Hechos 9:4-5

I ma Sáulo xtzak pulew; are ʼuri xu ta jun chʼawbal chicaj chi xu bij: —A-Sáulo, a-Sáulo, ¿wuchac ca ʼan chʼoʼoj chwij yin? —xbix che. I ma Sáulo xu tzʼonoj che: —¿At pachin yet, Nim laj Winak? —coʼono. Teʼuri xbix che: —Yin in Jesus; chwij yin cat tijin wi chu ʼanic chʼoʼoj. Xui-ri, xa atuquel yet ca ʼan cʼax che awib, pacha coʼon jun boyex are cu coj akan che jun puyu; utuquel coʼon cʼax che rib, queje ca ʼan yet ile —xbix che.