ରୋମୀ 10
10
ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମ୍ଚ୍କୁନ୍ ପାପ୍ଘି ଦଣ୍ଡ୍ତି ମୁକ୍ତି ହାଖ୍ଖରୋ
1ହେ ଏଙ୍ଘା ଭାଇ ଆରୁ ବୁହୁଣୀରୋ, ଏଙ୍ଘାଏ ବହୁତ୍ ଇଚ୍ଛା ରାଇ କା ପାର୍ମେଶ୍ୱାର୍ସାନ୍ ଏଙ୍ଘା ବିନ୍ତି ଇଦ୍ ରାଇଦ୍ କା ଏଙ୍ଘାଏ ଇସ୍ରାଏଲୀ ଆଲାର୍ ପାପ୍ଘି ଦଣ୍ତ୍ତି ମୁକ୍ତି ହାଖ୍ଖର୍। 2ଏନ୍ଦେର୍ଗେକା ଏନ୍ ଇସ୍ରାଏଲୀର୍ଘି ବାରେନୁନିନ୍ ତେଙ୍ଗାଲ୍ଦାନ୍ କା ଆବ୍ଡ଼ାର୍ଗେ ପାର୍ମେଶ୍ୱାର୍ସ୍କି ଲାଗାନ୍ ମୁରୁକ୍ ଇଚ୍ଛା ରାଇ ଲେକିନ୍ ଆବ୍ଡ଼ାର୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ଘି ଲେଖା ମାଲ୍କାରିନ୍। 3ଆରୁ ପାର୍ମେଶ୍ୱାର୍ସ୍ ଆଲାରିନ୍ ଏସ୍କେ ତାଙ୍ଘା ନଜର୍ନୁ ନିର୍ଦ୍ଦୋଷ୍ ବାନାବାନାଘି ପାବୁ ମା ଆହିକିରି ଆବ୍ଡ଼ାର୍ ନିଜର୍ ପାବୁନୁ ଚାଲ୍ରିକିରି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଗେ କୋଶିଷ୍ କାମାଲିୟାର୍, ହୁଦ୍ଘିଲାଗାନ୍ ଆବ୍ଡ଼ାର୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନା ପଲ୍ଲିୟାର୍। 4ଆରୁ ଯେତ୍କବାକେନ୍ ଖ୍ରୀସ୍ତ୍ସ୍ ବାର୍ଚାସ୍, ହତ୍କବାକେନ୍ନ୍ତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଗେ ଆଲାର୍ଗେ ନିୟମ୍ଘି ଦାର୍କାର୍ ମାଲ୍ଲାମାନୁ। ଏନ୍ଦେର୍ଗେକା ଖ୍ରୀସ୍ତ୍କି ମିଆଁ ବିଶ୍ୱାସ୍ କାମିକିରି ନେଦିନ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଅଙ୍ଗ୍ନାଏ।
5ଆରୁ ଏକା ଆଲାର୍ ନିୟମ୍ ମାନିକିରି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନା ବେଦ୍ଦନାଏ, ଆବ୍ଡ଼ାର୍ଘି ଲାଗାନ୍ ମୁଶାସ୍ ଲେଖ୍ଚ୍କାଦାସ୍ କା ଏକା ଆଲାସ୍ ନିୟମ୍ବନ୍ ପୁରା ମାନ୍ଦାସ୍, ଆସ୍ ଆ ନିୟମ୍ତି ସବୁଦିନ୍ତା ଜୀବନ୍ ହାଖ୍ଖସ୍। 6ଲେକିନ୍ ବିଶ୍ୱାସ୍ କାମିକିରି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ନାଘି ବାରେ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା, “ନିନ୍ ନିଙ୍ଘା ମନେ-ମନେ ଏନ୍ନେ ଆମାତେଙ୍ଗା କା, ଖ୍ରୀସ୍ତ୍ସିନ୍ ନାହ୍ମା ଚାହା ଅନ୍ଦ୍ରାଗେ, ସରଗ୍ଗେ ନେଦ୍ ଆର୍ଗା ଅଙ୍ଗର୍?” 7ଚାହେ “କେଚ୍ଚକାସ୍ତି ଉଜ୍ଜତିକିରି ଖ୍ରୀସ୍ତ୍ସିନ୍ ମିଆଁ ଅନ୍ଦ୍ରାଗେ ନେଦ୍ ଧାନ୍ତାରି କିୟାଁ ନେଦ୍ ଏତ୍ତର୍?” 8ଲେକିନ୍ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା, ପାର୍ମେଶ୍ୱାର୍ସ୍କି ବଚନ୍ଦ୍ ନିଙ୍ଘା ଚାହାନୁ ରାଇଦ୍, ଆରୁ ନିନ୍ ଆଦ୍ଘି ବାରେନୁନିନ୍ ତେଙ୍ଗ୍ଦାଏ, ଆରୁ ଇଦ୍ ନିଙ୍ଘା ଥୁମ୍ଣାନୁ ଆରୁ ଜୀଆନୁହି ରାଇଦ୍, ଆରୁ ଏକା ବିଶ୍ୱାସ୍ଘି ବାରେନୁ ନାମ୍ ପ୍ରଚାର୍ କାମ୍ଦାତ୍, ଆଦ୍ ଇ ବଚନ୍ଦିନ୍। 9ଆରୁ ଯଦି ନିମ୍ ଯୀଶୁସିନ୍ ପ୍ରାଭୁସ୍ ବୁଲି ମାନର୍, ଆରୁ ପୁରା ମନ୍ତି ବିଶ୍ୱାସ୍ କାମ୍ଦାର୍ କା, ପାର୍ମେଶ୍ୱାର୍ସ୍ ଆସିନ୍ କେଚ୍ଚକାସ୍ତି ଉଜ୍ଜତାଚାସ୍ତା, ନିମ୍ ଏସ୍କ୍ରିନ୍ହି ପାପ୍ଘି ଦଣ୍ତ୍ତି ବାଛ୍ରର୍। 10ଏନ୍ଦେର୍ଗେକା ଯଦି ଅଣ୍ଟା ଆଲାସ୍ ପୁରା ମନ୍ତି ବିଶ୍ୱାସ୍ କାମ୍ଦାସ୍ ତା ଆସ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ଦାସ୍, ଆରୁ ଥୁମ୍ଣାତି ସ୍ୱୀକାର୍ କାମ୍ଦାସ୍ ତା ଆସ୍ ପାପ୍ଘି ଦଣ୍ତ୍ତି ବାଛ୍ର୍ଦାସ୍। 11ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା, “ଏକାର୍ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମର୍, ଆବ୍ଡ଼ାର୍ଗେ ନିରାଶ୍ ମାନା ମା ଖାତ୍ରୋ।” 12ହୁଦ୍ଘିଲାଗାନ୍ ୟାହୁଦୀ ଆରୁ ବିନାୟାହୁଦୀନୁ ଏନ୍ଦେର୍ହି ଫରକ୍ ମାଲ୍ଲାଦିନ୍। ଏନ୍ଦେର୍ଗେକା ଜାମାର୍ଘି ପ୍ରାଭୁସ୍ ଅଣ୍ଟା ରାଦାସ୍। ଆରୁ ଯେତ୍କ ଆଲାର୍ ଆସ୍ସାନ୍ ବିନ୍ତି କାମ୍ନାଏ, ଆବ୍ଡ଼ାର୍ଗେ ଆସ୍ ଖୁଲାମନ୍ତି ଆଶିଷ୍ ଚିଦାସ୍। 13ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା, “ନେଦିନ୍ ପ୍ରାଭୁସ୍କି ନାମେ ହୋଇକିରି ବିନ୍ତି କାମର୍, ଆର୍ ପାପ୍ଘି ଦଣ୍ତ୍ତି ବାଛ୍ରର୍କର୍।”
14ଲେକିନ୍, ଏକା ପାର୍ମେଶ୍ୱାର୍ସ୍ସିନ୍ ଆବ୍ଡ଼ାର୍ ବିଶ୍ୱାସ୍ ମା କାମ୍ନାଏ, ଆସ୍ସାନ୍ ଏସ୍କେ ବିନ୍ତି କାମର୍? ଆରୁ ଏକା ପାର୍ମେଶ୍ୱାର୍ସ୍କି ବାରେନୁ ଆବ୍ଡ଼ାର୍ ମାଲ୍ଲା ମେନୁର୍ ତା, ଏସ୍କେ ଆସ୍କି ମିଆଁ ବିଶ୍ୱାସ୍ କାମର୍? ଆରୁ ଆବ୍ଡ଼ାର୍ରିନ୍ ଯଦି ନେଦ୍ହି ଆସ୍କି ବାରେନୁ ମା ତେଙ୍ଗର୍ ତା ଆବ୍ଡ଼ାର୍ ଏସ୍କେ ମେନର୍? 15ଲେକିନ୍ ଯଦି ନେଦିନ୍ ଆସିନ୍ ମା ତାଇକୁନ୍ ଆସ୍ ଆବ୍ଡ଼ାର୍ଘି ଚାହାଗେ ଏସ୍କେ କାଇକିରି ପ୍ରଚାର୍ କାମସ୍? ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏକାର୍ ସୁସାମାଚାର୍ ଶୁଣାବାଗେ ବାର୍ନାଏ, ଆବ୍ଡ଼ାର୍ଘି ବାର୍ନାଦ୍ କେତ୍କ ଖୁସୀଘି କାତ୍ଥାଦ୍।” 16ଲେକିନ୍ ଜାମାର୍ ଆ ସୁସାମାଚାର୍ବନ୍ ଗ୍ରହନ୍ ମା କାମ୍ଚାର୍, ହୁଦ୍ଘିଲାଗାନ୍ ଇଶାୟାହ୍ସ୍ ନାବୀସ୍ ତେଙ୍ଗିୟାସ୍, “କା ହେ ପ୍ରାଭୁ ନେଦ୍ ନାହ୍ମା ତେଙ୍କା ସୁସାମାଚାର୍ବନ୍ ବିଶ୍ୱାସ୍ କାମ୍ଚାର୍?” 17ଏନ୍ଦେର୍ଗେକା ବଚନ୍ ମେନ୍ନାଘି ଦ୍ୱାର୍ନୁ ବିଶ୍ୱାସ୍ ମାନିଦ୍। ଆରୁ ନେଦିନ୍ ଖ୍ରୀସ୍ତ୍ସ୍କି ବାରେନୁ ପ୍ରଚାର୍ କାମ୍ନାଏ ତା ଆଲାର୍ ମେନାଗେ ଅଙ୍ଗ୍ନାଏ।
18ଲେକିନ୍ ଏନ୍ ତେଙ୍ଗ୍ଦାନ୍, ଇସ୍ରାଏଲୀ ଆଲାର୍ ନାହ୍ମା ତେଙ୍କା ସୁସାମାଚାର୍ବନ୍ ମାଲ୍ଲା ମେନୁର୍ କାଁଏ? ଜରୁର୍ ଆବ୍ଡ଼ାର୍ ମେନ୍ଚାର୍, ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ପାର୍ମେଶ୍ୱାର୍ସ୍କି ବଚନ୍ ପ୍ରଚାର୍ କାମୁର୍ ପୁରା ଦୁନିଆଁନୁ ପ୍ରଚାର୍ କାମ୍ଚାର୍, ଆରୁ ଆବ୍ଡ଼ାର୍ଘି ପ୍ରଚାର୍ କାମ୍ଚ୍କା ବଚନ୍ ପୁରା ଦୁନିଆଁନୁ ଫାଏଲାରାଚା କେରା।” 19ଆରୁ ଏନ୍ ତେଙ୍ଗାଲ୍ଦାନ୍ କା ଇସ୍ରାଏଲୀଜାମାର୍ ବଚନ୍ବନ୍ ମା ବୁଝ୍ରାଲିୟାର୍ କାଁଏ? ଜରୁର୍ ବୁଝ୍ରାଲିୟାର୍, ଏନ୍ଦେର୍ଗେକା ମୁଶା ନାବୀସ୍କି ବହିନୁ ପାର୍ମେଶ୍ୱାର୍ସ୍ ତେଙ୍ଗ୍ଦାସ୍ କା, “ଏକାର୍ ଏଙ୍ଘା ଆଲ୍ ମାଲ୍ଲନାଏ ଆବ୍ଡ଼ାରିନ୍ ଏନ୍ ବେଭାର୍ କାମନ୍ ତାକା ଇବନ୍ ଏରିକିରି ନିମାଗେ ହିସ୍ଙ୍ଗା ଲାଗ୍ଗ। ଆରୁ ଏକାର୍ ପାର୍ମେଶ୍ୱାର୍ସ୍କି ବାରେନୁ ବାଲ୍ଲନାଇନ୍ ଏନ୍ନେ ଆଲାରିନ୍ ବେଭାର୍ କାମନ୍ ହତ୍କବାକେନ୍ ନିମ୍ ଇସ୍ରାଏଲୀ ଆଲାର୍ ମୁରୁକ୍ ଖିସାରର୍।” 20ଆରୁ ଇଶାୟାହ୍ସ୍ ନାବୀସ୍ ବିନାଏଲ୍ଚିକିରି ପାର୍ମେଶ୍ୱାର୍ସ୍କି ବଚନ୍ବନ୍ ତେଙ୍ଗ୍ଦାସ୍ କା, “ଏକାର୍ ଏଙ୍ଗାନ୍ ମା ବେଦ୍ଦାଲିୟାର୍, ଆବ୍ଡ଼ାର୍ ଏଙ୍ଗାନ୍ ହାଖ୍ଖୀୟାର୍: ଆରୁ ଏକାର୍ ଏଙ୍ଘା ବାରେନୁ ମା ମେନାଲିୟାର୍। ଆବ୍ଡ଼ାର୍ଗେ ନିଜେ ଏନ୍ ଏଥ୍ର୍କାନ୍।” 21ଲେକିନ୍ ଇସ୍ରାଏଲୀ ଆଲାର୍ଘି ବାରେନୁ ପାର୍ମେଶ୍ୱାର୍ସ୍ ତେଙ୍ଗିୟାସ୍, “ଏକାର୍ ଏଙ୍ଘା ହୁକୁମ୍ ମା ମେନ୍ନାଏ ଆରୁ ଏକାର୍ଘି ଜୀଆ କାଠୋର୍ ମାନ୍ଚାକେର୍କିଚି ଆବ୍ଡ଼ାରିନ୍ ଗ୍ରହନ୍ କାମାଗେ ଜାମାବାକେନ୍ ଏଙ୍ଘା ହେଖ୍ଖା ବାଢ଼ାବାଚ୍କାଦାନ୍।”
ទើបបានជ្រើសរើសហើយ៖
ରୋମୀ 10: xis
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active) Wycliffe Bible Translators, Inc. All rights reserved.
