Eclesiástico 30
30
Käñtesa ti' itojlel la' jkalobilob
1-3Mi' mux aweñ k'uxbiñ awalobil,
yom ma' käñtesañ yik'ot yom atoj-esañ.
Mi' che'äch ma' mel, ti wi'il mi' kaj iñuk'esañ apusik'al.
Jiñi käñäyo'bä acha'añ mi kaj itijikñesañob ibä awik'ot,
ixku xts'a'leyajob ti' atojlel mi kaj imich'esañob ipusik'al.
4Mi' mux aweñ käñtesañ awalobil,
che' ti' yorajlel achämel, ma'añik majki mi kaj iñajäyet,
kome mi kaj ik'ejlel ti awalobil juñtikil bajche' jatet.
5Che' añet to ti pañämil ma' tijikñesañ apusik'al ti' itojlel,
che' ti' yorajlel achämel, ma'añik ich'ijiyemlel apusik'al
6kome jiñi awalobil mi kaj ik'extäbeñ ijoñtolil ats'a'leyajob
yik'ot mi' kaj icha' koltañ api'älob.
7Mi ma'añik ma' atoj-esañ awalobil,
ti wi'il, mi' akaj ats'äkäbeñ ilojwemal,
yik'ot ma' kaj amel apusik'al che' ma' awu'biñ iyuk'el.
8Mi' mach uts'esäbilik jiñi akawayu',
mach kajetik ti k'ächtäl,
mi' ma'añik ma' atoj-esañ jiñi awalobil,
mach kajetik che'bä awom akäñtesañ.
9-10Mi ma'añik ma' akäñtesañ awalobil,
yik'ot ma' wäk'eñ pejtelel chuki mi' k'ajtiñ,
ti wi'il ma' akaj amel apusik'al.
11-12Che' alobto mach ma' wäk' imel chuki yom ti' bajñel,
che' ja'el, mach ma' ñusañ isajtemal.
Yom ma' toj-esañ ti jujump'ejl k'iñ
cha'añ ma'añik mi' mel ich'aplomlel
yik'ot ma'añik mi yotsañ wokolil ti' atojlel.
13Yom ma' weñ toj-esañ awalobil,
che' jiñi, ma'añik ma' akaj awu'biñ kisiñ cha'añ ti kaj isajtemal.
Ik'äjñibal la jk'ok'lel
14Ñumeñ uts'at che' añäch la jk'ok'lel ti p'ump'uñlel,
kome ma'añik ik'äjñibal ombä chu'bä añäl che' añoñlaj ti k'amäjel.
15Ñumeñ ñuk ik'äjñibal jiñi la jk'ok'lel yik'ot la jch'ejlel,
che' bajche' añ ti lak tojlel pejtelel chu'bä añäl cha'añ pañämil.
16Ma'añik ñukbä chu'bä añäl
che' bajche' la jk'oklel,
Che' ja'el ma'añik ñukbä tijikñäyel
che' bajche' itijikñäyel lak kpusik'al.
17Ñumeñ uts'at jiñi chämel,
che' añoñlaj ti k'amäjel
yik'ot ti ch'ijiyemlel ti' pejtelel k'iñ.
18-20Che' mi lak käk'eñ bälñäk'äl ti ipam mukoñibäl,
yik'ot che' mi lak käk'eñ majtañäl ti itojlel jiñi kuybilo'bä ti ch'ujul,
lajaläch che' bajche' mi laj käk'eñ ik'ux iwaj juntikil machbä mejlik ik'ux:
¡Ma'añik bakibä k'iñ mi' kajelob we'el uch'el
jiñi kuybilo'bä ti ch'ujul mi jiñi chämeño'bä!
Che'äch mi' yujtel ti' itojlelob
jiñi ts'a' k'elbilo'bä ti' tojlel Lak Yum;
lajaläch che' bajche' juntikil wiñik machbä mejlik ipi'leñ x-ixik;
werza yom ixku ma'añik mi' mejlel imel:
Che' jach mi' mek' jiñi x-ixik yik'ot ka'bäl ch'ijiyemlel.
Itijikñäyel lak pusik'al
21Mach ma' wäk' ti ch'ijiyemlel ach'ujlel,
che' ja'el mach amel apusik'al
ti' kaj chuki ma' bajñel ña'tañ.
22Majki tijikña ipusik'al ti' pejtelel k'iñ
uts'atax mi' chumtäl yik'ot mi' tam-esañ ija'bilel.
23Jiñ cha'añ, ¡Tijikñesañ apusik'al,
ñajätesañ pejtelel ch'ijiyemlel,
kome ma'añik chuki uts'at mi' päy tilel!
24Jiñi tsäytsäyñälel lak pusik'al, jiñi mich'lel
yik'ot che' añ ch'ijiyemlel ti lak pusik'al,
mux ikom-esañ lak ja'bilel.
25Ixku majki tijikña mi' yajñel,
mi' tijikñesañ ipusik'al ja'el che' mi' cha'leñ we'el uch'el.
ទើបបានជ្រើសរើសហើយ៖
Eclesiástico 30: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM