2 Akolinto 3
3
Atumilwe ba Lilagano lyayambi'
1Buli, tutumbwa kai' kwilumba kasinu? Lili, twenga tubileli kati bi'ngi' babannetya balua yo pala mwatange, au bantange. 2Mwenga mwabene nga mwabalua yitu yo tanganikwa, yaiandikilwe mumyoyo yitu kila mundu aibone na kwisoma. 3Ibonekana mpu'la panga mwenga mwa balua yaiandikilwe na Kilisitu no tumilwa kwo pi'tya utumisi witu. Balua yi' iandikilweli na bwino, ila kwa Loo wa Nnu'ngu' mwene ukoto, na iandikilweli panani ya maliwe, ila mumyoyo ya bandu.
4Tuwesa baya go kwa ukangamau wa Nnu'ngu' kwa ndi'la ya Kilisitu. 5Kwenda twenga tuwesa panga sosoti kwa makakala gitu twabene lili, ila uweso witu woti ubu'ka kwa Nnu'ngu'. 6Kwa mwanjaa ywembe ngatupei makakala go, li'nga tube twatumisi bake ba lilagano lyayambi'. Lilagano lyo lya salya yaiandikilweli, ila libu'ka kwa Loo. Salya yaiandikilwe ileta kiwo, ila Loo aleta ukoto.
7Pamope no panga salya yayaandikilwe mumaliwe iletage kiwo, yaaisi kwa utukupu wo ng'alang'atya, mpaka Baisilaili baakombwili lingulya kuminyo ya Musa. Baasindwi kunningulya, kwa mwanjaa kuminyo yake kwaating'alang'atya pamope no panga ng'alang'atya kwake kwasi'yiteli yomoka. 8Kwa nyo, lyengo lya lilagano lyayambi' lyaliisa kwa Loo libile na utukupu pi'ta. 9Pano nilombolya panga, ndi'la ya kwai'mbu' ya kuntumikia Nnu'ngu' yaabi'i bandu musambi na kwapeya ukumu, lakini yaabile na utukupu. Kwa nyo, ndi'la yayambi' yaileta aki ibile na utukupu nku'lu' pi'ta. 10Tuwesa baya panga, wu'lu' utukupu waung'alang'atyage kwai'mbu', uwesali landana na utukupu wa nambi'yambi' waubile nku'lu' pi'ta. 11Manaitei si'lu' sasaakotwike konda saabile na utukupu, asi' sakikonda milele kibile na utukupu pi'ta.
12Kwa mwanjaa, ali' nga lyatuliu'bi'lya, twenga twatulongela kwo kangamala. 13Twenga tupangali kati Musa ywawi'ki'li kitambala kuminyo li'nga Baisilaili kanebakubone ku'lu' ng'alang'atya kwakuimika. 14Lakini malango gabe gaai matopau kwo tanga. Ata mpaka nambi'yambi', Baisilaili pabasoma muitabu ya lilagano lya kwai'mbu', malango gabe gawi'ki'li'lwa na kitambala si'si'lu'si'lu'. Kitambala so saabu'yi'lwa kwa mundu ywalu'mbana na Kilisitu bai. 15Eloo, mpaka li'no kila pabasoma salya ya Musa, malango gabe gapanga gawi'ki'lilwe. 16Lakini palu' bai mundu panng'alambukya Bwana, kitambala si'lu' sendabu'yi'lwa. 17Pano, Bwana nga Loo, na palu' paabile Loo wa Bwana nga paubile uulu.
18Bai, twenga twangali wi'ki'lya kuminyo yitu na kitambala, tulaya utukupu wa Bwana kati mu'lu' mwatulola mukilolo. Na twenga twendagalambuyilwa li'nga tulandane nakwe bu'ka muutukupu mpaka kuutukupu nku'lu' muno. Bwana nga Loo, ngaywapanga lyengo lyo.
ទើបបានជ្រើសរើសហើយ៖
2 Akolinto 3: Matumbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Pioneer Bible Translators