Utu 21
21
Kuvelekewa kwa Isaka
1Bambu akamkumbuka Sala, akamhengela ngati cheamujovili. 2Sala akavya na ndumbu, akamvelekela mwana mgosi Ibulahimu muugogolo waki, mulukumbi lula lweajoviwi na Chapanga. 3Ibulahimu akamkemela mwana mweavelekiwi na Sala lihina laki Isaka. 4Isaka adumuliwi jandu na dadi waki peavii na magono nane, ngati Chapanga cheamulagisi Ibulahimu. 5Lukumbi peavelekewayi Isaka, Ibulahimu avii na miyaka miya yimonga. 6Sala akajova, “Chapanga anikitili luheku, mundu yeyoha mweiyuwanayi kuvya nivi na mwana yati iheka pamonga na nene.” 7Akayonjokesa kujova, “Yani ngaahotwili kumjovela Ibulahimu kuvya Sala nene yati ninyongesa vana? Nimuvelekili mwana mgosi muugogolo waki.”
8Mwana akakula, akalekeswa kunyonga, ligono Isaka lealekeswayi kunyonga Ibulahimu akitili mselebuko uvaha.
Hajili na Ishimaeli vivingiwa
9Ligono limonga Sala amuweni Ishimaeli mwana wa Ibulahimu mweavelikwi kwa Hajili, Mumisili, ikina na Isaka mwana waki akumvevesa. 10Sala akamjovela Ibulahimu, “Mvinga mvanda uyu pamonga na mwana waki, muni mwana wa mdala mvanda ihotola lepi kuhala vindu pamonga na Isaka mwana vangu.” 11Malovi genago gamuvinisi mtima neju Ibulahimu ndava Ishimaeli avii mwana waki mewa. 12Nambu Chapanga akamjovela Ibulahimu, “Kotoka kuviniswa mtima ndava ya mvanda na mwana waku. Muyidakila Sala cheakujovela, ndava chiveleku chaku chenikujovili yati chihumila kwa Isaka. 13Mwana wa mvanda waku mewawa yati nikumkita kuvya dadi wa mulima uvaha, ndava mwenuyu mewa ndi mwana waku.”
14Ibulahimu akayimuka lukela pee, akatola chakulya na kahaku kachikumba kamanji akampela Hajili. Akavivika mumavega ga Hajili, akamuwusa pamonga na mwana vaki. Hajili akawuka, akalyungalyunga mulikemba la Beeli Sheba. 15Manji pegamaliki mukahaku kachikumba, Hajili akamgonesa mwana pahi ya mkongo. 16Akahamba kutama utali ngati wa mita miya, akajova, “Nihotola lepi kumlola mwana vangu afwayi.” Peatamili papipi penapo akatumbula kuvemba kwa lwami.
17Chapanga akamyuwana mwana ivemba, mtumu wa Chapanga akamkemela Hajili kuhuma kunani kwa Chapanga na kumjovela, “Ung'ahika kyani Hajili? Kotoka kuyogopa muni Chapanga ayuwini lwami lwa mwana ivemba peagonili pala. 18Yima umuyinula mwana na umkamula mumawoko gaku, ndava yati nikumukita avya dadi wa mulima uvaha.” 19Kangi Chapanga akamdindula mihu Hajili ndi achiwene chiliva chechivi na manji. Ndi akachihambila akamemesa manji mukahaku kachikumba na kumunywiha mwana. 20Chapanga akavya pamonga na mwana peayendelelayi kukula, akatama kulugangatu na akavya mtova upindi mkekesi. 21Peatama kulugangatu lwa Palani, ndi nyina waki akamugotolela mdala kuhuma ku Misili.
Ibulahimu na Abimeleki vikita lilaganu
22Lukumbi lwenulo Abimeleki na Fikoli mkulu wa manjolinjoli gaki vakamjovela Ibulahimu, “Chapanga avii pamonga na veve mu kila chindu chewikita. 23Hinu nilapakisa kwa lihina la Chapanga kuvya yati ukunikitila lepi gahakau nene, vana vangu hati chiveleku changu. Ngati nene chenivili msadikika kwaku na veve mewa uvya msadikia kwa nene na kwa mulima uwu weutama.”
24Ibulahimu akajova, “Yati nilapa.”
25Ndi Ibulahimu akamujovela Abimeleki mhalu kuchivala chiliva cha manji cheanyagiwi na vavanda vaki Abimeleki. 26Abimeleki akayangula, “Nimanyili lepi kuvya yani mweahengili chenichi. Veve wanijovili lepi na lelu ndi niyuwana.” 27Penapo Ibulahimu akatola mambelele na ng'ombi, akampela Abimeleki, ndi vavii venavo vakavika lilaganu. 28Ibulahimu akabagula mambelele gadala saba kuhuma mumsambi. 29Abimeleki akamkota Ibulahimu, “Mambelele aga saba gadala geugabagwili mana yaki kyani?”
30Ibulahimu akamyangula, “Nikupela kwa mawoko gangu namwene mambelele aga saba gadala kuvya ulangisu nene ndi mwenigimili chiliva ichi.” 31Ndava yeniyo pandu pala vapakemili Beeli Sheba, ndava penapo valapalini voha vavili.
32Pevamali kulagana ku Beeli Sheba kwenuko, Abimeleki na Fikoli mkulu wa manjolinjoli vaki ndi vakawuya kumulima wa Vafilisti. 33Ibulahimu akapanda mkongo wa mukwaju bahapo pa Beeli Sheba, na akamuyupa Bambu, Chapanga wa magono goha. 34Ibulahimu akatama pamulima wa Vafilisti ngati myehe kwa magono gamahele.
ទើបបានជ្រើសរើសហើយ៖
Utu 21: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.