Eclesiástico 28
28
1Majki mi' k'extañ joñtolil mi kaj iyu'biñ imich'lel Lak Yum,
kome Lak Yum yujil bajche' k'amel imul.
2Yom ma' ñusäbeñ imul api'äl,
che' jiñi Lak Yum mi kaj ip'uñtañet ja'el che'bä ma' aka'jtibeñ.
3Mi juñtikil wiñik mi' lot mich'ajel ti' itojlel yambä ipi'äl,
¿Bajche' mi' imejlel ik'ajtiñ ikoltäñtel ti Lak Yum ja'el?
4Mi pejtelel k'iñ añet ti mich'lel yik'ot api'älob,
¿Bajche' ma' pijtañ ip'uñtaya icha'añ Lak Yum?
5Mi juñtikil wiñik ma'añik mi' ñusäbeñ imul ipi'älob,
¿Majki mi' mejlel iñusäbeñ imul ja'el?
6Ña'tañ ajilibal, yom ma' käy jiñi ts'a'leya,
che' ja'el yom ma' chäñ ña'tañ achämel,
ts'äktesañ pejtelel ixik'ojel Lak Yum.
7Chäñ ña'tañ ixik'ojel Lak Yum,
mach ma' lot mich'ajel ti' tojlel api'älob,
Yom ma' chäñ ña'tañ ja'el xuk'ulbä it'añ Lak Yum,
ñajätesañ pejtelel letojtak.
Jiñi letojtak
8Täts'ä abä, baki woli ikajbeñob ibä
cha'añ ma'añik ma' yajlel ti mulil,
kome jiñi joñtolo'bä wiñikob mi' techob ka'bäl wokol.
9Jiñi xmulil mi' päk'beñ joñtolil ti' pusik'al ipi'älob,
ya' ba' añob ñäch'älbä wiñikob mi' p'olbeñ ka'bäl wokol.
10Che' bajche' si' mi' p'ätesañ jiñi k'ajk,
che'äch ja'el mi techob letoj jiñi joñtolo'bä,
mi ka'bäl ichu'bä añ, mi weñ p'ätäl,
ñumeñ ñuk imich'ajel yik'ot ijoñtolil.
11Jiñi joñtolbä t'añ, mi' ts'uk jiñi k'ajk,
jiñi letojtak, mi yujtel yik'ot chämel.
12Che' ma' wujtañ jiñi ñich k'ajk mi' lejmel,
che' ma' tujbañ mi' yajpel,
ti cha'p'ejlel mi lok'el ti awej.
Jiñi u'yaj t'añ
13¡Ch'äkäyob majki mi' cha'leñob u'yaj yik'ot lotbä t'añ,
kome tsa'ix iyäk'äyob ti sajtel jiñi ñäch'älbä wiñikob!
14Cha'añ imul jiñi u'yaj t'añ ka'bälob tsi' käyäyob ilumaltak,
che' ja'el tsa' ijisa ts'ajkibilbä tejklumtak,
yik'ot tsi' yäk'ä ti jejmel iyotottak jiñi ñukbä wiñikob.
15Jiñi u'yaj t'añ mux iyäk' ti lok'el ti iyotot jiñi xuk'ulbä ijñamäl,
che' ja'el mi' chilbeñ ichobejtäbal iye'tel.
16Majki mi' iñäch'tañ jiñi u'yaj yik'ot lotbä t'añ,
ma'añik mi kaj iyu'biñ tijikñäyel,
che' ja'el ma'añik mi kaj itaj iñäch'tälel ipusik'al.
17Jiñi tsätsbä asiyal mi' käy iyejtal,
jiñi u'yaj t'añ mi' laj k'äs lak bäkel.
18Ka'bäl wiñikob tsa' chämiyob ti jek'oñibäl,
ñumeñ ka'bälob jiñi tsa'bä jisäntiyob cha'añ ti' mul jiñi u'yaj t'añ.
19La' itijikñesañ ibä majki machbä añobik ti wokol ti ikaj pejtelel iliyi,
20kome jiñi ikuchijel lajaläch bajche' jiñi ch'ajñal melbilbä ti tsuku tak'iñ.
21Che' ja'el mi' päy tilel bäbäk'enbä chämel,
ñumeñ uts'at che' añoñixlaj ti mukoñibäl.
22Jiñi u'yaj t'añ ma'añik mi' mejlel itik'lañob jiñi xuk'ulbä wiñikob,
ik'äk'al ma'añik mi kaj ipulob.
23Kojach majki mi' ikäyob Lak Yum mi kaj ijisañtelob,
mi kaj ipulelob ti' pejtelel k'iñ,
che' bajche' junkojt joñtolbä bajlum
mi kaj ibik'ti jisañob.
24Joy mäkä ti ch'ixol jiñi awotot, che' ja'el yom ma' weñ käñtañ jiñi atak'iñ.
25Yom ma' wäk' ti p'isoñib jiñi at'añ,
che' ja'el yom ma' wäk'eñ imajkil jiñi awej.
26Tsajilet cha'añ ma'añik ma' wotsañ lotbä t'añ che' ma' cha'leñ t'añ,
ame yajliket ti' ik'äb jiñi mu'bä ichijtañetob.
ទើបបានជ្រើសរើសហើយ៖
Eclesiástico 28: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM