ରୋମୀ 4
4
ଆବ୍ରାହାମ୍ସ୍କି ବିଶ୍ୱାସ୍ଘି ନାମୁନା
1ତା ନାମ୍ ଏନ୍ଦେର୍ ତେଙ୍ଗତ୍ କା ନାହ୍ମା ପୁର୍ଖା ବୁଆ ଆବ୍ରାହାମ୍ସ୍କେ ଇ କାତ୍ଥାନୁ ଏନ୍ଦେର୍ ହାଖ୍ରା? 2ଆବ୍ରାହାମ୍ସ୍ ନିଜର୍ ନାଲ୍ଖୁଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାରସ୍ନେ ତା ଆସ୍ ନିଜର୍ ମିଆଁ ବଡ଼୍ପଣି ଏଦ୍ରା ଅଙ୍ଗସ୍ନେ ଲେକିନ୍ ଆସ୍ ପାର୍ମେଶ୍ୱାର୍ସ୍କି ଚାହାନୁ ଅସଲ୍ନୁ ବଡ଼୍ପଣି ଏଦ୍ରା ପଲ୍ଲସ୍ନେ। 3ପାବିତାର୍ ଶାସ୍ତ୍ରଦ୍ ଏନ୍ଦେର୍ ତେଙ୍ଗିଦ୍? ଆବ୍ରାହାମ୍ସ୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ଚାସ୍ ଆରୁ ଆ ବିଶ୍ୱାସ୍ଘି ଲାଗାନ୍ ପାର୍ମେଶ୍ୱାର୍ସ୍ ଆବ୍ରାହାମ୍ସିନ୍ ତାଙ୍ଘା ନଜର୍ନୁ ନିର୍ଦ୍ଦୋଷ୍ ଠାହ୍ରାଚାସ୍। 4ଆରୁ ଆ ବିଶ୍ୱାସ୍ଘି ଦ୍ୱାର୍ନୁ ନାଲ୍ଖୁ କାମୁର୍ଗେ ମଜ୍ରୀ ହାଖ୍ର୍ନା କ୍ରିପାଘି ରୂପ୍ନୁ ମା ଚିଆକାଇ ବରନ୍ ମଜ୍ଦୁରୀ ହାଖ୍ଖନା ଆସ୍କି ହକ୍ ରାଇ। 5ଲେକିନ୍ ନେର୍ ନାଲଖୁ ମା କାମ୍ନାଏ ଆରୁ ପାର୍ମେଶ୍ୱାର୍ସ୍ସିନ୍ ବିଶ୍ୱାସ୍ କାମ୍ନାତି ଆସ୍କି ନଜର୍ନୁ ନିର୍ଦ୍ଦୋଷ୍ ମାନ୍ନାଏକାନାଏ ତା ଆବ୍ଡ଼ାର୍ ଖାଲି ନିଜର୍ ବିଶ୍ୱାସ୍ଘି ଲାଗାନ୍ ନିର୍ଦ୍ଦୋଷ୍ ମାନ୍ନାଏକାନାଏ। 6ଇଦ୍ଘି ଲେଖା ଦାଉଦ୍ସ୍ହି ଆ ମୁନୁଷ୍ସିନ୍ ଧଏନ୍ ବାନାଏ ଏକାସିନ୍ ପାର୍ମେଶ୍ୱାର୍ସ୍ ନାଲ୍ଖୁଘିବିନାହି ନିଜର୍ ନଜର୍ନୁ ନିର୍ଦ୍ଦୋଷ୍ ମାନ୍ଦାସ୍, ଦାଉଦ୍ସ୍ ଏନ୍ନେ ତେଙ୍ଗିୟାସ୍। 7କେତ୍କ ଧଏନ୍ ରାନାଏ ଆବ୍ଡ଼ାର୍ ଏକାର୍ଘି ଦୋଷ୍ ଛେମା କାମା କେର୍କିଚି ଆରୁ ଏକାର୍ଘି ପାପ୍ବନ୍ ଡାବାଚା କେର୍କିଚି। 8କେତ୍କ ଧଏନ୍ ରାନାଏ କା ଏକାର୍ଘି ପାପ୍ବନ୍ ପ୍ରାଭୁସ୍ ମା ଗଣଦାସ୍।
9ଖାଲି ୟାହୁଦୀଜାମାର୍ ପାର୍ମେଶ୍ୱାର୍ସ୍ତି ଆଶୀର୍ବାଦ୍ ହାଖ୍ଖର୍ କାଁଏ? ବିନାୟାହୁଦୀ ଆଲାର୍ହି ପାର୍ମେଶ୍ୱାର୍ସ୍ତି ଆଶୀର୍ବାଦ୍ ହାଖ୍ଖର? ହଁ ନାମ୍ ତେଙ୍ଗ୍ଦାତ୍ କା ପାର୍ମେଶ୍ୱାର୍ସ୍ ଆବ୍ରାହାମ୍ସିନ୍ ଆସ୍କି ବିଶ୍ୱାସ୍ଘି ଲାଗାନିନ୍ ତାଙ୍ଘା ନଜର୍ନୁ ନିର୍ଦ୍ଦୋଷ୍ ଠାହ୍ରାଚାସ୍। 10ପାର୍ମେଶ୍ୱାର୍ସ୍ ଆବ୍ରାହାମ୍ସିନ୍ ଏକ୍ଲା ନିର୍ଦ୍ଦୋଷ୍ ଠାହ୍ରାଚାସ୍। ଖାତ୍ନା କାମ୍ଚ୍କାଘି ପହ୍ଲେ କା ଖାତ୍ନା କାମ୍ଚ୍କାଘି ପାଛ୍ଲି? ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍ ଆବ୍ରାହାମ୍ସିନ୍ ଖାତ୍ନା ମାନ୍ଚ୍କାଘି ଆଘ୍ଲିନିନ୍ ନିଜର୍ ନଜର୍ନୁହି ନିର୍ଦ୍ଦୋଷ୍ ଠାହ୍ରାଚାସ୍। 11ଆବ୍ରାହାମ୍ସ୍କି ବିନାଖାତ୍ନାଘି ସାମାୟନୁ ଖାଲି ଆସିନ୍ ବିଶ୍ୱାସ୍ଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାବା କେରାଦ୍ ଆରୁ ଆବ୍ରାହାମ୍ସ୍କି ମିଆଁ ମୋହର୍ଘି ଲେଖା ଖାତ୍ନାଘି ଚିହ୍ନା ଲାଗାବା କେରା। ଇଦ୍ଘି ଲେଖା ଆବ୍ରାହାମ୍ସ୍ ଜାମାର୍ଘି ବାଙ୍ଗ୍ ମାନ୍ଚାସ୍ କେରାସ୍ ଏକା ଖାତ୍ନା କାମ୍ଚ୍କା ବିନା ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ନାଏ। ଆରୁ ଆ ବିଶ୍ୱାସ୍ଘି ଦ୍ୱାର୍ନୁହି ଆବ୍ଡ଼ାର୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାରାନାଏ। 12ନାହ୍ମା ବାଙ୍ଗ୍ ଆବ୍ରାହାମ୍ସ୍କି ବିଶ୍ୱାସ୍ଦ୍ ଏକାଦ୍ ଆବ୍ଡ଼ାରିନ୍ ଖାତ୍ନାଘି ପହ୍ଲେ ହାଖ୍ଖର୍କିଚା ଆ ବିଶ୍ୱାସ୍ଘି ପାବୁନୁ ଏକାର୍ ଏକ୍ନାଏ, ଆ ଜାମାର୍ଘି ବାଙ୍ଗ୍ସ୍ ଆବ୍ରାହାମ୍ସ୍।
ପାର୍ମେଶ୍ୱାର୍ସ୍ ଆବ୍ରହାମ୍ସଗେ କାତ୍ଥା ଚିଚ୍ଚାସ୍
13ପାର୍ମେଶ୍ୱାର୍ସ୍ ଆବ୍ରାହାମ୍ ଆରୁ ତାଙ୍ଘା ହାଦ୍ଦୁର୍ଗେ ଏନ୍ନେ କାତ୍ଥା ଚିଚ୍ଚାସ୍ କା ଆବ୍ଡ଼ାର୍ ଦୁନିଆଁଘି ହକ୍ଦାର୍ ମାନର୍, ଇଦ୍ ହୁଦ୍ଘିଲାଗାନ୍ ମା ମାନ୍ଚା କା ଆବ୍ରାହାମ୍ସ୍ ନିୟମ୍ଘି ପାଲନ୍ କାମ୍ଚାସ୍। ବରନ୍ ଇଦ୍ଘିଲାଗାନ୍ ମାନ୍ଚା କା ଆବ୍ଡ଼ାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ଚାର୍ ଆରୁ ଆ ବିଶ୍ୱାସ୍ଘି ଦ୍ୱାର୍ନୁ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ନିଜର୍ ନଜର୍ନୁ ନିର୍ଦ୍ଦୋଷ୍ ଠାହ୍ରାଚାସ୍। 14ଯଦି ନିୟମ୍ ପାଲନ୍ କାମ୍ନାତି ହକ୍ଦାର୍ ମାନ୍ନାଏ ତା ବିଶ୍ୱାସ୍ଦ୍ ବେକାର୍ଦ୍, ଆରୁ କାତ୍ଥା ଚିଚ୍ଚକାଦ୍ ପାଖିଆରି କାଇଦ୍। 15ଏକାସାନ୍ ନିୟମ୍ ଆତ୍ଲି ଆରୁ ନା ଆଲାର୍ ନିୟମ୍ବନ୍ ମା ମାନ୍ନାଏ ତା ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ଦଣ୍ତ୍ ଚିଦାସ୍। ଲେକିନ୍ ଏକାସାନ୍ ନିୟମ୍ଦିନ୍ ମାଲ୍ଲାଦିନ୍ ଆସାନ୍ ନିୟମ୍ ତୋଡ଼୍ନାଦ୍ହି ମାଲ୍ଲାଦିନ୍।
16ପାର୍ମେଶ୍ୱାର୍ସ୍କି କାତ୍ଥା ଚିଚ୍ଚକାଦ୍ ଖାଲି ବିଶ୍ୱାସ୍ତି ହାଖ୍ଖରିଦ୍, ଆରୁ ପାର୍ମେଶ୍ୱାର୍ସ୍କି ବିଶ୍ୱାସ୍ ନା ଖାଲି ଆ ଆଲାର୍ଘି ମିଆଁ ଏକା ନିୟମ୍ବନ୍ ପାଲନ୍ କାମ୍ନାଏ ବରନ୍ ଆ ଆଲାର୍ଘି ମିଆଁହି ଲାଗୁ ମାନିଦ୍ ଏକା ଆଲାର୍ ଆବ୍ରାହାମ୍ସ୍କି ଲେଖା ବିଶ୍ୱାସ୍ କାମ୍ନାଏ, ଆ ଆବ୍ରାହାମ୍ସ୍ ନାହ୍ମାଏ ଜାମାର୍ଘି ବାଙ୍ଗ୍ସ୍। 17ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏନ୍ ନିଙ୍ଗାନ୍ ଜାମା ଜାତିନ୍ତା ବାଙ୍ଗ୍ ବାନାବନ୍ ଇଦ୍ ଇଦ୍ଘିଲାଗାନ୍ ମାନ୍ଚା କା ଆବ୍ରାହାମ୍ସ୍ ପାର୍ମେଶ୍ୱାର୍ସିନ୍ ବିଶ୍ୱାସ୍ କାମ୍ଚାସ୍ ଏକା ପାର୍ମେଶ୍ୱାର୍ସ୍ କେଚ୍ଚକାରିନ୍ ଉଜ୍ଜତାଦାସ୍ ଆରୁ ମା ରାନା ଜିନିଷ୍ବନ୍ ରାନା ଲେଖା କାମ୍ଦାସ୍।” 18ଆବ୍ରାହାମ୍ସ୍ ହାତାଶ୍ ରାନା ସାମାୟନୁହି ଆଶ୍ରା ଉଇକିରି ବିଶ୍ୱାସ୍ କାମ୍ଚାସ୍ ଆରୁ ଆସ୍ ବହୁତ୍ ଜାତିୟାର୍ଘି ବାଙ୍ଗ୍ ମାନ୍ଚାସ୍ କେରାସ୍ ଏସ୍କେ କା ଆବ୍ଡ଼ାରିନ୍ ତେଙ୍ଗାକେର୍କିଚା ନିଙ୍ଘାଏ ଗଣାପଲ୍ନା ବାଉଁଶା ମାନର୍। 19ଆବ୍ରାହାମ୍ସ୍କି ଲାଗ୍ଭାଗ୍ ଶୋଏ ବଛର୍ ମାନ୍ଚା କେର୍କିଚା ଆରୁ ହାଦ୍ଦୁବଚ୍ଚ ଜନମ୍ କାମ୍ନାଘି ବୟସ୍ ବିତ୍ରା କେର୍କିଚା ଆରୁ ସାରାଦ୍ ବାନ୍ଝୀ ରାଚା ହାଲେହି ଆବ୍ରାହାମ୍ସ୍ ବିଶ୍ୱାସ୍ନୁ ମା ଡାଗ୍ମାଗ୍ରାସ୍। 20ଆବ୍ରାହାମ୍ସ୍ ପାର୍ମେଶ୍ୱାର୍ସ୍କି କାତ୍ଥା ଚିଚ୍ଚକାଘି ମିଆଁ କାଟେହି ଶାକ୍ ମା କାମ୍ଚାସ୍ ଲେକିନ୍ ଆସ୍କି ବିଶ୍ୱାସ୍ ଆରୁହି ବାଗ୍ଗେ ମଜ୍ବୁତ୍ ମାନ୍ଚା ଆରୁ ଆସ୍ ପାର୍ମେଶ୍ୱାର୍ସ୍କି ମାହିମା କାମ୍ଚାସ୍। 21ଆବ୍ରାହାମ୍ସ୍କେ ପୁରା ଭାର୍ଷା ରାଚା କା ଏକା କାତ୍ଥା ପାର୍ମେଶ୍ୱାର୍ସ୍ ଚିଚ୍କାଦାସ୍ ଆବନ୍ ପୁରା କାମାଗେ ତାଙ୍ଘା ଶକ୍ତି ରାଇ। 22ଆବ୍ରାହାମ୍ସ୍କି ବିଶ୍ୱାସ୍ଘି ଦ୍ୱାର୍ନୁ ଆସିନ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାଚାସ୍। 23ବିଶ୍ୱାସ୍ଘି ଦ୍ୱାର୍ନୁ ପାର୍ମେଶ୍ୱାର୍ସ୍ ତାଙ୍ଘା ନଜର୍ନୁ ଧାର୍ମିକ୍ ଗନ୍ତି କାମ୍ଚାସ୍ ଇ କାତ୍ଥା ପାବିତାର୍ ଶାସ୍ତ୍ରନୁ ଲେଖା ରାଇ ଏସ୍କେ ଆବ୍ରାହାମ୍ସ୍କେ ଖାଲି ଲେଖ୍ଚ୍କା ମାଲ୍ଲାଦିନ୍। 24ନାହ୍ମାଲାଗାନ୍ହି ଲେଖ୍ଚ୍କା ରାଇ ପାର୍ମେଶ୍ୱାର୍ସ୍ ନାମାଗେ କାତ୍ଥା ଚିଚ୍କାଦାସ୍ କା ଆସ୍ ନାମାନ୍ ତାଙ୍ଘା ନଜର୍ନୁ ନିର୍ଦ୍ଦୋଷ୍ ଗନ୍ତି କାମସ୍, ଏକାସ୍ କା ନାହ୍ମାଏ ପ୍ରାଭୁ ଯୀଶୁସିନ୍ କେଚ୍ଚ୍କାସ୍ତି ଉଜ୍ଜତାଚାସ୍। 25ଆ ଯୀଶୁ ଖ୍ରୀସ୍ତ୍ସିନ୍ ନାହ୍ମା ଦୋଷ୍ଘି ଲାଗାନ୍ କ୍ରୁଶ୍ନୁ ଠୋକାଚାକେରା ଆରୁ ନାମାନ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ବାନାବାଗେ ଉଜ୍ଜତାକେରା।
ទើបបានជ្រើសរើសហើយ៖
ରୋମୀ 4: xis
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active) Wycliffe Bible Translators, Inc. All rights reserved.
