Eclesiástico 4
4
1Kalobil, mach awajleñ jiñi wolibä iyu'biñob wokol;
yik'ot mach abi'leñ jiñi wolibä iñumeñ yilañ wokol.
2Mach ma' wäk'eñ iyu'biñ wokol jiñi ambä iwi'ñal,
mach amujkuñ abä ti itojlel jiñi ñumeñ p'ump'umbä.
3Mach ma' wäk'eñ iyu'biñ wokol jiñi ch'ijiyembä ipusik'al,
yik'ot yom achäñ koltañ majki yombä koltäñtel.
4Mach ats'a' k'el jiñi mu'bä ik'ajtiñ akoltaya mi jiñik p'ump'uño'bä,
5cha'añ ma'añik mi' ch'äkleñet ti wi'il.
6Kome che' woli iyu'biñ ch'ijiyemlel mi' imel k'ajtiya,
jiñi Lak Yum mi kaj iñäch'täbeñ it'añ.
7Ak'ä abä ti k'uxbiñtel ti' tojlel api'älob,
yik'ot k'uxbiñ jiñi año'bä iye'tel ja'el.
8Yom ma' ñäch'täbeñ it'añ p'ump'umbä,
yik'ot ti' awustlel jak'beñ che' woli ipejkañet.
9Koltañ jiñi p'ump'umbä ti' tojlel xtik'laya,
yik'ot mach acha'leñ bäk'eñ cha'añ ti' melol chuki toj.
10Yom awajñel ti' tojlel meba'ob
yik'ot ti itojlel ti' xme'ba' ixikob,
che' bajche' juñtikil xkoltaya.
Che' jiñi Lak Yum mi' kaj ipejkañet ti' iyalobil,
mi' ikajel ik'uxbiñet yik'ot mi' ikajel ikoltañet ya' ti wokolil.
Ikoltaya jiñi ña'täbaläl
11Jiñi ña'täbaläl mi ikäñtesañ majki mu'bä isajkañob;
yik'ot mi' ipäsbeñob jiñi bijlel che' bajche' iyalobilob.
12Jiñi mu'bä ik'uxbiñob,
mi' k'uxbiñob jiñi kuxtälel;
majki mu'bä ichäñ sajkañ,
k'ux u'bibilob ti Lak Yum.
13Jiñi mu'bä iweñ lotob ti' ipusik'al,
mi kaj iyäk'beñtelob iñuklel ti' itojlel;
che' baki jach mi' majlelob ti chumtäl
mi' ich'ujutesäñtelob ti Lak Yum.
14K'uxbiñla jiñi ña'täbaläl,
che' jiñi Lak Yum mi ikaj ik'uxbiñetla ja'el.
Tsajkañlaj jiñi itik'ojel,
che'äch bajche' jiñi woli la' ach'ujutesañ Lak Yum.
15Jiñi mu'bä icha'leñ ch'ujbiya ti' itojlel,
mi' kajel ti meloñel ti' tojlel yumäñteltak;
majki mu'bä iñäch'täbeñ ikäñtesä,
mi' ikaj ti chumtäl yik'ot ti' iyotot.
16K'uñte xuk'ul mi' ikaj ti xämbal yik'ot.
17Mi' kaj iyäk'eñ ka'bäl wokol cha'añ itoj-esäñtel;
ya'i che' xuk'ulix ipusik'al yik'ot,
18mi' ikaj icha' sujtel tilel ti itojlel cha'añ mi ikäñtesañ
yik'ot cha'añ mi' itsiktesäbeñ jiñi mukulbä ña'täbal.
19Ixku mi tsa' itäts'ä ibä ti' ibijlel, mi' ikaj ibi'leñtel
ya'i mi' kaj iyäk' ti jisäñtel.
Mi jiñik ch'ejlbä ti joñtolil mi jiñik chap'ejlbä ipusik'al
20Kalobil,
chäñ k'ele chuki mi' iyujtel ti' pejtelel k'iñ,
ya'i ñajt-esañ abä ti jiñi joñtolil,
cha'añ ma'añik ma' acha' sujtel akisiñ abä.
21Kome añ kisiñtikbä mu'bä ich'äm tilel mulil,
yik'ot añ yambä kisiñ mu'bä iyäk'eñoñla iñuklel lak pusik'al.
22Kome uts'at che' ma' awu'biñla kisiñ,
ixku mach yom abajñel tik'lañla abä.
23Mach yomik ma' tik' at'añ che' añ chuki mejl awäl,
mi yomik amuk aña'täbal.
24Kome jiñi ña'täbal mi' käjñel ya' ti lak t'añ,
yik'ot jiñi p'ip'lel lak kol, che' uts'at mi lak jak'ela k'ajtiya.
25Mach achañ-esañ abä ti' itojlel chuki isujmbä,
yom awu'biñ kisiñ che' mach laj awujilik ña'täbal.
26Mach ach'aleñ kisiñ che' ma' tsiktesañ amul
yik'ot mach achäñ mel ach'aplomlel.
27Mach awu'biñ it'añ jiñi machbä toj iña'täbal,
ixku mach ak'uj abä ti' tojlel jiñi año'bä ip'ätälel.
28Chäñ sajkañ ti' apusik'al chuki tojbä k'äläl che' ma' chämel,
che' jiñi Lak Yum mi' kaj ikoltañet ti' tojlel ts'a'bä mi' k'eletob.
29Mach achañ-esañ abä che' añ chuki ma' wäl,
mi ts'ubetax ti e'tel yik'ot mi xlotetik ti awe'teltak.
30Mach apäs ap'ätälel che' bajche' junkojt bajlum ya' ti awotot,
yik'ot xbäk'eñet ti' itojlel yaño'bä.
31Mach achäñ tich' ak'äb cha'añ chuki mi' ach'äm
ya'i xchäket che' jatet ma' wäk'.
ទើបបានជ្រើសរើសហើយ៖
Eclesiástico 4: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM