Ŋúnuyɔ 145
145
Yewe wiī Kùlofɔli lɛ̀lɛ ó lɛ̀lɛ nī
1 Gbùʔɔrigɔ. Dawuda wuʔu gī#145.1 Ŋúnugo gáà ki siɛnkanʔana gboli ó gboli niī nɛ séligi nɛ́ sɛbɛkaanna láà ní; gàli ke 'taanni sɛbɛkanʔana ó sɛbɛkanʔana ke taanni kìye táanni nɛ̀ yɛli nɛ́ Eburulo alifabe ní wè (wéli baa 9.1 kaliwɛgɛ ki táanmɛ gè). Ŋúnuyɔ nyáà yī kire felige, yire yī: 9,25,34,37,111,112,119,145; Kàs 31.10-31; Lam 1-4; Nah 1.2-11..
M'béri muɔ kpóri, mi Kulocɛliɛ, mi Kùlofɔli !
M'béri kpuʔɔrɔ tari muɔ míʔɛ nɛ̄ gè súuri lɛ̀lɛ ó lɛ̀lɛ nī.
2ʔaan, m'béri kpuʔɔrɔ tari muɔ nɛ̄ cɛngɛ ó cɛngɛ,
m'béri muɔ míʔɛ gbùʔɔrɔ́ gè súuri kúɔmɔ fùn !
3 Yewe wi 'kpúʔɔ, wi tɔ̀ni nɛ̀ yɛli nɛ́ gbùʔɔrilɔ ní;
láʔala wè wi kpuɔmɔ nɛ̄ bèʔ.
4Ki 'yɛli kɛ̀ngɛlɛ ke mìɛni de muɔ kakpiʔiligele tòbiló gèle,
kɛ̀ngɛlɛ gílì mɛ́ ke báan gèle.
Peri muɔ ŋɔri kakpiʔiligele wuʔu nyu gè,
5nɛ́ muɔ kpuɔmɔ ní bè, bàa pi 'nyíʔɛnɛ nɛ̀ nyuɔ bè.
Mi wè, m'béri sɔ̀ngí muɔ kakpoliyo wuʔu nɛ̄ gè.
6Pe béri muɔ kakpiʔiligele ke ŋɔri wuʔu nyu gè
bɛ̀ kiyē bògaara wuʔulo gèle;
m'béri muɔ kpuɔmɔ wuʔu jáari gè.
7Peri sɔ̀ngí de taʔa kɛnmɛ bíì nɛ̄ muɔ kacɛ̀ngbuʔɔ ki yē gè,
peri fundaanra yékpuʔulo wáari bèri muɔ sínmɛ wuʔu ŋú gè.
8Yewe wè, wiī nɛ kpuʔɔrɔ kanʔa siɛnnɛ mɛ́ bèle, wiī nyinidaaguugofɔli.
Wi fungo kiì yɛ̀ madɛniʔ, wi bànguɔ dɛ́nigɛ kiī kpuʔɔ#145.8 Wéli baa 86.5,15; 103.8..
9Yewe wiī funjɛ̀ngɛfɔli siɛnnɛ pe mìɛni kɔli mɛ́ gè,
wi nyinidaaguugo ki 'kpúʔɔ nɛ̀ sɛ́nì nɔ̀ wi yafaanra ti mìɛni nɛ̄.
10Yewe, siɛnnɛ nɛ́ yɛrɛ dáà muɔ 'faan dè, ti mìɛni 'yɛli ti de muɔ síɛri,
dí muɔ siɛnnɛ bálì pe 'pìye puɔ muɔ nɛ̄ wè,
peri kpuʔɔrɔ tari muɔ nɛ̄.
11Pe béri muɔ kùlofɔligɔ kpuɔmɔ wuʔu nyu gè,
béri muɔ fànʔa wori nyu dè,
12kire ga buu lewiile pe‑ muɔ ŋɔri kakpiʔiligele cɛ́n gèle
nɛ́ muɔ kùlofɔlimɔ pi kpuɔmɔ ní bè, bàa pi 'nyíʔɛnɛ bè.
13Muɔ kùlofɔlimɔ piī lɛ̀gɛlɛ ke mìɛni nī,
muɔ kàfɔlimɔ piī kɛ̀ngɛlɛ ke mìɛni nī.
[Yewe wiī nɛ wi nyafɛniyɛ fori yè,
wiī nɛ kacɛ̀ngɛ kpínʔini wi kakpiʔiligele ke mìɛni nī#145.13 Eburu siɛnliɛrɛ sɛbɛ nī wè, ŋúnugo gáà ki siɛnkanʔana gboli ó gboli niī nɛ séligi nɛ́ sɛbɛkaanna láà ní, nɛ̀ ki yaʔa gboli láà wè baaʔ nàa ni séligi nɛ́ nyasiɛnkaanna «n» ní lèʔ. Girɛki nɛ́ sirii siɛnliɛrɛ dè, nɛ́ míɛni eburu siɛnliɛrɛ sɛbɛ wáà nigbe ní, pe 'tiɛyɛ siinwuʔu gáà fàri gè baa, gàa ki 'nyasiɛnkaanna «n» nyɔ́gɔ lè baa..]
14Bàli pe mìɛni pe tun bèle, Yewe wire wi pe yɛ̀gí nɛ yérigi,
wi nɛ̂ pe sìɛn bàli mìɛni pe kùrú bèle.
15Siɛnnɛ nɛ́ yawiire ti mìɛni nɛ̂ ti yiɛyɛ le yè muɔ nī
nɛ̂ ti sɔ̀ngirɔ taʔa dè muɔ nɛ̄;
muɔ wī ma nyɛ́ni ti yaliire kanʔa dè ti mɛ́ làjɛnnɛ nī lè.
16Muɔ nɛ̂ muɔ kɔli sáʔa gè níɛ̀ pe tín
nìɛ pe funzɔngirɔ fori dè bàli bīɛlɛ sìi nɛ̄ wè#145.16 Wéli baa 104.27-28..
17Yewe wiī sínwɛ wi baara ti mìɛni kúɔgɛnmɛ nī bè,
nɛ́ ní funjɛ̀ngɛfɔli wi kakpiʔiligele ke mìɛni nī.
18Yewe wi nyɛ́nì kpɔni bàli pe mìɛni nɛ̄ pe wi yeri bèle,
bàli pe mìɛni pe funyɔ yi 'fílige yè á piyē nɛ wi yeri wè#145.18 Wéli baa 34.18; Fàn 4.7; Zan 4.23-24..
19Wi nɛ̂ pe nyɛ́ni kele fori gèle, bàli pe wi fìʔɛ́ bèle,
wi nɛ̂ pe kòkuʔulo lúʔu gèle níɛ̀ pe suɔ.
20Bìli woli ni 'kpúʔɔ wi mɛ́ lè, Yewe wi nɛ̂ pe mìɛni sɔ́migɔ nɛ̀ wéli,
nɛ̀ ki yaʔa wi nɛ̂ siɛnpiile pe mìɛni cúʔɔ.
21Mi nyuɔ ki béri Yewe gbùʔɔrilɔ ŋú lè.
Siɛnnɛ nɛ́ yawiire ti mìɛni ti de kpuʔɔrɔ tari wi tiɛlɛfun míʔɛ nɛ̄ gè,
lɛ̀lɛ ó lɛ̀lɛ nī súuri !
ទើបបានជ្រើសរើសហើយ៖
Ŋúnuyɔ 145: sev
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.