Matayo 2
2
Eisabakita ꞉loibonok laa lakir Yeso
1Kore apa eidipaki aatiiu Yeso te lkerenket le Beteleem le nkop e Yudea, ta ng'amata e nkitoria e Lkinkii Erode, nepuonu loibonok laa lakir ooing'uaa ng'oji neiliepunyie ndama aabaki Yerusalem, 2ejo, <<Aji etii ilo kinkii loo Lyiaudi otiiwuaki? Ikitoduaa lakira lenye eiliepu to ng'oji neiliepunyie ndama, nikiotuo aasai ninye.>>
3Kore payie ening ꞉Lkinkii Erode kuna baa, nenyamalu o Yerusalem pooki. 4Neiturrurru laitainok kutuaa la lasar o laiteng'enak loo nkitanapat, neipar ng'oji neikini Mesia. 5Newoliki ꞉ninche aajoki, <<Te Beteleem e Yudea amu inji apa eikuna ꞉Nkai payie eiger to loiboni lenye:
6 #
Mika 5:2
<Kore iyie Beteleem te nkop e Yuda,
mira hoo kini taa larikok le Yuda,
amu iyie eipung'unyie ꞉larikoni
oaku lchekut loo ltung'ana lainien, Isirael.> >>
7Neipot aitoki ꞉Erode loibonok laa lakir too nkurrat payie etum ateyielo sipata e ng'amata naipung'ua ilo akira. 8Neipaaya ninche Beteleem nejoki, <<Enchom enterrerrekuanu aasipu mbaa e inia kerai. Naa kore ake payie itumtum, nikirewakiki sii nanu lkilikuai paa alo asai ninye.>>
9Kore payie ening inia natejo lkinkii, neibung nkoitiei aapuo. Nerikoo tekue ꞉ilo akira apa otoduaa te nkiliepunoto e ndama ana meitacho te keper e ng'oji netii nkerai, 10neng'ida ninche oleng, payie edol ilo akira. 11Nejing nkaji, nedol nkerai o ng'otonye naji Maria, neirrigokino ꞉ninche ninye aasai. Neitoki aalak lbenia lenche ootii ntokitin naagol nkinyiang'a, neicho ninye nkichoorot, e saabu#2:11 Kore saabu naa soit ogol nkinyang'a. o ne naing'urre e silalei o ne mir. 12Neitaarriyian ninche ꞉Nkai te nkidetidetata payie merrinyokino Erode, neim nkae oitiei aapuo nkop enche.
Eisiga nkang e Yosep alo Misiri
13Kore payie eidip lolo oibonok laa lakir aatirrinyoto, neipung'oki ꞉lmalaika la Laitoriani Yosep te nkidetidetata nejoki, <<Inyuo tarrapu nkerai o ng'otonye sigaki Misiri, niwuon te inie ana maatiliki. Amu keyieita ꞉Erode nkerai payie ear.>>
14Kaa hae, neinyuototo ninye kuarie, nerrapu nkerai o ng'otonye nelo Misiri. 15#Osea 11:1Newuon te inie ana metua Erode, payie ebaya natejo ꞉Laitoriani to loiboni lenye, payie ejo,
<<Kaipotua layieni lai te Misiri.>>
Arata ee layiok kunini
16Kore payie edol Erode ajo ketasapa ꞉lolo oibonok ninye to loseg, negoro oleng. Nereu ltung'ana lkerenket le Beteleem o lubot pooki, neitanap metara layiok pooki ooitabakita larin oare nerrinyo siedi, airirikinore inia ng'amata apa natilikita ninye ꞉loibonok laa lakir. 17Kore inia kata, nebaya rerei apa otejo ꞉Nkai to Loiboni lenye Yeremia payie ejo,
18 #
Yer 31:15
<<Etining'ie ltoilo te lkerenket le Rama,
lkichirai o lkiyioi kitok,
eichiraki ꞉Rael #2:18 Kore Rael naa ng'otonye Benjamin e lmarei le Yuda. nkera enyena,
netanya ninye eitigiri,
amu merokure eatae ninche.>>
Etirrinyoki Yeso Nasaret
19Kore tesiedi lkiye le Erode, neipung'oki ꞉lmalaika la Laitoriani Yosep te nkidetidetata te Misiri 20nejoki, <<Inyuo, iwa nkerai o ng'otonye, chomo nkop e Isirael, amu etuata apa lolo ooiyieu near metua.>>
21Kaa hae, neinyuototo ꞉Yosep nerriny nkerai o ng'otonye aya nkop e Isirael. 22Kore payie ening ajo keitorita ꞉Arkilo nkop e Yudea ta mpaach e papa lenye Erode, neuriei achomo inie. Kake kore amu ketukurrakaki apa ninye te nkidetidetata, neroyie alo mbata e Galilaya, 23#Mrk 1:24; Luka 2:39; Yoa 1:45nelo amany lkerenket le Nasaret. Neaku etabayie napa natejoki too loibonok le Nkai, <<Keipoti ninye aajo le Nasaret.>>
ទើបបានជ្រើសរើសហើយ៖
Matayo 2: saq
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Bible Translation and Literacy