Matewuji 20
20
Yofwalrafwaniha ya anamalima a munda wa uva
1Mwasiwa Umwene wa zulu unalingana na mulombwana mmohi uli mwinnya wa vande, wenno avenyilege na mabebehene ira adowe aavende anamalaba ira kadowe kalabege mundaye wa uva. 2Evale agaavendile anamalabale, ohomalaga vwanana na aliwa ira: <<Mwalaba siku nompumbula, miyo nnouvahani kobiri imohi ya parata.>>#20:2 kobiri imohi ya parata: Ora yenno kobiri yatambilra mutu agamanle laba siku nimohi ali kobiri imohi ya parata. Ku wonga maliba munda ohopangana ira aavahe anyaganyo kobiri yenno nnga katambilretcha atu. Liye kawendjedile eto kavungunle. Evale oharumaga, aliwa dowa mundani waye ule, aliwa roma laba. 3Noira enne, agamaruwile pandi ya 9 ora ira aavendeve amohiwa, ohaonaga atu amohiwa kafwanyeya varampani,#20:3 ohaonaga atu amohiwa kafwanyeya varampani: Malambo a mundulrimu, vamerkado vokala nimburo vagumanetcha anyaganyo. Evale mutu wenno akana mabasaye ira kalabiwe na atu, odowa nimburo neno, liye asakulra atu anne aafuna liye, vwanana mabasiwa, aliwa dowa roma laba. kahahindaga yengo. 4Mwa enne ohawandelaga eraga: <<Na nyenne venyani mudowe mwalabege mundani waga wa uva, wewo daahiyile miyo afwinyu. Miyo nnouvahani yenno inakale yokwakwanela na ndima inafuna nyo laba.>> Evale aliwa kohodowaga, roma laba.
5Noira enne, ifiyaga 12 ora, ovenya akoka, liye dowa asayela anamalaba amohiwa, liye azana, aliwa roma laba. Eto ifiyaga 15 ora, ovenya akoka, liye dowa asayela anamalaba amohiwa, liye azana, aliwa roma laba. 6Mwa enne yagafiyile pandi ya 17 ora, ovenya akoka, liye afwanya atu amohiwa, liye afuka kwi: <<Kodi mukalele nni veva siku nompumbula na peno mwahahindaga yengo?>> 7Evale aliwa kohomuwakulaga, aliwa ira: <<Kaniire funa. So mbwenye hiyo kanimuonne mutu ofuna nivaha mabasa ira nilabe siku na peno ni.>> Mwa enne liye ohawandelaga kwi: <<Na nyenne dowani mwalabege mundani waga wa uva, wewo unalaba afwinyu.>> Evale kohodowa, aliwa labaga.
8Mwa enne nzuwa nagavirile, mwinnya wa mundole ohomuitanaga musogolrelri waye amuwandelaga eraga: <<Kaaitane aliba lima atene ira waatambilrihe kobiriwa, romela ogomiheda fiyeda arandji za.>>
9Mwa enne ale kaligi ogomiheda za ale, kohofiyaga, aliwa watchela kobiri imohi ya parata kada mutu. 10Mbwenye yagafiyile tempu ira ale kali arandji dowa mundani ule katambilre, aliwa kaumbuwela ira: <<Hiyo nnotambilra kobiri ilukulu kwaranya yenno itambinlre afwihu ala kazile tchineneva.>> Mbwenye kada mutu ohotambilraga kobiri imohi ya parata molingana na afwiwa ale. 11Evale aliwa katambilraga, kohotakaleliwa, aliwa roma mung'ong'ohaga mundimuwa wa vande ule, keraga: 12<<Afwihu ogomiheda ala kazile tchineneva, kalabile ora imohi bahi eto muhatambilriha molingana na hiyo, agali hiyo guonile goyi ya ntana no viha watene wene waona hiyo.>>
13Mbwenye mwinnya wa mundole ohowakulaga amuwongagana mutu mmohi eraga: <<Moya miyo kannaudjelra nari. Kodi weyo uvolowaga ira walabe kanapanganne ira duvahe kobiri imohi ya parata? 14Utukule yenno ili yawo nnga mwapanganne hiyo, udowege. Miyo mbwenye nnafuna dimutambilrihe mutu ogomiheda za ula molingana na yenno itambinlre we. 15Kodi miyo na kobiri yaga dinna miyo, kavili jowandeya ira diirena yenno inafuna miyo? Owu hehi weyo unadiirela jatene jeji na mwasa oira kuziveliwe upama daairele miyo afwawo?>>
16Yesu agamanle wonga eno, ohomariha eraga: <<Kalaga nnga Umwene wa zulu. Anno kali ogomiheda peno va, anoza kakale arandji eto oroma peno va, anoza kakale ogomiheda.>>#Matewuji 19:30
Yesu ohowonga fendo yaneraru zela kwa waye no venya waye mokwani
Markuji 10:32-34; Lukaji 18:31-34
17Yesu adowaga Jeruzalemu, kagali mundila, ohaitanelaga anamamuharaye pandi yewene, liye roma awandelaga eraga: 18<<Kavuruwanani pama! Hiyo eni ulrendola nnadowa Jeruzalemu. Nadowa wewule, Mwana wa Mutu unoveleliwa mmandani mwa andimuwa a anamakuta na anamafundjiha malamulo eto anomutonga ira apiwe. 19Eto anonvaheda mmandani mwa atu ohokala aJudewu. Aliwa anompeta, kamuwaxule, kamukomele vamuradini fiyeda akwe. Mbwenye kagampile, siku naneraru, unovenya mokwani.>>
Yovepa ya mwadi Zebedewu
Markuji 10:35-45
20Evale mwadi Zebedewu ohozaga na ahimaye ambinli, liye fiya vali Yesu, mukokorela, roma nvepa eraga: <<Nnafuna muirena yenno inafuna miyo uvepani.>>#20:20 mwadi Zebedewu ohozaga na ahimaye ambinli: Ahima ambinli anawongiwa gu Tiyagu na Juwawu. Aliwa eto kafwanyeya muwari mwa anamamuhara Yesu kumi na ambinli. 21Yesu ohonfukaga muhiyanole ira: <<Kawonga, unafuna nni?>> Liye ohowakula kwi: <<Miyo dazela duvepeni. Nnavepa mulumbele ira mwafiya muUmweneni mwenyu, mwaagaratihe ahimaga ambinli ala, mmohi muwononi wenyu odjana, mmohiwa muwononi wenyu oromana.>> 22Evale Yesu ohowakulaga eraga: <<Nyo inavepa nyo, kamuiziwile.>> Noira enne, ohafuka ahimaye ale eraga: <<Kodi nyo munowanda ng'wa kopo imohive ya goyi inafuna miyo ona?>> Aliwa kohorumelaga ira: <<He, nnowanda.>> 23Evale liye ohawandela eraga: <<Ng'wave, munong'wa mukoponi mwaga.#20:23 Ng'wave, munong'wa mukoponi mwaga. Va Yesu unaawandela ana Zebedewu ira: <<Goyi nnafuna miyo ona, na nyenne munokala aniya? Munoona.>> Nione Matewuji 26:39; Juwawu 18:11. Mbwenye ira dugaratiheni nfwaye muwononi waga odjana, nfwaye muwononi oromana, mabasa anno kadivahiwe. So mipando dedo disakanyiwe ira kavahiwe ale kasakulriwe na Baba.>>
24Evale anamamuhara afwiwa kumi ale kagavwile yovepa yenne, kohotakaleliwa na afwiwa ambinli ale. 25Evale Yesu ohagumaniha anamamuharaye atene vamohi, liye ira: <<Nyo muhumala iziwa makalelo vinera andimuwa a atu a unde. Anamasogolrelra ewa kafunaga aruma atu, anaaruma movitukulela. Eto muhuiziwa ira anno anafwanyeya kagali andimuwa, anaakanyiheda atu muwari mwa utongi unna atu. 26Mbwenye zela nyo, kamukale eno. Mofutukula, ule unafuna ira akale mundimuwa, akalege namalaba wa afwaye. 27Eto unafuna kala murandji, akalege muzari wa nyo. 28Kalaga nnga Mwana wa Mutu. Mwana wa Mutu kazele ira atu kamulabege. Mbwenye uzile avahe ingumi yaye ira aawombole atu oindjiva.>>
Yesu ohavulumutcha aliba haona ambinli
Markuji 10:46-52; Lukaji 18:35-43
29Yesu na anamamuharaye kakumaga sidadi ya Jeriko, wohokala mwindji wa atu oindjiva kamuhara. 30Mwa enne kohokalawo aliba haona ambinli kafwanyeyaga ogaratene wandamelana mundila. Aliwa kagavwile ira: <<Yesu unavira>>, kohoromaga kuwa keraga: <<Nabwiya, Mwana Davi, niwendeleni tangaranga hiyo vano.>> 31Evale atu kamuharaga Yesu ale kohoroma asumulula, keraga: <<Munakuwela nni? Kamiyalani nyo!>> Mbwenye aliwa komuitanagave kakuwaga keraga: <<Nabwiya, Mwana Davi, niwendeleni tangaranga hiyo vano.>> 32Mwa enne Yesu ohoimelaga, liye aitana. Kagazile, ohafukaga, liye ira: <<Katchiyeni, nyo munafuna ira duireleni nni?>> 33Aliwa kohowakulaga keraga: <<Nabwiya hiyo nnafuna ira meso ehu kahuleye, nionege!>> 34Evale Yesu mozeliwa tangaranga, ohosakwinyaga meso ewa. Mwa enne, mobaranya kohoromaga ona. Eto noira enne, aliwa kohoromaga muhara.
ទើបបានជ្រើសរើសហើយ៖
Matewuji 20: iLolo
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral
