Sanghano 24
24
Tertulo viyamdununze Paulo habehi ya Feliki Luwali
1Siku nhano vizibitile, mtambika mkulu Anania kahulumuka hamonga na wavyele wayagwe na mkalangamana imonga twaga jake Tertulo, wamdununze Paulo hameso ga Luwali. 2Viyakemigwe Paulo, Tertulo kasonga kumdununza yolonga, “Gweye Mtawala mtogolwa Feliki, tokala goya nghani hasi ya wimilizi wako, na lukolo lwetu lotendelwa mbuli bwando zinogile zotutaza vuutugesile. 3Ago gose togabokela na kukulavila nhogo mazuwa gose hanhu hose. 4Komu sikunikudonheze kwa ulonzi bwando, nokupula ututegeleze hadodo kwa unhu wako. 5Kilumbo tumona munhu yuno mdiya, msonga magida, kowagaiila nghondo Wayuda wose wali mulumwengu, kabili heyo yuyo mkulu wa didale dija ja Wanazareti. 6Avo viyagezile kutibula mbila za dingʼanda ja Mulungu tumgoga, tulonda kumtagusa muna Inzuma yetu. 7Komu mkulugenzi Lisia kavika kambokonyola mmakono getu, kawalagiza waja wamtaguse weze kumwako. 8Avo gweye mwenyecho kwa kumuuzagiza yuno kogatanga gose gotumtagusa tweye.”
9Baho Wayuda wongezela kumdununza walonga, avo vivo ili.
Paulo kaigombelezela, Feliki kawagimbuza
10Paulo viyafunyizilwa na Luwali yalonge, kedika, “Nivitanga kamba gweye kwa Mulamuzi wa ulukolo luno kulawa miyaka bwando, avo nogangamala kuno nokibelela hakihanga chako. 11Kwa mzoko kovitanga kamba mazuwa ganivikile Yerusalemu kutambika hazinabita mulongo umwe na mbili. 12Kabili wanhu wano vuwaniwene muna dihekalu, nghala silongelele na munhu hebu kudinghula wanhu; wabule mbuli hiyo kunidununza kamba mzingʼanda zawo za nhambiko hebu mdiwambo. 13Vilema hawadaha kusindila ga ihoko gaja gowonhagusa hakihanga chako. 14Komu mbuli imonga noivumila kumwako iyo ino, nzila ya Yesu iwalongaga yokwagiza wanhu, iyo nikoleleza, kuno nomtambikila Mulungu wa tata zetu, nigatogola gose galumbile na Inzuma, na gandikigwe mzindagu za Walaguzi. 15Kabili nomtamanila Mulungu kamba kowazusa wafile wose, wene ihoko na wali bule ihoko, na hewo wodilolela vivo. 16Avo nokiyoha kuwimiliza moyo wangu ungʼale mazuwa gose, uwe bule kinghwaso hameso ga Mulungu na hameso ga wanhu.
17Milongo bwando viibitile, mvika kabili niwagalile wa lukolo lwangu msango wa ugozi, na kulava nhosa. 18Aho vuwaniwene mdihekalu, nikala ningʼazigwe kilumbo cha nhosa zija; hawaniwene nikwegeza wanhu hebu kulava mizangi. Komu kukala na Wayuda wayagwe walawile Asia, 19awo iwandama weze hano, wanisindile hakihanga chako gaja gawawene. 20Hebu wano wali baha, na walonge wenyego ubananzi ulihi uwawene kumwangu, vinimile hana Uluhengo lwao lwa Nhaguso – 21komu longa dija dimonga dimbwatile na dizwi kulu hagatigati yawo, Hano nodununzigwa vino kilumbo vituubeta mzuko wa wafile.”
22Komu luwali Feliki kawagimbuza, kilumbo kagamanya goya mbuli na malangulizo gaja; avo kalonga, “Mkulugenzi Lisia vonda yahulumuke, nogakanha malonga genu.” 23Kamulagiza ija imkulu wa asikali yamwimilize Paulo, yawe na ulegeho, na mbwiga zake sikuwagomeswe kumsanghanila.
24Siku vizibitile, Feliki keza hamonga na sano jake Drusila yakalile Muyuda, katuma munhu kumkema Paulo, kamtegeleza viyopeta mbuli za kumtogola Kristo Yesu, vukuli. 25Komu Paulo viyamzumile mbuli za kupata ihoko kwa Mulungu, na kwinega na dongho, na kukibeta ikitala cha Mulungu chonda kize, Feliki kagwa bwembwe kalonga, “Lawa uchole tanhu, na niye nihapata ulegeho nokukema.” 26Hamonga na higo kawalanga kugwelelwa mhiya na Paulo yamdohole; avo kamkema miyanza bwando yolongelela nayo.
27Miyaka mibili viibitile, Porkio Festo kambokela Feliki hanhu hake, yatawale hechugu chake; na Feliki kalonda kuwanogeza Wayuda, kamuleka Paulo mkifungo.
ទើបបានជ្រើសរើសហើយ៖
Sanghano 24: ZAM75
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.
Sanghano 24
24
Tertulo viyamdununze Paulo habehi ya Feliki Luwali
1Siku nhano vizibitile, mtambika mkulu Anania kahulumuka hamonga na wavyele wayagwe na mkalangamana imonga twaga jake Tertulo, wamdununze Paulo hameso ga Luwali. 2Viyakemigwe Paulo, Tertulo kasonga kumdununza yolonga, “Gweye Mtawala mtogolwa Feliki, tokala goya nghani hasi ya wimilizi wako, na lukolo lwetu lotendelwa mbuli bwando zinogile zotutaza vuutugesile. 3Ago gose togabokela na kukulavila nhogo mazuwa gose hanhu hose. 4Komu sikunikudonheze kwa ulonzi bwando, nokupula ututegeleze hadodo kwa unhu wako. 5Kilumbo tumona munhu yuno mdiya, msonga magida, kowagaiila nghondo Wayuda wose wali mulumwengu, kabili heyo yuyo mkulu wa didale dija ja Wanazareti. 6Avo viyagezile kutibula mbila za dingʼanda ja Mulungu tumgoga, tulonda kumtagusa muna Inzuma yetu. 7Komu mkulugenzi Lisia kavika kambokonyola mmakono getu, kawalagiza waja wamtaguse weze kumwako. 8Avo gweye mwenyecho kwa kumuuzagiza yuno kogatanga gose gotumtagusa tweye.”
9Baho Wayuda wongezela kumdununza walonga, avo vivo ili.
Paulo kaigombelezela, Feliki kawagimbuza
10Paulo viyafunyizilwa na Luwali yalonge, kedika, “Nivitanga kamba gweye kwa Mulamuzi wa ulukolo luno kulawa miyaka bwando, avo nogangamala kuno nokibelela hakihanga chako. 11Kwa mzoko kovitanga kamba mazuwa ganivikile Yerusalemu kutambika hazinabita mulongo umwe na mbili. 12Kabili wanhu wano vuwaniwene muna dihekalu, nghala silongelele na munhu hebu kudinghula wanhu; wabule mbuli hiyo kunidununza kamba mzingʼanda zawo za nhambiko hebu mdiwambo. 13Vilema hawadaha kusindila ga ihoko gaja gowonhagusa hakihanga chako. 14Komu mbuli imonga noivumila kumwako iyo ino, nzila ya Yesu iwalongaga yokwagiza wanhu, iyo nikoleleza, kuno nomtambikila Mulungu wa tata zetu, nigatogola gose galumbile na Inzuma, na gandikigwe mzindagu za Walaguzi. 15Kabili nomtamanila Mulungu kamba kowazusa wafile wose, wene ihoko na wali bule ihoko, na hewo wodilolela vivo. 16Avo nokiyoha kuwimiliza moyo wangu ungʼale mazuwa gose, uwe bule kinghwaso hameso ga Mulungu na hameso ga wanhu.
17Milongo bwando viibitile, mvika kabili niwagalile wa lukolo lwangu msango wa ugozi, na kulava nhosa. 18Aho vuwaniwene mdihekalu, nikala ningʼazigwe kilumbo cha nhosa zija; hawaniwene nikwegeza wanhu hebu kulava mizangi. Komu kukala na Wayuda wayagwe walawile Asia, 19awo iwandama weze hano, wanisindile hakihanga chako gaja gawawene. 20Hebu wano wali baha, na walonge wenyego ubananzi ulihi uwawene kumwangu, vinimile hana Uluhengo lwao lwa Nhaguso – 21komu longa dija dimonga dimbwatile na dizwi kulu hagatigati yawo, Hano nodununzigwa vino kilumbo vituubeta mzuko wa wafile.”
22Komu luwali Feliki kawagimbuza, kilumbo kagamanya goya mbuli na malangulizo gaja; avo kalonga, “Mkulugenzi Lisia vonda yahulumuke, nogakanha malonga genu.” 23Kamulagiza ija imkulu wa asikali yamwimilize Paulo, yawe na ulegeho, na mbwiga zake sikuwagomeswe kumsanghanila.
24Siku vizibitile, Feliki keza hamonga na sano jake Drusila yakalile Muyuda, katuma munhu kumkema Paulo, kamtegeleza viyopeta mbuli za kumtogola Kristo Yesu, vukuli. 25Komu Paulo viyamzumile mbuli za kupata ihoko kwa Mulungu, na kwinega na dongho, na kukibeta ikitala cha Mulungu chonda kize, Feliki kagwa bwembwe kalonga, “Lawa uchole tanhu, na niye nihapata ulegeho nokukema.” 26Hamonga na higo kawalanga kugwelelwa mhiya na Paulo yamdohole; avo kamkema miyanza bwando yolongelela nayo.
27Miyaka mibili viibitile, Porkio Festo kambokela Feliki hanhu hake, yatawale hechugu chake; na Feliki kalonda kuwanogeza Wayuda, kamuleka Paulo mkifungo.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.