Utu 24
24
Isaka igega mdala
1Lukumbi lwenulo Ibulahimu avii mgogolo wa miyaka yamahele neju, na Bambu avili amotisiwi mu kila chindu cheakitili. 2Ligono limonga Ibulahimu akamjovela muvanda waki mweavii mgogolo kuliku vayaki, mweiyimalila vindu vyaki vyoha, “Vikayi chiwoko chaku pagati ya mawondo gangu. 3Na nene yati nikulapisa kwa lihina la Bambu, Chapanga wa pamulima na Chapanga wa kunani, kuvya yati ukumugegesa lepi mwana vangu msikana yoyoha pagati ya Vakanani venitama navu mumlima uwu. 4Nilapilayi kuvya yati uhamba kumulima wangu, na kwavalongo vangu, kumtolela mwana vangu Isaka mdala.”
5Mvanda yula akamkota, “Wu, ngati mdala uyo akabelayi kubwela na nene kumulima uwu? Wu, nimuwuyisayi mwana waku kumulima wewahumili?”
6Ibulahimu akayangula, “Katu, kotoka kumuwuyisa mwana vangu kwenuko! 7Bambu, Chapanga wa kunani, mweaniwusili munyumba ya dadi wangu mumulima wanavelikwi, na mweajovili na nene, anilapakisi kuvya mulima uwu yati akuvipela viveleku vyangu. Mwenuyo yati akupela mtumu waki akulongolela na veve ukamuletelayi mwana vangu mdala kuhuma kwenuko. 8Ngati mdala mwenuyo abelili kulandana na veve mbaka kuni, penapo chilapu changu yati chikukukunga lepi. Nambu kotoka kumuwuyisa mwana vangu kwenuko.” 9Mvanda yula akavika chiwoko chaki pagati ya mawondo ga Ibulahimu akalapa ndava ya genago.
10Penapo mvanda mwenuyo akatola ngamiya kumi ya mkulungu waki, akahamba kuni agegili njombi ndalindali. Akahamba mbaka kumuji kweatamayi Naholi, kumulima wa Mesopotamia. 11Peahikili akavafugamisa mafugamilu ngamiya pamuhana ya chiliva chechavili kuvala ya muji. Yavili kimihi lukumbi vadala pevihamba kunega manji. 12Na mwene akayupa, “Bambu wa mkulu vangu Ibulahimu, nikuyupa mambu aga gahotoleka bwina lelu, ulangisa lipyana kwa mkulungu wangu Ibulahimu. 13Lola niyimili apa papipi na chiliva cha manji, na vasikana va vandu va muji vibwela kunega manji. 14Hinu yivyayi naha, msikana mwenikumjovela, ‘Chondi tula chihulu chaku cha manji unipela nene manji ninywayi,’ Mwene akajovayi, ‘Nywayi, mewawa yati ninywiha ngamiya zaku mewa.’ Mwenuyo ndi avyayi msikana mweumuhagulili mtangatila waku Isaka. Kwa kukita genago umulangisi ubwina mkulungu vangu.”
15Kwakona angamala kuyupa, akamuhumila Lebeka kuni agegili chihulu pamutu. Avii msikana wa Betueli. Betueli avii mwana wa Milika mweavili mdala wa Naholi mlongo waki Ibulahimu. 16Msikana mwenuyo panyambili neju, na avii akona angamanya mgosi tangiya kuvelekewa. Akahelela kuchiliva, akamemesa manji muchihulu akakwela. 17Ndi mvanda yula akamuhambila kanyata, akamjovela, “Chondi, unipele manji chidogo muchihulu chaku ninywe.”
18Msikana yula akamyangula, “Nywayi, mkulu wangu.” Akahulusa chihulu mumawoko gaki, akachikamulila ndava amunywihayi. 19Peamalili kumunywiha manji, akamjovela, “Yati ninega manji mewawa ndava ya ngamiya yaku, hinywayi mbaka hikolayi.” 20Ndi akakita kanyata, manji gegavi muchihulu chaki akahisopela ngamiya mu chindu cha kunywelela, akajumba kunega manji kuchiliva, akanywiha ngamiya zoha. 21Mvanda yula akamuhutusila mihu musikana changali kujova chindu, ndava amanyayi ngati Bambu amuhotwisi lugendu amala lepi.
22Ngamiya peyayukwiti manji, mvanda akampela musikana yula kipini cha zahabu ya yeyina utopa wa gilamu sita, na bangili zivili za mashonga gamahele. 23Penapo akamkota, “Chondi unijovelayi, veve wamusikana wa yani? Wu, kuvi fwasi ya kugona kunyumba ya dadi waku?”
24Lebeka akayangula, “Nene namusikana wa Betueli mwana wa Milika, mdala waki Naholi,” 25Akayendelela kujova, “Kunyumba yitu kuvi manyahi na vyakulya ndava ya hinyama, na pakutama nyenye pavili.”
26Ndi mundu yula akagundama na kumuyupa Bambu. 27Akajova, “Alumbiwayi Bambu, Chapanga wa mkulungu wangu Ibulahimu, muni akosiwi lepi kumuhengela ubwina na usadikika mkulungu wangu. Nene mewa Bambu anilongwisi mulugendu lwangu mbaka munyumba ya valongo vaki mkulungu wangu.”
28Musikana yula akajumba kuhamba kuvajovela vandu va munyumba ya nyina waki mambu ago. 29Lebeka avii na muhaja mweikemelewa Labani, mwenuyo ndi akayumbatika kuhamba kukonganeka na mvanda wa Ibulahimu kuchiliva. 30Kwakona angahamba Labani achiweni chipini chila pameng'elu na bangili mumawoko ga mlumbu waki, na kuyuwana malovi gala Lebeka geajoviwi na mundu yula, ndi akamuhambila na akamukolela ayimili papipi na ngamiya pachiliva. 31Labani akamjovela, “Ubwela kunyumba yitu veve mweumotisiwi na Bambu, ndava kyani uyima kuvala? Nene nimali kukutendelekela nyumba na pandu pa ngamiya.”
32Ndi mvanda yula akayingila munyumba. Labani akaziwopola mizigu mungamiya zila na kuzipela manyahi na chakulya cha mifuya, akampela manji ga kusanja magendelu mwene pamonga na vandu vealongosini navu. 33Vakamletela chakulya, nambu mwene akajova, “Nilya lepi mbaka nimalayi kuvajovela malovi genivii nagu.”
Labani akamjovela, “Ena tijovelayi.”
34Akajova, “Nene namtangatila wa Ibulahimu. 35Bambu amumotisi neju mkulungu wangu, na ana vindu vyamahele. Ampelili msambi wa mambelele na mene na ng'ombi zamahele, maganga ga feza na zahabu ampeli vavanda va chigosi na va chidala, ngamiya na mapunda. 36Lihina la mdala wa mkulungu wangu ikemiwa Sala, mwenuyo amuvelekili mkulungu wangu mwana muugogolo waki, na mwene ampeli vindu vyoha vyeavii navyu. 37Mkulu wangu anilapakisi, ‘Ukotokayi kumugegesa mwana wangu mdala pagati ya vasikana va kumulima wa Vakaanani venitama navu mumulima wavi, 38nambu uhambayi mbaka kumulima wangu na kunyumba ya dadi wangu, kwa valongo vangu, kwenuko ukamlondelayi mwana wangu mdala.’ 39Penapo nikamkota mkulungu wangu, ‘Wu, yati yivya wuli ngati mdala mwenuyo akabelayi kulandana nene?’ 40Nambu mwene akajova, ‘Bambu mweakunilongosa magono goha muwumi wangu, mwenuyo yati akunitumila mtumu wa kunani kwa Chapnga alongosanayi na veve ndi yati uhotola. Na veve yati ukumuletela mwana wangu mdala kuhuma kwa valongo vangu, na wa munyumba ya dadi wangu. 41Ndi ukahambayi ndu kulukolo lwangu, hati ngati vabelili kukupela musikana ndi yati ukungiwa lepi na chilapu changu.’”
42“Lelu panakahikili pachiliva nikayupa, ‘Chondi Bambu, Chapanga wa mkulungu wangu Ibulahimu, nikuyupa unihotolesayi lelu pa aga genikita, umukitilayi ubwina mkulungu wangu Ibulahimu. 43Lolayi niyimili apa papipi na chiliva. Msikana yoyoha mweibwelayi kunega manji, nikamyupa manji gadebe ga muchihulu chaku ninywa, 44na mwene akayidakila na kunipela manji ninywayi, na ngamiya yaku mewa yati nikuzinegela manji zinywayi, mwenuyo ndi avyayi msikana mweahaguliwi na Bambu avyayi mdala wa mwana wa mkulungu wangu.’ 45Kwakona nangamala kujova mumutima wangu, akahumila Lebeka agegili chihulu pamutu, akahelela kuchiliva akanega manji, ndi nene nikamujovela, ‘Chondi ni niyupa manji ninywe.’ 46Ndi akahelesa kanyata chihulu pamutu na akajova, ‘Nywayi na ngamia zaku yati nikuzinywiha mewa.’ Ndi nikanywa mewa akazinywiha na ngamiya. 47Nikamkota, ‘Veve wamusikana wa yani?’ Mwene akayangula, ‘Dadi wangu ikemiwa Betueli, mwana wa Naholi, mweavelekiwi kwa Milika.’ Penapo nikamuwalika chipini mumeng'elu yaki na bangili mumawoko gaki. 48Kangi akafugama, na kumyupa Bambu. Nikamlumba Bambu Chapanga wa mkulungu wangu Ibulahimu, mweanilongwisi mbaka kwa valongo va mkulungu wangu nimtolelayi mwana waki mdala. 49Hinu, munijovelayi ngati mukumuhengela mkulungu wangu usadikika na ubwina, mujova ngati mukita lepi, nimanyayi chakukita.”
50Labani na Betueli vakamyangula, “Lijambu lenili lihumili kwa Bambu tete tihotola lepi kukujovela linenu loloha labwina amala lihakau. 51Lebeka uyu apa, umtola uhamba naku akavyayi mdala wa mwana wa mkulu waku ngati cheajovili Bambu.” 52Mtumisi wa Ibulahimu peayuwini malovi genago, Akagundama mbaka pahi palongolo ya Bambu 53penapo mtangatila mwenuyo akampela Lebeka vindu vyakujinyambisila vyevyatenganizwi kwa feza na zahabu, pamonga na nyula. Mewa avapelili vindu vya mashonga gamahele muhaja na nyina waki.
54Mtumisi wa Ibulahimu na vala veavii navu vakalya, na kunywa na kugona baho. Pevayimwiki lukela, mtangatila yula akajova, “Niyupa niwunye kwa mkulungu wangu.”
55Penapo mhaja waki Lebeka na nyina waki vakamjovela, “Linda kamwali atame hoti na tete lukumbi lwa magono kumi, na gakamalikayi ndi uhamba naku.”
56Mwene akayangula, “Chondi mukoto kunidivalila, muni Bambu amali kuhotosa lugendu lwangu, niyupa munileka niwuye kwa mkulungu wangu.”
57Na vene vakajova, “Linda timukemele hoti msikana, timukote mwene.” 58Ndi vakamkemela Lebeka na vakamkota, “Wu, yati uhamba na mundu uyu?”
Akayangula, “Ena nihamba naku.”
59Penapo vakamulaga Lebeka pamonga na mdala mweamulelili kuhumila wana waki vahambayi pamonga na mtangatila wa Ibulahimu na vandu veavii navu. 60Vakamumotisa Lebeka, vakamjovela,
“Veve, wamulongo witu, uvyayi wamau wa vana maelufu kwa maelufu kumi!
Viveleku vyaku yati vitola miji ya makoko na kuvya yavi.”
61Penapo Lebeka na vavanda vaki, vakakwela ngamiya zavi vakamulanda mtangatila wa Ibulahimu, ndi vakawuka voha.
62Lukumbi lwenulo, Isaka awukili ku Belai Loi, na atamili upandi wa kusini wa mulima wa Kaanani. 63Ligono limonga, Isaka akahamba kumugunda kuholalela lukumbi lwa chimihi, pealolili akawona ngamiya zibwela. 64Lebeka pealolili na kumuwona Isaka, akahuluka pa ngamiya yaki, 65akamkota mvanda wa Ibulahimu, “Mundu mweigenda mumugunda mwaakutibwelela ndi yani?”
Mvanda akayangula, “Mwenuyo ndi mkulungu wangu.” Penapo Lebeka akatola mtandilu waki akajigubika kumihu.
66Mvanda yula akamkokosela Isaka mambu goha geagakitili. 67Ndi Isaka akamutola Lebeka akayingila naku mulindanda la Sala nyina waki, penapo Lebeka ndi akavya mdala waki. Isaka akamgana neju Lebeka na akapoleswa mtima ndava ya lifwa la nyina waki.
ទើបបានជ្រើសរើសហើយ៖
Utu 24: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.