Eclesiástico 18
18
Iñuklel iyutslel Lak Yum
1Lak Ch'ujutat, machbä añik ijilibal ikuxtälel,
tsi' ilaj mele pejtelel chukitak añ ti pañämil.
2Kojach jiñi Lak Yum xuk'ul mi' iyajñel ti toj,
ma'añik yambä ch'ujulbä che' bajche' Lak Yum.
[3Ti' ip'ätälel mi' icha'leñ yumäñtel ti pañämil,
pejtelel chukitak añ mi' ch'ujbiñ it'añ.
Jiñäch juñtikil k'ax p'ätälbä yumäl,
yik'ot mi' mejlel it'ox chuki ch'ujul
yik'ot chuki machbä ch'ujulik.]
4Ma'añik majch mejl itsiktesañ chuki tsa'bä imele;
¿Majki mejl isajkäbeñ isujmlel iñuklel?
5¿Majki mi' imejlel ip'is ip'ätälel
yik'ot itsiktesañ iñuklel?
6Mach mejlik lak oñ-esañ mi' mejlik lak t'oxbeñ;
ma'añik juñtikil mejlbä ilaj k'el iñuklel Lak Yum.
7Che'bä juñtikil mi' iña'tañ cha'añ tsa'ix ilaj k'ele,
wolijaxto itejchel;
ixku che' mi' iña'tañ cha'añ k'otemix ti' ijoloñibal,
mach yujilik chuki mejl iña'tañ.
8¿Chuki isujmlel wiñik yik'ot x-ixik? ¿Chuki ik'äjñibal?
¿Chuki isujmlel jiñi tojbä yik'ot joñtolbä mejlbä imel?
9Mi añ juñtikil wiñik ombä ja'bil kuxul,
mi' taj che'bä jo'k'al ija'bilel;
10ixku jiñi jo'k'al ija'bilel che' mi' ilajtäl yik'ot machbä añik ijilibal,
lajaläch che' bajche' juñchäjk' ja' ti kolem ñajb,
yik'ot che' bajche' jump'ejl alä ji' ya' ti iji'il.
11Jiñ cha'añ Lak Yum añ
iyutslel ipusik'al ti' tojlel jiñi wiñikob,
yik'ot mi' iñumeñ päs ip'uñtaya ti' itojlelob.
12Iyujil Lak Yum cha'añ ti' pejteleloñla mi lak kajel ti chämel,
jiñ cha'añ mi' ichäñ p'uñtañoñla.
13Jiñi wiñikob kojach mi' ip'uñtañ ipi'älob,
ixku ip'uñtaya ipusik'al Lak Yum,
mi' itaj ti' pejtelel wiñikob ti' pañämil.
Lak Yum mi isu'beñ tsätsbä t'añ, mi käñtesañ yik'ot mi' päs-eñ,
yik'ot mi cha' tempañob tilel che' bajche' xkäñta täñäme'.
14¡Tijikñayob jiñi mu'bä iyäk'ob ipusik'al ti' ip'uñtaya Lak Yum
yik'ot mi' se'b ch'ujbibeñob ixik'ojel!
Jiñi ustlel
15Kalobil,
che'bä mi' acha'leñ koltaya mach amel a'leya,
mach abi'besañ jiñi majtañ ti' kaj tsätsbä at'añ.
16Che' bajche' jiñi ye'eb mi' itsäñ-esañ tikwal,
che'äch jiñi tojbä tik'ojel ñumeñ ñuk ik'äjñibal
che' bajche' jump'ejl majtañ.
17Ti' isujm, jump'ejl tojbä t'añ
ñumeñ añ ik'äjñibal bajche' jump'ejl majtañ,
yik'ot utsbä ipusik'al wiñik mi yäk' ti' cha'p'ejlel.
18Jiñi tsätsbä iña'täbal ma'añik chuki mi yäk',
kojach wulwul t'añ,
yik'ot che' mi iyäk' imajtañ mi' ikaj iweñ uk'tañ.
Che' xuk'uloñla
19Che' mu'to ikajel acha'leñ t'añ
ñaxañ yom ma' ña'tañ chuki mi kaj awäl,
yik'ot che' maxto añik ak'amäjel, käñtañ ak'oklel.
20Che' mu'to ikaj amel meloñel ti' tojlel yaño'bä,
ñaxañ ña'tañ bajche' añet;
che' jiñi Lak Ch'ujutat mi' ikaj ip'uñtañet
che'bä mi' ikaj ipäyet apäs amelbal.
21Che' maxto añet ti k'amäjel wäñ pek'esañ abä;
yik'ot che' mi' awotsañ amul,
ña'tañ ti' apusik'al akäy jiñi mulil.
22Yom ats'äk'tesañ jiñi at'añ tsa'bä awälä ti' itojlel Lak Yum,
yik'ot mach apijtañ che' mux ikaj achämel cha'añ mi' atoj.
23Che' mi' aña'tañ awäk' at'añ ti' tojlel Lak Yum,
ñaxañ yom ma' chajpañ abä cha'añ ma' ts'äktesañ;
mach yom ma' ñop ti alas iyutslel Lak Yum.
24Yom aña'tañ cha'añ che' ti jilibal,
Lak Yum ti jujuñtikiloñla mi ikajel ti meloñel.
25Che' bakibä k'iñ añix ombä achu'bä añ
yom ma' k'ajtesañ iyorajlel wi'ñal ja'el,
yik'ot che' ka'bälix atak'iñ k'ajtesañ jiñi p'ump'uñlel.
26Ti ak'älel k'älä mi' säk'añ pañämil
mux ik'extäyel jiñi pañämil;
mach jalik mi' ñumel pejtelel chukitak añ,
mi che'äch yom Lak Yum.
27Jiñi wiñik ambä iña'täbal wäñ chajpäbil ibä;
che' läk'älix cha'añ mi iyajlel ti mulil,
mi' itäts' lok'el ibä ti joñtolil.
28Pejtelel wiñik xuk'ulbä ipusik'al käñä icha'añ ña'täbal,
ya'i mi' yäk'eñ iyutslel jiñi mu'bä itaj.
29Jiñi mu'bä ich'ämbeñob isujm jiñi käñtesa,
mi' itajob iña'täbal ja'el,
yik'ot ts'äkäl mi' tsiktesañ jiñi käñtesabä iña'täbal.
Itik'ol lak pusik'al
30Mach awäk' abä ikipañet ajoñtolil;
kächä ijoñtolil apusik'al.
31Mi' tsa' ach'ujbi amel itsukulel apusik'al,
jiñi mu'bä its'a'leñetob mi' kaj itse'tañetob.
32Mach yom wo'et alaj mulañ chuki yom apusik'al;
jiñi amäñoñel mi' ikaj ikäyet ti p'ump'uñ.
33Mach amel ka'bäl k'iñijel yik'ot lemoñel,
che' jochol jiñi iyajñib atak'iñ.
ទើបបានជ្រើសរើសហើយ៖
Eclesiástico 18: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM