Ŋúnuyɔ 118
118
Yeri Yewe síɛri wè, nɛ́ ki cɛ́n wi nyɛ́nì nyuɔ
1Yeri Yewe síɛri wè, nɛ́ ki cɛ́n wi nyɛ́nì nyuɔ,
wi bànguɔ dɛ́nigɛ kiī baa súuri#118.1 Wéli baa 100.5; 106.1; 107.1; 136; Kaj1 16.34; Kaj2 5.13; 7.3; Ɛsid 3.11; Zer 33.11. !
2 Isirayɛliyé pe‑ ki juu pe jo:
wi bànguɔ dɛ́nigɛ kiī baa súuri !
3 Arawɔn wi siimɛ#118.3 Wéli baa 115.10 kaliwɛgɛ ki táanmɛ gè. pi‑ ki juu pi jo:
wi bànguɔ dɛ́nigɛ kiī baa súuri !
4Bàli pe fìʔɛ́ Yewe nɛ̄ wè, pe‑ ki juu pe jo:
wi bànguɔ dɛ́nigɛ kiī baa súuri !
5Mi wuʔɔgɔ nī gè, a mi 'kòkuulo wáa Yewe kúrugu wè,
a Yewe wi 'lúʔu mi mɛ́, nɛ̀ mi tɛ́ngɛ larigbuʔɔ káà nī.
6Yewe wi yē nɛ́ mi ní; mi wè nɛ fìʔɛ́ yakaa nɛ̄ʔ.
Gáa siɛnnɛ pe bé gbɛ̀ kpíʔile mi nɛ̄#118.6 Ki siɛnrɛ ti 'juu baa Eb 13.6. ?
7Yewe yē nɛ́ mi ní; wiī mi sáʔafɔli.
Bàli mi 'biɛn bèle, m'bé pe tuugɛnmɛ nyaa bè.
8Sɛ́ni wi‑ wi sɔ̀ngirɔ taʔa dè siɛnnɛ nɛ̄ bèle,
kiī pɔ́rigɔ siɛn wi‑ líʔire jó Yewe mɛ́.
9Sɛ́ni wi‑ wi sɔ̀ngirɔ taʔa dè siɛnkpolilo nɛ̄ bèle,
kiī pɔ́rigɔ siɛn wi‑ líʔire jó Yewe mɛ́.
10 Kùlogolo kálì siɛnnɛ pe mìɛni yé mi màʔa nɛ̀ suʔu;
Yewe míʔɛ nɛ̄ gè, a mi 'pe cúʔɔ.
11Pe 'mi màʔa nɛ̀ suʔu, ʔaan, pe 'mi màʔa nɛ̀ suʔu;
Yewe míʔɛ nɛ̄ gè, a mi 'pe cúʔɔ.
12Pe 'mi màʔa nɛ̀ suʔu bɛ̀ sámugo tíɛlɛ,
a pe 'fuu nɛ̀ fígi bɛ̀ wawaʔara kàsun tíɛlɛ;
Yewe míʔɛ nɛ̄ gè, a mi 'pe cúʔɔ.
13Pe 'puu nɛ mi ŋɔrigi bè cáan,
nɛ̀ ki yaʔa Yewe pɛ́nì mi sáʔa.
14Yewe wire wī mi ŋɔri dè nɛ́ ní mi ŋúnugo nyùgo gè#118.14 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mi ŋɔri dè nɛ́ ní mi wélifɔli.,
wire wi 'mi suɔ#118.14 Tiʔɛ gáà siɛnrɛ tiī nɛ taʔa Yir 15.2; wéli baa míɛni Eza 12.2..
15Fundaanra yékpuʔulo gálì ke yigi suɔlɔ wuʔu nɛ̄ gè,
keli nɛ lúru baa siɛnsinminɛ bùguro nī dè.
Yewe kàliige kɔli kiī nɛ kele kpínʔini gèle nɛ́ ŋɔri ní,
16Yewe wi 'kàliige kɔli yɛ̀gɛ gè,
Yewe kàliige kɔli kiī nɛ kakpoliyo kpínʔini.
17ʔéʔe, miǐ ga tíi kùu díɛʔ !
M'bé kò sìi nɛ̄, bèri Yewe kakpiʔiligele jáari gèle !
18Yewe 'mi kpúɔn kpuʔɔ; wiì ki yaʔa a mi 'kùuʔ#118.18 Wéli baa Kor2 6.9..
19Ye‑ Gbùʔɔrɔsaʔa kɔ̀riyɔ múgu yè mi mɛ́,
nyàa nī siɛnsinminɛ pe jiin bèle !
M'bé jíin bè Yewe síɛri wè !
20Yewe kɔ̀ri kire gī;
kire nī siɛnsinminɛ piyē nɛ jiin#118.20 Wéli baa Ŋún 15.1-2; 24.3-6. bèle.
21Mi nɛ báan bè pa muɔ síɛri, nɛ́ ki cɛ́n muɔ nyɛ́nì lúʔu mi mɛ́,
muɔ wī ma yē mi suɔfɔli wè.
22Kàdɛnigɛ gíì saafaanna pe cé kɔ̀n nɛ̀ wáa gè,
kire ki kɛ́nì kò saʔa kàdɛnipelige gè, kàluulo nī lè#118.22 Ki siɛnrɛ ti 'juu baa Mat 21.42; Mar 12.10; Luk 20.17; Piɛ1 2.7. Wéli baa míɛni Eza 28.16; Zaka 3.9; 4.10; Kakpi 4.11. Isirayɛliyé mɛ́ bèle, ki sìndɛnigɛ gáà ki nɛ̂ puu majo mɛni gèdinnɛ ni sî saʔa cò gè nɛ̀ yérige gè.,
gàa ki 'saʔa cò gè nɛ̀ yérige gè.
23Kire sí nyɛ́nì taa Yewe wire mɛ́, nɛ́ sí ní kakpuʔɔ weli mɛ́#118.23 Ki 'juu baa Mat 21.42; Mar 12.10-11..
24Kire cɛngɛ gè, kire gī gàa Yewe 'kpíʔile gè:
weri fundaanra kpínʔini weri muguri kire cɛngɛ gè !
25Yewe yo, weli nɛ muɔ fiɛn wī, te báan ma pa weli suɔ#118.25 te báan ma pa weli suɔ: Tiʔɛ gáà ki nyasiɛnkɛniyɛ yè, girɛki siɛnrɛ nī dè, ki 'juu nɛ́ jó: «Wozana.» Ki 'juu baa Mat 21.9; Mar 11.9; Zan 12.13. !
ʔé ! Yewe, weli nɛ muɔ fiɛn, ‑weli yaʔa weli‑ pe jáa !
26Siɛn ŋáà wi báan Yewe wi míʔɛ nɛ̄ gè, Yewe wi‑ kpuʔɔrɔ taʔa dè wi nɛ̄ !
Nɛ̀ ki líɛ baa Yewe saʔa nī gè, weli nɛ kpuʔɔrɔ tari dè yeli nɛ̄#118.26 Ki siɛnrɛ ti 'juu baa Mat 21.9; 23.39; Mar 11.9; Luk 13.35; 19.38; Zan 12.13. !
27Yewe wiī Kulocɛliɛ, wire wi 'wi kpìɛnmɛ cáanri bè weli nɛ̄#118.27 Wéli baa Tɔ́r 6.25..
Ye‑ táanni yìye nɛ̄ yeri báan nɛ́ tiire lère ní dè yeli kiyɛ nī yè,
yeri waa fúɔ ye sa nɔ̀ gbùʔɔrɔdiʔɛ yafanʔa ki nyɛgɛlɛ nɛ̄ gèle.
28Muɔ yē mi Kulocɛliɛ, m'bága de muɔ síɛri;
muɔ yē mi Kulocɛliɛ, m'bága de muɔ kpóri !
29Yeri Yewe síɛri wè nɛ́ ki cɛ́n wi nyɛ́nì nyuɔ,
wi bànguɔ dɛ́nigɛ kiī baa súuri !
ទើបបានជ្រើសរើសហើយ៖
Ŋúnuyɔ 118: sev
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.