Eclesiástico 20
20
Jiñi ambä iña'täbal yik'ot jiñi xch'aplom
1Añ machbä iyorajlel mi' imejlel jiñi tik'ojel,
añ majki ñäch'älbä mi' kälel cha'añ che'äch mi' tik' ipusik'al.
2Ñumeñ uts'at che' mi lak mel tik'ojel,
mach che'ik che' añ lak mich'lel.
3Jiñi mu'bä iña'tañ imul, mi' kojlel ti wokol.
4Jiñi mu'bä ik'äñ joñtolbä ip'ätälel cha'añ mi' itaj chuki toj
lajaläch che' bajche' juñtikil wiñik machbä mejlik ipi'leñ x-ixik
che' mi' ñop ip'ajchiñ juñtikil xch'okbä x-ixik.
5Añ ñäch'älobä yik'ot año'bäch iña'täbal
añ yaño'bä, cha'añ ka'bäl mi' cha'leñob t'añ,
muk'ix ik'ojyelob iyu'biñob.
6Añ ñäch'älbä mi' yajñelob cha'añ mach yujilo'bik bajche' yom jak'ol,
añ yaño'bä ñäch'älobä mi' kälel ipijtañob cha'añ mi jak'ob.
7Ambä iña'täbal, ñäch'äl mi' yajñel, jiñto mi' ik'otel iyorajlel icha'leñ t'añ,
ixku joñtolbä ipusik'al mi' iwa' xäñ otsañ it'añ.
8Jiñi jaybä iti' mi' cha'leñ ka'bäl t'añ ya'i ts'a'ix mi' ik'ejlel,
yik'ot jiñi joñtolbä mi' imel iye'tel ts'a'ix ti k'elol.
9Añ bixel lak ñuklel mi lak taj ya' ti wokol,
añ ja'el lak chobejtäbal mu'bä iyäk'oñla ti sajtel.
10Añ che' mi' acha'leñ koltaya ma'añikbä mi' yäk'eñet achobejtäbal,
ti ojliltak, che' mi' awäk', cha' sujtelto mi lak ch'äm.
11Añ ñuk'esäñtel mu'bä ipäytilel wokolil,
che' ja'el jiñi wiñikob mu'bä ipek'esañ ibä mi' imejlel itajob ñuklel.
12Añ ka'bälob mi' melob mäñoñel che' ma'añ letsel itojol,
ixku wäksujtelto mi' cha' ñumeñ tojob bajche' itojol.
13Jasäljach cha'p'ajl uxp'ajl it'añ jiñi ambä iña'täbal
cha'añ mi' iyäk' ibä ti k'uxbiñtel,
ixku uts'atbä t'añ jiñi machbä añik iña'täbal ma'añik mi' ch'äjmel.
14Jiñi majtañ mu'bä iyäk'eñet machbä añik iña'täbal,
ma'añik mi kaj ik'äjñibäyel acha'añ;
jiñi ñumeñ ñuk woli ik'el bajche' yilal jiñi majtañ;
15wistäjach chuki mi yäk', ñumeñix ti p'is mi' itsiktesañ,
ya'i mi' cha'leñ t'añ che' bajche' ñukbä ik'äjñibal chuki mi' iyäl mi' iña'tañ.
Mi' yäk' ti majañ wale, ijk'äl woli ik'ajtiñ ik'exol:
¡Ts'a'ix ti k'elol jiñi wiñik!
16Jiñi joñtolbä iña'täbal mi' yäl: «¡Ma'añik juñtikil kpi'äl käñäbä kcha'añ!
¡Mi' añik majch mi' chäñ kämbeñoñ ust'atbä jkoltaya!
17Mi' k'uxob kwaj kik'ot ya'i mach uts'at muk'ob ti t'añ ti ktojlel».
¡Ixku jay yajl mi' cha'leñob tse'ñal ti tojlel!
18Cha' uts'at che' mi' jäjlel lak kok ya' ti pam xajlel,
mach che'ik che' mi' yäk'oñla ti yajlel lak t'añ;
iwokolil xjoñtolob che'äch mach jal mi' ikajel itilel.
19Juñtikil mu'bä imulañ lekojbä t'añ,
lajal bajche' alas t'añ machbä uts'atik ti u'biñtel
mu'bä ichäñ alob jiñi machbä añobik iña'täbal.
20Jiñi käñtesa mu'bä ilok'el ti' iyej xjoñtolil mach weñ u'bibilik,
cha'añ ma'añik mi' iwis su'b che' yorajlel mi' iyäl.
21Añ machbä añik mi' icha'leñob mulil ti' kaj cha'añ p'ump'uñob;
che' mi' ik'ajob iyoj tijikña ipusik'al mi' yajñelob.
22Añ yaño'bä mu'bä isätob ibä ti' kaj kisñiyel,
yik'ot cha'añ mi' ibäk'ñañob jiñi machbä añik iña'täbal.
23Añ yaño'bä, ti' kaj mach weñ tijikñayob,
mi' ikomoñ lajob it'añ ti' tojlel ikäñäbä ipi'äl,
che' jiñi, mi' imajtañ taj majki mi' ts'a'leñ.
24Jiñi lot jiñäch xbi'besa icha'añ jiñi wiñik;
ya'äch mi lak chäñ taj ti' it'añ machbä añikob iña'täbal.
25Ñumeñ uts'at jiñi xujch' bajche' mu'bä icha'leñ lot,
ixku kojach ti' icha'tiklelob mi' majlelob ti sajtemal.
26Jiñi ñämälbä icha'leñ lot mux iyäk' ibä ti kisiñ;
ti' pejtelel k'iñ ma'añik mi' ikaj ti k'ejlel ti ñuk.
27Jiñi ambä iña'täbal ma'añik wokol mi' ikäjñel,
ixku jiñi xuk'ulbä, muk'ix ik'uxbiñtel ti' tojlel ñuko'bä.
28Jiñi mu'bä ik'äñ ti' e'tel lum mi' kaj iyäk iwut ichol,
ixku jiñi mu'bä iyäk' ibä ti k'uxbiñtel ti' tojlel ñuko'bä,
mi' kaj iñusäbeñtel imul che' mi' icha'leñ mulil.
29Ñukbä majtañältak mi' sutk'iñ ti xpots' año'bä iña'täbal,
mi' xojbeñob ch'ajañ cha'añ ma'añix mi' ikaj ti tik'ojel.
30jiñi mukulbä ña'täbal yik'ot mukulbä tak'iñ,
¿Majki añ ik'äjñibal icha'añ?
31Ñumeñ uts'at jiñi mu'bä imuk itsätslel ipusik'al,
mach uts'at jiñi mu'bä imuk iña'täbal.
ទើបបានជ្រើសរើសហើយ៖
Eclesiástico 20: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM