Sabiduría 15
15
Jiñi israelitajob ma'añik mi' ch'ujutesañob kuybil'obä ti ch'ujul
1kCh'ujutat lojoñ,
uts'atäch yik'ot chäñ xuk'ul apusik'al
ma'añik se'b mi' amich'añ
yik'ot mi' amel ayumäñtel ti' ak'uxbiya.
2Acha'añoñ lojoñ ti' pejtelel k'iñ
mach jiñik yälä che' mi kcha'leñ lojoñ mulil;
käñäyix lojoñ jiñi ap'ätälel.
Jatet kyumetäch lojoñ,
jiñ cha'añ mach komik lojoñ kmel mulil ti' atojlel.
3Ts'äkäläch mik taj lojoñ koltäñtel
che' mij k'otel käñet lojoñ.
Itejchibal jiñi kuxtälel machbä añik ijilibal
jiñäch che' mi jkäñe lojoñ jiñi ap'ätälel.
4Ma'añik mi' ilotiñoñ lojoñ
jiñi kuybilo'bä ti ch'ujul melbiljachbä icha'añob
wiñikob xmel ch'äjli'ob
mu'bä iboñob ti' pejtelel uts'ataxbä bojñibäl.
5Kojach jiñi machbä añik iña'täbalob
mi' toj sajtelob ipusik'al che' mi' ik'elob
ti' tojlel kuybilo'bä ti ch'ujul
machbä año'bik ikuxtälel.
6Jiñi xmel kuybilo'bä ti ch'ujul,
temel yik'ot jiñi mu'bä ich'ujutesañob,
jiño'bäch mu'bä ik'uxbiñob jiñi joñtolil.
¡Jiñ cha'añ, la' itajob wokolil!
Lajiya cha'añ xmel ch'ejew
7Jiñi xmel ch'ejew mi' ixäk'e jiñi ok'ol
cha'añ mi' imel p'ejtak mu'bä ilaj k'äñ.
Yik'ot ti jiñi ok'ol mejl imel
p'ejt cha'añ mi' ik'äjñel
ti chuki uts'atbä yik'ot joñtolbä.
Jiñi xmel ch'ejew mi' iña'tañ
bajche' mi' ik'äjñel ti jujump'ejl jiñi ip'ejtak.
8Jiñi xmel ch'ejew mi' isät k'iñ yik'ot ip'ätälel,
che' mi' imel jiñi kuybilba ti ch'ujul
lok'embä ti ts'u'beñal lum.
Ma'añik mi' iña'tañ cha'añ wajali
mejlemjach ti ts'u'bejñ ja'el
yik'ot che' ma'añix mi' ikajel ijalijel,
che' muk'ix ijilel ikuxtälel,
mi' ikajel icha' sujtel ti' ts'u'bejñal lum.
9Che' yom iña'tañ ti ipusik'al cha'añ mach tamik ikuxtälel
yik'ot cha'añ mi kajel ti chämel,
mi' ilajiñ ibä yik'ot jiñi mu'bä ik'äñob tsuku tak'iñ ti' e'tel.
Mi' weñ mulañ ti' ipusik'al imel jiñi kuybilbä ti ch'ujul.
10Ipusik'al lajaläch bajche' täñäl k'ajk,
jiñi ipijtaya ñumeñ añäch ibi'bilel bajche' lum
yik'ot ikuxtälel ju'beñto ik'äjñibal bajche' ok'ol.
11Ma'añik käñä icha'añ Lak Ch'ujutat xmeloñelbä ti' itojlel
yik'ot tsa'bä iwujtäbe ich'ujlel cha'añ mi' kuxtäyel.
12Jiñi xmel p'ejt alasach mi' iña'tañ jiñi ikuxtälel,
yik'ot choñoñeljach cha'añ itajol tak'iñ.
Jiñ cha'añ che' mi' yäl:
«Yom mi' k'äñe'la jiñto jiñi joñtolil
cha'añ käläxix mi lak taj jiñi tak'iñ».
13Jiñi xmel p'ejt mi' mel yik'ot jiñi ok'ol,
jiñi kuybilbä ti ch'ujul yik'ot p'ejtak mu'bä ti tojp'el,
che' ja'el yujiläch cha'añ woli imel chuki joñtolbä.
Isajtemal egipciojob
14Ixku jiñi ñumeñ ju'beño'ächbä iña'täbal
jiño'bäch tsa'bä ik'äñäyob ti tsätsbä e'tel atejklum,
15kome tsi' ich'ujutesayob bajche' ch'ujulo'bä
ti' pejtelel kuybilo'bä ti ch'ujul icha'añ yañtakbä tejklumtak.
Jiñi kuybilo'bä ti ch'ujul añob iwut, ixku ma'añik chuki mejl ik'elob,
año'bäch iñi', ixku ma'añik mi' isik'ob ik';
año'bäch ichikiñ, ixku ma'añik mi' iyu'biñob t'añ,
año'bäch iyalob k'äb, ixku mach mejl itälob,
yik'ot año'bäch iyok, ixku mach mejlob ik'äñob ti xämbäl.
16Kome tsi' mele juntikil wiñik
majñäbiljach icha'añ ikuxtälel,
ixku ma'añik juntikil mu'bä imejl imel
juntikil ch'ujulbä lajalbä yik'ot.
17Jiñi mu'bä imelob kuybilo'bä ti ch'ujul muk'ach ichämelob,
jiñ cha'añ jiñi iyejtaltak ma'añik ikuxtälel.
Jiñi mu'bä ich'ujutesañ kuybilo'bä ti ch'ujul
ñumeñ ñuk ik'äjñi'bal bajche' mu'bä ich'ujutesañ,
kome añäch ikuxtälel,
ixku jiñi kuybilo'bä ti ch'ujul ma'añobik ikuxtälelob.
18-19Che' ja'el, jiñi egipciojob mi' ich'ujutesañob
lekojaxbä yik'ot bi'bi'takaxbä bälte'eltak,
ts'a'lebilbä ti Lak Ch'ujutat
che' bajche' tsi' mele ti' tojlel lukum ya' ti Edén.
ទើបបានជ្រើសរើសហើយ៖
Sabiduría 15: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM