ରୋମୀ 1
1
ଖାସ୍ଚେଲା ପାଉଲୁସ୍କି ଯୋହାର୍
1ପାଉଲୁସ୍କି ତାର୍ତି, ଏକାସ୍ ଯୀଶୁ ଖ୍ରୀସ୍ତ୍କି ଗୁତ୍ତିୟାସ୍, ଆରୁ ଚେଲା ମାନାଗେଲାଗାନ୍ ମେହାଁକେର୍କିଚି, ଆରୁ ପାର୍ମେଶ୍ୱାର୍ସ୍କି ଆ ସୁସାମାଚାର୍ଘି ଲାଗାନ୍ ଭିନେ କାମାକେରା। 2ଏସ୍କେ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, ପାର୍ମେଶ୍ୱାର୍ସ୍ ବହୁତ୍ ଆଘ୍ଲି ନିଜର୍ ନାବୀର୍ଘି ଦ୍ୱାର୍ନୁ ଇ ସୁସାମାଚାର୍ଘି କାତ୍ଥା କାମ୍ଚ୍କାଚାସ୍। 3ଇ ସୁସାମାଚାର୍ ପାର୍ମେଶ୍ୱାର୍ସ୍କି ହାଦ୍ଦୁ, ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ବାରେନୁ ରାଇ ଏକାସ୍ ଶରୀର୍ଘି ରୂପ୍ତି ତା ଦାଉଦ୍ସ୍କି ବାଉଁଶାନ୍ତି ଜନମ୍ ମାନ୍ଚାସ୍। 4ଆସ୍ ମୁନୁଷ୍ଘି ରୂପ୍ନୁ ଦାଉଦ୍ସ୍କି ବାଉଁଶାନୁ ଜନମ୍ ମାନ୍ଚାସ୍, ଆରୁ କେଚ୍ଚକାସ୍ତି ଉଜ୍ଜନାଘି ଲାଗାନ୍ ପାବିତାର୍ ଆତ୍ମାଘି ଦ୍ୱାର୍ନୁ ଶକ୍ତିଘି ସାଙ୍ଗେନ୍ ପାର୍ମେଶ୍ୱାର୍ସ୍କି ହାଦ୍ଦୁ ଠାହ୍ରାରାଚାସ୍।
5ଇ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଏଙ୍ଗାଗେ କ୍ରିପା ଆରୁ ଅଣ୍ଟା ଖାସ୍ଚେଲା ମାନାଗେ ବିଶେଷ୍ ହକ୍ ହାଖ୍ଖର୍କିଚି କା ଏନ୍ ଆସ୍କି ନାମେନୁ ଜାମା ଆ ବିନାୟାହୁଦୀର୍ଘି ମାଝାନୁ ପ୍ରଚାର୍ କାମନ୍ ତାକା ଆବ୍ଡ଼ାର୍ ବିଶ୍ୱାସ୍ କାମିକିରି ଆସିନ୍ ମାନ୍ନାର୍। 6ଆ ବିନାୟାହୁଦୀର୍ଘିସ୍ତି ନିମାନ୍ହି ଯୀଶୁ ଖ୍ରୀସ୍ତ୍କି ନିଜର୍ ଆଲ୍ ମାନାଗେ ମେହାଁକେର୍କାରାଇ।
7ଏନ୍ ଆ ଜାମା ଆଲାର୍ଘି ନାମେନୁ ଚିଠି ଲେଖାଲ୍ଦାନ୍ ଏକାର୍ କା ରୋମ୍ନୁ ପାର୍ମେଶ୍ୱାର୍ସିନ୍ ବାନେ ହାଖ୍ଖନାଏ ଆରୁ ଏକାରିନ୍ ପାବିତାର୍ ଆଲ୍ ମାନାଗେ ମେହ୍କା ରାଇ।
ନାହ୍ମା ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ଖର୍ତେ ରାନାଦ୍।
ପାଉଲୁସ୍ ରୋମ୍ ସହର୍ ବାର୍ନାଘି ଲାଗାନ୍ ଇଚ୍ଛା କାମାଲ୍ଦାସ୍
8ଦୁନିଆଁନୁ ନିହ୍ମା ଜାମାର୍ଘି ବିଶ୍ୱାସ୍ଘି ଚାର୍ଚା ଫାଏଲାରାଚା କେର୍କିଚି, ହୁଦ୍ଘିଲାଗାନ୍ ଜାମାର୍ଘିନ୍ତି ପହ୍ଲେ ଏନ୍ ନିହ୍ମା ଜାମାର୍ଘି ଲାଗାନ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଏଙ୍ଘା ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାନ୍, 9ଏକା ପାର୍ମେଶ୍ୱାର୍ସ୍କି ସେବାନୁ ଆସ୍କି ହାଦ୍ଦୁସ୍କି ସୁସାମାଚାର୍ଘି ଦ୍ୱାର୍ନୁ ପୁରାପୁରୀ ଜୀଆତି କାମ୍ଦାନ୍, ପାର୍ମେଶ୍ୱାର୍ସ୍ ଏଙ୍ଘା ସାକ୍ଷୀସ୍ କା ଏନ୍ ଏଙ୍ଘା ନିଜର୍ ବିନ୍ତିନୁ ନିମାରିନ୍ ଜାମାବାକେନ୍ ମନେ କାମ୍ଦାନ୍। 10ଆରୁ ଏନ୍ ଏଙ୍ଘା ବିନ୍ତିନୁ ଜାମାବାକେନ୍ ଆର୍ଜୀ କାମ୍ଦାନ୍ କା ପାର୍ମେଶ୍ୱାରସ୍କି ଇଚ୍ଛା ମାନ୍ଚ୍କୁନ୍ ଏସ୍କିନ୍ଭି ନିହ୍ମାସାନ୍ ବାରାଗେ ମଉକା ହାଖ୍ଖର୍ନାଦ୍। 11ନିମାଗେ ପାର୍ମେଶ୍ୱାର୍ସ୍କି ଅଣ୍ଟା ବାର୍ଦାନ୍ ଚନ୍ ଏସ୍କେ କା ନିମ୍ ଆତ୍ମିକ୍ ରୂପ୍ନୁ ମଜ୍ବୁତ୍ ମାନାଅଙ୍ଗର୍ ହୁଦ୍ଘିଲାଗାନ୍ ଏନ୍ ନିହ୍ମାଗାନେ ଭେଁଟ୍ ମାନାଗେ ବହୁତ୍ ଇଚ୍ଛା କାମ୍ଦାନ୍। 12ଏଙ୍ଗା ତେଙ୍ଗ୍ନା କାତ୍ଥା କା ଏନ୍ ଚାହ୍ଁଦାନ୍ କା ଯେତ୍କବାକେନ୍ ନିହ୍ମାସାନ୍ ରନ୍ ଏନ୍ ନିହ୍ମା ବିଶ୍ୱାସ୍ତି ଆରୁ ନିମ୍ ଏଙ୍ଘା ବିଶ୍ୱାସ୍ତି ଦିଲାସା ହାଖ୍ଖର୍। 13ହେ ଭାଇ ବୁହୁଣୀଜାମାରୋ, ଏନ୍ ଚାହ୍ଁଦାନ୍ କା ନିମ୍ ଆହା କା ନିହ୍ମାସାନ୍ ଧିୟାନ୍-ଧିୟାନ୍ ବାରାଗେ ଚାହଁଚ୍କାନ୍ ଏସ୍କେ ଏନ୍ ଦୁସ୍ରା ବିନାୟାହୁଦୀରିନ୍ ଯୀଶୁ ଖ୍ରୀସ୍ତ୍କିନୁ ଅନ୍ଦର୍କାନ୍ ଆରୁ ବିଶ୍ୱାସ୍ନୁ ମଜ୍ବୁତ୍ କାମ୍ଚ୍କାନ୍ ହନ୍ନେନ୍ ନିମାନ୍ହି ଯୀଶୁ ଖ୍ରୀସ୍ତ୍ନୁ ଅନ୍ଦରନ୍ ଆରୁ ବିଶ୍ୱାସ୍ନୁ ମଜ୍ବୁତ୍ କାମନ୍, ଲେକିନ୍ ଆକ୍କୁନ୍ତକ୍ ବାଧା ବାର୍ତେ ରାଇଦ୍। 14ଏଙ୍ଘା ମିଆଁ ୟାହୁଦୀର୍ ଆରୁ ବିନାୟାହୁଦୀର୍ଘି, ପାଢ଼୍ଚ୍କା ଆରୁ ମା ପାଢ଼୍ଚ୍କା, ଜାମାର୍ଘି ଦାୟିନ୍। 15ହୁଦ୍ଘିଲାଗାନ୍ ଏନ୍ ନିମାନ୍ ରୋମ୍ତା ବାସିନ୍ଦାରିନ୍ହି ସୁସାମାଚାର୍ଘି ଉପ୍ଦେଶ୍ ଶୁଣାବାଗେ ରିଝ୍ର୍ଦାନ୍। 16ସୁସାମାଚାର୍ନୁ ଏକା ଆଲାର୍ ବିଶ୍ୱାସ୍ କାମ୍ନାଏ, ଆବ୍ଡ଼ା ଆଲାର୍ଗେ ପାପ୍ଘି ଦଣ୍ତ୍ସ୍ତି ବାଛାବାନାଘି ଲାଗାନ୍ ପହ୍ଲେ ତା ୟାହୁଦୀ, ଆନ୍ତିନ୍ ବିନାୟାହୁଦୀର୍ଘି ଲାଗାନ୍ ଇ ସୁସାମାଚାର୍ ପାର୍ମେଶ୍ୱାର୍ସ୍କି ଶକ୍ତିଦ୍, ହୁଦ୍ଘିଲାଗାନ୍ ଏନ୍ ଇ ସୁସାମାଚାର୍ଘି ଲାଗାନ୍ ମା ଲାଜ୍ର୍ଦାନ୍। 17ଇ ସୁସାମାଚାର୍ ନାମାନ୍ ତେଙ୍ଗିଦ୍ ପାର୍ମେଶ୍ୱାର୍ସ୍ ଏସ୍କେ ତାଙ୍ଘା ନଜର୍ନୁ ନାମାନ୍ ଏସ୍କେ ବାନେ କାମ୍ଦାସ୍, ଇଦ୍ ବିଶ୍ୱାସ୍ଘି ଦ୍ୱାର୍ନୁ ସୁରୁନ୍ତି ଆଖ୍ରୀତକ୍ ସିଦ୍ଧ୍ କାମ୍ଚାସ୍। ଏସ୍କେ କା ପାବିତାର୍ ଶାସ୍ତ୍ର ତେଙ୍ଗିଦ୍, ଇଦ୍ ବିଶ୍ୱାସ୍ଘି ଦ୍ୱାର୍ନୁ ରାଇଦ୍ ଏକା ଆଲାର୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାରାଦାସ୍ ଆସ୍ ବିଶ୍ୱାସ୍ତି ଉଜ୍ଜସ୍।
ପାପ୍ କାମ୍ନା ବାଲାର୍ଗେ ପାର୍ମେଶ୍ୱାର୍ସ୍ ଦଣ୍ଡ୍ ଚିଦାସ୍
18ଏକା ଆଲାର୍ ଅନ୍ୟାୟଘି ଦ୍ୱାର୍ନୁ ସତ୍ତୁବନ୍ ରୋକ୍ନାଏ ଉଇନାଏ ଆରୁ ଜାମା ଲେଖା ଅଧର୍ମ ଆରୁ ଅନ୍ୟାୟ କାମ୍ନାଏ ଆବ୍ଡ଼ା ଆଲାର୍ଘି ମିଆଁ ସରଗ୍ତି ପାର୍ମେଶ୍ୱାର୍ସ୍କି ଖୀସୁ ପ୍ରକଟ୍ ମାନିଦ୍। 19ଏନ୍ଦେର୍ଗେକା ଆବ୍ଡ଼ାର୍ ପାର୍ମେଶ୍ୱାର୍ସ୍କି ବାରେନୁ ସତ୍ତୁବନ୍ ଆହ୍ନାଏ, ଆରୁ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଇଦ୍ଘି ବାରେ ବାତାବାଚ୍କାଦାସ୍। 20ଯେତ୍କବାକେନ୍ତିନ୍ ଦୁନିଆଁନ୍ ବାନାବା କେରା, ଆଲାର୍ ଦୁନିଆଁନ୍ ଆରୁ ଆକାଶ୍ବନ୍ ଏରିୟାର୍। ଯେତ୍କୋଭି ପାର୍ମେଶ୍ୱାର୍ସ୍ ବାନାବାଚ୍କାଦାସ୍ ଆନ୍ନୁ ଆବ୍ଡ଼ାର୍ ସାଫା-ସାଫା ଏରା ଅଙ୍ଗ୍ନାଏ, କା ପାର୍ମେଶ୍ୱାର୍ସ୍ ଏସ୍କେ ରାଦାସ୍, ଆସ୍କି ସବୁଦିନ୍ତା ଶକ୍ତିନ୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସିନ୍ ବାଉନାନାଘି ଏନ୍ଦେର୍ହି ବାହ୍ନା ଆବ୍ଡ଼ାର୍ସାନ୍ ମାଲ୍ଲାଦିନ୍। 21ଆବ୍ଡ଼ାର୍ ପାର୍ମେଶ୍ୱାର୍ସିନ୍ ଆହ୍ନାଏ, ହାଲେହି ଆବ୍ଡ଼ାର୍ ପାର୍ମେଶ୍ୱାର୍ସ୍କି ଉଚିତ୍ ଆଦର୍ ଆରୁ ଧାନ୍ୟାବାଦ୍ ମା ଚିନାଏ। ଆବ୍ଡ଼ାର୍ ପାର୍ମେଶ୍ୱାର୍ସ୍କି ବାରେନୁ ବାନେ ସୋଚ୍ବିଚାର୍ ମା କାମ୍ନାଏ, ଏତ୍କତକ୍ କା ଆବ୍ଡ଼ାର୍ଘି ନିର୍ବୁଦ୍ଧିଆ ମନ୍ଦ୍ ବାନେ ସୋଚ୍ବିଚାର୍ ମା କାମିଦ୍। 22ଆବ୍ଡ଼ାର୍ ନିଜ୍କେନିଜ୍ ବୁଦ୍ଧିୟାର୍ ବୁଲି ସୋଚ୍ନାଏ, ଲେକିନ୍ ମୁରୁଖ୍ ମାନ୍ନାଏକାନାଏ। 23ଆରୁ ନାଶ୍ ମା ମାନ୍ନାବାଲା ପାର୍ମେଶ୍ୱାର୍ସ୍କି ମାହିମାବନ୍ ନାଶ୍ ମାନ୍ନାବାଲା ମୁନୁଷ୍, ଆରୁ ଓଡ଼ା ଗୁଠିନ୍, ପଶୁ ଆରୁ ନେର୍ରୁଘି ମୂର୍ତ୍ତୀ ତିଆର୍ କାମିକିରି ଆବ୍ଡ଼ାନ୍ ପୂଜା କାମ୍ନାଏ।
24ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ତାହ୍ମା ମନ୍ଘି ଖାରାପ୍ ଇଚ୍ଛା ଲେଖା ଅଶୁଦ୍ଧ୍ଘି ଲାଗାନ୍ ଆମ୍ବେଇଚାସ୍କା ଆବ୍ଡ଼ାର୍ ଏକ୍ ଦୁସ୍ରାର୍ଗାନେ ନିଜର୍ ଶରୀର୍ବନ୍ହି ମାଇନ୍ ମା କାମ୍ନାଏ। 25ଏନ୍ଦେର୍ଗେକା ଆବ୍ଡ଼ାର୍ ପାର୍ମେଶ୍ୱାର୍ସ୍କି ସତ୍ତୁବନ୍ ବାଦ୍ଲିକିରି ଝୁଟ୍ଟୁ ବାନାବାଚାର୍। ଆରୁ ଆବ୍ଡ଼ାର୍ ଦୁନିଆଁନ୍ ବାନାବୁ ପାର୍ମେଶ୍ୱାର୍ସ୍କି ଆରାଧାନା କାମ୍ନାନ୍ ଆମ୍ବିକିରି ତାଙ୍ଘା ବାନାବାଚ୍କା ଜିନିଷ୍ବନ୍ ଆରାଧାନା କାମାଗେ ଲାଗ୍ଗିୟାର୍। ପାର୍ମେଶ୍ୱାର୍ସ୍ ଖାଲି ସବୁଦିନ୍ଘି ଲାଗାନ୍ ଧାନ୍ୟାବାଦ୍ଘି ଲାଇଗ୍ ରାଦାସ୍। ଆମେନ୍।
26ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଖାରାପ୍ ନାଲ୍ଖୁ କାମାଗେ ଆମ୍ବେଇଚାସ୍। ଆବ୍ଡ଼ାର୍ଘି ମାଏକିନିଆଁର୍ହି ସ୍ୱାଭାବିକ୍ ସମ୍ବନ୍ଧବନ୍ ଆମ୍ବିକିରି ଅସ୍ୱାଭାବିକ୍ ସମ୍ବନ୍ଧ କାମାଗେ ଲାଗ୍ଗିୟାର୍। 27ଏନ୍ନେନ୍ ଆବ୍ଡ଼ାର୍ଘି ମାର୍ଦ୍ନାର୍ହି ତାହ୍ମା ମାଏକିନିଆଁର୍ଗାନେ ସ୍ୱାଭାବିକ୍ ସମ୍ବନ୍ଧ ଆମ୍ବିକିରି ଏକ୍ ଦୁସ୍ରାର୍ଗାନେ ସମ୍ବନ୍ଧ ଉଇୟାଗେ ଜାଲ୍ରାଗେ ଲାଗ୍ଗିୟାର୍। ଆରୁ ମାର୍ଦ୍ନାର୍-ମାର୍ଦ୍ନାର୍ ଗାନେ ଖାରାପ୍ ନାଲ୍ଖୁ କାମ୍ଚାର୍। ଆବ୍ଡ଼ାର୍ଗେ ଖାରାପ୍ ନାଲ୍ଖୁଘି ବାରାବୁରି ଦଣ୍ତ୍ ହାଖ୍ଖରା।
28ଏନ୍ଦେର୍ଗେକା ଆବ୍ଡ଼ାର୍ ପାର୍ମେଶ୍ୱାର୍ସିନ୍ ଚିହ୍ନା ମା ବେଦ୍ଦିୟାର୍। ଆଙ୍ଗେନ୍ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ତାହ୍ମା ବାନେକିରି ନାଲ୍ଖୁ ମା କାମୁ ମନ୍ନୁ ଆମ୍ବେଇଚାସ୍, ଆରୁ ଆବ୍ଡ଼ାର୍ ଏନ୍ନେ ଉଚିତ୍ ମାଲ୍ଲିଦ୍ ଆ ନାଲ୍ଖୁନ୍ କାମାଗେ ଲାଗ୍ଗିୟାର୍ ଏକାନ୍ ମା କାମ୍ନାକାତ୍ଥା। 29ଆବ୍ଡ଼ାର୍ ଜାମା ରକମ୍ଘି ଅଧର୍ମ, ବଦ୍ମାସି, ଲୋଭ୍ଲାଲଚ୍, ହାଁଣ୍ନା ତୁଫ୍ନାତି ନିନ୍ଦିୟାର୍କେରାର୍। ଆରୁ ମାର୍ପିଟ୍, ପିଟ୍ଟନା, ଝାଗ୍ଡ଼ା, ଏଦ୍ର୍ନା, ହିସ୍ଙ୍ଗା, ତି ପୁରାପୁରୀ ମାନ୍ଚାର୍ କେରାର୍। 30ବଦ୍ନାମ୍ କାମ୍ନାବାଲା, ପାର୍ମେଶ୍ୱାର୍ସ୍ସିନ୍ ହାଁଣ୍ନା ତୁଫ୍ନାବାଲା, ଦୁସ୍ରାରିନ୍ ଆଦର୍ ମା କାମ୍ନାବାଲା, ଘମଣ୍ଡି, ବଡ଼୍ପଣି, ଖାରାପ୍ କାତ୍ଥା କାମୁ, ଆୟାଙ୍ଗ୍ ବାଙ୍ଗ୍ର୍ଘି ହୁକୁମ୍ ମା ମାନ୍ନାବାଲା। 31ନିର୍ବୁଦ୍ଧିଆ, ଧୋଖା ଚିଉର୍, ବାନେ ମା ହାଖ୍ଖୁର୍, ସଗ୍ଗେ ମା କାମୁର୍। 32ଆବ୍ଡ଼ାର୍ ତା ପାର୍ମେଶ୍ୱାର୍ସ୍କି ଇ ଧାର୍ମିକ୍ ନିୟମ୍ବନ୍ ଆହ୍ନାଏ କା ଏନ୍ନେ ନାଲ୍ଖୁ କାମୁର୍ ମରନ୍ଘି ଦଣ୍ଡ୍ ଲାଇଗ୍ ରାନାଏ ହାଲେହି ତା ଆବ୍ଡ଼ାର୍ ଖାଲି ଏନ୍ନେ ଖାରାପ୍ ନାଲ୍ଖୁ ମା କାମ୍ନାଏ ଲେକିନ୍ ଏନ୍ନେ ଖାରାପ୍ କାମୁର୍ଘି ଲାଗାନ୍ହି ଲିଝ୍ର୍ନାଏ।
ទើបបានជ្រើសរើសហើយ៖
ରୋମୀ 1: xis
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active) Wycliffe Bible Translators, Inc. All rights reserved.
