1 Kor. 11

1I no Khristo kimihi shi ketoi nongu ghí pa kimihi shilo.

Akukuho lo Akütsü Küzüpu keu Vehu

2Ni ye nongu akishé tsü ani, kughengu nongu no thowkha kümtsü lo I kümsülu eno I no akükütsü tsaqo pekishe süwo nongu lau tsü keu toi nongu no tipaqo pape ke. 3Ikemu I no nongu pelo ithi penishi akeu ye kipitimi kümtsü shou akütsü ye Khristo ke, eno totimi shou li kimi no akütsü ke, eno titoi Khristo shou Alhou no akütsü ke. 4Kipitimi khunoqo no pa kütsü küzüpu no akighini shi momu tungkuptsa#11:4 Hipau kiqi ye Alhou shepe pìní keno pa ye Khristo gihumove anie. 5Eno totimi khunoqo no aqo-aho hoho lo akütsü küzüpumo no akighini shi momu Alhou tsape shini keno li ye li kimi gihumove ani, eno tiye li kütsüsa miyeve akeu paphi ke. 6Kughengu totimi lakhi no li kütsü küzüpumo aye, li ye li kütsüsa tsave moayesae; ikemu asà tsave keu momu akütsüsa miyeve keu ye totimi lakhi ghenguno aju-aje lhoküsa shi aghí aye, li ye akütsü küzüpuluve moayesa ke.

7Kipitimi lakhi ye pa kütsü küzüpu kepu kumoe, kughengu pa ye Alhou julho eno Alhou juküvü yebide tsü anike; ikemu totimi ye kipitimi juküvü ke. 8Kughengu kipitimi ye totimi lau no ighimoe, ikemu totimi no kipitimi lau no ighike; 9tishiaye totimi ghenguno kipitimi lhosü ke kumoe ikemu totimi ye kipitimi ghenguno lhosü ke. 10Tishiaye hipau kiqi ghenguno ngò kungumiqo no chheju akeu ghenguno ngò ishi, totimi lakhi ye li likhi li kütsü küzüpu nikeu lo kükagha aghí moayesa ke.#11:10 Momu li kütsü küzüpu keu ye liw kükagha qholo akeu michipu ke. 11Tishimu, Ampeu gholo xüküqha pesü akeu lo totimi ye kipitimi sümo no xümlae, momu kipitimi ye totimi sümo no xümlae. 12Kughengu kipitimi lau no totimi ighike toi, kipitimi ghí totimi vechewo punú ke. Ikemu thowkha kümtsü Alhou lau no ighi cheni.

13Nongu likhi nongu no xathaluve lo: Totimi lakhi no aqo-aho hoho lo li kütsü küzüpumo no Alhou vilo inikhu keu ye achipi keshea? 14Alhoaye lonomu kipitimi lakhi no asà kushuwa xapu keu ye pa ghenguno aju-aje lhoküsa ke, 15ikemu totimi lakhi no asà kushuwa xapu aye tiye li ghenguno aju-aje kivipu ke. Kughengu li pelo shonhapulu penike ghenguno asà kushuwa li tsüpüani ke. 16Khukhumu hipau vehu lo kütsala nishi aghí aye, ningu ye kütau pimhe chekeu kühae, momu Alhou kukuhouqo ghí kütau pimhe chekeu kühae.

Ampeu Ghulhu Vehu

17Itehi kichetsü niye shi akeu lo ni ye nongu akishé tsü kepu kühae, kughengu nongu ye aqoshi kusholu akeu lo akivi shini keu nguno alau shiküpüsapu shi anike. 18Atüghishi, I no chilu keu no kughou nongu no kümtsa kuho niye ighini keno nongu dolo kijetha keu acheni ipi ani, eno tiye kuchou shi aghí nani kepi I no pülü ani. 19Kuchou no pìní aye nongu khuu shou Alhou’w puloza ani keno ithinishi aghí aye nongu dolo kijetha keu aghí moayesa pütsá ke. 20Tishiaye, kughou nongu no aqoshi kusholuni keno nongu ye Ampeu Ghulhu chu cheni ke kumoe,#11:20 Korinthiamiqo ye aqoshi Ampeu Ghulhu lo alibe chu acheke. 21kughengu aqoshi chu niye akelo nongu khami ye akimighi shi pütüta shélo alibe chu thuve cheni. Tishive kelo no timi khami no müzüthi ngo acheni eno khami no shomzüve cheni. 22Nongu ye chu-sho nike ghenguno pütüta ki küha keshea? Ikeo nongu ye kiumu küha kemi thogha keu vechewo Alhou kukuhou thaigha ani kea? Ni ye nongu vilo kiu pìní kea? Ni ye nongu sheqhelo pi keshea? Hipau vehu lo khilemu tishimlae!

23Kughengu Ampeu lau no I no kiu ithulu keno tipau pesü I no nongu lau pekishe tsü anike: Ampeu Jisü no pa pesü thechu shive nikeu jì lo pa no asho ikhilu, 24eno kughou pa no Alhou shikimthi tsüve keno, tipau süpho no ishi pi, “Hiye I phimpi, nongu ghenguno tsüve keu ke; I kümsüchilelu ghi hi shichelo.” 25Tipau tho lono, aghulhu thiu pa no ajikhu ikhilu no ishi pi, “Ajikhu hipau ye I jì vechewo puloshoqhi akitheu shiluve keu ke; Kughou nongu no hi sho keno I kümsülu ghi hipau shichelo.” 26Kughengu kughou nongu no asho hipau chuni eno ajikhu hipau lono shoni keno, nongu ye Ampeu no ighimo ke kutólo Ampeu kithí ghili pikülhatsü anike.

27Tishiaye, khukhumu tsaqütsaleimo püzü Ampeu’w asho chu keu eno Ampeu jikhu lono sho keu ye Ampeu phimpi eno Ampeu jì zülo axiné kipimí shive anie. 28Kümtsü no asho chumphi züu eno ajikhu lono sho mphi züu no panongu likhi panongu phukideküdai ju moayesa ke. 29Kughengu khunoqo no Khristo phimpi ghili tsaqütsalei mtha no chuni eno shoni keno panongu ye panongu likhi panongu shou küghakütha süghi kepu shi chu eno sho anike. 30Hi ghenguno nongu gholo kutomo no qeinai eno küsükini shi acheni ke, eno nongu dolo khami ye thivae. 31Ikemu ningu no hinguno tsaqütsalei shi nilikhi nighili ithi aghí ke aye, ningu ye küghakütha hitoi keu ningu shou ikughimoni cheke. 32Tishimu, kughou Ampeu no hipau gholau no ningu shou küghathabeve keno, tiye ningu ghasüve anike, tishianguno ashekha lo ayeghiqha gholo ningu ghí kiléqhive pemo niye ke.

33Tishiaye, I thiküzümi eno I chelimiqo, kughou nongu no chu niye kumqoni keno, nongu kümtsü kümtsa chu moayesae. 34Khukhumu müzüthi aghí aye aki lono kiuala chuve moayesae, tishianguno nongu no kümtsa kumqo kelo nongu shou küghakütha ikughi pemo niye ke.

Eno kütau vehuqo ye I no ighi kelo no itaghi alau kichetsü nani.

ទើបបានជ្រើសរើសហើយ៖

1 Kor. 11: STB

គំនូសចំណាំ

ចែករំលែក

ចម្លង