Luke 1
1
Лука эԓты уԓты Евангелие
1Хун ар хŏйат, мўӈ тŏрԓы уйтәм верԓув эԓты, хӑшты питәс,
2хун мўӈева мет оԓәӈ вантәм хŏйатәтән щит айкеԓа туса пӑ щи йўпийән ԓыв йасәӈ туты хŏйатәта питсәт,
3ма пӑ щи вер эԓты нумәссәм, йӑмәс ԓэрапман, оԓӈәԓ эԓты ԓŏватәԓән йўпеԓ тўвман, нӑӈ урӈена йэшәк Феофил, щит нэпека хӑшты нŏмәс ўсәм,
4йӑна уԓәм утәԓтәпса, хŏты утәԓтәсайән ԓуԓән нӑӈ йӑма ат мŏштәсэн.
Захария Турәм хотән йэмәӈ верәт верәԓ
5Иудея мўвән Ирод ики хона уԓәм пŏрайән, Захария нэмпи Авия пеләк эԓты Турма йир верты хŏйат ус; ԓўв итэԓән Елизавета ийимеԓ пӑ Аарон рут эԓты ус.
6Ԓын кинәӈтак Турәм йэԓпийән тўӈа–щира усӈән, Турәм Куща#1:6 Турәм Куща – Турәм нэмтәм щир партәпса йасӈәт пӑ мŏрт щира верәт сыстама версәӈән.
7Туп ԋаврэм ӑт тӑйсәӈән: Елизавета ӑт ԓавәртәмәԓа пӑ щиты щи ԓын пирщамәсайӈән.
8И пўш, Захария хŏйатԓаԓ пиԓән ԓыв пŏрайэԓән, Турма йэмәӈ верәт верман, уԓмаԓән,
9ԓўвеԓа питәм пос xўват, xŏты уԓтыйән Турма йир верты xŏйатәт xŏща уԓԓыйәс, Турәм Куща Хот йэмәӈ йӑтәԓа ԓŏӈты пӑ щита йоԓ кўшмәԓтты вера йис.
10Мир, щи йоԓ кўшмәԓтты пŏрайән, Турма ким пеләк сӑхат пойәкщәсәт.
Ангел Иоанн йиӈка ԓŏӈәԓтыты хŏйат сэма питты вер аԉәԓ
11Щи сыс Турәм Куща ангел Захария сэма этәс, йоԓ кўшмәԓтты йирасты нŏрәм ԉэпән йӑм пеләк сӑхат ԓойәс.
12Захария, Ԓўвеԓ кащаԓәмаԓ кемән, нŏпсәԓ ԓыԓэмәс, пӑ пӑԓщәмән йŏхәтса.
13Ангел щиты йастәс ԓўвеԓа: "Аԓ пӑԓа, Захария: нӑӈ пойкен хуԓса! Елизавета ийименән пŏхән туԓайән, пӑ нӑӈ ԓўвеԓ Иоанн нэмән пŏнԓэн;
14нӑӈена амәт пӑ каш питәԓ, ар хŏйат, ԓўв сэма питмаԓ урәӈән, амтәтԓыты питәԓ.
15Турәм Куща хŏща ԓўв ԓӑтәӈа питәԓ, ўна пӑ па кўтрәӈ ŏт йищты ӑт питәԓ, пӑ хŏԓна аԋԏеԓ хŏща пӑтлам хотән уԓман Йэмәӈ Ԓыԓән тэкәнԓа,
16пӑ ар хŏйат Израиль йох эԓты Турәм Куща пеԓа керәтԓәԓы;
17Ԓўв Турәм Куща йэԓпийән, Илияйа мийԓыйәм хŏрпи ԓыԓ пӑ йур пиԓән мӑнты питәԓ, ащет сӑм ԋаврэмԓаԓа йŏхԓы мӑты урәӈән, ӑт хуԓәтты хŏйатәта тўӈа–щира уԓты нŏмәс мӑты урәӈән. Щиты Турәм Куща урәӈән хŏйатәт ԓэщатәԓ”.
18Захария ангела йастәс: "Xŏты сӑхат ма щи вер уйәтԓэм? Ма пирщамәсайәм, имем пӑ тӑԓԓаԓ арамәсәт".
Захария пŏтәртты ӑт верәтәԓ
19Ангел йŏхԓы йастәс: "Ма – Гавриил, Турәм пўӈәԓән ԓойты ангел, нӑӈ пиԓэнән пŏтәртты пӑ нӑӈена тӑм йӑм айкеԓ туты китсайәм.
20Мўйа нӑӈ ма йасәӈԓама ӑт эвәԓсән, ин нӑӈ мӑшйайән уԓты питԓән, пӑ хŏԓна щи унты пŏтәртты щир ӑт тӑйты питԓән, хун аԉәм верэм йŏхәтәԓ, мŏрт пŏрайән ԓыв тӑԓаӈа йиԓәт”.
21Щи сыс мир камән Захария ԓавәԓсәт пӑ нумәсты питсәт, мўйа ԓўв щиты Турәм Хотән рŏнащәԓ.
22Ԓўв ким этмаԓән, нэмәԓты хŏйат пеԓа пŏтәртты ӑт веритәс. Хŏйатәтән ŏша пӑйәтса, ԓўв, иԓампа, Турәм Хотән мŏԓты йэм вантәс; щиӈәԋща ԓўв хŏйатәт пеԓа ԓўйән-паӈән аԉисыман пŏтәртәс, ўӈәԓԓы щиты щи ус.
23Туп хун ԓўв йэмәӈ верәт верты хӑтәԓԓаԓ йэтшәсәт, йŏхи йŏхтәс.
24-25Щи йўпийән Елизавета имеԓ ԓавәрта йис, пӑ вет тыԓәщ хŏйатәт эԓты хӑԋатыйәс пӑ пŏтәртыйәс: "Турәм Куща тӑм хӑтԓәтән ма урӈема щи йӑм верәс, ма эԓтайэм хŏйатәт ԋухматты вер нŏх ўты урәӈән, ма пеԓайэм аԋкәрмәс".
Гавриил Христос сэма питты вер аԉәԓ
26-27Хун Елизавета xутмет тыԓәщ ўшән уԓмаԓән, Турәм Гавриил нэмпи ангел Галилея мўвән уԓты Назарет воша эви xŏща китсәԓы. Щи эви Иосиф xŏща уртыса, Иосиф Давид рут эԓты уԓ. Эви нэмәԓ: Мария.
28Ангел ԓўв хŏщайәԓ ԓŏӈмаԓән, йастәс: "Амтәтԓыйа, йӑм мŏщатәм нэ! Турәм Куща Нӑӈ пиԓэнән уԓ; имет кўтән йӑмән мийәм нэ!"
29Мария ԓўвеԓ кащаԓәмаԓ кемән, щи йасәӈԓаԓ эԓты нŏпсәԓ ԓыԓэмәс пӑ нумәсәс: мўй тӑмәщ ўща верты щир.
30Ангел пӑ ԓўвеԓа йастәс: "Аԓ пӑԓа, Мария! Турәм нӑӈ пеԓайэн йӑм щирән ӑӈкәрмәс;
31ԓавәрта йиԓән пӑ Пŏх сэма пайәтԓән, Иисус нэмән Ԓўвеԓ пŏнԓэн.
32Ԓўв ԓӑтәӈ питәԓ, пӑ Нўм Турәм Пŏха айәԓты питԓа; Турәм Куща Ԓўвеԓа Давид ащеԓ хон омәсты тӑха мӑԓ.
33Щӑԓта Ԓўв Иаков хот тэԓ хŏща веккеша хона уԓты питәԓ, пӑ Хон Уԓәпсайәԓ нэмәԓты пŏрайән ӑт йэтшәԓ".
Ӑнтом хŏйат щирән тыйты вер
34Мария ангела йастәс: "Xŏты сӑхат щиты питәԓ, ма xу сайән уԓты вер хŏԓна ӑт уйәтԓэм?"
35Ангел йŏхԓы йастәс: "Йэмәӈ Ԓыԓ Нӑӈ хŏщайэн эсԓәщәԓ пӑ Нўм Турәм йурән йŏхәтԓайән, щишән сэма пайәтты йэмәӈ Ԋаврэмийэн Турәм Пŏха айәԓтты питԓа.
36Ин Елизавета, xŏйатәтән таԓа айәԓтәм Нӑӈ рут нэӈен, кўш пирщамәса, ищи пŏх ԓавәԓәԓ: ин ԓўв хутмет тыԓщәԓ.
37Турәм и йасӈәԓ йурԓы ӑт уԓԓыйәԓ".
38Мария йастәс: "Щишән, ма Турәм Куща митнэ; нӑӈ йасӈен щира ма xŏщайэм щи вер ат тыйәԓ". Щи йўпийән ангел ԓўвеԓ утща хӑйсәԓы.
Мария Елизавета хŏща йӑӈхәԓ
39Йэша ус, щи йўпийән Мария ԓэщатэмийәс пӑ сора Иуда кевәтән уԓты воша мӑнәс.
40Захария хота ԓŏӈәс пӑ Елизавета пиԓән ўща верәс.
41Хун Елизавета Мария эԓты ўща йасәӈ хуԓмәс, сӑмәԓ иԓпийән тӑйты ԋаврэмәԓ ԋŏхԓыйәс. Щи кемән Елизавета Йэмәӈ Ԓыԓән тэкәтса,
42пӑ ԓўв такан йастәс: "Нӑӈ имет кўтән йӑмән мийәм нэ, сӑм иԓпенән тӑйты ŏтыйэн ищи йӑмән мийәм!
43Мўй щирән щит тыйәс? Ма хŏщайэма Турәм Кущайэм аԋԏи йŏхтәс!
44Ванта-са: хун ма нӑӈ ўща верты сыйэн хуԓмәсәм, щи пŏрайән ԋаврэмем сӑмем иԓпийән амәтман ԋŏхԓыйәс.
45Ин эвԓәм нэ щўԋԓән, Турәм Куща эԓты йастәм йасӈәт тӑԓаӈа йиԓәт, щишән".
46Щӑԓта Мария йастәс: "Ма сӑмем Турәм Куща ԓӑтәӈа айәԓԓәԓы,
47Ма сӑмемән шек амтәтԓыԓәм Турмем урәӈән, ма ԓыԓэм Этәԓтәты Ŏтэм урәӈән,
48Ԓўв митнэ лэӈкеԓ пеԓа сэмәԓ пайәтсәԓы, тӑԓта йэԓԓы ин омәсты мир, йӑԓпа йиты мŏхет мӑнэм щўԋән мийәм нэӈа айәԓты питԓэԓ;
49Йурәӈ Ŏт мӑнэм вŏԓаӈ верәт вермаԓ урәӈән, пӑ Ԓўв Нэмәԓ йэмәӈ,
50Турәм сӑмәӈ верәԓ кашәӈ Ԓўв эԓтайәԓ пӑԓты хŏйата, ин уԓты пӑ йӑԓпа йиты мŏхета, уԓты питәԓ;
51Ԓўв йурәӈ йошәԓ этәԓтәсԓы; сӑмԓаԓән йŏрәӈ нŏмәс тӑйты хŏйатәт лакки йовәԓсәԓы;
52ун кущайәт кущайа омәсты тӑхайԓаԓ эԓты иԓ пайәтсәԓы, лэӈкийа уԓты хŏйатәт нŏх эԓәтсәԓы;
53ԓэԓԓы уԓты хŏйатәт йӑм эԓты ԓапәтсәԓы, тащәӈа уԓты хŏйатәт таԓты китсәԓы.
54Ԓўв Израиль митхуйәԓа ԋотыԓыйәс, аԉәм сӑмәӈ щирәԓ нумман,
55хŏты мўӈ опращԓува йастыԓыйәс, Авраама пӑ йиты ԋаврэмԓаԓа веккеша".
56Мария Елизавета хŏща хуԓәм тыԓәщ кем мойԓәман ус, щӑԓта йŏхи мӑнәс.
Елизавета Иоанн сэма пайәтәԓ
57Елизавета пŏрайәԓ йŏхтәс пӑ пŏх сэма пайтәс.
58Ванән уԓты хŏйатәтән пӑ рутԓаԓән хуԓса, хŏты ԓўв урӈәԓән Турәм Куща ԓӑтәӈ сӑмәӈ вер аԉәс пӑ ԓўв пиԓәԓән амтәтԓысәт.
59Нийәԓмет хӑтәԓән ԓыв ԋаврэм хŏща эвәтты вер#1:59 Эвәтты вер - еврейәт хŏща сэма питәм ху ԋаврэм ԋийәԓмет хӑтәԓән ху пŏрмасәԓ хŏща лыпащ поԋам шўкәԓ хŏԓт эвәтмәԓа. урәӈән йŏхәтсәт пӑ ащеԓ иты Захария нэма пŏнты ўтщисэԓ.
60Туп Елизавета йастәс: "Ӑнта, Иоанн нэмән пŏнԓэв".
61Ăктәщәм хŏйатәт йастәсәт: "Нӑӈ рутэн кўтән тӑмәщ нэм тӑйты и хŏйат нэш ӑнтом!"
62Ащеԓ эԓты ԓўйән-паӈән аԉиԓыман иԋщәсты питса, мўйсыр нэм ԓўв ԋаврэмәԓа мӑты ԓӑӈхас.
63Хӑшты сохәԓ вохәс пӑ хӑншәс: "Ԓўв нэмәԓ Иоанн". Ăктәщәм хŏйатәт йасәӈ ӑт шитԓәт, ӑԓ щи ватԓәт.
64Щи пўԉаӈ ԓўв ўӈԓәԓ-ԋаԓмәԓ пел пўншаԋщәс, пӑ Турәм ишәкман пŏтәртты питәс.
65Щиӈәԋща ԓывиԓаԓ керәтман уԓәм хŏйатәт пӑԓщәмән йŏхәтсайәт, пӑ ин щи вер эԓты кев пеләк Иудея мўв ԓŏватән пŏтәртты питса.
66Хŏйән айкеԓ хуԓса, хŏԓыйэ ԓыв сӑма пŏтсэԓ пӑ пŏтәртсәт: "Xŏйа тӑм ԋаврэм йиԓ?" Турәм Куща йош ԓўв пиԓәԓән ус.
Захария Иоанн йэмәӈ верәт верты эԓты пŏтәртәԓ
67Щӑԓта Захария, Иоанн ащи, Йэмәӈ Ԓыԓән тэкәтса, Турәм эԓты хуԓәм йасәӈԓаԓ пŏтәртты питәс:
68"Турәм Куща - Израиль Турәм ат ишәкԓа, Ԓўв Израиль мирәԓ хŏща йŏхтәс пӑ хŏԓт пайтәсты щир мӑс,
69пӑ мўӈева ԓыԓ этәԓтәты йурәӈ Ŏт Давид, митхуйәԓ, рут сӑхат мӑс,
70хŏты йис тэԓән Турәм йасәӈ туты йэмәӈ xŏйатԓаԓ ўӈәԓән пŏтәртәс,
71щит мўӈев веԓты ŏтԓув эԓты пӑ мўӈиԓув нўрыты ŏтԓув эԓты мўӈев нŏх пайәтԓәԓы,
72мўӈ ащиԓув пиԓән сӑмәӈ верәԓ ватәԓтәԓ пӑ Ԓўв йэмәӈ йастантәм щирәԓ нумԓәԓы,
73Ԓўв Авраама, ащева, мийԓыйәм йасӈәԓ нумԓәԓы, мўӈева,
74мўӈ нўрәӈ ŏтԓув эԓты нŏх пайәттаԓ йўпийән, хурԓыйа Ԓўвеԓа
75йэмәӈ пӑ вещкат щирән кашәӈ хӑтәԓ уԓәпсайэвән митйоxа уԓты вер мӑԓ.
76Нӑӈ ищи, ԋаврэмийэ, Нўм Турәм йасәӈ туты хŏйата нэмәтԓайән, Турәм Куща йэԓпийән мӑнты питԓән:
Ԓўв кешайәԓа йуш ԓэщатты урәӈән,
77Ԓўв мирәԓа щит ŏша пайәтты мӑты урәӈән: кӑрэкԓаԓ#1:77 кӑрэк - словарь ванта; йŏрэмәты щир хŏща ԓыԓ этәԓтәты вер уԓ,
78Турмев йӑм сӑм хўватән, Ԓўв йӑԓпа этты хӑтәԓ иты, нумәԓта мўӈ хŏщайэва йŏхтәс,
79пӑтламән пӑ хӑԓа хŏрән уԓты xŏйатәт нŏх хутԓәптәты урәӈән, мўӈ кўрԓув пайԓы уԓәпса йуш хўват мӑнәԓтты урәӈән."
80Ԋаврэмийэ щи сыс энмәԓтыйәс пӑ ԓыԓәԓ-нŏпсәԓ такамтыйәс, таԓ шитам тӑхайәтән Израильәԓ хŏща эттаԓ унты ус.
ទើបបានជ្រើសរើសហើយ៖
Luke 1: ХБ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Institute for Bible Translation, Finland
Luke 1
1
Лука эԓты уԓты Евангелие
1Хун ар хŏйат, мўӈ тŏрԓы уйтәм верԓув эԓты, хӑшты питәс,
2хун мўӈева мет оԓәӈ вантәм хŏйатәтән щит айкеԓа туса пӑ щи йўпийән ԓыв йасәӈ туты хŏйатәта питсәт,
3ма пӑ щи вер эԓты нумәссәм, йӑмәс ԓэрапман, оԓӈәԓ эԓты ԓŏватәԓән йўпеԓ тўвман, нӑӈ урӈена йэшәк Феофил, щит нэпека хӑшты нŏмәс ўсәм,
4йӑна уԓәм утәԓтәпса, хŏты утәԓтәсайән ԓуԓән нӑӈ йӑма ат мŏштәсэн.
Захария Турәм хотән йэмәӈ верәт верәԓ
5Иудея мўвән Ирод ики хона уԓәм пŏрайән, Захария нэмпи Авия пеләк эԓты Турма йир верты хŏйат ус; ԓўв итэԓән Елизавета ийимеԓ пӑ Аарон рут эԓты ус.
6Ԓын кинәӈтак Турәм йэԓпийән тўӈа–щира усӈән, Турәм Куща#1:6 Турәм Куща – Турәм нэмтәм щир партәпса йасӈәт пӑ мŏрт щира верәт сыстама версәӈән.
7Туп ԋаврэм ӑт тӑйсәӈән: Елизавета ӑт ԓавәртәмәԓа пӑ щиты щи ԓын пирщамәсайӈән.
8И пўш, Захария хŏйатԓаԓ пиԓән ԓыв пŏрайэԓән, Турма йэмәӈ верәт верман, уԓмаԓән,
9ԓўвеԓа питәм пос xўват, xŏты уԓтыйән Турма йир верты xŏйатәт xŏща уԓԓыйәс, Турәм Куща Хот йэмәӈ йӑтәԓа ԓŏӈты пӑ щита йоԓ кўшмәԓтты вера йис.
10Мир, щи йоԓ кўшмәԓтты пŏрайән, Турма ким пеләк сӑхат пойәкщәсәт.
Ангел Иоанн йиӈка ԓŏӈәԓтыты хŏйат сэма питты вер аԉәԓ
11Щи сыс Турәм Куща ангел Захария сэма этәс, йоԓ кўшмәԓтты йирасты нŏрәм ԉэпән йӑм пеләк сӑхат ԓойәс.
12Захария, Ԓўвеԓ кащаԓәмаԓ кемән, нŏпсәԓ ԓыԓэмәс, пӑ пӑԓщәмән йŏхәтса.
13Ангел щиты йастәс ԓўвеԓа: "Аԓ пӑԓа, Захария: нӑӈ пойкен хуԓса! Елизавета ийименән пŏхән туԓайән, пӑ нӑӈ ԓўвеԓ Иоанн нэмән пŏнԓэн;
14нӑӈена амәт пӑ каш питәԓ, ар хŏйат, ԓўв сэма питмаԓ урәӈән, амтәтԓыты питәԓ.
15Турәм Куща хŏща ԓўв ԓӑтәӈа питәԓ, ўна пӑ па кўтрәӈ ŏт йищты ӑт питәԓ, пӑ хŏԓна аԋԏеԓ хŏща пӑтлам хотән уԓман Йэмәӈ Ԓыԓән тэкәнԓа,
16пӑ ар хŏйат Израиль йох эԓты Турәм Куща пеԓа керәтԓәԓы;
17Ԓўв Турәм Куща йэԓпийән, Илияйа мийԓыйәм хŏрпи ԓыԓ пӑ йур пиԓән мӑнты питәԓ, ащет сӑм ԋаврэмԓаԓа йŏхԓы мӑты урәӈән, ӑт хуԓәтты хŏйатәта тўӈа–щира уԓты нŏмәс мӑты урәӈән. Щиты Турәм Куща урәӈән хŏйатәт ԓэщатәԓ”.
18Захария ангела йастәс: "Xŏты сӑхат ма щи вер уйәтԓэм? Ма пирщамәсайәм, имем пӑ тӑԓԓаԓ арамәсәт".
Захария пŏтәртты ӑт верәтәԓ
19Ангел йŏхԓы йастәс: "Ма – Гавриил, Турәм пўӈәԓән ԓойты ангел, нӑӈ пиԓэнән пŏтәртты пӑ нӑӈена тӑм йӑм айкеԓ туты китсайәм.
20Мўйа нӑӈ ма йасәӈԓама ӑт эвәԓсән, ин нӑӈ мӑшйайән уԓты питԓән, пӑ хŏԓна щи унты пŏтәртты щир ӑт тӑйты питԓән, хун аԉәм верэм йŏхәтәԓ, мŏрт пŏрайән ԓыв тӑԓаӈа йиԓәт”.
21Щи сыс мир камән Захария ԓавәԓсәт пӑ нумәсты питсәт, мўйа ԓўв щиты Турәм Хотән рŏнащәԓ.
22Ԓўв ким этмаԓән, нэмәԓты хŏйат пеԓа пŏтәртты ӑт веритәс. Хŏйатәтән ŏша пӑйәтса, ԓўв, иԓампа, Турәм Хотән мŏԓты йэм вантәс; щиӈәԋща ԓўв хŏйатәт пеԓа ԓўйән-паӈән аԉисыман пŏтәртәс, ўӈәԓԓы щиты щи ус.
23Туп хун ԓўв йэмәӈ верәт верты хӑтәԓԓаԓ йэтшәсәт, йŏхи йŏхтәс.
24-25Щи йўпийән Елизавета имеԓ ԓавәрта йис, пӑ вет тыԓәщ хŏйатәт эԓты хӑԋатыйәс пӑ пŏтәртыйәс: "Турәм Куща тӑм хӑтԓәтән ма урӈема щи йӑм верәс, ма эԓтайэм хŏйатәт ԋухматты вер нŏх ўты урәӈән, ма пеԓайэм аԋкәрмәс".
Гавриил Христос сэма питты вер аԉәԓ
26-27Хун Елизавета xутмет тыԓәщ ўшән уԓмаԓән, Турәм Гавриил нэмпи ангел Галилея мўвән уԓты Назарет воша эви xŏща китсәԓы. Щи эви Иосиф xŏща уртыса, Иосиф Давид рут эԓты уԓ. Эви нэмәԓ: Мария.
28Ангел ԓўв хŏщайәԓ ԓŏӈмаԓән, йастәс: "Амтәтԓыйа, йӑм мŏщатәм нэ! Турәм Куща Нӑӈ пиԓэнән уԓ; имет кўтән йӑмән мийәм нэ!"
29Мария ԓўвеԓ кащаԓәмаԓ кемән, щи йасәӈԓаԓ эԓты нŏпсәԓ ԓыԓэмәс пӑ нумәсәс: мўй тӑмәщ ўща верты щир.
30Ангел пӑ ԓўвеԓа йастәс: "Аԓ пӑԓа, Мария! Турәм нӑӈ пеԓайэн йӑм щирән ӑӈкәрмәс;
31ԓавәрта йиԓән пӑ Пŏх сэма пайәтԓән, Иисус нэмән Ԓўвеԓ пŏнԓэн.
32Ԓўв ԓӑтәӈ питәԓ, пӑ Нўм Турәм Пŏха айәԓты питԓа; Турәм Куща Ԓўвеԓа Давид ащеԓ хон омәсты тӑха мӑԓ.
33Щӑԓта Ԓўв Иаков хот тэԓ хŏща веккеша хона уԓты питәԓ, пӑ Хон Уԓәпсайәԓ нэмәԓты пŏрайән ӑт йэтшәԓ".
Ӑнтом хŏйат щирән тыйты вер
34Мария ангела йастәс: "Xŏты сӑхат щиты питәԓ, ма xу сайән уԓты вер хŏԓна ӑт уйәтԓэм?"
35Ангел йŏхԓы йастәс: "Йэмәӈ Ԓыԓ Нӑӈ хŏщайэн эсԓәщәԓ пӑ Нўм Турәм йурән йŏхәтԓайән, щишән сэма пайәтты йэмәӈ Ԋаврэмийэн Турәм Пŏха айәԓтты питԓа.
36Ин Елизавета, xŏйатәтән таԓа айәԓтәм Нӑӈ рут нэӈен, кўш пирщамәса, ищи пŏх ԓавәԓәԓ: ин ԓўв хутмет тыԓщәԓ.
37Турәм и йасӈәԓ йурԓы ӑт уԓԓыйәԓ".
38Мария йастәс: "Щишән, ма Турәм Куща митнэ; нӑӈ йасӈен щира ма xŏщайэм щи вер ат тыйәԓ". Щи йўпийән ангел ԓўвеԓ утща хӑйсәԓы.
Мария Елизавета хŏща йӑӈхәԓ
39Йэша ус, щи йўпийән Мария ԓэщатэмийәс пӑ сора Иуда кевәтән уԓты воша мӑнәс.
40Захария хота ԓŏӈәс пӑ Елизавета пиԓән ўща верәс.
41Хун Елизавета Мария эԓты ўща йасәӈ хуԓмәс, сӑмәԓ иԓпийән тӑйты ԋаврэмәԓ ԋŏхԓыйәс. Щи кемән Елизавета Йэмәӈ Ԓыԓән тэкәтса,
42пӑ ԓўв такан йастәс: "Нӑӈ имет кўтән йӑмән мийәм нэ, сӑм иԓпенән тӑйты ŏтыйэн ищи йӑмән мийәм!
43Мўй щирән щит тыйәс? Ма хŏщайэма Турәм Кущайэм аԋԏи йŏхтәс!
44Ванта-са: хун ма нӑӈ ўща верты сыйэн хуԓмәсәм, щи пŏрайән ԋаврэмем сӑмем иԓпийән амәтман ԋŏхԓыйәс.
45Ин эвԓәм нэ щўԋԓән, Турәм Куща эԓты йастәм йасӈәт тӑԓаӈа йиԓәт, щишән".
46Щӑԓта Мария йастәс: "Ма сӑмем Турәм Куща ԓӑтәӈа айәԓԓәԓы,
47Ма сӑмемән шек амтәтԓыԓәм Турмем урәӈән, ма ԓыԓэм Этәԓтәты Ŏтэм урәӈән,
48Ԓўв митнэ лэӈкеԓ пеԓа сэмәԓ пайәтсәԓы, тӑԓта йэԓԓы ин омәсты мир, йӑԓпа йиты мŏхет мӑнэм щўԋән мийәм нэӈа айәԓты питԓэԓ;
49Йурәӈ Ŏт мӑнэм вŏԓаӈ верәт вермаԓ урәӈән, пӑ Ԓўв Нэмәԓ йэмәӈ,
50Турәм сӑмәӈ верәԓ кашәӈ Ԓўв эԓтайәԓ пӑԓты хŏйата, ин уԓты пӑ йӑԓпа йиты мŏхета, уԓты питәԓ;
51Ԓўв йурәӈ йошәԓ этәԓтәсԓы; сӑмԓаԓән йŏрәӈ нŏмәс тӑйты хŏйатәт лакки йовәԓсәԓы;
52ун кущайәт кущайа омәсты тӑхайԓаԓ эԓты иԓ пайәтсәԓы, лэӈкийа уԓты хŏйатәт нŏх эԓәтсәԓы;
53ԓэԓԓы уԓты хŏйатәт йӑм эԓты ԓапәтсәԓы, тащәӈа уԓты хŏйатәт таԓты китсәԓы.
54Ԓўв Израиль митхуйәԓа ԋотыԓыйәс, аԉәм сӑмәӈ щирәԓ нумман,
55хŏты мўӈ опращԓува йастыԓыйәс, Авраама пӑ йиты ԋаврэмԓаԓа веккеша".
56Мария Елизавета хŏща хуԓәм тыԓәщ кем мойԓәман ус, щӑԓта йŏхи мӑнәс.
Елизавета Иоанн сэма пайәтәԓ
57Елизавета пŏрайәԓ йŏхтәс пӑ пŏх сэма пайтәс.
58Ванән уԓты хŏйатәтән пӑ рутԓаԓән хуԓса, хŏты ԓўв урӈәԓән Турәм Куща ԓӑтәӈ сӑмәӈ вер аԉәс пӑ ԓўв пиԓәԓән амтәтԓысәт.
59Нийәԓмет хӑтәԓән ԓыв ԋаврэм хŏща эвәтты вер#1:59 Эвәтты вер - еврейәт хŏща сэма питәм ху ԋаврэм ԋийәԓмет хӑтәԓән ху пŏрмасәԓ хŏща лыпащ поԋам шўкәԓ хŏԓт эвәтмәԓа. урәӈән йŏхәтсәт пӑ ащеԓ иты Захария нэма пŏнты ўтщисэԓ.
60Туп Елизавета йастәс: "Ӑнта, Иоанн нэмән пŏнԓэв".
61Ăктәщәм хŏйатәт йастәсәт: "Нӑӈ рутэн кўтән тӑмәщ нэм тӑйты и хŏйат нэш ӑнтом!"
62Ащеԓ эԓты ԓўйән-паӈән аԉиԓыман иԋщәсты питса, мўйсыр нэм ԓўв ԋаврэмәԓа мӑты ԓӑӈхас.
63Хӑшты сохәԓ вохәс пӑ хӑншәс: "Ԓўв нэмәԓ Иоанн". Ăктәщәм хŏйатәт йасәӈ ӑт шитԓәт, ӑԓ щи ватԓәт.
64Щи пўԉаӈ ԓўв ўӈԓәԓ-ԋаԓмәԓ пел пўншаԋщәс, пӑ Турәм ишәкман пŏтәртты питәс.
65Щиӈәԋща ԓывиԓаԓ керәтман уԓәм хŏйатәт пӑԓщәмән йŏхәтсайәт, пӑ ин щи вер эԓты кев пеләк Иудея мўв ԓŏватән пŏтәртты питса.
66Хŏйән айкеԓ хуԓса, хŏԓыйэ ԓыв сӑма пŏтсэԓ пӑ пŏтәртсәт: "Xŏйа тӑм ԋаврэм йиԓ?" Турәм Куща йош ԓўв пиԓәԓән ус.
Захария Иоанн йэмәӈ верәт верты эԓты пŏтәртәԓ
67Щӑԓта Захария, Иоанн ащи, Йэмәӈ Ԓыԓән тэкәтса, Турәм эԓты хуԓәм йасәӈԓаԓ пŏтәртты питәс:
68"Турәм Куща - Израиль Турәм ат ишәкԓа, Ԓўв Израиль мирәԓ хŏща йŏхтәс пӑ хŏԓт пайтәсты щир мӑс,
69пӑ мўӈева ԓыԓ этәԓтәты йурәӈ Ŏт Давид, митхуйәԓ, рут сӑхат мӑс,
70хŏты йис тэԓән Турәм йасәӈ туты йэмәӈ xŏйатԓаԓ ўӈәԓән пŏтәртәс,
71щит мўӈев веԓты ŏтԓув эԓты пӑ мўӈиԓув нўрыты ŏтԓув эԓты мўӈев нŏх пайәтԓәԓы,
72мўӈ ащиԓув пиԓән сӑмәӈ верәԓ ватәԓтәԓ пӑ Ԓўв йэмәӈ йастантәм щирәԓ нумԓәԓы,
73Ԓўв Авраама, ащева, мийԓыйәм йасӈәԓ нумԓәԓы, мўӈева,
74мўӈ нўрәӈ ŏтԓув эԓты нŏх пайәттаԓ йўпийән, хурԓыйа Ԓўвеԓа
75йэмәӈ пӑ вещкат щирән кашәӈ хӑтәԓ уԓәпсайэвән митйоxа уԓты вер мӑԓ.
76Нӑӈ ищи, ԋаврэмийэ, Нўм Турәм йасәӈ туты хŏйата нэмәтԓайән, Турәм Куща йэԓпийән мӑнты питԓән:
Ԓўв кешайәԓа йуш ԓэщатты урәӈән,
77Ԓўв мирәԓа щит ŏша пайәтты мӑты урәӈән: кӑрэкԓаԓ#1:77 кӑрэк - словарь ванта; йŏрэмәты щир хŏща ԓыԓ этәԓтәты вер уԓ,
78Турмев йӑм сӑм хўватән, Ԓўв йӑԓпа этты хӑтәԓ иты, нумәԓта мўӈ хŏщайэва йŏхтәс,
79пӑтламән пӑ хӑԓа хŏрән уԓты xŏйатәт нŏх хутԓәптәты урәӈән, мўӈ кўрԓув пайԓы уԓәпса йуш хўват мӑнәԓтты урәӈән."
80Ԋаврэмийэ щи сыс энмәԓтыйәс пӑ ԓыԓәԓ-нŏпсәԓ такамтыйәс, таԓ шитам тӑхайәтән Израильәԓ хŏща эттаԓ унты ус.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Institute for Bible Translation, Finland