looma 10
10
1maanat'ohaesa, la'u a'ʉmtʉ cuveu ci 'tohʉngʉ ho tata'za ta 'tohʉngʉ'u hoci meelʉ noa to'usni 'e 'oahngʉ'u ci 'isolaelu, yaeza nomzi 'emo maica ci hi'hioa ho o'te tosveni eoho'neni to hamo! 2te'o peelʉi soomei ho lahin'i a'ʉmtʉ cuveu ci 'tohʉngʉ ho mi'usnu to hamo, at'inghi 'e cuveu ci 'tohʉngʉhe. ma'imo i'tohungu no a'ʉmtʉ mau'to'tohʉngʉ. 3o'aihe asansana na moulʉlʉ to hamo. mici iachi biebimi no tehe ceonʉ, ho o'te meo'uzo to moulʉlʉ to hamo. 4a'ʉmtʉsi, isicu aepʉnga to kilisto 'o hoolicu, poacu coumoʉlʉlʉ 'omo afu'u tmaa'uzo ci cou.
faeni ta yatatiskova 'e mengumi no to'usnu
5e'usna tola boemi no meot'ʉcʉ to hoolicu ho elʉ no coumoʉlʉlʉ, moso maica 'o nia hia tmopsʉ to moose: <'omo meot'ʉcʉ to mashʉyʉ to hoolicu ci cou te i'mi to hoolicu ho yaansoua.> 6at'inghi, na hi'hioa no i'mi no tmaa'uzo ho meelʉ coumoʉlʉlʉ, mo maica 'o e'e to seiso: <'ote invonvo tuocosʉ: siya nate uhne pepe? (tee yaeza yainca. usa ho hafa ohpueho 'o kilisto.) 7yaeza teav'a tuocosi: siya nete uhne vooecʉvcana? (te yaeza yainca, i'mi to mcoi ho e'eafi 'o kilisto.) > 8na e'a'ausna ta maee'e tan'e zou: <'o e'e to hamo o'anamo nomcovhi suu, micu yonta ngayosu, yonta 'tohʉngʉsu.> hoci eezuha, ci'amoeno no'ayumonʉ ta imza epeaska cimo e'usnu no tmaa'uzo ci e'e. 9hociko esansana ta ngayosu 'o iesu ho zou nooe'oca, taa'uzva ta 'tohʉngʉ 'o hamo ho isi i'mi to mcoi 'o iesu ho poa smoevovei, mikocu elʉ no to'usnu. 10hoci maica nate hia tmaa'uzo ta 'tohʉngʉ, tec'u coumoʉlʉlʉ, maica nate hia esansano ta ngayo, tec'u to'usni. 11yainca to seiso: <inate tmaa'uzo to iesu ci cou o'ate ma'papayo'ʉ.> 12'e e'e eni mo mi'usnu ta acʉcʉhʉ ci cou, maica o'a isi ah'una na couyutaya ho couyafana; 'o hamo zou nooe'oca ta yatatiskova, tesi at'otngasa ho fii no ʉm'ʉmnʉ namo afu'u eyoho'ʉ ci cou. 13aʉlʉ mais'a 'o isi yainca to seiso: <namo afu'u eyoho'ʉ to ongko to nooe'oca ci cou 'ate ahtao'te to'usni.>
14at'inghi, ho o'aihe taa'uzva, te mainenu hoci eyoho'ʉ to hamo? ho o'amo tmalʉ, te mainenu hoci tmaa'uzo? ho o'aisi psoyaska, te mainenu nate hia tmalʉ? 15hoci o'te popeosmuhnu, teeno meelʉ psoyaski? aʉlʉ mais'a to isi yainca to seiso: <i'omo psoyaski to fukuin ci cou. a'ʉmtʉs'a yonghu 'o cocaphʉhe!> 16at'inghi. o'amos'a acʉhʉ tiou to fukuin 'e cou. ohsila yainca to 'izaya: <nooe'oca. siya nate tmaa'uzo ta imza psoyaska ci e'e?> 17peelʉi aiti tan'e na tmaa'uzo mo i'mi no tmalʉ, na tmalʉ mo i'mi no e'e to kilisto.
18at'inghi te'o tuocosi: ihenana a'ʉmta o'temocu tac'ʉhi na e'e? ci'a ohecueno talʉi. aʉlʉ mais'a 'o isi yainca to seiso:
'o fihngauhe micu psoengabo ta yatatiskova;
'o e'ehe micu psoecʉ'ho ta mauhpuhpusu.
19te'o i'vaha tuocosi: ihenana a'ʉmta o'te cohivi ta cou'isolaelu? ahoisi, 'o moose ohsila titheni to e'e to hamo ho yut'inga eni:
te'o boemi to <o'aisi tamza no 'o'oko'u> ci oko ho poa smo'eubut'u muu,
boemi tomo nongonongo ci hpʉhpʉngʉ ho asʉsʉ'nova muu.
20mo asuhcu emeoisi 'o 'izaya ho yainca:
te'o poa elʉ a'o 'o o'a mosola biebimi a'o,
aopa'to to o'amosola eyoho'ʉ a'o ci cou.
21at'inghi e'usna ta cou'isolaelu, isi yainca:
la'u conino ho'usneni 'e emucu'u,
mici mi'usnu tomo yutasufku ho 'ʉteʉ ci cou ho enanaovei.
ទើបបានជ្រើសរើសហើយ៖
looma 10: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014
