ओसाचीर 21
21
पावल यरूसलेमदा ओबाव
1गे नोरास भाःसिद पावलस ऱी जहाजल पसिद एकसब्द्या कोस तापुदा गेबाके। हो पराःती रोदस तापुल गेबाके। नकिन पतारा सहरल केस्द, 2फोनिके खन्ददा बान्या ऱी जहाजलाई दैद होल ज़ गेबाके। 3साइप्रस तापु रैंःन्याक केस्द, तापुकिन दखिनलाव घ्याँ बाद सिरिया खन्द पै सिधा गेबाके। नो जहाजलाव मालसामान हाइन्याए जूँनी तुरोस सहरल ज़ गेथकनिके। 4नलाव यायुँ हुबोरास दैसिनाद नोरास सात दिन गेलिके। नाः भरिल नोराए परमेस्वरए उपुरूसनी पावललाई, “यरूसलेमदा बान्या माःक,” है दाव ज़ यानैज़्याव। 5है यादोज़्यावत ब जहाज बान्या बेला ओतावत गे ननी पुलुस्द फरी गेबाके। नोर खेपा मेंमार याज़ारास ज़ गेलाई सहरनी जहाजक पै सारैसिहुकेर। समुन्द्र छ्योक गेघूँदानी तिकिसिद पोंखारिद, 6प़ाइँलाई जेरो दाद जहाजल गेपसिके। नोर ओल्द याझ़िमदा बाकेर।
7है जैद तुरोसनी तोलेमाइस सहरल बाद नलाव यायुँ हुबोरास दैसिद, तरी नोरास गेलिके। 8नकिन हो पराःती फरी जहाजल बाद कैसरिया सहरल केस्द जहाजतिन हाइसिद नो सात जनारासकाव परमेस्वरए ओपाँ सथैज़्याव फिलिपए उझ़िमक बाद नोस ज़ गेलिके।#ओसा ६:५; ८:५ 9नोए ओज़ार चार जना रे मादोताव मेंमार यालिज़्याव। नोर प़ाइँ परमेस्वरए उपुरूसनी पाँज़्यावर यालिज़्याव।
10फिलिपस गेल्यो स़ोंला चार दिन गेतावत तोबो अगाबस यादोज़्याव अगमबक्ता यहूदिया खन्दनी गेस दैसिहुद, 11पावलए ओवाँःफो बैद ओल ज़ उखँ उकुइर किद, “छैंव पुरूसए है लिज़्या, ‘यरूसलेमलाव यहूदीराए आव वाँःफोए ओर्गेलाई अइ जैद किद, छुत जातलावरालाई सूँपिरिज़्यार,’ ” है लिके।
12नोए ओपाँ थैद, पावललाई, “यरूसलेमदा ताबानी,” है लिद गे स़ोनो नलाव यायुँ हुबोराए है दाव ज़ गेनैके। 13खाली पावलए झन, “जे काता जेजैसिज़्याव इताव, घर्द्याद नदा बान्या ङायुँ केःद जेयाँज़्याव? ङा किसिन्या वाज़ माःक, यरूसलेमल बाद प्रभु येसुए उमिनत सिन्या ब तयार ज़ ङालिज़्या,” है दासिक्यो। 14है जैद गे कै जैद ब गेमासभैंःधुवए, ‘परमेस्वरए उयुँ ज़ ओताक’ लिद च़िम गेदोके।
15हुकिन ते गे भरी झाःसिद यरूसलेमदा बान्या गेथूसिके। 16कैसरियालाव यायुँ हुबोर मनी तोबो ऩेब्लो गेस ज़ बाद यरूसलेमदा मनासोनए उझ़िमक पै लाँसिकेर। नो मिँ साइप्रसनी हुव, ङ़ादाकिन येसुए ओपाँत हुव मिँ ज़ ओल्यो। है जैद नोए ओल्योक गेबासिके।
पावल याकूबस ओदैसिउ
17यरूसलेमलाव यायुँ हुबोराए गेलाई रँःद खुसी ताद चावस ज़ सुम्सिकेर। 18हो पराःती गे पावलस याकूबए ल्योदा गेदैसिनाके। मन्दलीलाव स़ेरर मनी याकूबए ल्योक दुप्सिद यालिज़्याव। 19पावलए नोरालाई जेरो दाद, परमेस्वरए ओय़ेननी ज़ छुत जातलाव मिँरालाई याक्याँताव ओदोव भरी तोबो तोबोनी है दाद यासथैक्यो। 20नो पाँ थैद नोर परमेस्वरए ल्योदा बनै खुसी ताद धन्याबाद चरैःकेर। नकिन पावललाई, “भाइ, यहूदी जातलाव मिँराए मनी हजारका हजारए ज़ येसुए ओपाँत यायुँ हुप्के। खाली नोराए मोसाए ओकानुन ब बनै सघ्योःज़्यार। 21नँ नजूँनी ब थैद नैर। ख्वा ख्वाराए नँलाई, ‘पावलए मोसाए ओपाँकिन तँदा जैसिद छुत देसल लिज़्याव यहूदीरालाई याचलन भरी ऱासो परींद याज़ारालाई मनी ‘क्याल्न्या सरेस जेमाराजैदी ब ताए’ है यादोज़्याव दी,’ है दींज़्यार। 22गे कै लिन्या ओताव? अब ते ‘हुके दी’ लिन्या ब थैन्या लेर। 23है जैद अइ जैव ताके — गेसकाव चार जना मिँराए मोसाए ओकानुन मितावनी किर्या झाःद नैर। 24पुजारीराए ल्योक चोखोइसिद याचेम एन्न्या वाज़ बाँखी लिज़्या। है जैद नँ नोरास बाद यास ज़ चोखोइसिद नलाव खर्च भरी नँ ज़ फो·व ताके। हो ताकिन नो याथैव पाँ भरी ‘माथ॰रिउ ची ओल्यो’ है लिन्या लेर। ‘मोसाए ओकानुन ब ओदोज़्याव ओल्यो’ लिन्या ब सैंन्या लेर।#गन्ती ६:१३-२१ 25खाली छुत जातलाव यायुँ हुबोराए दान्या य़ेन ते आव ज़ थ·रैद सर्द गेनै — अङग्यालाई चरैःसिउ ज़्यावर माज़्यान्या, झी माज़्यान्या, ओधें फर्लेद सैःसिउ स्याकरी माकैन्या, पातर्या पातर्नी ब माजैसिन्या,” है दोकेर।
26है जैद हो पराःती पावलए नो चार जना मिँरालाई ध्यान झ़िमक लाँद नोरास चोखोइसिद, ‘सात दिनत किर्या खेम्द मार ब चरैःन्या गेले’ लिद भकल दोकेर।
पावललाई याक्योःव
27नो सात दिन ओयो·नावत एसिया खन्दनी हुव यहूदीराए पावललाई ध्यान झ़िमल रँःद नकाव मिँरालाई मचैद, पावललाई क्योःद, 28“अ इस्राएली गेदाज्यु भाइर, चाँदो हुचिके। आकाव मिँए संसार भरी दुलिद गेजातलाई सज़िम्द, मोसाए ओकानुनलाव पाँलाई ख्याद, ध्यान झ़िमए उमिन ब बले·द्यासिज़्याव। झन ग्रीक मिँरालाई ध्यान झ़िमल रैद चोखो गेपो ब छुद्यासिक्यो,” है दाद यारामचैकेर। 29नोर ङ़ादा सहरल त्रोफिमस यादोज़्याव एफिससलाव मिँलाई पावलस यारँःवए, ‘ध्यान झ़िमल मनी रैद नैज़्याखेहो’ लिन्या यासम्जिज़्याव।
30है जैद सहरलाव मिँर बनै ज़ मचिद प़ाइँनी ज़ धोंःहुद, पावललाई क्योःद, ध्यान झ़िमनी स़ेल्द, य़ामर गल्केर। 31नोलाई सैःव यापैंज़्याक ज़ नकाव रोमी सेनापतीए ‘यरूसलेम भरी बनै खैलानी बैला ताके दी’ लिन्या थैद, 32हतप्त ज़ सिपाईंर स़ोनो कप्तानरालाई लाँद नो मचिज़्यावराए ल्योदा धोंःनाकेर। नो माहोल्याराए नोर याहुज़्याव रँःद पावललाई प़ोन्या च़िम दोकेर।
33हाःत ज़ नो सेनापतीए पावललाई क्योःद ऩेब्लो साँगलए किव परींद, माहोल्यारालाई, ‘आव मिँ सु ओताव, काता य़ेन ओदोव?’ है लिद ओरासुधिक ते, 34ख्वाराए ‘आव ज़’, ख्वाराए ‘हो ज़’ लिद बनै राउँनी झ्याउँ लिकेर। सुए यापाँ ब ओमाथ·रैधुवए उसिपाईंरालाई पावललाई थानाक लाँव यापरींक्यो। 35थानालाव थप्काक याकेसोत माहोल्यार यारिसए बनै ज़ याछुइसिहुवए सिपाईंराए पावललाई छींद लाँकेर। 36नो माहोल्यार थानाक पै याछीं याछीं ज़ हुद, “आवलाई खदम ज़ ख्यान्या,” है लिद बनै ज़ क़िकेर।
माहोल्यारालाई पावलए जवाप ओरायो
37हाःत ज़ पावललाई थानाल लाँव यापैंज़्याक, पावलए सेनापतीलाई, “ङा नँस तोबो पाँव ङादैक,” है ओदोक ते, नो सेनापतीए, “नँ ग्रीक पाँ कातानी नसैंव? 38ङा ते नँलाई छुत ची है ङाल्यो। नँ नो तालाङाव सरकारकिन तँदा जैसिद चार हजार गुन्दारालाई मचैज़्याव इजिपी माःक रो?” है ओदोक ते, 39पावलए, “ङा हो माःक। ङा ते किलिकियालाव तार्सस सहरल जर्मिउ यहूदी ची। नो पो बनै उमिन थासो, छ्याल्ल्यु सहर ब माःक। नँस ङाबिन्ती तोबो लिज़्या — आव माहोल्यारास तखेप पाँव ङादैक,” है ओदोक ते, 40नो सेनापतीए पावललाई भैंःदिक्यो।
पावल थप्कात च्याँःसिद, ‘च़िम दोचिके’ लिद उकुइए सान दाद याएक्यो। प़ाइँ च़िम यादोवत पावलए हिब्रू खामनी अइ लिद पाँके,
ទើបបានជ្រើសរើសហើយ៖
ओसाचीर 21: NKham
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, Wycliffe Bible Translators, Inc. All rights reserved.
