TOHI GAUE A TE KAU APOSITOLO 17
17
Paulo mo Silasi i Tesalonika
1Nee fakalaka leva Paulo mo Silasi i Afipolisi mo Apolonia, pea nee na kaku leva ki Tesalonika, ae nee tuu ai te sinakoka o te kau Sutea. 2Nee ulu leva Paulo ki ai, o hage ko tana faimahani. I te u sapato e tolu, nee palalau ia mo natou ki te u mea o te tohi tapu, 3o ina fakamatala mo fakaha kia natou nee tonu ke mamahi te Kilisito pea ke toe tuuake ia mai te kau mate. Pea nee ina ui: Ko te Sesu aeni e au fakaha atu kia koutou, ko te Kilisito aia. 4Nee tui leva ni ihi o natou, pea nee natou kau leva kia Paulo mo Silasi, feia mo he kaugamalie o te kau Keleka nee mataku ki te Atua, pea mo ni ihi fafine aliki tokolahi. 5Kae ko te kau Sutea maheka nee natou too leva mo natou he u tagata agakovi mai te hahai noa, nee natou fakatupu leva ni fakatahi i te u malae fakafenua, pea nee natou fakatupu leva ni maveuveu i te kolo. Nee natou olo leva ki te fale o Sasone, pea nee natou kumi leva ia Paulo mo Silasi, ke natou aumai naua kia mua o te hahai. 6I tanatou mole mau naua, nee natou toho leva ia Sasone mo ni ihi tehina kia mua o te kau pule o te kolo, o kalaga: ko natou aeni nee natou fakamaveuveu te malamanei katoa, pea kua natou kaku mai foki ki heni, pea nee fakatalitali natou e Sasone. 7E natou fakafehagai fuli ki te u lao a Sesale, o natou tala e i ai he tahi age hau, ko Sesu. 8Aki te u palalau aena nee natou fakamamahii ai te loto o te hahai mo te kau pule, 9ae nee natou tuku age leva Sasone mo te u tehina ke natou olo i te osi o tanatou mau maia natou he totogi paaga.
Tali lelei o Paulo i Pelea
10Nee fekaui aipe e te u tehina ia Paulo mo Silasi i te pouli ke na olo ki Pelea. I tana kaku ki ai, nee na ulu leva ki te sinakoka o te kau Sutea. 11Nee mau e te kau Sutea aeni ni loto e lelei age ia natou o Tesalonika; nee natou tali leva te folafola mo he loto holi, pea nee natou kumi i te Tohi Tapu i te aho takitahi, ke natou sio pe e totonu te mea e fakaha age kia natou. 12Nee tui leva he kaugamalie o natou, feia mo he tokolahi o te u fafine aliki Keleka, pea mo ni tagata kaugamalie. 13Kae, i te iloi leva e te kau Sutea o Tesalonika kua fakaha foki e Paulo te folafola a te Atua i Pelea, nee natou olo leva ki ai o fakamaveuveui te hahai. 14Nee fakahola atu aipe e te u tehina ia Paulo ke alu ki te faahi o te tai; nee nonofo leva Silasi mo Timoteo i Pelea.
15Ko natou ae nee natou fakaha te ala kia Paulo nee natou taki leva ia o kaku ki Atena. Pea nee natou toe liliu leva, mo te fakatotonu aeni kia Silasi mo Timoteo ke na hahake fakavilivili ake kia ia.
Akonaki a Paulo i Atena
16I te kei talitali a Paulo kia naua i Atena, nee ina logoi leva he ita i tona loto, i tana sio ki te fonu o te kolo aena i te u taulaatua. 17Pea nee palalau leva ia i te loto sinakoka mo te kau Sutea pea mo te u tagata nee mataku ki te Atua, pea i te u malae fakafenua i te aho takitahi mo natou nee ina mau. 18Ko ni tagata filosofia o te faahiga o Epikulio mo te faahiga o Setoiko nee kamata palalau leva mo ia. Pea nee ui e ihi: Kotea e fia palalau ki ai te tagata gutu palalau aeni? Pea ko ihi, i te logo ki tana fakaha ia Sesu mo te toe tuuake, nee natou ui leva: E hage e ina fakaha ni atua matapule. 19Pea nee natou too leva ia, o taki ki te Aleopasi, o ui: Pe e feala ke matou iloi te akonaki foou aena e ke fakagonogono? 20Koteuhi e kehe te u mea e ke fakalogo matou ki ai. Koia e matou fia iloi te uhiga o te u mea aia.
21Kae ko te kau Atena fuli mo te kau matapule nee nofo i Atena, nee natou fakaaoga tonatou temi ki te palalau mo te fakalogo o te u logo.
22Nee tuu leva ia Paulo i lotomalie o te Aleopasi, o ui: Tagata o Atena, e au sio e malohi age takotou tauhi lotu i te u mea fuli. 23Koteuhi, i taku taka i tokotou kolo, pea mo taku sio ki te u mea fuli e kotou tauhi ki ai, nee au mau foki he aletale e tuu ai te fakailoga aeni: Ki he atua e mole iloi! Ko te mea ae e kotou tauhi ki ai kae e mole koutou iloi, ko ia aeni e au fakaha atu kia koutou. 24Ko te Atua ae nee ina fakatupu te malamanei mo mea fuli i ai, ae ko te Aliki o te lagi mo te kele, e mole pe nofo ia i ni fale tapu nee fau e te u nima o te tagata; 25e mole tauhi ia e te u nima o te tagata, o hage e aoga kia ia he mea, ia ia ae e ina foaki ki te u tagata fuli te mauli, mo te tukumanava, pea mo te u mea fuli. 26Nee ina fakatupu mai he tagata e tahi te u puleaga fuli, pea nee ina fakanofo natou i te fuga katoa o te kele, o ina fakatuutuu kia natou te u temi mo te u tuakoi o onatou nofoaga. 27Nee ina fai te u mea aia koteuhi ke natou kumi te Aliki, pea ke natou faiga ke natou mau ia i te tautaufa, logo ai e mole mamao ia maia tatou takitahi, 28koteuhi ia te ia e tou mau ai te mauli, mo te gaugaue, pea mo te agaaga. Nee fakaha foki te mea aena e ni ihi o akotou tagata poto: Ko tatou ko tona lanu. 29Koia kapau ko tatou ko te lanu o te Atua, e mole tonu ke tou manatu e tatau te natula fakaatua mo te aulo, mo te paaga, pee ko te maka, ae nee ta e te poto mo te fakakaukau a te tagata. 30Kae nee mole fakaaoga e te Atua te u temi ae nee nofo ai te tagata i te fakapouli, kae kua ina fakaha i te temi nei ki te tagata fuli i te u kogamea fuli, e tonu ke natou fakahemala, 31koteuhi kua ina fakatuutuu he aho ae e ina fakamaaui anai te malamanei i te faitotonu, i he tagata ae kua ina filifili, pea kua ina tuku ki te u tagata fuli he fakamooni o uhiga mo ia i tana toe fakatuuake ia mai te kau mate.
32I tanatou logo ki te palalau ki te toe tuuake o te kau mate, nee nukinuki leva ni ihi, kae nee ui leva e ihi: Hoki matou toe logo anai ki ai i he tahi age faiaga. 33Pea nee mavae leva ia Paulo maia natou. 34Kae nee pipiki leva ni ihi kia ia, o natou tui leva: Nee kau i ai Tenisio o te Aleopasi, mo he fafine nee higoa ko Tamalisi, pea mo ni ihi age.
ទើបបានជ្រើសរើសហើយ៖
TOHI GAUE A TE KAU APOSITOLO 17: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
TOHI GAUE A TE KAU APOSITOLO 17
17
Paulo mo Silasi i Tesalonika
1Nee fakalaka leva Paulo mo Silasi i Afipolisi mo Apolonia, pea nee na kaku leva ki Tesalonika, ae nee tuu ai te sinakoka o te kau Sutea. 2Nee ulu leva Paulo ki ai, o hage ko tana faimahani. I te u sapato e tolu, nee palalau ia mo natou ki te u mea o te tohi tapu, 3o ina fakamatala mo fakaha kia natou nee tonu ke mamahi te Kilisito pea ke toe tuuake ia mai te kau mate. Pea nee ina ui: Ko te Sesu aeni e au fakaha atu kia koutou, ko te Kilisito aia. 4Nee tui leva ni ihi o natou, pea nee natou kau leva kia Paulo mo Silasi, feia mo he kaugamalie o te kau Keleka nee mataku ki te Atua, pea mo ni ihi fafine aliki tokolahi. 5Kae ko te kau Sutea maheka nee natou too leva mo natou he u tagata agakovi mai te hahai noa, nee natou fakatupu leva ni fakatahi i te u malae fakafenua, pea nee natou fakatupu leva ni maveuveu i te kolo. Nee natou olo leva ki te fale o Sasone, pea nee natou kumi leva ia Paulo mo Silasi, ke natou aumai naua kia mua o te hahai. 6I tanatou mole mau naua, nee natou toho leva ia Sasone mo ni ihi tehina kia mua o te kau pule o te kolo, o kalaga: ko natou aeni nee natou fakamaveuveu te malamanei katoa, pea kua natou kaku mai foki ki heni, pea nee fakatalitali natou e Sasone. 7E natou fakafehagai fuli ki te u lao a Sesale, o natou tala e i ai he tahi age hau, ko Sesu. 8Aki te u palalau aena nee natou fakamamahii ai te loto o te hahai mo te kau pule, 9ae nee natou tuku age leva Sasone mo te u tehina ke natou olo i te osi o tanatou mau maia natou he totogi paaga.
Tali lelei o Paulo i Pelea
10Nee fekaui aipe e te u tehina ia Paulo mo Silasi i te pouli ke na olo ki Pelea. I tana kaku ki ai, nee na ulu leva ki te sinakoka o te kau Sutea. 11Nee mau e te kau Sutea aeni ni loto e lelei age ia natou o Tesalonika; nee natou tali leva te folafola mo he loto holi, pea nee natou kumi i te Tohi Tapu i te aho takitahi, ke natou sio pe e totonu te mea e fakaha age kia natou. 12Nee tui leva he kaugamalie o natou, feia mo he tokolahi o te u fafine aliki Keleka, pea mo ni tagata kaugamalie. 13Kae, i te iloi leva e te kau Sutea o Tesalonika kua fakaha foki e Paulo te folafola a te Atua i Pelea, nee natou olo leva ki ai o fakamaveuveui te hahai. 14Nee fakahola atu aipe e te u tehina ia Paulo ke alu ki te faahi o te tai; nee nonofo leva Silasi mo Timoteo i Pelea.
15Ko natou ae nee natou fakaha te ala kia Paulo nee natou taki leva ia o kaku ki Atena. Pea nee natou toe liliu leva, mo te fakatotonu aeni kia Silasi mo Timoteo ke na hahake fakavilivili ake kia ia.
Akonaki a Paulo i Atena
16I te kei talitali a Paulo kia naua i Atena, nee ina logoi leva he ita i tona loto, i tana sio ki te fonu o te kolo aena i te u taulaatua. 17Pea nee palalau leva ia i te loto sinakoka mo te kau Sutea pea mo te u tagata nee mataku ki te Atua, pea i te u malae fakafenua i te aho takitahi mo natou nee ina mau. 18Ko ni tagata filosofia o te faahiga o Epikulio mo te faahiga o Setoiko nee kamata palalau leva mo ia. Pea nee ui e ihi: Kotea e fia palalau ki ai te tagata gutu palalau aeni? Pea ko ihi, i te logo ki tana fakaha ia Sesu mo te toe tuuake, nee natou ui leva: E hage e ina fakaha ni atua matapule. 19Pea nee natou too leva ia, o taki ki te Aleopasi, o ui: Pe e feala ke matou iloi te akonaki foou aena e ke fakagonogono? 20Koteuhi e kehe te u mea e ke fakalogo matou ki ai. Koia e matou fia iloi te uhiga o te u mea aia.
21Kae ko te kau Atena fuli mo te kau matapule nee nofo i Atena, nee natou fakaaoga tonatou temi ki te palalau mo te fakalogo o te u logo.
22Nee tuu leva ia Paulo i lotomalie o te Aleopasi, o ui: Tagata o Atena, e au sio e malohi age takotou tauhi lotu i te u mea fuli. 23Koteuhi, i taku taka i tokotou kolo, pea mo taku sio ki te u mea fuli e kotou tauhi ki ai, nee au mau foki he aletale e tuu ai te fakailoga aeni: Ki he atua e mole iloi! Ko te mea ae e kotou tauhi ki ai kae e mole koutou iloi, ko ia aeni e au fakaha atu kia koutou. 24Ko te Atua ae nee ina fakatupu te malamanei mo mea fuli i ai, ae ko te Aliki o te lagi mo te kele, e mole pe nofo ia i ni fale tapu nee fau e te u nima o te tagata; 25e mole tauhi ia e te u nima o te tagata, o hage e aoga kia ia he mea, ia ia ae e ina foaki ki te u tagata fuli te mauli, mo te tukumanava, pea mo te u mea fuli. 26Nee ina fakatupu mai he tagata e tahi te u puleaga fuli, pea nee ina fakanofo natou i te fuga katoa o te kele, o ina fakatuutuu kia natou te u temi mo te u tuakoi o onatou nofoaga. 27Nee ina fai te u mea aia koteuhi ke natou kumi te Aliki, pea ke natou faiga ke natou mau ia i te tautaufa, logo ai e mole mamao ia maia tatou takitahi, 28koteuhi ia te ia e tou mau ai te mauli, mo te gaugaue, pea mo te agaaga. Nee fakaha foki te mea aena e ni ihi o akotou tagata poto: Ko tatou ko tona lanu. 29Koia kapau ko tatou ko te lanu o te Atua, e mole tonu ke tou manatu e tatau te natula fakaatua mo te aulo, mo te paaga, pee ko te maka, ae nee ta e te poto mo te fakakaukau a te tagata. 30Kae nee mole fakaaoga e te Atua te u temi ae nee nofo ai te tagata i te fakapouli, kae kua ina fakaha i te temi nei ki te tagata fuli i te u kogamea fuli, e tonu ke natou fakahemala, 31koteuhi kua ina fakatuutuu he aho ae e ina fakamaaui anai te malamanei i te faitotonu, i he tagata ae kua ina filifili, pea kua ina tuku ki te u tagata fuli he fakamooni o uhiga mo ia i tana toe fakatuuake ia mai te kau mate.
32I tanatou logo ki te palalau ki te toe tuuake o te kau mate, nee nukinuki leva ni ihi, kae nee ui leva e ihi: Hoki matou toe logo anai ki ai i he tahi age faiaga. 33Pea nee mavae leva ia Paulo maia natou. 34Kae nee pipiki leva ni ihi kia ia, o natou tui leva: Nee kau i ai Tenisio o te Aleopasi, mo he fafine nee higoa ko Tamalisi, pea mo ni ihi age.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland