Kisah Para Rasul 18
18
Paulus kase tau Kabar Bae tentang Yesus Kristus di kota Korintus
1Abis itu, Paulus kase tinggal kota Atena kong pigi di kota Korintus. 2Di Korintus ada satu orang, dia pe nama Akwila. Akwila ini orang Yahudi dari daera Pontus. Dia deng dia pe bini Priskila baru datang dari daera Italia, barang raja basar#18:2: Raja basarini orang yang bapimpin di banya daera yang Roma kuasai. Raja basar ini, dong jaga sebut lagi, ‘Kaisar’. Klaudius so parenta pa samua orang Yahudi musti kaluar dari kota Roma.#18:2: Kota Roma ini, kota yang basar di daera Italia. Waktu Paulus sampe di kota Korintus, Paulus baku dapa deng Akwila kong dia singga pa Akwila pe ruma. 3Paulus, Akwila deng Priskila pe karja itu sama, bamanjai tenda dari kuli binatang. Karna itu, Paulus tinggal pa Akwila pe ruma la dorang bisa karja sama-sama.
4Tiap hari Sabat, Paulus bacarita deng orang-orang Yahudi deng Yunani di ruma ibada agama Yahudi. Dia berusaha la dorang jadi percaya pa Yesus. 5Waktu Silas deng Timotius so datang dari daera Makedonia, Paulus kase tau Tuhan Allah pe Kabar Bae siang deng malam.#18:5: Biasa Paulus pe karja biking tenda untuk dia pe hidup hari-hari, tapi waktu Silas deng Timotius datang, dia tara biking tenda lagi supaya dia bisa pake dia pe waktu samua untuk kase tau Kabar Bae. Ada tafsiran laeng yang bilang, Silas deng Timotius mangkali ada bawa doi sadiki supaya Paulus tara perlu cari doi lagi, tapi bisa pake dia pe waktu samua untuk biking Tuhan pe karja. Dia bilang pa orang-orang Yahudi, Yesus itu Mesias suda, Raja yang Tuhan Allah janji, deng yang dorang ada tunggu-tunggu. 6Tapi orang-orang Yahudi itu tara suka yang Paulus bilang itu, kong dorang tantang deng hina pa dia. Karna itu, Paulus kase kabas abu dari dia pe baju, itu tanda dia so tara mo bapusing lagi deng dorang. Kong Paulus bilang, “Nanti ngoni sandiri yang mo tanggung hukuman dari Tuhan Allah, barang ngoni tara percaya Yesus itu Raja yang Tuhan Allah janji mo kase slamat pa manusia. Kita pe tugas mo kase tau Kabar Bae tentang Yesus Kristus pa ngoni so selesai. Karna itu, kita so tara mo tanggung jawab lagi pa ngoni. Jadi mulai skarang, kita mo pigi pa orang-orang yang bukang Yahudi la mo kase tau pa dorang Kabar Bae itu.”
7Pe abis bilang bagitu, Paulus kaluar dari ruma ibada itu kong pigi pa Titius Yustus pe ruma yang baku sabla deng ruma ibada itu. Titius itu bukang orang Yahudi deng dia bolong percaya pa Yesus tapi dia jaga baibada pa Tuhan Allah.
8Kapala ruma ibada di situ, dia pe nama Krispus. Dia deng samua orang yang ada pa dia pe ruma jadi percaya pa Tuhan Yesus. Bagitu lagi deng orang-orang laeng di Korintus, dorang dengar apa yang Paulus ajar kong percaya pa Tuhan Yesus. Abis itu, dorang samua kase dong pe diri untuk dapa baptis.
9Satu malam, Paulus dapa penglihatan. Pa dia pe penglihatan, Tuhan bilang pa dia bagini, “Paulus, jang ngana tako pa orang-orang di sini, tapi ngana kase tau turus suda Kabar Bae pa dorang, 10karna Kita sama-sama deng ngana. Tara ada satu orang yang akan pukul deng siksa pa ngana, barang Kita pe umat ada banya di kota ini.” 11Jadi, Paulus tinggal di Korintus selama satu taong anam bulan, kase ajar Tuhan Allah pe Kabar Bae tentang Yesus Kristus pa orang-orang di situ.
12Tapi waktu Galio so jadi gubernur di daera Akhaya, orang-orang Yahudi baku kompak kong tangka pa Paulus, turus dorang bawa pa dia di pengadilan. 13Pe sampe di pengadilan, dorang bilang pa gubernur Galio, “Orang ini yang jaga pengaru pa orang banya la baibada pa Tuhan Allah deng cara yang tara pantas deng torang orang Yahudi pe aturan-aturan di lima kitab Musa.”
14Tapi waktu Paulus baru mo badiri babela dia pe diri, gubernur Galio langsung bilang pa orang-orang Yahudi itu, “Ee, ngoni orang-orang Yahudi! Kalu ngoni tudu orang ini biking sala atau biking yang jahat, pasti kita mo urus pa dia. 15Tapi ini, ngoni cuma baku beda pendapat tentang ngoni pe agama, cuma soal kata, nama-nama deng ngoni pe aturan agama Yahudi. Jadi ngoni sandiri suda yang kase selesai masala itu. Kita tara mau iko campur.” 16Pe abis bilang itu, Galio user pa dorang dari pengadilan itu.
17Kong orang-orang Yahudi yang ada di situ langsung tangka pa kapala ruma ibada agama Yahudi yang pe nama Sostenes. Dorang pukul pa dia pa gubernur pe muka, tapi gubernur tara peduli pa dorang.
Paulus kase tau Kabar Bae tentang Yesus Kristus di mana-mana
18 #
Bil. 6:18
Paulus masi tinggal sadiki lama lagi di Korintus. Abis itu, dia basiloloa pa orang-orang percaya di Korintus, kong dia pigi sama-sama deng Priskila deng Akwila di kota Kengkrea, la mo balayar ka daera Siria. Waktu dorang bolong balayar, Paulus kase botak dia pe kapala di Kengkrea, kota dekat pelabuhan itu. Dia biking bagitu la jadi tanda dia so kase selesai dia pe janji kusus yang dia biking deng Tuhan Allah dulu. 19Abis itu, dorang balayar sampe di kota Efesus. Di kota itu, Paulus basiloloa pa Priskila deng Akwila kong dorang baku pisa. Di situ, Paulus maso di ruma ibada agama Yahudi la dia kase carita pa orang-orang Yahudi tentang Yesus. 20Orang-orang Yahudi di situ minta pa Paulus supaya tinggal lebe lama deng dorang, tapi Paulus bilang bolong bisa. 21Jadi dia basiloloa pa dorang deng bilang, “Kalu memang Tuhan Allah mau, kita pasti mo bale kamari.” Abis itu, Paulus kase tinggal kota Efesus.
22Turus, dia balayar sampe di kota Kaisarea. Di situ, dia turung kong bajalang ka kota Yerusalem. Di Yerusalem, dia basingga sadiki di jemaat di sana kong kase salam pa dorang. Dari situ, dia pigi di kota Antiokhia di daera Siria. 23Dia tinggal di situ sadiki lama. Abis itu, dia pigi di tampa-tampa laeng, di daera Galatia deng Frigia. Di tampa-tampa itu, dia kase kuat orang-orang percaya pe hati.
Apolos kase tau Kabar Bae di kota Efesus deng di daera Akhaya
24Ada satu orang Yahudi yang pe asal dari kota Aleksandria. Dia baru sampe di kota Efesus, dia pe nama Apolos. Dia pande bicara deng tau skali Kitab Suci pe isi. 25Dia lagi tau ajaran tentang Tuhan Yesus. Dia pe hati smangat skali kase carita tentang Tuhan Yesus kong samua yang dia kase carita itu butul. Tapi tentang baptisan, dia bolong tau samua, dia cuma tau tentang baptisan yang Yohanes biking. 26Apolos mulai mangajar deng barani di ruma ibada agama Yahudi. Satu kali, Priskila deng Akwila ada dengar waktu Apolos mangajar, kong abis itu dorang sigaro pa dia pigi pa dong pe ruma. Di situ, dorang kase tau lebe jelas pa dia tentang bagimana hidup iko ajaran tentang Tuhan Yesus.
27Abis Apolos tau Yesus pe ajaran yang lengkap, dia suka mo pigi di daera Akhaya la dia ajar Kabar Bae tentang Yesus Kristus pa orang-orang di situ. Orang-orang percaya di Efesus dukung dia pe rencana itu, jadi dorang tulis surat pa orang-orang percaya di Akhaya la dorang tarima deng bae-bae pa Apolos. Waktu Apolos sampe di situ, Tuhan tolong pa Apolos sampe dia butul-butul bantu pa orang-orang percaya di situ. 28Barang, di orang banya pe muka, Apolos barani baku ambe pendapat deng orang-orang Yahudi yang tara percaya pa Yesus. Dia kase tunju bukti dari Kitab Suci, Yesus itu Mesias suda, Raja yang Tuhan Allah janji mo kase slamat pa manusia.
ទើបបានជ្រើសរើសហើយ៖
Kisah Para Rasul 18: PB MMU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Perjanjian Baru Bahasa Melayu Maluku Utara @ Lembaga Alkitab Indonesia 2020
