लुका 3
3
युहन्ना बपतीस्मा आपवा वाळा नु परच्यार
(मत्ती 3:1-12; मरकुस 1:1-18; युहन्ना 1:1-28)
1रोमी राजा ना राज ने तीबर्युस राज करलो पन्दरे साल हय जेला, तीहयी टेमे पुन्तीयुस पीलातुस युहद्या जीला मे राज-पाट नो भार ह़माळतो हतो; अने हेरोद गलील जीला मे राज करतो हतो, अने तीनो भाय फीलीपुस ईतर्या जीला मे राज करतो हतो, अने लीसानीयुस, अबीन्या जीला मे राज करतो हतो। 2अने हन्ना अने केफा भगवान ना डायला पुंजारा हता, तीहया दाड़ा मे भगवान जकर्याह ना सोरा युहन्ना ने खुस-खबर ह़मळायो। तीहयी टेमे बपतीस्मा आपण्यो युहन्नो उजाड़ी बड़ा मे रेतो हतो। 3अने तीहयो यरदन नंदी नी आड़े-धेड़े आखा परगणा मे फीरीन ईसम परच्यार करवा बाज ज्यो “पाप नी माफी जुगु, पाप भणी गेथा मन बदलीन भगवान भणी मन फीरवो अने बपतीस्मा लेवो, ता भगवान तमारा पाप ने माफ करहे।”
4जीसम भगवान वगे गेथा केण्या यसाया नी कीताप मे लीखलु से: “उजाड़ी बड़ा मे कोय आड़ी र्यो, ‘मालीक भगवान जुगु रोहो तीयार करो, तीनी जुगु वाट ह़ुदी करो। 5आखा खाडा-खोबारा भर देहे, आखा बड़ा अने बड़ी बराबर कर देहे, अने जे वाट वाकी-ढेकी से, तीहयी वाट ने ह़ुदी कर देहे अने उची-नीची वाट ने बराबर कर देहे। 6अने आखा माणहु भगवान ना छुटकारा ने देखहे।’”
7 #
मत्ती 12:34; 23:33 जे माणहु ना टोळा युहन्ना ना हात सी बपतीस्मा लेवा आवला हता, तीमने युहन्ना केतो हतो, ए गड़हा ना बच्चा! तमु बपतीस्मा लेहु ता आव्वा वाळी गरा तमारी पोर गेथी टळ जहे ईसम तमने कोय की देदु? 8#युहन्ना 8:33“तमु पापु भणी गेथा मन बदलीन भगवान भणी वळ ज्या हय, ता ईसम जीवाय जीवीन आह़फा ने उजन्ता करो। अने ‘आमु ते अब्राहम बाह नी अवल्यात से’ ईसम वीच्यारीन बेफीकर्या नी रेजो। मे तमने केम, भगवान आहया दगड़ाम गेथो बी अब्राहम जुगु अवल्यात पयदा कर सके, 9#मत्ती 7:19अने हमणेत झाड़ ना मुळ्या पोर कुराड़ी मेक मेली। काहाके जे झाड़ वारु नी फाले, तीहया झाड़ ने वाड देहे अने तीने आक्ठा मे धपाड़वा करीन नाख देहे।”
10अने माणहु तीने पुसता हता, “ता आमु हाव ह़ु करीया?”
11तीहयो तीमने केतो ज्यो, “जीनी पांह बे डगला हय, तीहयो एक तीने आप देवा जोवे, जीनी पांह नी हय; अने जीनी पांह खाणु हय, तीहयो बी जीनी पांह नी हय तीने आप देवा जोवे।”
12 #
लुका 7:29
थोड़ाक फाळो उगरावण्या बी बपतीस्मा लेवा आया, अने तीने पुछ्या, “ए गुरु, आमने ह़ु करवा जोवे।”
13तीहयो युहन्नो तीमने केदो, “जेतरु लेवा करीन वात टकायली से, तेतरुत मांगजो, तीन गेथु जादा नी मांगजो।”
14अने सीपायड़ा बी तीने पुछता हता, “आमने ह़ु करवा जोवे?” तीहयो तीमने केदो, “कोय पांह जोर करीन पय्हा ना मांगो अने कोय पोर झुटो गुनो ना लगाड़ो अने आह़फा नी दाड़की मे नीरहा रेवो।”
15माणहु वाट जोवीन आह कर र्या हता, अने युहन्ना ना बारा मे आह़फाम ना मन मे वीच्यार करवा बाज ज्या के कंखर माय्न आहयोत मसी ते नी हय। 16एतरे बपतीस्मा आपण्यो युहन्नो आखा ने केदो, “मे ते तमने पाणी सी बपतीस्मा आपु; पण एक मार पसळ आव्वा वाळो से, तीहयो मार गेथो जोरभर्यो से। मे तीना चाट्यान बोंद सोड़वान लायक बी नी हय; पण तीहयो तमने चोखली आत्मा सी अने आक्ठा सी बपतीस्मा आपहे। 17तीहयो आह़फा नु ह़ुपड़ु आह़फा ना हात मे ली लेदलो से, अने तीहयो आह़फा ना खळा मे गम नीकाळीन चोखाळहे अने गम ने मोहटी मे भरहे, पण गम ना चारा ने ओलाये नी एवी आक्ठी मे नाखीन धपाड़ देहे।”
18एवी घण ढेरकी ह़ीकापण आपतो जाय्न युहन्नो माणहु ने चेतावतो हतो अने खुस-खबर ह़मळावतो हतो। 19#मत्ती 14:3,4; मरकुस 6:17,18राजा हेरोद आह़फा ना भाय फीलीपुस नी लाडी हेरोदीयास ने राख लेदलो अने ढेरेत गलत कामु कर्यो हतो एतरे युहन्नो, तीने वड्यो, 20एतरे हेरोद राजा बपतीस्मा आपण्या युहन्ना ने जेल मे कुंडाड़ीन बीजा गलत कामु गेथो बी जादा गलत काम कर्यो।
युहन्नो ईसु ने बपतीस्मा आपे
(मत्ती 3:13-17; मरकुस 1:9-11)
21जत्यार ढेरेत माणहु पाणी मे डुबीन बपतीस्मान रीती ली लेदा अने अळतेण ईसु बी बपतीस्मा लेदो, अने जत्यार तीहयो वीन्ती करवा बाज रेलो तत्यार ह़रग उगड़ी ज्यु। 22#मत्ती 3:17; मरकुस 1:11; लुका 9:35अने भगवान नी चोखली आत्मा पारवान वेह मे ईसु पोर उतरी अने तत्यारुत भगवान बाह ह़रग मे रीन ईसु ने केदो, “तु मारो मोंगाळ्ळो सोरो से मे तार सी घणो खुस से।”
ईसु नी कुळी
(मत्ती 1:1-17)
23ते वखत ईसुन उमर तीसेक साल नी हती। आहयी टेमे तीहयो आह़फोत ह़ीकापण आपवा बाज ज्यो, माणहु ईसु ने, युसुफ नो सोरो ह़मजता हता; अने आहयो युसुफ, एली नो सोरो हतो, 24अने आहयो लेवी, मत्तात नो सोरो हतो, अने आहयो मत्तात लेवी नो सोरो हतो, अने आहयो लेवी, मलाकी नो सोरो हतो, अने आहयो मलाकी, यन्ना नो सोरो हतो, अने आहयो यन्ना, युसुफ नो सोरो हतो, 25अने आहयो युसुफ, मत्तीत्याह नो सोरो हतो, अने आहयो मत्तीत्याह, आमोस नो सोरो हतो, अने आहयो आमोस, नहुम नो सोरो हतो, अने आहयो नहुम, असल्याह नो सोरो हतो, अने आहयो असल्याह, नोगह नो सोरो हतो, 26अने आहयो नोगह, मात नो सोरो हतो, अने आहयो मात, मत्तीत्याह नो सोरो हतो, अने आहयो मत्तीत्याह, सीमी नो सोरो हतो, अने आहयो सीमी, योसेक नो सोरो हतो, अने आहयो योसेक, योदाह नो सोरो हतो। 27अने आहयो योदाह, युहन्ना नो सोरो हतो, अने आहयो युहन्ना, रेसा नो सोरो हतो, अने आहयो रेसा, जरुबाबील नो सोरो हतो, अने आहयो जरुब्बाबील, सलतीयेल नो सोरो हतो, अने आहयो सलतीयेल, नेरु नो सोरो हतो, 28अने आहयो नेरु, मलाकी नो सोरो हतो, अने आहयो मलाकी, अद्दी नो सोरो हतो, अने आहयो अद्दी, कोसाम नो सोरो हतो, अने आहयो कोसाम, ईलमोदम नो सोरो हतो, अने आहयो ईलमोदम, एरा नो सोरो हतो, 29अने आहयो एरो, अने तीहयो येसु नो सोरो हतो, अने आहयो येसु, ईलजार नो सोरो हतो, अने आहयो ईलजार, यरीम नो सोरो हतो, अने आहयो यरीम, मत्तात नो सोरो हतो, अने मत्तात, लेवी नो सोरो हतो, 30अने लेवी सीमीयोन नो सोरो हतो, अने सीमीयोन, यहुदा नो सोरो हतो, अने यहुदा, युसुफ नो सोरो हतो, अने युसुफ, योनान नो सोरो हतो, अने योनान, ईलयाकीम नो सोरो हतो। 31अने ईलयाकीम, मलेयाह नो सोरो हतो, अने मलेयाह, मीन्नाह नो सोरो हतो, अने मीन्नाह मत्ता नो सोरो हतो, अने मत्ता, नातान नो सोरो हतो, अने नातान, दावुद नो सोरो हतो, 32अने दावुद, यीसे नो सोरो हतो, अने यीसे, ओबेद नो सोरो हतो, अने ओबेद, बोवाज नो सोरो हतो, अने बोवाज, सलमोन नो सोरो हतो, अने सलमोन, नहसोन नो सोरो हतो, 33अने नहसोन, अम्मीनादाब नो सोरो हतो, अने अम्मीनादाब, अरनी नो सोरो हतो, अने अरनी, हीस्रोन नो सोरो हतो, अने हीस्रोन, फीरीस नो सोरो हतो, अने फीरीस यहुदा नो सोरो हतो। 34अने यहुदा, याकुब नो सोरो हतो, अने याकुब, ईसाक नो सोरो हतो, अने ईसाक, अब्राहम नो सोरो हतो, अने अब्राहम, तीरह नो सोरो हतो, अने तीरह, नाहोर नो सोरो हतो। 35अने नाहोर, सरुग नो सोरो हतो, अने सरुग, रुव नो सोरो हतो, अने रुव, फीलीग नो सोरो हतो, अने फीलीग, एबीर नो सोरो हतो, अने एबीर, सीलह नो सोरो हतो। 36अने सीलह, केनान नो सोरो हतो, अने केनान, अरफक्सद नो सोरो हतो, अने अरफक्सद, सेम नो सोरो हतो, अने सेम, नुहा नो सोरो हतो, अने नुह, लीमीक नो सोरो हतो, 37अने लीमीक, मथुसीलह नो सोरो हतो, अने मथुसीलह, हनोक नो सोरो हतो, अने हनोक, यीरीद नो सोरो हतो, अने यीरीद, महललेल नो सोरो हतो, अने महललेल, केनान नो सोरो हतो, 38अने केनान, ईनोस नो सोरो हतो, अने ईनोस, सेत नो सोरो हतो, अने सेत, आदम नो सोरो हतो, अने आदम, भगवान नो सोरो हतो।
ទើបបានជ្រើសរើសហើយ៖
लुका 3: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
