MARIKO 4
4
Lukanu lu Mumitsi
(Mat 13:1-9; Luka 8:4-8)
1Yesu yaraanga khwechitsa khandi vandu khuluchinga lwi Inyanza ya Galilaya. Shituma shia vandu vanyishi vakanila halala havundu ha yali nali, kachila Yesu nanina mu liaro khandi niyikhala mulio. Shituma shia vandu vanyishi vali nivikhale khuluchinga lwi inyanza. 2Yesu yaveechitsa vindu vinyishi mu tsinganu. Yaveechitsa, navavoolela, 3“Hulishitsi! Litukhu lindi, mumitsi yasimukha natsia khumitsa vukuutsa. 4Lwa yali namitsanga vukuutsa mu mulimi, vulala khuvwo vwakwa khunjila, ma manyonyi nikitsa nikavuvotsa. 5Vukuutsa vundi vwakwa khu lwanda, ha lilova liali litititi, nuvumeela vwangu, shichila lilova shiliali linyishi tawe; 6lwa mbasu kwakha, kwasamba viraakwa vitoro; khandi shichila miili shichiali chiatsia hasi mu malova tawe, viraakwa vienevo vianiala. 7Vukuutsa vundi vwakwa mu mavwa, kameela nikavutsoma nuvuvula khwama viamu. 8Navutswa vukuutsa vundi vwakwa mulilova linuulu, ma viraakwa nivimeela, nivitukha khandi niviama vukuutsa, vulala vwama viamu makhomi kavaka, vundi makhomi sita, na vundi imia indala.”
9Yesu yamalila navoola, “Numuli na maroyi ku khuhulila, muhulishitsi.”
Shivune shiu Khurumishila Tsinganu
(Mat 13:10-17; Luka 8:9-10)
10Lwa Yesu yali nali wonyene, vandu valala khu yavo vali nivahulilenje makhuva keke vatsia na veechi likhomi na vavili khuye, nivamureeva avavoolele shivune shi tsinganu tsienetso.
11Yesu yavachipa, “Munyi mwaheelwa vucheli khulondokhana khu makhuva kaviswa ku Vwami vwa Nyasaye; navutswa yavo vali ilwanyi valiitsa khuvoolelwa vindu viosi mu tsinganu, 12nikanyalikha,
‘Vaheenzeshitsi navutswa vavuli khulola;
Vahulishitsi navutswa vavuli khuva ni limanya.
Niiva valiitsa khukhola ndio, vanyala khukalukha khu Nyasaye,
nu khuvasemeha khurula mu vwoni vwavo.’ ”
Yesu Yivaala Lukanu lu Mumitsi
(Mat 13:18-23; Luka 8:11-15)
13Yesu yavareeva, “Mushili khuhulilakhu lukanu yulu? Muliitsa khuhulila munjila shina tsinganu tsindi tsiosi? 14Mumitsi amitsanga likhuva lia Nyasaye. 15Vandu valala vali khuli vukuutsa vwakwa khunjila; lwa vahulilanga likhuva lia Nyasaye, Shetani yitsanga vwangu, khandi avanuula. 16Vandi vali khuli vukuutsa vwakwa khu lwanda, lwa vahulilanga likhuva valinjilitsanga nivasangala. 17Navutswa shilinjilanga muvo mukari, khandi shivahindilanga tawe. Lwa vutiinyu inoho khutambitswa khuvanyolanga shichila likhuva, vakhutsanga mwoyo vwangu. 18Vandu vandi vali khuli vukuutsa vwamitswa mu mavwa. Yava navo vahulilanga likhuva, 19navutswa liheenda mioyo shichila vulamu yuvu, liyanza liu khuva vahinda mu shivala nende vwikombi vundi vwosi vwitsulanga muvo, khandi vwikalila likhuva lienelo; mavavula khukhola vikholwa vilahi. 20Vandu vandi vali khuli vukuutsa vwamitswa mulilova linuulu. Navo vandu vahulilanga likhuva, valihuchilila, mavama matunda; valala makhomi kavaka, vandi makhomi sita, na vandi imia indala.”
Itaaha ni Yukhukholitsa Vulavu
(Luka 8:16-18)
21Yesu yavareeva, “Mundu anyala khuvikhakhu itaaha mu muhinda inoho mulwalo mwi shitali? Shikali kario tawe! Achivikhanga khu shikuru? 22Shia shindu shiosi shiaviswa ihale wene shilitsa khuvikhwa havulavu, khandi shiosi shia khunikhwa shilitsa khukhunulwa. 23Khulwa yako, numuli na maroyi ku khuhulila, muhulishitsi.”
24Yesu yavavoolela, “Muve vacheli khukamuhulila! Malako malala mele kamurumishilanga nu mukhalachila vandi, nako ka Nyasaye aliitsa khurumishila khumukhalachila nu vululu muno. 25Mundu uli ni shindu aliitsa khumeetwa vindu mu vunyishi, navutswa mundu uvula shindu shiosi, khali shitititi shiali nashio aliitsa khunuulwa.”
Lukanu khu Vukuutsa Vwali nu Vumeelanga
26Yesu yatsililila khuvoola, “Vwami vwa Nyasaye vuli khuli mundu umitsanga vukuutsa mu mulimi kwekwe. 27Akonanga tsindolo vutukhu, avukha nuvushiele mu mavwevwe; inyinga iyi vukuutsa vwenovo vumeelanga mavwama. Mundu mwenoyo wakorwa khuli kenako kikholekhanga. 28Lilova liene nalio lilombanga viraakwa khumeela nu khwama matunda; khuraanjila khu shivula, musoka nende tsimu tsiene. 29Lwa viraakwa vivetsanga niviakhalava, mundu mwenoyo avichesanga ni ikhoni yeye, shichila inyinga yu khuchesa ivetsanga niyakhatukha.”
Lukanu khu Lukuutsa Luti Muno
(Mat 13:31-32,34; Luka 13:18-19)
30Yesu yavareeva, “Ni shina shia khunyala khusasanyinya khu Vwami vwa Nyasaye, inoho lukanu shina lwa khunyala khurumishila khwivaala? 31Vuli khuli lukuutsa lwamitswa khulilova, nalwo nu lutititi muno khuvira vukuutsa vundi vwosi mu shivala; 32khandi lwa lumitswangwa, lumelanga lukwa lukali khuvira viraakwa vindi viosi; khandi tsisia tsialwo tsikalihanga muno, ma manyonyi kiitsa, kumbakha vitsu mutsisia tsiakwo.”
33Yesu yilwatsa likhuva lia Nyasaye khu vandu narumishilanga tsinganu tsindi tsinyishi; yavavoolela mu vunyishi khuli lwa vanyala khuhulila. 34Shiyalomoloma khuvo vuchila khurumishila tsinganu tawe; navutswa lwa yali nali na veechi veve vonyene, yavavoolela shia shindu shiosi.
Yesu Yasinjilitsa Imbuutsa
(Mat 8:23-27; Luka 8:22-25)
35Khulitukhu lienelo halukolovo, Yesu yavoolela veechi veve, “Chendi khwambushi khutsi khuluveka lundi lwi inyanza yolo.” 36Veechi valekha shituma shia vandu; nivinjila mu liaro lia Yesu yali nalimu, manivasimukha naye. Maaro kandi kaliho khandi. 37Nonoho lwa imbuutsa inditoho yahuutsa inyanza, ma maruundu ka matsi nikaraanga khwinjila mukari mwi liaro, khali liaro niliva himbi khwiyinikha mu inyanza. 38Yesu yali nali mu liaro inyuma nakoni khu ibilo. Veechi veve vamuvushitsa mu tsindolo nivavoola, “Mwechitsi, wambakhane khukhuheendelakhu mwoyo khuli himbi khukhutsa?”
39Yesu yavukha, nakondeshela imbuutsa, “Honjela!” Yavoolela maruundu, “Sinjila!” Imbuutsa yahonjela ma inyanza nilenjela. 40Yesu yareeva veechi veve, “Shichila shina numuria? Muvula lisuuvila?”
41Veechi varia muno, nivareevana vene khuvene, “Nu mundu shina uyu? Khali imbuutsa nende maruundu vimuhulilanga!”
ទើបបានជ្រើសរើសហើយ៖
MARIKO 4: LLLCATHOLIC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013
MARIKO 4
4
Lukanu lu Mumitsi
(Mat 13:1-9; Luka 8:4-8)
1Yesu yaraanga khwechitsa khandi vandu khuluchinga lwi Inyanza ya Galilaya. Shituma shia vandu vanyishi vakanila halala havundu ha yali nali, kachila Yesu nanina mu liaro khandi niyikhala mulio. Shituma shia vandu vanyishi vali nivikhale khuluchinga lwi inyanza. 2Yesu yaveechitsa vindu vinyishi mu tsinganu. Yaveechitsa, navavoolela, 3“Hulishitsi! Litukhu lindi, mumitsi yasimukha natsia khumitsa vukuutsa. 4Lwa yali namitsanga vukuutsa mu mulimi, vulala khuvwo vwakwa khunjila, ma manyonyi nikitsa nikavuvotsa. 5Vukuutsa vundi vwakwa khu lwanda, ha lilova liali litititi, nuvumeela vwangu, shichila lilova shiliali linyishi tawe; 6lwa mbasu kwakha, kwasamba viraakwa vitoro; khandi shichila miili shichiali chiatsia hasi mu malova tawe, viraakwa vienevo vianiala. 7Vukuutsa vundi vwakwa mu mavwa, kameela nikavutsoma nuvuvula khwama viamu. 8Navutswa vukuutsa vundi vwakwa mulilova linuulu, ma viraakwa nivimeela, nivitukha khandi niviama vukuutsa, vulala vwama viamu makhomi kavaka, vundi makhomi sita, na vundi imia indala.”
9Yesu yamalila navoola, “Numuli na maroyi ku khuhulila, muhulishitsi.”
Shivune shiu Khurumishila Tsinganu
(Mat 13:10-17; Luka 8:9-10)
10Lwa Yesu yali nali wonyene, vandu valala khu yavo vali nivahulilenje makhuva keke vatsia na veechi likhomi na vavili khuye, nivamureeva avavoolele shivune shi tsinganu tsienetso.
11Yesu yavachipa, “Munyi mwaheelwa vucheli khulondokhana khu makhuva kaviswa ku Vwami vwa Nyasaye; navutswa yavo vali ilwanyi valiitsa khuvoolelwa vindu viosi mu tsinganu, 12nikanyalikha,
‘Vaheenzeshitsi navutswa vavuli khulola;
Vahulishitsi navutswa vavuli khuva ni limanya.
Niiva valiitsa khukhola ndio, vanyala khukalukha khu Nyasaye,
nu khuvasemeha khurula mu vwoni vwavo.’ ”
Yesu Yivaala Lukanu lu Mumitsi
(Mat 13:18-23; Luka 8:11-15)
13Yesu yavareeva, “Mushili khuhulilakhu lukanu yulu? Muliitsa khuhulila munjila shina tsinganu tsindi tsiosi? 14Mumitsi amitsanga likhuva lia Nyasaye. 15Vandu valala vali khuli vukuutsa vwakwa khunjila; lwa vahulilanga likhuva lia Nyasaye, Shetani yitsanga vwangu, khandi avanuula. 16Vandi vali khuli vukuutsa vwakwa khu lwanda, lwa vahulilanga likhuva valinjilitsanga nivasangala. 17Navutswa shilinjilanga muvo mukari, khandi shivahindilanga tawe. Lwa vutiinyu inoho khutambitswa khuvanyolanga shichila likhuva, vakhutsanga mwoyo vwangu. 18Vandu vandi vali khuli vukuutsa vwamitswa mu mavwa. Yava navo vahulilanga likhuva, 19navutswa liheenda mioyo shichila vulamu yuvu, liyanza liu khuva vahinda mu shivala nende vwikombi vundi vwosi vwitsulanga muvo, khandi vwikalila likhuva lienelo; mavavula khukhola vikholwa vilahi. 20Vandu vandi vali khuli vukuutsa vwamitswa mulilova linuulu. Navo vandu vahulilanga likhuva, valihuchilila, mavama matunda; valala makhomi kavaka, vandi makhomi sita, na vandi imia indala.”
Itaaha ni Yukhukholitsa Vulavu
(Luka 8:16-18)
21Yesu yavareeva, “Mundu anyala khuvikhakhu itaaha mu muhinda inoho mulwalo mwi shitali? Shikali kario tawe! Achivikhanga khu shikuru? 22Shia shindu shiosi shiaviswa ihale wene shilitsa khuvikhwa havulavu, khandi shiosi shia khunikhwa shilitsa khukhunulwa. 23Khulwa yako, numuli na maroyi ku khuhulila, muhulishitsi.”
24Yesu yavavoolela, “Muve vacheli khukamuhulila! Malako malala mele kamurumishilanga nu mukhalachila vandi, nako ka Nyasaye aliitsa khurumishila khumukhalachila nu vululu muno. 25Mundu uli ni shindu aliitsa khumeetwa vindu mu vunyishi, navutswa mundu uvula shindu shiosi, khali shitititi shiali nashio aliitsa khunuulwa.”
Lukanu khu Vukuutsa Vwali nu Vumeelanga
26Yesu yatsililila khuvoola, “Vwami vwa Nyasaye vuli khuli mundu umitsanga vukuutsa mu mulimi kwekwe. 27Akonanga tsindolo vutukhu, avukha nuvushiele mu mavwevwe; inyinga iyi vukuutsa vwenovo vumeelanga mavwama. Mundu mwenoyo wakorwa khuli kenako kikholekhanga. 28Lilova liene nalio lilombanga viraakwa khumeela nu khwama matunda; khuraanjila khu shivula, musoka nende tsimu tsiene. 29Lwa viraakwa vivetsanga niviakhalava, mundu mwenoyo avichesanga ni ikhoni yeye, shichila inyinga yu khuchesa ivetsanga niyakhatukha.”
Lukanu khu Lukuutsa Luti Muno
(Mat 13:31-32,34; Luka 13:18-19)
30Yesu yavareeva, “Ni shina shia khunyala khusasanyinya khu Vwami vwa Nyasaye, inoho lukanu shina lwa khunyala khurumishila khwivaala? 31Vuli khuli lukuutsa lwamitswa khulilova, nalwo nu lutititi muno khuvira vukuutsa vundi vwosi mu shivala; 32khandi lwa lumitswangwa, lumelanga lukwa lukali khuvira viraakwa vindi viosi; khandi tsisia tsialwo tsikalihanga muno, ma manyonyi kiitsa, kumbakha vitsu mutsisia tsiakwo.”
33Yesu yilwatsa likhuva lia Nyasaye khu vandu narumishilanga tsinganu tsindi tsinyishi; yavavoolela mu vunyishi khuli lwa vanyala khuhulila. 34Shiyalomoloma khuvo vuchila khurumishila tsinganu tawe; navutswa lwa yali nali na veechi veve vonyene, yavavoolela shia shindu shiosi.
Yesu Yasinjilitsa Imbuutsa
(Mat 8:23-27; Luka 8:22-25)
35Khulitukhu lienelo halukolovo, Yesu yavoolela veechi veve, “Chendi khwambushi khutsi khuluveka lundi lwi inyanza yolo.” 36Veechi valekha shituma shia vandu; nivinjila mu liaro lia Yesu yali nalimu, manivasimukha naye. Maaro kandi kaliho khandi. 37Nonoho lwa imbuutsa inditoho yahuutsa inyanza, ma maruundu ka matsi nikaraanga khwinjila mukari mwi liaro, khali liaro niliva himbi khwiyinikha mu inyanza. 38Yesu yali nali mu liaro inyuma nakoni khu ibilo. Veechi veve vamuvushitsa mu tsindolo nivavoola, “Mwechitsi, wambakhane khukhuheendelakhu mwoyo khuli himbi khukhutsa?”
39Yesu yavukha, nakondeshela imbuutsa, “Honjela!” Yavoolela maruundu, “Sinjila!” Imbuutsa yahonjela ma inyanza nilenjela. 40Yesu yareeva veechi veve, “Shichila shina numuria? Muvula lisuuvila?”
41Veechi varia muno, nivareevana vene khuvene, “Nu mundu shina uyu? Khali imbuutsa nende maruundu vimuhulilanga!”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013