sitoo 26

26
mi'usnu to 'acipa 'o poolo ho iachi eto'usnu
1isi mi'usni to 'acipa 'o poolo ho yaica: <te'o teomneni hociko iachi eto'usnu.>
isicu hoʉsʉzneni to poolo 'o emucusi hocu iachi eto'usnu:
2<honte ci 'acipa, maitan'e mi'ocu petohʉyʉ meelʉ yonta tuhcusu, nomio ta ihe ehpʉngneni ta couyutaya ci acʉcʉhʉ ci hi'hioa ho iachi eto'usnu, os'o yainca no koyu'u mio abohtʉ ci hioa! 3asuhcun'a ʉmnʉ. osko na'na co'cohivi 'e h'ofiha ho i'ola hia yupa eehcʉvha ta couyutaya. ko'koeno, os'o tata'ia hociko uveica talʉi 'e te'o hia ebkocʉ.
4<ahoi ne mo'un'a oko ac'ʉhʉ maitan'e mi'o mainenu ci cou, uk'a cimo o'te bochio ta couyutaya, ahoi ne mo'ucu yayo mi'o yaansou ta iachi'u hpʉhpʉngʉ. amiocni ne 'elusalemu. 5hocihin'i mimha 'akasi a'o, ihin'i cohivi ahoi to ahoisi mi'o tma'usnu to mo atva'esi eyʉyʉcʉ ta siukiomza ci falisai. 6maitan'e ho mi'o yontan'e ho noa yʉsvʉta, mo maica ho os'o mingeovi 'o ohsila mi'usneni no nia maameoimza to hamo ho teomneni ci hioa. 7'e teomneni eni 'aeno 'o lamza toehunga huhucmasa totea tamimza maskʉueso no suezopʉ ho 'ucia toc'ʉha ho lamza m'ohkuyu to hamo. honte, mo aʉlʉ i'mi ta lamza mingeovi tan'e, ko'ko ihin'i ehpʉngneni ta couyutaya a'o! 8at'inghi. na muu couyutaya maincis'a o'te taa'uzva hocisi peelʉi poa smoevovei to hamo na micu mcoi ci cou?
9<ne auyusi o'u yaeza yainca no koyu'u nte pnanfi na tonʉ ho yutasufka 'o iesu ne nazalo. 10ne mo'un'a yone 'elusalemu 'amohcueno maica 'o nia hioa'u. mo'u noa tonʉ to saisicoo, tʉtpʉta 'omoso 'enepio ci sinto ho poekotva; o'amo anou maica, botngonʉ 'o isi yʉsvʉta ho poa mcoia. os'o yaeza ʉm'ʉmnʉa. 11to mocmosi, mo'u yonto makakaitoo ho siho ti'usnu, 'ahʉhʉya poa teongasneni 'o singkoohe. os'o kuici sʉ'nova 'o sinto, ac'ʉhʉ no sʉc'ʉhʉ to hosa to mocmo ci hpʉhpʉngʉ ho akuzkuzoa.>
etoyangza to poolo na nia hiasi ma'hi'usnu to nooe'oca
(sitoo 9:1-19; 22:6-16)
12<moso i'nʉskʉ, hafa 'o isi faeni a'o to saisi ci tonʉ ho i'o pashʉyasi ho emo'usnu ne tamasuko. 13honte, asonʉ a'usnu no cohzona, mi'on'a mine ceonʉ, baito to psoetiskou ci tiskova, mo na'nohe taso to tiskova to hie, i'mi ne pepe ho psoetikovi a'o ho ito aukukuyungu to mimza nʉthʉ. 14mimza acʉhʉ e'puyu ta ceoa. os'o talʉi 'o mo conci fihngau, mo buahevulu ho yainca: <<saulo, saulo! mainci akuzkuzoa a'o? miko mais'a 'uachumu ho po'poti 'o isi skomaenva ci evi to taukesi, apuya alolonga 'e iachi.>> 15os'ocu tuocosi: <<nooe'oca, zou siya suu?>> yainca to nooe'oca: <<'ai'o oskoeno akuzkuzoa ci iesu. 16yʉc'ʉ, ho yac'ʉ. ho mi'o aopa'to suu, te'o asvʉta no soskuskunu na suu. teko 'akasi 'e osko aiti maitan'e ci mo yaa natʉ'ca a'o ho i'o te'o poa hioaneni ho noana'o. 17te'o i'mi ta emucu ta 'isolaelu ho couyafana ho to'usni suu, ta'ucu popeoskuna ho poa uhta 'ayumonahe. 18teko paavi 'o mcoohe, poa i'mi no voecʉvcʉ ho miezuhu no tiskova, momeesih'i no tonʉ to satan ho miezuhu to hamo, ko'ko meelʉ i'mi homo tmaa'uzo a'o ho noa peteongasa na kuisihe, a'vinano yaa ca'hʉa to 'ayumona to 'o'oko to hamo.>> >
etotoyangza to poolo na lasi hioa
19<ko'koeno, honte ci 'acipa, o'ami'o yuszozʉ no mo i'mi ne pepe ci mavolosi. 20mi'o auyun'a yone tamasuko ho ine 'elusalemu, mo'ucu nongabo ta yutaya ho ito 'ayumona to couyafana ho eucucufnu to cou poa asansano ma'vovei, miezuhu to hamo, inala peipeis'ausna la poa yupa toseolʉ na ma'vovei ci 'tohʉngʉ. 21'amoeno nomio tan'e, ne mi'o seolʉano yonto seiten, ihecu tʉtpʉta ta couyutaya ho 'ucia opcoza. 22at'inghi, ac'ʉhʉ maitan'e, noa to'usni to hamo ho meelʉ yac'ʉ tan'e, mi'usnu tamo suepe ho suaceaco ci cou ho 'akasi, i'o os'o engha 'ai'oeno 'o ohela engha to eyongensa ho ito moose ci te esmi ci hi'hioa, 23'aeno 'o kilisto te ahtuo'te noa akuzkuzoa, a'vinano te ahoi i'mi to mcoi ho smoevovei, mi'usnu ta couyutaya ho ita couyafana ho psoecʉ'hi micu esmi 'e tiskova no to'usnu.>
24homo maica ci hia iachia ebkocʉ to poolo; mo tmunoi 'o fuisutu ho yainca: <poolo, mikocu eʉngcʉ; co hiasu motposʉ isicu poa ma'pepecvai suu!>
25yainca to poolo: <koe'ia ci fuisutu! o'ami'o eʉngcʉ; 'e os'o engha mo acʉhʉ mou'ʉmtʉ ci e'e. 26osko yaeza cohivi honte 'e a'a'ausnasi, ko'ko mi'oeno mi'usnu suu ho aʉ'ʉteʉ ho esngʉsngʉcʉ; os'o taa'uzva iko huacni na eni. maica na 'e hi'hioa eni, ihe toehunga cohivi ta cou. 27honte ci 'acipa, osko taa'uzva 'o eyongensa? os'o cohivi ho osko taa'uzva!>
28mi'usni to 'acipa 'o poolo ho yainca: <oskon'asi yainca no koyusu tekoc'o matpopzohʉ nianteko cu ev'ov'ohi a'o ho poa kilistoto?>
29yut'inga to poolo: <'upena hoci'u ekakutia ho eman'i, 'e os'o eoho'neni to hamo. 'aeno suu ho i'e mo afu'u yontan'e ho tmalʉ ta e'e'u ci cou te acʉhʉ totiski a'o, at'inghi o'ate 'ahʉyʉ maezo a'o ho mahafo ta ekʉka!>
30micu acʉhʉ yac'ʉ 'o honte, sootoku, peinisu. ho i'o mocmo ci cou. 31ne micu emose'u, yupa mimi'usnu ho mainca: <'e cou eni. ma'imo yuszozʉ ho peismi nonte koa mcoi ho koa poekotva ci kuisi.> 32mi'usnu to fuisutu 'o 'acipa ho yainca: <hoci o'amo'so mici ec'ʉhʉ to ateuyunu honte 'e cou eni, niantec'u noana'va poesih'a.>

ទើបបានជ្រើសរើសហើយ៖

sitoo 26: bsnfe

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល