Ŋúnuyɔ 103
103
Yewe yē bànguɔ dɛ́nigɛfɔli
1 Dawuda wuʔu gī.
Mi fungo yo, ma kpuʔɔrɔ taʔa dè Yewe nɛ̄ !
Mi laamɛ pi mìɛni, pi de kpuʔɔrɔ tari dè wi tiɛlɛfun míʔɛ nɛ̄ gè !
2Mi fungo yo, ma kpuʔɔrɔ taʔa dè Yewe nɛ̄ wè !
Mi fǎga fìʔɛ nɛ́ wi kacɛ̀ngbiʔilige káà nigbe níʔ !
3Wire wī mi kolimɔ pi mìɛni yɛri bè,
níɛ mi yaama pi mìɛni póri.
4Wire wi 'mi sìi suɔ wè kusiʔi mɛ́ gè,
níɛ bànguɔ dɛ́nigɛ nɛ́ nyinidaaguugo tɔ́ngi gè mi nɛ̄
bɛ̀ kpuʔɔrɔ ndɔ̀ngɔ tíɛlɛ.
5Wire wi 'mi tín nɛ́ kacɛ̀ngɛlɛ ní gèle mi sìi cɛnyɛ yi mìɛni nī,
wi nɛ̂ ki 'kpíʔile mi nɛ̂ koli nɛ̀ kò nàgapunwɔ tíɛlɛ,
mi nɛ̂ cáʔara bɛ̀ kàgbɛni tíɛlɛ#103.5 Wéli baa Eza 40.31..
6Yewe nɛ kasingele kpínʔini,
níɛ tànʔa kanʔa bàli pe mìɛni mɛ́ siɛnnɛ 'pe wuʔɔ bèle.
7Wi nyɛ́nì wi sɔ̀ngirɔ tìɛ dè Misa nɛ̄,
nɛ́ wi kakpiʔiligele ní gèle Isirayɛli siɛnnɛ nɛ̄ bèle.
8Yewe yē nyinidaaguugofɔli níɛ kpuʔɔrɔ kanʔa siɛnnɛ mɛ́ bèle;
wi fungo kiì yɛ̀ madɛniʔ;
bànguɔ dɛ́nigɛfɔli wī, nɛ́ ní kányiʔɛfɔli#103.8 Wéli baa Yir 34.6; Nɛy 9.17; Ŋún 86.15; 145.8..
9Wi wè nɛ tíri siɛn nɛ̄ súuriʔ,
wi wè nɛ kaala cògí siɛn kúrugu lɛ̀lɛ ó lɛ̀lɛ nīʔ.
10Wi wè nɛ̌ weli nári nɛ yɛligi nɛ́ weli kapiʔile ní gèleʔ,
wi wè nɛ weli wuʔɔ nɛ yɛligi nɛ́ weli kolimɔ ní bèʔ.
11Majo bɛ̀ nyìʔɛnɛ ni 'líili dàala nɛ̄ lè,
bɛ̀ míɛni wi bànguɔ dɛ́nigɛ ki 'kpúʔɔ bàli mɛ́ pe wi fìʔɛ́ bèle.
12Majo bɛ̀ cɛngɛnyɛnifoligɔli ki 'líili cɛngɛnyɛnijiingɔli nɛ̄ gè,
bɛ̀ míɛni wi nɛ̂ weli tuudiʔɛlɛ líili gèle weli nɛ̄.
13Majo bɛ̀ tuufɔli cî puu nyinidaaguugo ní wi pìile kɔli mɛ́ gè,
Yewe yē nyinidaaguugo ní bàli mɛ́ pe wi fìʔɛ́ wè.
14Nɛ́ ki cɛ́n wire wè, wi nyɛ́nì ki cɛ́n gàa ní wi 'weli kpíʔile wè,
wiī nɛ sɔ̀ngí nɛ taʔa nɛ̀ ki cɛ́n weli yē tárigɛ.
15Siɛn wè, wi sìi wiī bɛ̀ nyàʔa tíɛlɛ, túluu suro nyàʔa tíɛlɛ
gàa ki 'puru gè bè lɛ̀lɛ cɛ̀ri kúɔ#103.15 Wéli baa 90.5..
16A káfaligɛ ki kɛ́ni báan gè, ki nɛ̂ fini nɛ̀ kɛ́;
tiʔɛ gíì nī ki yé fìin gè, ki nɛ̌ ní cɛ́nʔ.
17Nɛ̀ ki yaʔa, Yewe dɛ́nigɛ kire nɛ mɔgi bàli mɛ́ pe wi fìʔɛ́ wè,
nɛ̀ ki séli baa faʔa faʔa gè fúɔ nɛ waa yiʔɛmɛ súuri.
Yewe sínmɛ piī nɛ mɔgi fúɔ nɛ̀ pɛ́nì nɔ̀ pe kàduʔumɛ pìile nɛ̄ bèle,
18bàli mɛ́ pe wi nyakungɛngɛ cògí gè
níɛ lúru wi kacinʔɛnɛ kele mɛ́ gèle.
19Yewe nyɛ́nì wi kùlofɔlilɔ kácunʔɔ tɛ́ngɛ gè nyìʔɛnɛ nī lè,
a wi kùlofɔlimɔ pi 'dàala nyì lè.
20Yeri kpuʔɔrɔ tari dè Yewe nɛ̄,
yeli bálì bīɛlɛ wi nyìʔɛnɛ tundunminɔ bèle,
yeli bálì bīɛlɛ ŋɔbiire ní dè níɛ wi kajuʔulo forigi gèle
níɛ lúru wi siɛnrɛ mɛ́ dè !
21Yeri kpuʔɔrɔ tari dè Yewe nɛ̄,
yeli ye mìɛni bálì bīɛlɛ nyìʔɛnɛ kapiɛngbuɔnnɔ bèle,
yeli bálì bīɛlɛ wi baakuɔlɔ bèle níɛ wi nyɛ́ni kele forigi gèle !
22Yeri kpuʔɔrɔ tari dè Yewe nɛ̄,
yeli ye mìɛni bálì bīɛlɛ wi yafaanra dè,
tiɛrɛ ti mìɛni nī wi kùlofɔligɔ nī gè !
Mi fungo yo, ma kpuʔɔrɔ taʔa dè Yewe nɛ̄ !
ទើបបានជ្រើសរើសហើយ៖
Ŋúnuyɔ 103: sev
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.