रोम 2
2
परमेसर को सचो न्याय
1 #
मत्त 7:1; लूक 6:37 थे जखा दुसरा को न्याय करो हो थारै कनै कोई भानो कोनी क्युं क थे दुसरा की जखी बाता को न्याय करो हो बा बाता म खुदई दोसी हो। जखी बाता को थे न्याय करो हो बे बाता थे खुदई करो हो। 2पण आपा जाणा हां क परमेसर को सचो न्याय बापै पड़ै ह जखा अंय्यां का करम करीं हीं। 3पण तू जखो अ सगळा काम करबाळा को न्याय करै ह जदकी तू खुद अ काम करै ह, जणा तू के जाणै ह क तू परमेसर का न्यायऊँ बच ज्यासी? 4थे बिकी दया अर बिकी सहनसिलता अर बिका थ्यावसनै ख्याई जोगो कोनी समजो के? तू सचमई जाणै ह क परमेसर की दया तनै पापऊँ मन फिराबा कानि लेज्यावै ह।
5पण थारा जीद्दि सुभाव अर पापऊँ मन नइ फेरबा की बजेऊँ थे थारै ताँई झाळ भेळी करर्या हो अर आ झाळ थार प बि दिन पड़सी जद परमेसर आपको सचो न्याय परगट करसी। 6क्युं क परमेसर हरेकनै बिका करमा गेल फळ देसी। 7बे मिनख जखा थ्यावसऊँ भला कामा म लागर मेमा, मान-समान अर अजर-अमर जीवननै टोवीं हीं बानै परमेसर अजर-अमर को जीवन देसी। 8पण जखा खुदकी परवा करीं हीं अर सचनै कोनी मानी पण बुरो करीं हीं, बापै परमेसर की झाळ अर रीस पड़सी। 9बुराई का गेला प चालबाळा दुख संकट भोगसी, आ बात पेली यहूदि मिनखा प अर सागै की सागै यूनानी मिनखा प बी लागू होवै ह। 10बा मिनखानै मेमा, मान-समान अर सुक-स्यांती मिलसी जखा भला काम करीं हीं। आ बात पेली यहूदि मिनखा प अर सागै की सागै यूनानी मिनखा प बी लागू होवै ह। 11परमेसर भेद-भाव कोनी करै।
12जखा नेम-कायदानै जाण्या बिना पाप करीं हीं बे बिना नेम-कायदा क नास कर्या ज्यासी। अर जखा नेम-कायदानै जाणर पाप करीं हीं बे नेम-कायदा गेल नास कर्या ज्यासी। 13क्युं क नेम-कायदानै सुणबाळा परमेसर की नजर्या म धरमी कोनी होवै, पण बिपै चालबाळो धरमी बाजै। 14जद परमेसरनै नइ ध्यारबाळा जखा नेम-कायदा का नियमानै कोनी जाणै इकै पाछै बी ज बे आपकी समजऊँ नेम-कायदा की बातानै मानै जणा बे बिना नेम-कायदाई खुद ताँई नेम-कायदा ह। 15बाका काम आ दिखावै ह क नेम-कायदो बाका मना प मंडर्यो ह, बाकी अन्तर-आत्मा गुवाई देवै ह, कदै-कदै बाका बिचार बापै दोस लगावै अर कदै-कदै बानै बचावै ह। 16अ बाता चोखा समचार गेल जिको म परचार करूं हूँ बि दिन होसी जि दिन परमेसर मसी ईसु क जरिए मिनखा की लुखेड़ी बाता को न्याय करसी।
यहूदि अर नेम-कायदा
17तू खुदनै यहूदि मानै ह अर नेम-कायदा प तनै बिस्वास ह अर परमेसर प तनै गुमान ह, 18तू परमेसर की इंछ्यानै जाणै अर जखो सई ह बिनै मानै ह क्युं क नेम-कायदाऊँ तनै अ सीखाया गया ह। 19तू आ मानै ह क तू आँदा की आँख ह अर जखा अँधेरा म भटकर्या हीं बा ताँई च्यानणो ह, 20मूरखानै गेलो बताबाळो ह अर टाबरानै सीखाबाळो ह क्युं क नेम-कायदाऊँ तनै सगळो ज्ञान अर सच मिल्यो ह। 21तू जखो दुसरानै सीखावै खुदनै क्युं कोनी सीखावै? तू जखो दुसरानै चोरी नइ करबा को परचार करै, खुद चोरी क्याले करै ह? 22तू सीखावै ह क, “कुकरम नइ करनो चाए,” जणा खुद क्याले करै ह? तू जखो मूरत्याऊँ नफरत करै, मनदरनै क्याले लूटै ह? 23तू खुद नेम-कायदा प गुमान करै, जणा नेम-कायदा का नियमानै तोड़र परमेसर को अपमान क्याले करै ह? 24जंय्यां क पबितर सास्तर म मंडेड़ो ह क, “थारी बजेऊँ परमेसरनै नइ ध्यारबाळा मिनखा म परमेसर की बुराई होवै ह।” 25क्युं क ज थे नेम-कायदानै मानो जणा तो सुन्नत को मतबल ह, पण ज थे नेम-कायदा का नियमानै तोड़ो जणा सुन्नत करायड़ा बी नइ करायड़ासा हो। 26ज कोई गैर-यहूदि जखो बिना सुन्नत हाळो ह नेम-कायदा प चालै जणा बिनै सुन्नत हाळो नइ होबा प बी परमेसर सची सुन्नत हाळो गिणसी। 27तू जिकी सुन्नत होईड़ी ह अर तेरै कनै मंडेड़ो नेम-कायदो बी ह इकै पाछै बी तू नेम-कायदा का नियमानै तोड़ै जणा जिकी कायाऊँ सुन्नत कोनी होईड़ी पण नेम-कायदा प चालै ह, बो तनै दोसी बतासी।
28जखो मिनख देख-दिखावा को यहूदि ह बो सचो यहूदि कोनी अर काया की सुन्नत, सची सुन्नत कोनी। 29सचो यहूदि बो ह जखो मांयऊँ यहूदि ह अर सची सुन्नत बा सुन्नत ह जखी आत्मा क जरिए मन की होवै ह मांडेड़ा नेम-कायदाऊँ नइ। अंय्यां का मिनख की बडाई मिनख नइ पण परमेसर खुद करै ह।
ទើបបានជ្រើសរើសហើយ៖
रोम 2: एस डब्लु वी
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(c) 2010-2017, New Life Computer Institute. All rights reserved
