа̄нтутлъю Римымың ля̄лиҳтат Иудеит, язычнигытлъю манигӯткаюгыт Иудеястун. Нагатапут акузилъымтыстун уңипаҳтут Кияӷныӷым апыӷӣлъыҳлъяганың». 12Қамахтыңъўа̄ӷлютың сяӷӣӷаягуткӣтлъю, кукшиқуткыхкӣтлъю ухпықат, ынка̄м лъңитның а̄пқуӷўа̄ӷуткат: «Ся̄қат укут?»
13Иўырңа иляңита ныңляӷьюхся̄ткумӣта пикӣт: «Укут югыт мыӷыҳлъягӯт!»
Петырым Алыҳқуқаңи Югыт
14Петырлъю таўанлыңуқ апостолылгутмини. Ныкывлюни игляхтулюни югыт пикӣ: «Иудейелгутымни, нагатңўа̄қаҳтыңъа. 15Мыӷыҳлъягуниӷңа̄ҳпысикут мыӷыҳлъягунӷитукут нута̄нқун стаманың иңлюлык кылъя̄каңа уна̄ңулюку. 16Уна хўатын аныҳтылъық Иоилым ӯкналиқуткыхкақа̄ хўатын:
17“Кияӷнық пика̄гуқ:
Киңулиӷни аӷныӷни Таӷныӷахка каяхсяҳқақахка тамаҳа̄нун югнун.
Ынка̄м иӷныси, паниси ӯкналиқсяҳқа̄гут,
нукалъпигаси ысҳаӷўа̄ӷьяҳқа̄гут,
нанывгаси қаваңуӷьяҳқа̄гут.
18Талўа қыпҳаҳтымнун югнунлъю, аӷнанунлъю Таӷныӷахка каяхсяҳқақахка ӯкналиқысқылъюки.
19Югнун ысҳаҳтысяҳқақанка сяңўа̄т сяӷӣӷаналӷӣт қилягмилъю, нунамилъю:
а̄ука, кынық, агыпсюҳлъяк,
20сиқӣнық мамлыхсяҳқақ, танқиқ кавиҳсяҳқақ а̄ўыстун.
Тама̄кут киңуңитның мыгнунапихлъыҳӣ Атанӷым нанқихтивихка̄ аӷнық пияҳқа̄гуқ.
21Иўырңа аӷнық та̄на ка̄тыстыхпына̄н,
кина алңунак сыӷывутысқылӷӣ Атаныӷмун югулилъыңьяҳқа̄гуқ”.
Таўатын Иоиль ӯкналиқыхка̄гуқ.
22Израилыӷмӣни, нагатаҳтыңъа, лӣсимакыхкаҳси Назаретыӷмӣ Иисус, угля̄пихлъюку алъя̄ҳлъюхўаҳтиҳлъяга̄тақа̄лӷӣ. Кияӷныӷым таўатын пистыкақа̄ аҳтуӷьяҳқа̄нӷилъыӷмикун лъпысинун лӣтысқылъюку лъңанун накмикыхкақутни. 23Кияӷныӷым лӣсималъыӷмикун тӯныхкақа̄ Иисус лъпысинун пиюкылъыҳпысистун писқылъюку. Та̄хкын лъпыси қақӯраҳтыстаҳси тама̄кунун ўа̄кигалңуӷнун Кияӷныӷым Лӣлиҳтӯся̄мнъун. 24Иўырңа Кияӷныӷым туқулъыӷмың уңуваҳтыстыкақа̄, итымуткақа̄ туқулъҳым асиҳқутылъҳаның, талўа туқулъҳым нуқныҳпагниңиткақа̄. 25Давидым акузиткыхкақа̄ Иисус хўатын:
“Ысҳаӷақақа Атанық сивумнилъюку қӯнпың:
унисигата̄ңа, ынка̄ңам сыӷлыӷмун қапшахтысна̄нӷитуңа.
26Тама̄кын апалъюқлъюку қа̄мнака қуяҳлъягӯқ,
акузилъҳынка қуялъыпырыўа̄ӷмың аюқут.
Туқуяҳқа̄ӷңа̄ӷма сиӷимакнақамкын Атанық,
27қаюҳлъяк унинъа̄нӷитахкын уңувасихка туқумалӷӣни,
талўа Сыӷлыҳқумаңилңӯм югусӣ аӷусна̄нӷитан.
28Апыҳтуқақаҳпыңа кынлыңилңуӷмың уңувалъыңылъыҳқамың,
хўаңамнисимаңиналъыҳпык қуястыҳлъяўа̄ңа”».
29Петырым нагныӷуткӣ: «Иудейелгутымни, хўатыҳлъюўа̄қ апыӷьюгақа сивуныҳпут Давид. Лӣсимакаҳпут туқука̄гуқ, лъӣвӷалъю на̄нтуляңа лӣсимакаҳпут. 30-31Уңуваңулюку Кияӷныӷым акықыхкақа̄: “Ипапыста̄қ киңунӷын ата̄сиқ иглыӷутияҳқа̄гуқ юхпының”. Давидым ӯкналиқистыңутминың лӣсимакыхкақа̄ Кияӷныӷым акықуся̄. Ӯкналиқуткыхкақа̄ Христос туқумалӷӣнинъа̄нӷинъилюку талўа югусӣ аӷуна̄нӷинъилюку, уңувақа̄нилюку туқулъыӷмың. 32Та̄наңӯқ Иисус Кияӷныӷым уңуваҳтыка̄ туқулъыӷмың ынка̄м хўаңкута лӣсимакистыңӯкут. 33Кияӷныӷым ныкыхтыкақа̄ Иисус аӷынқигныӷмикун, таўатын қӯлвақақа̄. Акықылъыӷмитун Иисус, тӯныхкақа̄к Аглыӷналӷӣк Таӷныӷак лъңанун, ынка̄м Иисусым хўаңкунъун тӯна̄к. Тама̄кут сяӷӣӷаналӷӣт ысҳақыси, нагаскыси Таӷныӷам аҳтуӷьяҳқа̄нӷилъҳакун пилъҳӯт.
34-35Давид пика̄гуқ хўатын:
“Атанӷым пӣ Атанқа,
Ақуми аӷынқигнымкун кынляңа кая̄лъқыстылъымнун аңуяхтын”.
Давид маю̄маңитутминың қилягмун Иисусытун, лъңаның акузиткыңъунӷитуқ, акузиткыңъўа̄ Иисус.
36Уңипа̄таҳлъямси қамахлъюси Израилыӷмӣни, Кияӷныӷым ипапыста̄қ накмикыхкақа̄ Иисус Атанӷулюкулъю, Христосыңулюкулъю. Та̄наңӯқ Иисус қақӯрақаҳси!»
37Югыт нагалъюку Петр, сыӷлыӷьюхлъякат ынка̄м Петырлъю, апостолылгутаңилъю а̄птыкӣт: «Ухпықа̄лгутымнъи, сянақыста?»
38Петырым кӣмсиқӣ: «Авутыҳқылъюси, сыӷлыҳқынъаниӷлюси қӣвитык Кияӷныӷмун, крестиӷытыклъю А̄тҳакун Иисус Христосым, сыӷлыҳқылъыси сыӷывутылъыңысқылъюки, ынка̄м Кияӷныӷым тунусякык Аглыӷналӷӣк Таӷныӷак алъхыҳтыкык. 39Атанық Кияӷныҳпут таўатын пияҳқа̄гуқ, қаюҳлъяк акықусяқыхкақа̄к Таӷныӷагни лъпысинун, киңуныҳпысинун, китумунлъю алңунак уяваҳпансяӷңа̄н туқлъюқаминун».
40Петырым таўатыңинақ пихпынаки ўата сямың алъя̄ҳӣнаӷмың пикӣ. Кылыңася̄қӣлъю: «Кияӷныӷым аӷью̄ӷьяҳқақӣ сыӷлытун пистыт, ынка̄м лъңистун сыӷлытун пихпынаси лю̄рақ лъпысилъю аӷью̄ӷья̄ӷӣси». 41Та̄хкын ухпықилӷӣт уңипа̄мың крестиқат. Ынка̄м таўани аӷныӷми 3,000 ю̄к иляткақ ухпықанун.
Ухпықат Кияҳта̄лъҳит
42Ухпықат ӣўлың қырңуӷутңулӷӣт лӣнъалютың апостолымың. Христосыкун аңлыгуткулъҳӣстун кияҳта̄ӷыт, ныӷақылӷӣт, юӷаӷақылӷӣт қырңаӷмың. 43Апостолыт угляӷңа̄н алъя̄ҳлъюхўаҳтика̄лӷӣт Кияӷныӷым аҳтуӷьяҳқа̄нӷилъҳакун. Ынка̄м қамахлъюни сяӷӣӷаюка̄лӷӣ, талъюӷьягуткақыхкаңатлъю Кияӷнық. 44Ухпықат қамахлъютың нагнықа̄лӷӣт ата̄систун, сяӷьятың атуным атуқлъюки. 45Акиклъюки нунатыңлъю, сяӷьятыңлъю, алъхыҳтатың манит тӯнақыхкаңит сямың аклъюлӷӣнун. 46Аҳутаңа тамаҳа̄н қырңуӷутақылӷӣт Храмыми. Ныӷылгутыңлъяӷақлъюки илятың, қуякусиқинаӷлюки нықытың упуӷатусиқақыхкаңит. 47Китумун алңунак пиниқниҳлъягыт, усюқумаңинаӷақыхкаңатлъю Кияӷнық. Аҳутаңа тамаҳа̄н Атанӷым югулиңукаңи югыт, ынка̄м ухпықат нулямаңинақат.
ទើបបានជ្រើសរើសហើយ៖
Деяния 2: ess2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe Bible Translators, Inc. All rights reserved.
