रोमी 7
7
ख्रीससकाव साःरो सर्यो
1अ ङानैं ङामेंर, जे मोसाए ओकानुन भरी सैंद जेनै। है जैद आव ङापाँ ब चावस तीच्यो। जो मिताव कानुननी तादी ब नो कानुनए ओहक मासिवा भरी वाज़ लिज़्या। 2किताव रे दाव मेंमा, ओरे ओमासिवा पै कानुन मितावनी ओरेए ओसतत लिन्या ज़ लिज़्या। ओरे उसिकिन वाज़ बल्ल फुर्सुल ताज़्या। 3ओरे लिज़्यावत ज़ नो मेंमा छुतए ल्योदा ओरेस्किन नो मेंमाए जारी य़ेन ओदोव थ॰रिज़्या। खाली ओरे उसिकिन वाज़ नो कानुननी फुर्सुल ताज़्या। हाःकिन छुतस ओरेस्दी ब नोलाई काता खत ज़ माले।
4ङानैं ङामेंर, हो मिताव ज़ गे मनी ङ़ादाकिन मोसाए ओकानुन धूँल गेलिज़्याव। खाली ख्रीसए उमिनत ओलस गेसिउ मिताव ज़ ओतावए नो ङ़ादाकिनकाव मोसाए ओकानुनलाव गेसर्यो भरी फ्या·द अबकिन ते सिउनी सोव ख्रीसस साःरो गेसर्यो ताके। हुनी ज़ परमेस्वरए उयुँलाव मिताव य़ेन ब सयो·धुन्या गेले। 5ङ़ादा माचाव गेय़ेनए उधूँल गेलिज़्याक कानुनलाव ‘मादान्या’ सर्सिउए गेलाई झन मादान्या वाज़ खर॰ चेतैव उपरींसिज़्याव। है जैद सिन्या सजाल गेपरिके। 6आज्याल ते नो सजात गेसिउ मिताव ज़ ओतावए नो कानुनए ओहकनी पुलुस्द गेले। है जैद हाःकिन गे परमेस्वरए ओसेवा कानुननी गेदोज़्याव माःक, गेयुँल लिज़्याव छैंव पुरूसनी ज़ गेदोज़्याव ची।
कानुनए ओय़ेन पापलाई सरैंःद्यान्या
7ङा परमेस्वरए ओकानुन माचाव है ङालिज़्याव ते माःक। कानुन ओमाल्यो ताकिन ‘पाप आव ज़’ लिद कातानी ङासैंरिज़्याव? कानुनल “लोभ दान्या माताए”#प्रस २०:१७; ब्य ५:२१ लिद सर्सिउ ओमाल्यो ताकिन ङा लोभए उमिन ब ङामासैंखेहो। 8खाली नो कानुनलाव ‘तादोच्यो’ लिन्या पाँत ज़ पापए ओमौका हुके। ननी ज़ ङायुँलाव प़ाइँ किसिमलाव लोभ ब सरैंःद्याँक्यो। है जैद कानुनल ‘तादोच्यो’ लिन्या ओमाल्यो ताकिन ङापाप ब मारैंःखेहो। 9ङा ङ़ादा परमेस्वरए ओकानुन ङामासैंद, सन्चस ज़ ङालिज़्याव। हाःत ज़ ओकानुनलाव पाँर ङासैंवत ङापाप भरी रैंःद सिउल ङागनिसिके। 10है जैद नो कानुनलाव बाँचैव परिन्या पाँए ज़ झन ङालाई सिन्याल झाःनाज़्याव लिन्या ङासैंके। 11खास नो ङ़ादाकिनकाव ङादोव पापए ज़ कानुननी पल्तैन्या कर दैद ङालाई झुकैद नो कानुननी ओसैःनाव मिताव ताके।#उत ३:१३ 12हैदी ब परमेस्वरए ओकानुन माचाव माःक, छैंव ज़ लिज़्या। नलाव दान्या य़ेन ब परमेस्वर मिताव छैंव ब लिज़्या, सोजो ब लिज़्या, चाव ब लिज़्या। 13है जैद ङालाई सिन्या सजाल नो चाव पाँए ओझाःनाव ते माःक, ङादोव य़ेनए ज़ ओझाःनाव ची। है जैद ङादोव य़ेनए परमेस्वरए नाः चाव ओकानुननी मनी सिन्याल ओझाःनावए, नो ङाय़ेन ‘पाप ज़’ रैंःके। है जैद परमेस्वरए ओकानुननी पाप भरी झन छे छे ङम्सिउ रैंःज़्या।
मिँराए युँ स़ोनो क्याँ
14नो कानुन भरी परमेस्वरनी हुव, चाव ज़ लिज़्या लिन्या ते गेसैंज़्या। खाली ङा माचाव य़ेन दोज़्याव स़ोनो पापए ओबाँदा ङालिज़्याव ज़ रैंःज़्या। 15निताव ङाय़ेनलाई रँःद ङा मनी बक्क ज़ ङाताज़्या। ङायुँए चाव य़ेन दाव ङापैंदी ब, नो य़ेन मादाद झन ङासोव य़ेनलाई ङादोज़्याव ओल्यो। 16नो ङासोज़्याव माचाव य़ेननी ज़ ‘परमेस्वरए ओकानुन ते चाव ज़ ओल्यो’ लिन्या ङाथ·रैज़्या। 17नो ङादोव य़ेन ङानी ज़ ङाखुसीनी ङादोव माःक, ङायुँलाव पापए ची ओदोज़्याव ओल्यो। 18आव ङाक्याँत चाव काता ज़ माले लिन्या ङासैंज़्या। ङायुँल चाव य़ेन दाव ङापैंदी ब, ङाकुइए ते ङामासयो·धुइ। 19‘चाव य़ेन ङादोया’ है ङालिदी ब, नो य़ेन ज़ मापुलुसे। झन वैंव ङापैंज़्याव य़ेन, हो ज़ पुलुस्ज़्या। 20ङायुँए ओमाभैंःव य़ेन ङादोज़्या ल्यो ताकिन, नो ङानी ङादोज़्याव माःक, ङायुँलाव पापए ची ओदोज़्याव ओल्यो।
21ननी ज़ ङासैंज़्या — ङा चाव य़ेन दाव पैंज़्यावए ङाक्याँत पाप ङास ज़ लिज़्या। 22ङायुँल ते परमेस्वरए ओकानुन चाव ज़ ङम्सिद खुसीस ङाभैंःज़्या। 23खाली ङाखँ कुइए ते ङायुँलाव पाँकिन तँदा ज़ दोज़्याव। है जैद पापए ओसक्तीए ङायुँस लरैं दाद, पाप धूँल ङालाई कैदी जैद माचाव य़ेनदा ज़ लाँनाज़्याव। 24ओहो! ङा इताव पापीलाई सिन्याल झाःज़्याव ङाक्याँनी सुए हाइनावके? 25गेप्रभु येसु ख्रीसनी वाज़ पुलुसो ङादैज़्या। होए उजूँनी परमेस्वरलाई धन्याबाद लिज़्या।
है जैद ङायुँए परमेस्वरए ओकानुनलाव य़ेन दोव ङापैंज़्या, खाली माचाव य़ेन दाज़्याव ङाक्याँए ते पाप दान्यादा वाज़ लाँनाज़्याव।
ទើបបានជ្រើសរើសហើយ៖
रोमी 7: NKham
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, Wycliffe Bible Translators, Inc. All rights reserved.
