Utu 41
41
Yosefu idandaula ndoto za nkosi
1Peyamaliki miyaka yivili, Falao alotili. Ajiwene ayimili pamuhana ya mfuleni Naili, 2aziwene ng'ombi saba zabwina na zezikulupili zihuma kumfuleni zibwela kulya manyahi. 3Kangi, ng'ombi zingi saba zezavi ngalingasi neju zihuma ku mfuleni Naili, zikabwela na kuyima papipi na zila ng'ombi zabwina na zezikulupili, pamuhana ya mfuleni. 4Ng'ombi zila ngalingasi neju zikalya zingi zila saba zabwina na zezikulupili. Penapo Falao akayumuka mulugono. 5Peagoni kavili, akalota ndoto ya pili kila ndoto yavi na mana yaki. Aziwene ngele saba gavaha na gabwina gimela mulipei limonga. 6Kangi ngele zingi saba ngalingasi na gegayumili kwa mpungu uyumu wa kulugangatu gakahumila. 7Ngele zila saba ngalingasi gakagamila gala ngele saba zivaha gegamemili mbeyu. Hinu Falao peayumwiki akamanya kuvya yavili ndoto. 8Kwapachili, Falao kuni ityalatyala, akavakemela valondola voha va ku Misili, na vevavi na luhala, akavajovela ndoto zaki, nambu kawaka hati mmonga mweahotwili kumdandaulila ndoto zenizo.
9Kangi, yula mkulu wa minyweso akamjovela Falao, “Lelu nikugakumbuka mabudilu gangu! 10Ligono limonga watiyomili tete vavili, wanikungili nene pamonga na myocha mabumunda mkulu, munyumba ya mkulu wa msambi wa valonda. 11Kilu yimonga talotili ndoto, kila ndoto yavi na mana yaki. 12Hinu msongolo mmonga Mwebulania, mtangatila wa mkulu wa msambi wa valonda, avili pamonga na tete muchifungu. Petamjovili ndoto zitu, mwene ahotwili kutidandaulila kila mmonga witu kuwanangana na ndoto yaki. 13Cheadandawili ndi cheyahumili. Veve waniwuyisi nene kulihengu langu, na yula myocha mabumunda mkulu wamtundiki pamkongo.”
14Hinu Falao akalagiza Yosefu aleta, mwene akawusiwa muchifungu kanyata. Peamali kuketa na kubadilisha nyula zaki, Yosefu akaletwa palongolo ya Falao. 15Falao akamjovela Yosefu, “Nene nilotili ndoto, nambu kawaka mundu mweahotwili kunidandaulila. Niyuwini ulumba waku kuvya veve ukajoviwayi ndoto wihotola kudandaula.”
16Yosefu akamyangula Falao, “Uhotola wenuwo nivi nawu lepi, nambu Chapanga yati akujovela mana ya ndoto zenizo.”
17Penapo Falao akamjovela Yosefu, “Nalotili kuvya niyimili pamuhana ya mfuleni Naili, 18naziwene ng'ombi saba zabwina na zezikulupili zihuma kumfuleni kubwela kulya manyahi. 19Ndi zikagelekelwa na ng'ombi vangi saba, ngalingasi na zigandili neju. Katu niziwene lepi ng'ombi ngalingasi zezigandili ngati zenizo pamulima wa Misili. 20Hinu zila ng'ombi ngalingasi na zezigandili neju zikalya zila ng'ombi saba zezikulupili. 21Nambu hati pevamali kulya vala vevakulupili, mundu yeyoha ngaahotwili lepi kumanya kuvya vavalili vayavi, muni kwakona vavi vagandili ngati pakutumbula. Penapo nikayumuka mulugono. 22Kangi nalotili ndoto yingi. Naziwene ngele saba gabwina gegamemili mbeyu zezingali mulipehi limonga. 23Kangi gakagelekela ngele zingi saba gangali mbeyu, ngalingasi na gegayumiswi na mpungu uyumu wa kulugangatu. 24Ngele zila saba ngalingasi gakazimila zila ngele saba zabwina. Hinu nene navajovili valondola ndoto zenizo nambu kawaka mundu mweahotwili kunidandaulila.”
25Kangi Yosefu akamjovela Falao, “Ndoto zaki zoha zivili udandawula waki ndi umonga. Chapanga akugubukulili mambu geihenga papipi. 26Ngo'mbi zila saba zabwina ndi miyaka saba, na gala ngele saba gabwina mewa ndi miyaka saba, ndoto zenizo udandauwula waki ndi umonga. 27Zila ng'ombi saba zezigandili neju, na kugelekela vala vevakulupili, na zila ngele gngali mbeyu saba, gegayumiswi na mpungu uyumu wa kulugangatu, mana yaki ndi miyaka saba ya njala. 28Ngati chenikujovili nkosi Falao, Chapanga akugubukulili mambu geakuhahenga papipi naha. 29Yati kwivya na miaka saba ya kumota mabenu pamulima woha wa ku Misili. 30Nambu mwanakandahi yati yigelekela miyaka saba ya njala, hati vandu yati vikosiwa miyaka yila ya kumota mabenu. Njala yeniyo yati yikuuhalabisa mulima woha. 31Mabenu gevamotili pamulima yati vikosiwa njwe ndava njala yeyigelekela yati yivya yikali neju. 32Ndoto yaku yawuyili mala zivili kwa miluhumu yeyiwanangana kukulangisa kuvya Chapanga apangili, mwene yati ihenga lijambu lenilo papipi.”
33“Ndava yeniyo hinu, nkosi Falao, umhagula mundu mweavi na umanya na luhala, umpela lihengu la kuuyangalila mulima woha wa Misili. 34Kavili, nkosi Falao, uvahagula vayimilila vangi penapa pamulima, uvalagiza vavika pandu pa mhanu pa mabenu goha ga Misili mulukumbi ulu lwa miyaka saba ga mabenu. 35Uvalagiza vayimilila venavo vavika pamonga mota ya mabenu goha pamiyaka saba yeyibwela. Mabenu genago na vavika pavibana vyaku nkosi Falao, chivya chibana cha kwa miji yoha, na vene vaviyangalila vibana. 36Chakulya chenicho yati chivya chibana cha kupela vandu kwa miyaka saba yeyibwela pamulima wa Misili, ndi vandu yati vifwa lepi kwa njala.”
Yosefu ipewa ukulu mu Misili
37Lijambu lenilo lawonikini labwina kwa Falao na vakulu voha vevavii pahi yaki. 38Ndava yeniyo Falao akavakota vilongosi vayaki, “Mundu uyu avi na mpungu wa Chapanga! Wu, tihotola kumpata mundu yungi ngati uyu?” 39Kangi akamjovela Yosefu, “Ndava muni Chapanga akugubukulili aga goha, kawaka mundu yungi mweimanya na avi na luhala ngati veve. 40Veve ndi weuyimamila mulima wangu, na vandu vangu voha yati vivya pahi ya uhotola waku. Nene ndi mwenivya mkulu kuliku veve.” 41Kangi Falao akamjovela Yosefu, “Hinu nikuvika uvya mkulu wa mulima woha wa Misili.” 42Ndi, Falao akahula pete yeyina lihina laki mulung'onji lwaki na kumwalika Yosefu, akamwalika na nyula ya msopi na mkufu wa zahabu safi muhingu yaki. 43Falao akamkwesa pamutuka yaki ya pili ya kuhutwa na falasi na valonda vakalongolela kulongolo ya Yosefu vijova kwa lwami luvaha, “Myepa mtama pamuhana! Myepa mtama pamuhana!” Chenicho ndi Falao cheamuhagwili Yosefu avya na uhotola uvaha panani ya mulima woha wa Misili. 44Mewawa Falao akamjovela Yosefu, “Nene ndi nkosi Falao! Nijova, mundu yeyoha pamulima woha wa Misili akotoka kukita chindu chochoa changali veve kumujovela.” 45Falao akampela Yosefu lihina la Chimisili akamkemela Zafenati Panea. Akamgegesela Asenati msikana wa Potifela, mweavi mteta wa muji wa Oni. Hinu Yosefu akagendelela mulima woha wa Misili. 46Yosefu avi na miyaka selasini peatumbwili kumhengela Falao, nkosi wa Misili. Yosefu ahumili munyumba ya nkosi ya Farao na kuugendelela mulima woha wa Misili.
47Pamiyaka yila saba ya chakulya vyamahele migunda ya Vamisili yamotili mabenu gamahele neju. 48Yosefu akavika pamonga vyakulya vyoha vyevyapambiki miyaka yila saba ya mabenu gamahele na akavivika pamiji ya Misili. Mukila muji akavika chakulya chehachumili mumigunda ya papipi. 49Yosefu akavika muvibana mabenu gamahele neju ngati msavati wa kunyanja hati nakuhotola kuvalanga.
50Kwakona miyaka ya njala kutumbula, Yosefu amali kupata vana vavili kwa mdala waki, Asenati, binti Potifela, mweavi mteta wa muji wa Oni. 51Yosefu amkemili mwana waki mtumbula Manase, ndi akajova, “Chapanga akitili nikosiwa mtahu wangu woha na nyumba ya dadi wangu.” 52Mwana waki wa pili amkemili Efraimu, akajova, “Chapanga anipeli vana pamulima wa kung'aika kwangu.”
53Miyaka yila saba ya chakulya mulima wa Misili yikamalika. 54Yikatumbula miyaka saba ya njala ngati cheajovili Yosefu penapo kadeni. Milima yingi yoha yikahumila na njala, nambu mulima woha wa Misili wavili na chakulya. 55Lukumbi vandu va Misili pevatumbwili kuvya na njala, vamvembelili Falao avapela chakulya. Na Falao akavajovela Vamisili voha, “Mhambayi kwa Yosefu, na mhenga chochoa cheakuvajovela.” 56Njala yikayonjokesa kuvya yikali na kudandasika pamulima woha wa Misili. Ndava yeniyo Yosefu akaviwopola vibana vyoha, akavagulisila vandu va ku Misili chakulya ndava njala yavi yikali neju Misili. 57Neju ya genago, vandu voha kuhuma mmulima yoha vabwelili ku Misili kwa Yosefu kugula chakulya, muni njala yavili yikali pamilima woha.
ទើបបានជ្រើសរើសហើយ៖
Utu 41: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.