लुका 19
19
फाळो लेवा वाळो जक्कय
1एक दाड़े ईसु यरीहो ह़ेर मे हतीन जवा बाज रेलो हतो। 2जक्कय नाम नो एक मालदार माणेह हतो। तीहयो फाळो उगरावण्या नो मुखी हतो। 3ईसु कोय से, आहयु मालम करवा करीन, जक्कय ईसु ने देखवा हींडतो हतो। पण जक्कय घणो नीचो हतो। 4एतरे तीहयो गड़दी मे अगो दवड़ीन ज्यो। अने ईसु ने देखवा करीन एक गुलर ना झाड़ पोर चड़ ज्यो। काहाके ईसु तीहयीत वाट्ये माय्न सरकीन जवा वाळो हतो। 5जत्यार ईसु तीहया झाड़ नी तळे आयो, ता तीहयो उपर भाळ्यो, अने जक्कय ने केदो, “ए जक्कय ममार उतर! काहाके आज मे तारा घोर रेवा से।”
6तीहयो जक्कय छोटो उतर्यो अने खुस हय्न ईसु नो आव-भाव कर्यो अने आह़फा ना घोर ली ज्यो। 7आहयु देखीन आखा युहदी माणहु ईसु नो वाक काडीन एक-बीजा ने केवा बाज ज्या, “ईसु ते एक पापी ना घोर मे पोरणो बणीन आय र्यो।”
8पण जक्कय उबो हय्न ईसु ने केदो, “ए मालीक! मे मारु आखु धन नो आदो वाटो आहया ह़ेर ना गरीब ने आप देही। कदीम मे कोय पांह धोको दीन धन लेदो हय, ता मे तीने तीनु च्यार गुणा पासु वाळ देही।”
9तत्यार ईसु तीने केदो, “आज आहया घोर वाळा मे छुटकारो आवलो से; काहाके आहयो बी अब्राहम नी अवल्यात से। 10#मत्ती 18:11काहाके मनख्या नो सोरो खोवायला ने ह़ोदवा अने तीमने बचाड़वा आवलो से।”
दह़ सीक्का नो दाखलो
(मत्ती 25:14-30)
11जत्यार माणहु आहयी वात ह़मळवा बाज रेला हता, ता ईसु एक अळी दाखलो ह़मळायो; काहाके ईसु यरुसलेम ह़ेर नी ह़ातेत आय र्यो हतो अने माणहु आहयु देखीन ह़मजी र्या हता के भगवान नु राज हमणेत उजन्तु देखाव पड़वा हींडे। 12ईसम करीन ईसु केदो, “एक मालदार माणेह राजो बणीन पासो आव्वा, करीन घण नाम्बे वाळा देस मे जवा नी तीयारी कर्यो। 13अने तीहयो मालदार माणेह आह़फा ना दह़ चाकर्या ने बोलायो अने तीमने एक-एक जणा ने कळदार रुप्यो आपीन केदो, ‘मने पासो आवता लग तमु धंदो करीन लेणु-देणु करता रेवो अने कमायो।’ 14पण तीहया ह़ेर मे रेण्या तीनी ह़ाते रीह राखता हता, अने तीहया तीनी पसळ एक दुत बणावीन तीने की मोकल्या के ‘आमु आहयी वात मे राजी नी हय, के हीय्यो अमारी पोर राज करे।’”
15अळतेण मालदार माणेह राजो बणीन पासो आयो, अने तीहयो गुलाम चाकर्या ने धन आपलो हतो, तीमने बोलाव्वा मोकल्यो अने आहयु जाणवा हींडतो हतो, के एक-एक जणो लेणु-देणु करीन ह़ु-ह़ु कमायो। 16तत्यार पेलेत गुलाम चाकर्यो आवीन केदो, “ए मालीक, तु मने दह़ कळदार रुप्या आपलो हतो, तीहया दह रुप्या ना मे अळी दह कळदार रुप्या कमायलो से।” 17मालीक तीने केदो, “ए वारला गुलाम चाकर्या तु नानी सी नानी वात मे बी ईमानदार नीकळ्यो, एतरे तने दह ह़ेर पोर हक आपु।” 18बीजो गुलाम चाकर्यो आवीन केदो, “मालीक, तारा पांच कळदार रुप्या नी लारे मे पांच कळदार रुप्या अळी कमायलो से।” 19अने मालीक तीने बी केदो, “तने बी पांच ह़ेर पोर हक आपु।”
20हाव तीसरो गुलाम चाकर्यो आवीन केदो, “मालीक, देख आहयो से तारो कळदार रुप्यो; जीने मे एक रुमाल मे बांदीन मेक देदलो। 21काहाके मे तने देखीन बीहतो हतो, काहाके तु घणो आकरो से: तु जे नी मेले तीने चुट लेय, अने जे तु नी वेरे तीहयु तु वाड लेय।” 22तीहयो मालीक तीने केदो, “ए वेरी गुलाम चाकर्या! मे तारात बोलु मे तारो नीयाव करही। तु जाणतो हतो, के मे आकरो से। अने जे नी मेलु तीहयु चुट लेम, अने जे नी वेरु तीहयु वाड लेम। 23ता, तु मारु धन ह़ोवकार ने तां काहा नी मेल्यो? अने तत्यार मे पासो आवीन तीहया रुप्या ने मे वीयाज-भेळे ह़ोवकार पांह गेथो मांग लेतो।”
24अने मालीक ह़ाते उबा हय रेला तीहया आखा माणहु ने केदो, “आहया चाकर्या पांह गेथो तीहयो कळदार रुप्यो हापकी लेवो, अने जीनी पांह दह़ कळदार रुप्या से, तीनेत आहयो कळदार रुप्यो बी आप देवो।” 25तीहया उबा हय रेला आखा माणहु मालीक ने केदो, “मालीक, हीनी पांह ते दह़ कळदार रुप्या से!” 26#मत्ती 13:12; मरकुस 4:25; लुका 8:18मालीक जपाप आप्यो, जीनी पांह अमाळ से, तीने अळी बी आपहे; बाखीन जीनी पांह कंय बी नी हय, तीनी पांह गेथु, तीहयु बी मांग लेहे, जे तीनी पांह से। 27#मत्ती 25:14-30पण तीहया मारा वेरी ने, जीमने आहयु नी गमतु हतु, के मे तीमनी पोर राज करु, तीमने आंखर मारीन्तां लावीन कुटो अने मारी अगळ तीमने मार नाखो।
यरुसलेम मे ईसु नु भरायणु
(मत्ती 21:1-11; मरकुस 11:1-11; युहन्ना 12:12-19)
28अने आहयी वात कीदीन ईसु यरुसलेम ह़ेर भणी तीना चेला अगळ-अगळ जवा बाज ज्यो। 29अने ईसु चालतो-चालतो बेतफगे अने बेतन्या गाम ह़ाते वाळा जेतुन नाम ना बड़ा पोर पुग्यो। तत्यार ईसु आह़फा ना बे चेला ने ह़ाते बोलायो अने तीमने आहयु कीन मोकल्यो, 30“अगळ ह़ेला गाम मे जावो। अने जेम तमु गाम मे भरायहु, ता तमने एक पाठड़ु गदड़ु बांद मेकलु देखाव पड़हे। तीनी पोर हजु लग कोय नी बह्यु। तीने सोड़ीन आंया लीयाव जो। 31कदीम तमने कोय पुछे के आने काहा सोड़ र्या? ता तीने केजो, मालीक ने आहयु गदड़ु जोय र्यु।”
32तीहया बे चेला तेमेत कर्या जेम तीमने केदलु हतु। जेम ईसु केदलो तेम ने तेम तीमने एक पाठड़ु गदड़ु बांद मेकलु जड़्यु। 33जत्यार तीहया तीने सोड़वा बाज र्या हता, ता पाठड़ु गदड़ु ना मालक्या तीमने देख्या अने पुछ्या “तमु अमारु पाठड़ु गदड़ु ने काहा सोड़ र्या?”
34तीहया केदा “मालीक ने आहयु पाठड़ु गदड़ु जोय र्यु।” 35तत्यार तीहया ते पाठड़ु गदड़ु ने ईसुन्तां लाया। अने तीहया पाठड़ु गदड़ु ना वाहां पोर लुगड़ा आथरी देदा, अने तीहया पाठड़ु गदड़ु पोर ईसु ने बहाड़ देदा। 36जत्यार ईसु गदड़ु पोर बहीन जतो हतो, ता माणहु आह़फाम ना लुगड़ा तीनी अगळ आथरता हता।
37ईसु जेतुन झाड़ ना बड़ा ना आड़खे यरुसलेम धेड़े पुग्यो, ता ईसु ना आखा चेला नी मंडळी ढेरेत, ईसु आयो करीन खुस हय ज्या, अने जुदा-कामु ने देखीन भगवान ने घणो वारु कीन खुस हय्न तीनी बड़ाय करवा बाज ज्या। 38जुगाळो से तीहयो राजो, जे मालीक ना नाम सी आवे! ह़रग मे सांती अने वादळा ने तीनी बड़ाय हये।
39आहयु ह़मळीन गड़दी मे वाळा थोड़ाक फरीसी पंथवाळा ईसु ने केदा, “ए मास्तर! तु वडीन तारा चेला ने होगो राख।”
40पण ईसु तीहया फरीसी माणहु ने केदो, “मे तमने केम, कदीम हीय्या होगा री जहे, ता आहया दगड़ा आड़ी पड़हे।”
ईसु यरुसलेम ने देखीन रड़े
41जत्यार ईसु यरुसलेम ह़ेर नी ह़ातेह़ आयो, अने तीहयो ह़ेर ने देखीन रड़वा बाज ज्यो। 42अने केदो, ए यरुसलेम ना माणहु कदीम तमु आज आह़फाम नी सांती नी वात लेता, ता भलु हयतु, पण तमु तीने नी ह़मज्या अने तमने नी देखायु। 43काहाके तारी पोर तीहया दाड़ा आवह़े, जत्यार तारा वेरी तारी च्यारो-मेर ढाळ वेर घेरवी लेहे, अने च्यारो-मेर गेथा तने ठोकहे अने डाबहे। 44अने आहया भीतड़ा नी वच मे तने अने तारा माणहु ने कादा मे मेळ्वी देहे अने कचरह़े। अने ह़ेर नु भीतड़ु ओदरी जहे, अने दगड़ा पोर दगड़ो बी नी रेवा देय, काहाके तमु भगवान नो आव्वा नो मोखो आयो ता तीहयी टेम ने तमु नी ओळख्या।
ईसु मंदीर मे गेथो लेणु-देणु करन्या ने नीकाळे
(मत्ती 21:12-17; मरकुस 11:15-19; युहन्ना 2:13-22)
45अने ईसु मंदीर मे भराय्न वेपारु करन्या ने बारथो नीकाळवा बाज ज्यो। 46अने तीमने केदो “खरला सास्तर मे आहयु लीखलु से, ‘मारु घोर वीन्ती करवा नु घोर केवायहे, पण तमु आहया घोर ने, डाकु नु घोर बणाय देदा।’”
47 #
लुका 21:37
अने ईसु दाड़ीक मंदीर मे माणहु ने ह़ीकापण आपतो हतो। अने ईसु ने भगवान ना डायला पुंजारा अने युहदी-धरम ह़ीकाड़न्या अने मालदार माणहु ईसु नो वीरोद करवा बाज ज्या, अने तीने मार नाखवा नो मोखो ह़ोद र्या हता। 48पण तीमने कंय बी नी बण्यु; अने तीमने ह़मज नी आयु के आहयु कीसम कर्या; काहाके आखा माणहु घणी हेरे तीनी ह़ीकापण ह़मळता हता।
ទើបបានជ្រើសរើសហើយ៖
लुका 19: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
